Debora ne Barak ira Sisera
1 Fahfal wul Ehud, za Israel so kal tǝ joŋra faɓe' wo Dǝɓlii kpǝ. 2 So Dǝɓlii soɓ ra ge mor jol Jabin goŋ sǝr Kanaan mai mo kaa goŋ Hazor. Sisera ye swah sooje ahe, kaa ɓo Haroset-mǝ-za bai iŋni. 3 Za Israel ge yera yee wo Dǝɓlii, mor Jabin ne muŋta sal temere doraŋ, cuu syak nyi za Israel pǝlli, ŋhaa syii jemma gwa.
4 Ne cok ah profeto madǝwin no a ɗii ne Debora, mawin Lappidot yo. Ako ye kaa dǝɓlii za Israel ɓo ne cok ahe. 5 A kaa mor kpuu dabonooje Debora kǝsyil yaŋ Rama ne Betel tǝ waa Efraim. Za Israel a ga zalra ɓǝ ɓǝǝ pel ah gŋ. 6 Debora pepee ge ɗii Barak we Abinoam ma Kades-Naftali faa nyi ko: Dǝɓlii Masǝŋ Israel faa sye: Mo syee mo ge tǝ waa Tabor mo ge woo za kǝsyil za Naftali ne za Zebulon 10.000. 7 Me ga kǝǝ Sisera swah sal goŋ Jabin ga wo ɓo pǝ el Kison, ako, ne muŋta sal ah tǝkine sooje ah daŋ. Me ga soɓ ko ga mor jol ɓo. 8 Barak zyii faa nyi ko: Moo ga ne me no ɓe, me ganne, amma mo ka tǝ ga ne me ya ɓe, ka me ka gan a. 9 Debora faa nyi ko: Pǝsãhe, me ga ne mo, amma pǝ cok mai moo ga syee gŋ tǝ fahlii daŋ ka yǝk ah ma ɓo ye ka. Mor Dǝɓlii tǝ ga soɓ Sisera ga jol madǝwinni. So Debora ur ne Barak kalra ge Kades. 10 Barak ɗii za Zebulon ne za Naftali daŋ ge Kades, sooje 10.000 kalra ge mor ahe, Debora laŋ kal ge ne ki ta.
11 Amma Eber Keniyo mai mo woŋ ki ɓo ne Kenien ma morsǝ̃ǝ Hobaɓ bǝǝ Mosus gbah jul ah ɓo kah kpuu malii ma Zaananim, mo kah Kades.
12 Ge faara nyi Sisera: Barak we Abinoam kal ge gbah jul ɓo tǝ waa Tabor ne sooje ahe. 13 Sisera tai muŋta sal ah daŋ temere doraŋ tǝkine za ma ne ki daŋ daga Haroset-mǝ-za bai iŋni ge pǝ el Kison.
14 Debora faa nyi Barak: Mo ur o, mor tǝ'nah zah'nan mai Dǝɓlii mo ga soɓ Sisera ga mor jol ɓo yo. Dǝɓlii ye kal ɓo pel ɓo. Barak ɗǝr gin tǝ waa Tabor ge sǝŋ, sooje 10.000 mor ahe. 15 Dǝɓlii kiŋ tǝtǝl nyi Sisera ne kul sooje ma yee tǝ muŋta sal daŋ. Barak ik ra ne kafahe. Sisera ɗǝr gin tǝ muŋta sal ah kal ɗul ne ɓalle. 16 Amma Barak foo mor muŋta sal ne sooje ŋhaa ge dai Haroset-mǝ-za bai iŋni. Sooje Sisera daŋ ikra ra pǝ wul tǝɗe'. Koo dǝɓ vaŋno laŋ coŋ ya.
