1 Zǝzǝ̃ǝko za joŋzahsyiŋrĩ, ɓǝ lai ma mor ɓii a koi sye. Ame Dǝɓlii ma ne swah daŋ me faa: 2 Sai we yii me ne fan mai wee joŋni. Ko we zyii ka laa ɓǝ faa ɓe ya ɓe, me ga pee tǝkẽawãk ge tǝ ɓiiri, me ga ɓoo zahyee tǝ fan sãh mai daŋ wee lwaa tǝ ɓǝ yeɓ joŋzahsyiŋrĩ. Oho, daga zǝzǝ̃ǝ sǝ laŋ me ɓoo zahyee tǝl ah ra ɓe, mor we zyii ka nyiŋ ɓǝ lai ɓe ya. 3 Me ga ŋgoŋ kiita tǝ wee ɓiiri, me ga rwah mǝr faɓal mai wee joŋ syiŋ ne ga nyi we zahpelle, so me ga nĩi we myah ne ko. 4 So we ga tǝ, me nyi ɓǝ lai mai ɓo nyi we, mor ka ɓǝ gbanzah ɓe me gbǝ ɓo ne za joŋzahsyiŋ ma morsǝ̃ǝ Lewi mo yea pǝswahe.
5 Pǝ ɓǝ gbanzah ɓe, me faa ɓǝ cee tǝkine jam gŋ. So me nyi fan ah nyi ra gwa daŋ, mor ka mo ɗuura me. So a gbanra ɓǝ yǝk ɓe tǝkine ɗuu gal ɓe. 6 Ɓǝ faa zah ɓǝǝ a pǝsãhe, ka pǝɓe' ya. Gbǝra yǝk ɓǝ ɓe, a joŋra fan masãh ahe, gbahra jol za pǝlli, ka mo soɓra joŋ ɓǝɓe'. 7 Yeɓ za joŋzahsyiŋ ye mai ka mo cuura ryakryak goŋga ɓǝ Masǝŋ, ka za mo ge wo ɓǝǝ mo feera ɓǝ fahlii joŋ 'yah ɓe jol ɓǝǝra, mor ara ye zapee Dǝɓlii ma ne swah daŋ.
8 Amma awe za joŋzahsyiŋrĩ, we cak gin tǝ fahlii masãh ah kal ge lalle. Ɓǝ cuu ɓii joŋ za pǝlli danra pǝ faɓe'. Awe joŋ ɓǝ gbanzah ɓe me gbǝ ɓo ne we na ɓǝ kolle. 9 So me ga joŋ za Israel syẽara we, mor we ka tǝ syee mor ɓǝ cuu ɓe ra ya. Ne cok we tǝ cuu fahlii joŋ 'yah ɓe nyi zana, we joŋ za ne camcam. Ame Dǝɓlii ma ne swah daŋ me faa naiko.
Ɓǝɓe' za Israel
10 Ana daŋ pa man a vaŋno, ako ye Masǝŋ matǝ vaŋno mai mo joŋ na. So mor fẽe na syel ɓǝ gbanzah man naa gban ma kǝsyil ki ne? Mor fẽe na syel ɓǝ gbanzah mai Masǝŋ mo gbǝ ne pa man lii ra ne? 11 Za Yuda syelra ɓǝ gbanzah ɓǝǝ mo gbǝra ɓo ne Masǝŋ so joŋra fan maɓe' ah kǝsyil za Israel ne yaŋ Jerusalem. Ɓeɓra yaŋ Masǝŋ mai Dǝɓlii moo 'yahe. Woora ŋwǝǝ za gwǝǝ mai moo syeera mor masǝŋ ki ra kanne. 12 Dǝɓlii mo ɓeɓ pa ma joŋ fan ma morãiko, mo soɓ ko ka yea kǝsyil za ɓuu mai moo nyira fan nyi ɓǝǝ nyi Dǝɓlii ma ne swah daŋ ka.
