Jeremias faa ɓǝ ne Pasur
1 Pasur we Imer ako ye pa joŋzahsyiŋrĩ so ako ye dǝɓlii yaŋ Masǝŋ ta, laa ɓǝ mai Jeremias mo tǝ faani, 2 so faa nyi za yeɓ ah mo loɓra profeto Jeremias ne bǝrǝǝ, so ka mo gaara ko ne ŋgǝyam mai mo zahfah Benyaamin tǝ yaŋ Masǝŋ sǝŋ. 3 Tǝ'nan ah ne cok Pasur mo wǝǝ Jeremias ɓoo, Jeremias faa nyi ko: Dǝɓlii ka ga ɗii mo ne Pasur ya, ɗii mai mo ɗii mo ɓo ne ko, ako ye Pagalle. 4 Dǝɓlii ne suu ah faa: Me ga joŋ moo ɗuu galle, tǝkine bai ɓo ra daŋ. Za syiŋ ɓǝǝ ga ik ra pǝ wul ne kafahe ne nahnǝn ɓo. Me ga soɓ za sǝr Yuda daŋ ga mor jol goŋ Babilon, a ga gbahra za ki kal ga sǝr Babilon ne ko, a ga ik za ki pǝ wulli. 5 Me ga soɓ za syiŋ ɓǝǝ gin woo lak yaŋ maiko, joŋ ah ne fan sãh ah ra, ne joŋ za goŋ sǝr Yuda daŋ kal ga sǝr Babilon ne ko. 6 Amo Pasur, a ga gbǝra mo ne za yaŋ ɓo daŋ kal ga sǝr Babilon ne ko. Mo ga wǝ gŋ ŋhaako, a ga ciira mo gŋ ne bai ɓo ra mai mo gwah ber nyi ra.
Jeremias ɓer zah nyi Dǝɓlii
7 Dǝɓlii, mo kǝǝ me ɓe, so laŋ me zyak ɓe ta. Amo pǝswah kal me ɓe, amo joŋ me ne doole. Za daŋ a tǝǝra me, a syakra me zok com ne wõi. 8 Ne cok me tǝ faa ɓǝ ɓe daŋ, me yeyee ɓyaŋ ɓǝ ne ko: Za mana, gaɓɓe! Za mana, ɓeɓɓe! Dǝɓlii, cẽecẽe a tǝǝra me, a syẽara me, mor me tǝ faa ɓǝ ɓo. 9 Amma ne cok me foo sai me ga soɓ foo ɓǝ Dǝɓlii, me ka ga faa ɓǝ pǝ tǝɗii ah faɗa yao ɓe, so ɓǝ faa ɓo a ur pǝ zahzyil ɓe pǝcwak na wii, a dan ga nyi me pǝzyil woiŋ ryakryak, so me gaɓ ɓatɓat, me ka gak cak ya. 10 Ame laa za yeara ma tǝtǝǝ me. A ɗiira me ne Pagalle, a faara: Na ce ko, na ce ko! Koo bai ɓe ra laŋ a byakra lee ɓe. A faara: Ɗah maki na lwaa joŋ tǝgwĩi ne ki no ne? Ka na gbǝ ko na faŋ val tǝl ahe. 11 Amma Dǝɓlii, mo no ne me, amo pǝswahe, mo ye dǝɓ gorom, za mai mo tǝ foora mor ɓe a ga leara ga sǝŋ, ka gak kaara kacella tǝ ɓe ya. Mo tǝ ga cuu swãa ɓǝǝ pǝ'manne, ka tǝ ga yeara ne pejii pǝ fan joŋ ɓǝǝr a, swãa ah ga yea tǝ ɓǝǝ ga lii ga lii, za ka ga yaŋra ɓǝ ah ya syaŋsyaŋ. 12 Amma Dǝɓlii ma ne swah daŋ, amo lii za matǝ njaŋ ahe, mo tǝ zahzyil ɓǝǝ ne ɓǝ foo ɓǝǝ ɓe. Mo faŋ val tǝ za syiŋ ɓe, ka me ẽere, mor me soɓ ɓǝ ɓe daŋ ɓo jol ɓo.
13 We ɗǝǝ lǝŋ yii Dǝɓlii ne ko, mor a ǝ̃ǝ za mai za moo cuu syak nyi ra gin mor jol za maɓea ahe.
14 Zah'nan ɓe' ye zah'nan mai ma ɓe mo byaŋ me ne ko. Za mo faara ɓǝ sãh tǝ zah'nan ah kpee ka. 15 Tǝkẽawãk tǝ dǝɓ mai mo ge faa nyi pa ɓe, mo byaŋ we wor ɓe, mo so kǝǝ ko 'nyah suu. 16 Dǝɓ ah mo yea tǝgbana yaŋ maluu mai Dǝɓlii mo ɓeɓ ɓo bai kwan syak tǝl ahe. Zah'nan moo cee daŋ dǝɓ ah mo laa cii yee ge sokki, ne com kǝsyitǝtǝl daŋ mo laako ɓǝ salle. 17 Mor dǝɓ ah hǝǝ i me ge ɓǝr ma ɓe pǝ wul sǝ ka ɓǝr ma ɓe mo ciŋ pal ɓe, ka me lwaa byaŋ ka ya. 18 Ame byaŋ mor fẽene? Wala me byaŋ mor ka laa bone ne ɓǝ swaa ka zah'nan cee ɓe mo vǝr ne cuu swãa ne?
