Elkana ne za yaŋ ah yaŋ Silo
1 Dǝɓ ki no yaŋ Rama, a tǝ waa Efraim, a ɗii ne Elkana. Ako ye we Jeroham, we Elihu, we Tohu, we Zuf, dǝɓ sǝr Efraim yo. 2 A ne ŋwǝǝ gwa. Vaŋno ah ɗii ne Anna, maki ah ɗii ne Peninna. Peninna a no ne weere, amma Anna ka ne wee ya. 3 Syii daŋ dǝɓ ah ur gin yaŋ ah ka ga juupel tǝkine joŋ syiŋ wo Dǝɓlii ma ne swah daŋ yaŋ Silo. Wee Eli matǝ gwa, Hofni ne Fineas, ara gŋ. Ara ye za joŋzahsyiŋ pel Dǝɓlii. 4 Zah'nan mai Elkana moo joŋ syiŋ ne mo ge o, wom nǝǝ joŋ syiŋ ah nyi mawin ah Peninna ne wee ah mawǝǝ ne maŋwǝǝ tǝgbana moo joŋko ɓaa. 5 Amma nyi nyi Anna zahlǝŋ gwa, mor a 'yah ko pǝlli. Amma Dǝɓlii cwãh zah byaŋ Anna ɓo. 6 So makǝ'el ah a lah ko ka mo ɓaŋko kpãhe, mor Dǝɓlii cwãh zah byaŋ ah ɓo. 7 Syii daŋ a joŋ naiko, ne cok Anna mo tǝ ga juupel wo Dǝɓlii ɓe, Peninna yea ma ne lah ko. Mor ah Anna yea ma ne yee, ka ren fan a. 8 So wor ah Elkana a faa nyi ko: Anna, mo yeyee, mo ka ren fan a mor fẽene? Mo swaa ɓǝ mor fẽene? Me kal wee wǝǝ jemma wo ɓo ya ne?
Anna ne Eli
9 Comki fahfal mo rera farel tǝkine zwan fan yaŋ Dǝɓlii yaŋ Silo, Anna urri, ka pa joŋzahsyiŋ Eli kaa ɓo gŋ tǝ fakal kah zahfahe. 10 Anna ne ɓǝ swaa pǝ zahzyil ahe, juupel wo Dǝɓlii so yeyee pǝlli. 11 Anna haa zah pel Dǝɓlii faa: Dǝɓlii ma ne swah daŋ, mo kwo syak tǝ mabyak ɓo, mo foo ɓǝ ɓe ɓe, mo yaŋ mabyak ɓo ya, mo nyi we wor nyi ko ɓe, so me ga nyi wel ah nyi Dǝɓlii zah'nan cee ah daŋ. Nyahswãh ka kan ga tǝl ah ya.
12 Ne cok Anna mo juupel wo Dǝɓlii liilii, Eli ẽe tǝkpuuzah ahe. 13 Amma Anna a faa ɓǝ pǝ zahzyilli, sai tǝkpuuzah ah yee laŋ to, dǝɓ ka laa kyaŋ ah ya. Eli kwo tǝgbana yim tǝ tǝǝ ko. 14 So Eli faa nyi ko: Yim ah tǝǝ mo ɓo ɗii ne? Yim ɓo mo ge tǝǝ mo cok ki. 15 Anna zyii faa: Ka nai ya dǝɓlii ɓe, ame mawin ma ne ɓǝ swaa pǝ zahzyilli, me zwǝ yim ya, me zwǝ fan maki ah ma nen tǝǝ ne laŋ ya ta. Amma me ge ɓo pel Dǝɓlii ne ɓǝ ma zahzyil ɓe. 16 Mo lii mabyak ɓo ne mawin ɓe' ka. Mor ŋhaa zǝzǝ̃ǝko me tǝ faa ɓǝ bone ne ɓǝ swaa ma pǝ zahzyil ɓe. 17 So Eli zyii zah ah faa: Mo ge jam o, Masǝŋ Israel mo nyiko fan mai mo fii nyi mo. 18 Anna faa: Mo soɓ mabyak ɓo lwaa ɓǝ 'nyah wo ɓo. So mawin ur ɓaŋ fahlii kalle, ge re farelle. Zahpel ah ka tǝgbana matãa mo yea yao.