13 So fan maki ah mai we tǝ joŋ faɗa, awe yeyee ne mĩi syẽ ga tǝ cok joŋ syiŋ Dǝɓlii tǝkine 'meere, mor ka tǝ zyii nyiŋ fan nyi ɓii wee gin nyi ko ne ya. 14 So awe fifii faa: Mor fẽene? Mor Dǝɓlii tǝ ɓe, amo syel ɓǝ gbanzah ɓo mo gbǝ ɓo ne mawin zahlaŋ ɓo. Mor Dǝɓlii tǝ ɓǝ gbanzah ɓii we gbǝ ɓo pel Masǝŋ ɓe. Mor mo faa pel Masǝŋ mo ga gbǝ mawin ɓo pǝsãhe. 15 Masǝŋ joŋ mo ciŋ suu tǝ vaŋno, ne tǝ'yak tǝ vaŋno ɓo ka ne mawin ɓo ya ne? Ɓǝ foo ah tǝ ɓǝ mai a ɗǝne? Mor ka na bem wee matǝ goŋga mai moo gak syeera mor Masǝŋ. Mor ahe, we joŋ yella, ka kǝsyil ɓii koo dǝɓ vaŋno mo syelko ɓǝ gbanzah ah mo gbǝ ɓo ne mawin zahlaŋ ah ka. 16 Dǝɓlii Masǝŋ Israel faa: Ame syiŋ ɓǝ syel ki ɓo syiŋ. Ne cok dǝɓ vaŋno kǝsyil ɓii mo joŋ fan maɓe' ah wo mawin ah ɓe daŋ, ame syiŋ ɓǝ ah ɓo. We joŋ yella ka we syel ɓǝ gbanzah ɓii we faa ɓo ka joŋ fan masãh ah wo ŋwǝǝ ɓii ka.
Zah'nan kiita ge gwari ɓe
17 Ɓǝ faa ɓii wee faa gaɓ Dǝɓlii ɓe. Awe faa aru gaɓ ko ne ɓǝ fẽene? Awe gaɓ ko ɓo ne mai wee faa za mai moo joŋra faɓe' daŋ Dǝɓlii ma ne swah daŋ a laa pǝ'nyah ne ra, wala ne mai wee fifii faa: Masǝŋ ma ŋgoŋ kiita kŋ a kẽne?
1 Zǝzǝ̃ǝko za joŋzahsyiŋrĩ, ɓǝ lai ma mor ɓii a koi sye. Ame Dǝɓlii ma ne swah daŋ me faa: 2 Sai we yii me ne fan mai wee joŋni. Ko we zyii ka laa ɓǝ faa ɓe ya ɓe, me ga pee tǝkẽawãk ge tǝ ɓiiri, me ga ɓoo zahyee tǝ fan sãh mai daŋ wee lwaa tǝ ɓǝ yeɓ joŋzahsyiŋrĩ. Oho, daga zǝzǝ̃ǝ sǝ laŋ me ɓoo zahyee tǝl ah ra ɓe, mor we zyii ka nyiŋ ɓǝ lai ɓe ya. 3 Me ga ŋgoŋ kiita tǝ wee ɓiiri, me ga rwah mǝr faɓal mai wee joŋ syiŋ ne ga nyi we zahpelle, so me ga nĩi we myah ne ko. 4 So we ga tǝ, me nyi ɓǝ lai mai ɓo nyi we, mor ka ɓǝ gbanzah ɓe me gbǝ ɓo ne za joŋzahsyiŋ ma morsǝ̃ǝ Lewi mo yea pǝswahe.
5 Pǝ ɓǝ gbanzah ɓe, me faa ɓǝ cee tǝkine jam gŋ. So me nyi fan ah nyi ra gwa daŋ, mor ka mo ɗuura me. So a gbanra ɓǝ yǝk ɓe tǝkine ɗuu gal ɓe. 6 Ɓǝ faa zah ɓǝǝ a pǝsãhe, ka pǝɓe' ya. Gbǝra yǝk ɓǝ ɓe, a joŋra fan masãh ahe, gbahra jol za pǝlli, ka mo soɓra joŋ ɓǝɓe'. 7 Yeɓ za joŋzahsyiŋ ye mai ka mo cuura ryakryak goŋga ɓǝ Masǝŋ, ka za mo ge wo ɓǝǝ mo feera ɓǝ fahlii joŋ 'yah ɓe jol ɓǝǝra, mor ara ye zapee Dǝɓlii ma ne swah daŋ.