Jeremias faa ɓǝ ne Pasur
1 Pasur we Imer ako ye pa joŋzahsyiŋrĩ so ako ye dǝɓlii yaŋ Masǝŋ ta, laa ɓǝ mai Jeremias mo tǝ faani, 2 so faa nyi za yeɓ ah mo loɓra profeto Jeremias ne bǝrǝǝ, so ka mo gaara ko ne ŋgǝyam mai mo zahfah Benyaamin tǝ yaŋ Masǝŋ sǝŋ. 3 Tǝ'nan ah ne cok Pasur mo wǝǝ Jeremias ɓoo, Jeremias faa nyi ko: Dǝɓlii ka ga ɗii mo ne Pasur ya, ɗii mai mo ɗii mo ɓo ne ko, ako ye Pagalle. 4 Dǝɓlii ne suu ah faa: Me ga joŋ moo ɗuu galle, tǝkine bai ɓo ra daŋ. Za syiŋ ɓǝǝ ga ik ra pǝ wul ne kafahe ne nahnǝn ɓo. Me ga soɓ za sǝr Yuda daŋ ga mor jol goŋ Babilon, a ga gbahra za ki kal ga sǝr Babilon ne ko, a ga ik za ki pǝ wulli. 5 Me ga soɓ za syiŋ ɓǝǝ gin woo lak yaŋ maiko, joŋ ah ne fan sãh ah ra, ne joŋ za goŋ sǝr Yuda daŋ kal ga sǝr Babilon ne ko. 6 Amo Pasur, a ga gbǝra mo ne za yaŋ ɓo daŋ kal ga sǝr Babilon ne ko. Mo ga wǝ gŋ ŋhaako, a ga ciira mo gŋ ne bai ɓo ra mai mo gwah ber nyi ra.
Jeremias ɓer zah nyi Dǝɓlii
7 Dǝɓlii, mo kǝǝ me ɓe, so laŋ me zyak ɓe ta. Amo pǝswah kal me ɓe, amo joŋ me ne doole. Za daŋ a tǝǝra me, a syakra me zok com ne wõi. 8 Ne cok me tǝ faa ɓǝ ɓe daŋ, me yeyee ɓyaŋ ɓǝ ne ko: Za mana, gaɓɓe! Za mana, ɓeɓɓe! Dǝɓlii, cẽecẽe a tǝǝra me, a syẽara me, mor me tǝ faa ɓǝ ɓo. 9 Amma ne cok me foo sai me ga soɓ foo ɓǝ Dǝɓlii, me ka ga faa ɓǝ pǝ tǝɗii ah faɗa yao ɓe, so ɓǝ faa ɓo a ur pǝ zahzyil ɓe pǝcwak na wii, a dan ga nyi me pǝzyil woiŋ ryakryak, so me gaɓ ɓatɓat, me ka gak cak ya. 10 Ame laa za yeara ma tǝtǝǝ me. A ɗiira me ne Pagalle, a faara: Na ce ko, na ce ko! Koo bai ɓe ra laŋ a byakra lee ɓe. A faara: Ɗah maki na lwaa joŋ tǝgwĩi ne ki no ne? Ka na gbǝ ko na faŋ val tǝl ahe. 11 Amma Dǝɓlii, mo no ne me, amo pǝswahe, mo ye dǝɓ gorom, za mai mo tǝ foora mor ɓe a ga leara ga sǝŋ, ka gak kaara kacella tǝ ɓe ya. Mo tǝ ga cuu swãa ɓǝǝ pǝ'manne, ka tǝ ga yeara ne pejii pǝ fan joŋ ɓǝǝr a, swãa ah ga yea tǝ ɓǝǝ ga lii ga lii, za ka ga yaŋra ɓǝ ah ya syaŋsyaŋ. 12 Amma Dǝɓlii ma ne swah daŋ, amo lii za matǝ njaŋ ahe, mo tǝ zahzyil ɓǝǝ ne ɓǝ foo ɓǝǝ ɓe. Mo faŋ val tǝ za syiŋ ɓe, ka me ẽere, mor me soɓ ɓǝ ɓe daŋ ɓo jol ɓo.
13 We ɗǝǝ lǝŋ yii Dǝɓlii ne ko, mor a ǝ̃ǝ za mai za moo cuu syak nyi ra gin mor jol za maɓea ahe.
14 Zah'nan ɓe' ye zah'nan mai ma ɓe mo byaŋ me ne ko. Za mo faara ɓǝ sãh tǝ zah'nan ah kpee ka. 15 Tǝkẽawãk tǝ dǝɓ mai mo ge faa nyi pa ɓe, mo byaŋ we wor ɓe, mo so kǝǝ ko 'nyah suu. 16 Dǝɓ ah mo yea tǝgbana yaŋ maluu mai Dǝɓlii mo ɓeɓ ɓo bai kwan syak tǝl ahe. Zah'nan moo cee daŋ dǝɓ ah mo laa cii yee ge sokki, ne com kǝsyitǝtǝl daŋ mo laako ɓǝ salle. 17 Mor dǝɓ ah hǝǝ i me ge ɓǝr ma ɓe pǝ wul sǝ ka ɓǝr ma ɓe mo ciŋ pal ɓe, ka me lwaa byaŋ ka ya. 18 Ame byaŋ mor fẽene? Wala me byaŋ mor ka laa bone ne ɓǝ swaa ka zah'nan cee ɓe mo vǝr ne cuu swãa ne?