Ɓǝ byaŋ Samuel ne ɓǝ soɓ ko nyi Dǝɓlii
19 Pǝ̃ǝra ne zah'nan pim Elkana ne za yaŋ ah juura pel wo Dǝɓlii. So kalra fah yaŋ ɓǝǝ Rama. Elkana kaa ne mawin ah Anna, so Dǝɓlii foo ɓǝ ahe. 20 Anna gbǝ ɓil ne syii moo, byaŋ we worre. Ɗii ko ne Samuel, mor faako: Me fii ko jol Dǝɓlii.
21 Comki Elkana ur ne za yaŋ ah daŋ mor ka joŋ syiŋ mai moo joŋra syii daŋ wo Dǝɓlii, ka baa ɓǝ gbanzah ahe. 22 Amma Anna ge ya, faa nyi wor ahe: Me ka gan a, sai ka we soɓ won ɓe, me ga ne ki ka me ge cuu ko pel Dǝɓlii, ka me soɓ ko kaa gŋ ŋhaa ga lii. 23 Wor ah Elkana faa nyi ko: Mo joŋ tǝgbana zahzyil ɓo mo 'yahe. Mo kaa ka wel ah mo soɓ won ɗao, mor ka Dǝɓlii mo joŋko ɓǝ faa zah ahe. So mawin kaa ŋhaa nan ah soɓ wonni.
24 Ne cok Anna mo yee zah nan ah tǝ wonni, so ɓaŋ ko mor jolle, gbǝ ŋgǝǝri ma joŋ syii tǝ sai, ne sum tahsah jemma, tǝkine bii lee kpuu vin dah bii vaŋno ge yaŋ Dǝɓlii ne ko Silo, ka wel ah pǝlaŋ ba. 25 Ŋgoŋra ŋgǝǝri, zaŋra wee ge wo Eli ne ko. 26 Anna faa: Eli dǝɓlii ɓe, mo tǝ me ɓe ne? Ame mawin mai me uu kah ɓo nyee juupel wo Dǝɓlii kŋ. 27 Me juupel mor wee ko, Dǝɓlii laa fii ɓe me fii ko ɓe. 28 Mor ah me nyi ko ɓo nyi Dǝɓlii.
So juura pel wo Dǝɓlii pǝ cok ahe.
Elkana ne za yaŋ ah yaŋ Silo
1 Dǝɓ ki no yaŋ Rama, a tǝ waa Efraim, a ɗii ne Elkana. Ako ye we Jeroham, we Elihu, we Tohu, we Zuf, dǝɓ sǝr Efraim yo. 2 A ne ŋwǝǝ gwa. Vaŋno ah ɗii ne Anna, maki ah ɗii ne Peninna. Peninna a no ne weere, amma Anna ka ne wee ya. 3 Syii daŋ dǝɓ ah ur gin yaŋ ah ka ga juupel tǝkine joŋ syiŋ wo Dǝɓlii ma ne swah daŋ yaŋ Silo. Wee Eli matǝ gwa, Hofni ne Fineas, ara gŋ. Ara ye za joŋzahsyiŋ pel Dǝɓlii. 4 Zah'nan mai Elkana moo joŋ syiŋ ne mo ge o, wom nǝǝ joŋ syiŋ ah nyi mawin ah Peninna ne wee ah mawǝǝ ne maŋwǝǝ tǝgbana moo joŋko ɓaa. 5 Amma nyi nyi Anna zahlǝŋ gwa, mor a 'yah ko pǝlli. Amma Dǝɓlii cwãh zah byaŋ Anna ɓo. 6 So makǝ'el ah a lah ko ka mo ɓaŋko kpãhe, mor Dǝɓlii cwãh zah byaŋ ah ɓo. 7 Syii daŋ a joŋ naiko, ne cok Anna mo tǝ ga juupel wo Dǝɓlii ɓe, Peninna yea ma ne lah ko. Mor ah Anna yea ma ne yee, ka ren fan a. 8 So wor ah Elkana a faa nyi ko: Anna, mo yeyee, mo ka ren fan a mor fẽene? Mo swaa ɓǝ mor fẽene? Me kal wee wǝǝ jemma wo ɓo ya ne?