8 Amma awe za joŋzahsyiŋrĩ, we cak gin tǝ fahlii masãh ah kal ge lalle. Ɓǝ cuu ɓii joŋ za pǝlli danra pǝ faɓe'. Awe joŋ ɓǝ gbanzah ɓe me gbǝ ɓo ne we na ɓǝ kolle. 9 So me ga joŋ za Israel syẽara we, mor we ka tǝ syee mor ɓǝ cuu ɓe ra ya. Ne cok we tǝ cuu fahlii joŋ 'yah ɓe nyi zana, we joŋ za ne camcam. Ame Dǝɓlii ma ne swah daŋ me faa naiko.
Ɓǝɓe' za Israel
10 Ana daŋ pa man a vaŋno, ako ye Masǝŋ matǝ vaŋno mai mo joŋ na. So mor fẽe na syel ɓǝ gbanzah man naa gban ma kǝsyil ki ne? Mor fẽe na syel ɓǝ gbanzah mai Masǝŋ mo gbǝ ne pa man lii ra ne? 11 Za Yuda syelra ɓǝ gbanzah ɓǝǝ mo gbǝra ɓo ne Masǝŋ so joŋra fan maɓe' ah kǝsyil za Israel ne yaŋ Jerusalem. Ɓeɓra yaŋ Masǝŋ mai Dǝɓlii moo 'yahe. Woora ŋwǝǝ za gwǝǝ mai moo syeera mor masǝŋ ki ra kanne. 12 Dǝɓlii mo ɓeɓ pa ma joŋ fan ma morãiko, mo soɓ ko ka yea kǝsyil za ɓuu mai moo nyira fan nyi ɓǝǝ nyi Dǝɓlii ma ne swah daŋ ka.
13 So fan maki ah mai we tǝ joŋ faɗa, awe yeyee ne mĩi syẽ ga tǝ cok joŋ syiŋ Dǝɓlii tǝkine 'meere, mor ka tǝ zyii nyiŋ fan nyi ɓii wee gin nyi ko ne ya. 14 So awe fifii faa: Mor fẽene? Mor Dǝɓlii tǝ ɓe, amo syel ɓǝ gbanzah ɓo mo gbǝ ɓo ne mawin zahlaŋ ɓo. Mor Dǝɓlii tǝ ɓǝ gbanzah ɓii we gbǝ ɓo pel Masǝŋ ɓe. Mor mo faa pel Masǝŋ mo ga gbǝ mawin ɓo pǝsãhe. 15 Masǝŋ joŋ mo ciŋ suu tǝ vaŋno, ne tǝ'yak tǝ vaŋno ɓo ka ne mawin ɓo ya ne? Ɓǝ foo ah tǝ ɓǝ mai a ɗǝne? Mor ka na bem wee matǝ goŋga mai moo gak syeera mor Masǝŋ. Mor ahe, we joŋ yella, ka kǝsyil ɓii koo dǝɓ vaŋno mo syelko ɓǝ gbanzah ah mo gbǝ ɓo ne mawin zahlaŋ ah ka. 16 Dǝɓlii Masǝŋ Israel faa: Ame syiŋ ɓǝ syel ki ɓo syiŋ. Ne cok dǝɓ vaŋno kǝsyil ɓii mo joŋ fan maɓe' ah wo mawin ah ɓe daŋ, ame syiŋ ɓǝ ah ɓo. We joŋ yella ka we syel ɓǝ gbanzah ɓii we faa ɓo ka joŋ fan masãh ah wo ŋwǝǝ ɓii ka.
Zah'nan kiita ge gwari ɓe
17 Ɓǝ faa ɓii wee faa gaɓ Dǝɓlii ɓe. Awe faa aru gaɓ ko ne ɓǝ fẽene? Awe gaɓ ko ɓo ne mai wee faa za mai moo joŋra faɓe' daŋ Dǝɓlii ma ne swah daŋ a laa pǝ'nyah ne ra, wala ne mai wee fifii faa: Masǝŋ ma ŋgoŋ kiita kŋ a kẽne?
