Gwa̰ ya Dok ta
Sofar
1 Sofar, ndu ge suwal Naama ne he fare, jan go:
2 Fare janna ge gḛ ceɗed mbe ma no,
a ge ndu gwan dol fare nama pal to’a?
Da ne ka̰l jan fare kwaɗa ta ɗo, mo ba kat dosol ɗaa?
3 Mo fare kareya mbe ma no da ne pool dibi naa wak ɗaa?
Mo da ne pool cot tene ne naa be ge mo ɓol mḛreya to ɗaa?
4 Mo jan go: «Mbi hateya ma yaɗat,
mbi mbegeya na ndwara se.»
5 Te go Dok ba he fare janna,
te go na ba hage na wak jan mo fare,
6 te go na ba jan mo fare ɗimil ge na ne koy na ne tene pe,
na fare kwarra ge ndu ne day wan na pe to,
mo te ya kwa go, Dok ya̰ sone ge mo ne ma ya go be isiya.
7 Mo da ne pool kwa dwatɗa ge ɗugul ge Dok ne ɗaa?
Mo da ne pool wan Bage pool pe go hatal ɗaa?
8 A haal waɗe pḭr digi ya, mo ke ma̰ gyana ɗaa?
A ɗugul waɗe táál ge siya ma ne, mo kwa na ma̰ gyana ɗaa?
9 A twala waɗe suwar,
a fiyal waɗe maŋgaɗam ga̰l yuwam pul.
10 Kadɗa wan ndu ya, dibi daŋgay zi,
kaŋge na swaga sarya go, a wuɗi ɗaŋgre na ma̰ ne ɗaa?
11 Na sḛ kwa naa ge hale ma kwa,
twat ya̰l pe avun tetek be ge hon yál.
12 Ɗalla ge ndu dasana ne digi kakaw baŋ,
tolla ge ndu dasana ne go, a dimma ne kwara ge ful zi ge go baŋ.
13 Mo ɗe, kadɗa mo wan mo dulwak ya,
mo tyare mo tok ma Dok pe digi ke kaɗeya,
14 kadɗa mo ya̰ ya̰l ya be kerra,
mo ya̰ sone kat mo diŋ to,
15 Go no, mo mbo hé mo pala digi be saaso,
mo mbo mḛ jwap, mo mbo sya a̰me vo to.
16 Mo mbo vyale mo yál ma,
Mo mbo gá dwat nama dimma ne mam ne sore uzi ya go.
17 Mo swaga katɗa mbo hat kwaya̰l paɗak dimma ne gyala go,
tṵ mbo saŋge dimma ne kwaya̰l go me.
18 Mo mbo kat ne jobreya, ago saareya ya go,
swaga ge mo ne ndil mo ziyar, mo mbo fí dam halas.
19 Ndu a̰me mbo da̰a̰me mo, mo swaga fiya se to,
naa gḛ a mbo ka mbo ɓyare mbarra ne mo ta.
20 Amma naa ge sone ma mbo ban uzi,
a mbo ɓol swaga woy ta to,
jobreya ge nama ne mbo borwe uzi.
© La Bible en langue Kim © Alliance Biblique du Tchad, 2013.