Anna ne Eli
9 Comki fahfal mo rera farel tǝkine zwan fan yaŋ Dǝɓlii yaŋ Silo, Anna urri, ka pa joŋzahsyiŋ Eli kaa ɓo gŋ tǝ fakal kah zahfahe. 10 Anna ne ɓǝ swaa pǝ zahzyil ahe, juupel wo Dǝɓlii so yeyee pǝlli. 11 Anna haa zah pel Dǝɓlii faa: Dǝɓlii ma ne swah daŋ, mo kwo syak tǝ mabyak ɓo, mo foo ɓǝ ɓe ɓe, mo yaŋ mabyak ɓo ya, mo nyi we wor nyi ko ɓe, so me ga nyi wel ah nyi Dǝɓlii zah'nan cee ah daŋ. Nyahswãh ka kan ga tǝl ah ya.
12 Ne cok Anna mo juupel wo Dǝɓlii liilii, Eli ẽe tǝkpuuzah ahe. 13 Amma Anna a faa ɓǝ pǝ zahzyilli, sai tǝkpuuzah ah yee laŋ to, dǝɓ ka laa kyaŋ ah ya. Eli kwo tǝgbana yim tǝ tǝǝ ko. 14 So Eli faa nyi ko: Yim ah tǝǝ mo ɓo ɗii ne? Yim ɓo mo ge tǝǝ mo cok ki. 15 Anna zyii faa: Ka nai ya dǝɓlii ɓe, ame mawin ma ne ɓǝ swaa pǝ zahzyilli, me zwǝ yim ya, me zwǝ fan maki ah ma nen tǝǝ ne laŋ ya ta. Amma me ge ɓo pel Dǝɓlii ne ɓǝ ma zahzyil ɓe. 16 Mo lii mabyak ɓo ne mawin ɓe' ka. Mor ŋhaa zǝzǝ̃ǝko me tǝ faa ɓǝ bone ne ɓǝ swaa ma pǝ zahzyil ɓe. 17 So Eli zyii zah ah faa: Mo ge jam o, Masǝŋ Israel mo nyiko fan mai mo fii nyi mo. 18 Anna faa: Mo soɓ mabyak ɓo lwaa ɓǝ 'nyah wo ɓo. So mawin ur ɓaŋ fahlii kalle, ge re farelle. Zahpel ah ka tǝgbana matãa mo yea yao.
Ɓǝ byaŋ Samuel ne ɓǝ soɓ ko nyi Dǝɓlii
19 Pǝ̃ǝra ne zah'nan pim Elkana ne za yaŋ ah juura pel wo Dǝɓlii. So kalra fah yaŋ ɓǝǝ Rama. Elkana kaa ne mawin ah Anna, so Dǝɓlii foo ɓǝ ahe. 20 Anna gbǝ ɓil ne syii moo, byaŋ we worre. Ɗii ko ne Samuel, mor faako: Me fii ko jol Dǝɓlii.
21 Comki Elkana ur ne za yaŋ ah daŋ mor ka joŋ syiŋ mai moo joŋra syii daŋ wo Dǝɓlii, ka baa ɓǝ gbanzah ahe. 22 Amma Anna ge ya, faa nyi wor ahe: Me ka gan a, sai ka we soɓ won ɓe, me ga ne ki ka me ge cuu ko pel Dǝɓlii, ka me soɓ ko kaa gŋ ŋhaa ga lii. 23 Wor ah Elkana faa nyi ko: Mo joŋ tǝgbana zahzyil ɓo mo 'yahe. Mo kaa ka wel ah mo soɓ won ɗao, mor ka Dǝɓlii mo joŋko ɓǝ faa zah ahe. So mawin kaa ŋhaa nan ah soɓ wonni.
24 Ne cok Anna mo yee zah nan ah tǝ wonni, so ɓaŋ ko mor jolle, gbǝ ŋgǝǝri ma joŋ syii tǝ sai, ne sum tahsah jemma, tǝkine bii lee kpuu vin dah bii vaŋno ge yaŋ Dǝɓlii ne ko Silo, ka wel ah pǝlaŋ ba. 25 Ŋgoŋra ŋgǝǝri, zaŋra wee ge wo Eli ne ko. 26 Anna faa: Eli dǝɓlii ɓe, mo tǝ me ɓe ne? Ame mawin mai me uu kah ɓo nyee juupel wo Dǝɓlii kŋ. 27 Me juupel mor wee ko, Dǝɓlii laa fii ɓe me fii ko ɓe. 28 Mor ah me nyi ko ɓo nyi Dǝɓlii.
So juura pel wo Dǝɓlii pǝ cok ahe.