17 Sisera ɗuu ne ɓal kal ge muŋ pǝ tal mbǝro Jael mawin Eber Keniyo. Mor jam no kǝsyil Jabin goŋ Hazor ne za yaŋ Eber. 18 Jael pǝ̃ǝ ka zyaŋ tǝ Sisera, faa nyi ko: Mo dan ge o dǝɓlii, mo dan ge wo ɓe, mo ɗuu gal ka. Sisera dan kal ge wol ah pǝ tal mbǝro. So Jael ɓaŋ bargo jǝŋ ge nyi tǝtǝl muŋ ne ko. 19 So faa nyi Jael: Mo nyi bii me biŋ zwǝ sa, mor koŋ bii i me ɓo. Mawin so gbǝr zah gbel wonni, suu nyi ko zwǝ, so jǝŋ fan ge nyi tǝtǝlli. 20 Sisera so faa nyi mawinni: Mo uu zahfahe, ka dǝɓ mo ge fii mo dǝɓ ki no nyee ne ɓe, ka mo zyii faa nyi ko: Kǝka.
21 Sisera gaɓ ɓo pǝlli, lee nǝm pǝṽaŋ, so Jael mawin Eber ɓaŋ tǝwoo mor jolle, syee ge wol ah ne 'yaŋ 'yaŋ ge pee gaari ge nyi kahfǝn gaa ge gŋ ne tǝwoo ŋhaa gaari ge dan sǝrri, so wǝ gŋ sǝ. 22 So Barak ge daini, tǝ foo mor Sisera. Jael pǝ̃ǝ ge ka zyaŋ tǝl ahe, faa nyi ko: Mo ge o, ka me cuu dǝɓ mai mo tǝ kyeɓ ko nyi mo. Barak dan kal ge wol ahe, ge lwaa Sisera tǝ sǝrri, wǝ ɓe, gaari laŋ a kahfǝn ah 'wa.
23 Dǝɓlii soɓ Jabin goŋ Kanaanien ge mor jol za Israel com ah naiko. 24 So za Israel joŋra pǝswahe, jokra Jabin goŋ Kanaanien ŋhaa vǝrra ra tǝɗe'.
Debora ne Barak ira Sisera
1 Fahfal wul Ehud, za Israel so kal tǝ joŋra faɓe' wo Dǝɓlii kpǝ. 2 So Dǝɓlii soɓ ra ge mor jol Jabin goŋ sǝr Kanaan mai mo kaa goŋ Hazor. Sisera ye swah sooje ahe, kaa ɓo Haroset-mǝ-za bai iŋni. 3 Za Israel ge yera yee wo Dǝɓlii, mor Jabin ne muŋta sal temere doraŋ, cuu syak nyi za Israel pǝlli, ŋhaa syii jemma gwa.
4 Ne cok ah profeto madǝwin no a ɗii ne Debora, mawin Lappidot yo. Ako ye kaa dǝɓlii za Israel ɓo ne cok ahe. 5 A kaa mor kpuu dabonooje Debora kǝsyil yaŋ Rama ne Betel tǝ waa Efraim. Za Israel a ga zalra ɓǝ ɓǝǝ pel ah gŋ. 6 Debora pepee ge ɗii Barak we Abinoam ma Kades-Naftali faa nyi ko: Dǝɓlii Masǝŋ Israel faa sye: Mo syee mo ge tǝ waa Tabor mo ge woo za kǝsyil za Naftali ne za Zebulon 10.000. 7 Me ga kǝǝ Sisera swah sal goŋ Jabin ga wo ɓo pǝ el Kison, ako, ne muŋta sal ah tǝkine sooje ah daŋ. Me ga soɓ ko ga mor jol ɓo. 8 Barak zyii faa nyi ko: Moo ga ne me no ɓe, me ganne, amma mo ka tǝ ga ne me ya ɓe, ka me ka gan a. 9 Debora faa nyi ko: Pǝsãhe, me ga ne mo, amma pǝ cok mai moo ga syee gŋ tǝ fahlii daŋ ka yǝk ah ma ɓo ye ka. Mor Dǝɓlii tǝ ga soɓ Sisera ga jol madǝwinni. So Debora ur ne Barak kalra ge Kades. 10 Barak ɗii za Zebulon ne za Naftali daŋ ge Kades, sooje 10.000 kalra ge mor ahe, Debora laŋ kal ge ne ki ta.
11 Amma Eber Keniyo mai mo woŋ ki ɓo ne Kenien ma morsǝ̃ǝ Hobaɓ bǝǝ Mosus gbah jul ah ɓo kah kpuu malii ma Zaananim, mo kah Kades.
12 Ge faara nyi Sisera: Barak we Abinoam kal ge gbah jul ɓo tǝ waa Tabor ne sooje ahe. 13 Sisera tai muŋta sal ah daŋ temere doraŋ tǝkine za ma ne ki daŋ daga Haroset-mǝ-za bai iŋni ge pǝ el Kison.
14 Debora faa nyi Barak: Mo ur o, mor tǝ'nah zah'nan mai Dǝɓlii mo ga soɓ Sisera ga mor jol ɓo yo. Dǝɓlii ye kal ɓo pel ɓo. Barak ɗǝr gin tǝ waa Tabor ge sǝŋ, sooje 10.000 mor ahe. 15 Dǝɓlii kiŋ tǝtǝl nyi Sisera ne kul sooje ma yee tǝ muŋta sal daŋ. Barak ik ra ne kafahe. Sisera ɗǝr gin tǝ muŋta sal ah kal ɗul ne ɓalle. 16 Amma Barak foo mor muŋta sal ne sooje ŋhaa ge dai Haroset-mǝ-za bai iŋni. Sooje Sisera daŋ ikra ra pǝ wul tǝɗe'. Koo dǝɓ vaŋno laŋ coŋ ya.
17 Sisera ɗuu ne ɓal kal ge muŋ pǝ tal mbǝro Jael mawin Eber Keniyo. Mor jam no kǝsyil Jabin goŋ Hazor ne za yaŋ Eber. 18 Jael pǝ̃ǝ ka zyaŋ tǝ Sisera, faa nyi ko: Mo dan ge o dǝɓlii, mo dan ge wo ɓe, mo ɗuu gal ka. Sisera dan kal ge wol ah pǝ tal mbǝro. So Jael ɓaŋ bargo jǝŋ ge nyi tǝtǝl muŋ ne ko. 19 So faa nyi Jael: Mo nyi bii me biŋ zwǝ sa, mor koŋ bii i me ɓo. Mawin so gbǝr zah gbel wonni, suu nyi ko zwǝ, so jǝŋ fan ge nyi tǝtǝlli. 20 Sisera so faa nyi mawinni: Mo uu zahfahe, ka dǝɓ mo ge fii mo dǝɓ ki no nyee ne ɓe, ka mo zyii faa nyi ko: Kǝka.
21 Sisera gaɓ ɓo pǝlli, lee nǝm pǝṽaŋ, so Jael mawin Eber ɓaŋ tǝwoo mor jolle, syee ge wol ah ne 'yaŋ 'yaŋ ge pee gaari ge nyi kahfǝn gaa ge gŋ ne tǝwoo ŋhaa gaari ge dan sǝrri, so wǝ gŋ sǝ. 22 So Barak ge daini, tǝ foo mor Sisera. Jael pǝ̃ǝ ge ka zyaŋ tǝl ahe, faa nyi ko: Mo ge o, ka me cuu dǝɓ mai mo tǝ kyeɓ ko nyi mo. Barak dan kal ge wol ahe, ge lwaa Sisera tǝ sǝrri, wǝ ɓe, gaari laŋ a kahfǝn ah 'wa.
23 Dǝɓlii soɓ Jabin goŋ Kanaanien ge mor jol za Israel com ah naiko. 24 So za Israel joŋra pǝswahe, jokra Jabin goŋ Kanaanien ŋhaa vǝrra ra tǝɗe'.
