Dabid aw loo-si Sawul’g nɛ yeḛ mbad tɔlee
1 Dəwje gə́ Jip d’aw rɔ Sawul’g loo gə́ Gibea’g d’aw d’ulá pana: See Dabid iya rəa dɔdərloo gə́ Hakila gə́ wɔji dɔ dɔdilaloo njoroŋ lé el wa .
2 Togə́bè ɓa Sawul ḭ aw dɔdilaloo’d gə́ Jip gə njérɔje gə́ Israɛl gə́ siŋga dee to kɔgərɔ-kɔgərɔ gə́ d’ur dɔ mar deeje’g d’as tɔl-dɔg-loo-munda (3.000) mba saŋg ne Dabid dɔdilaloo gə́ Jip lé. 3 Sawul wa loo-siée dɔdərloo gə́ Hakila gə́ wɔji dɔ dɔdilaloo njoroŋ mbɔr rəw’g. Dabid si dɔdilaloo’g ndá loo gə́ yeḛ oo to gə́ Sawul aw tuba gée dɔdilaloo’g ndá 4 yeḛ ula njétənlooje gə́ keneŋ ndá oo gao to gə́ Sawul ree mba̰ ya. 5 Yen ŋga Dabid ḭ aw loo gə́ Sawul wa loo-siée keneŋ ndá yeḛ oo loo gə́ Sawul gə Abner, ŋgolə Ner, yeḛ gə́ to mbai dɔ njérɔje ləa to keneŋ lé. Sawul to dan dee’g dana bab ndá kudu-njérɔje gugu dəa sub.
6 Dabid un ta pa ar Ahimelek, dəw gə́ Het gə Abisai, ŋgolə Seruja gə́ to ŋgoko̰ Joab pana: See na̰ ɓa ndigi kaw səm rɔ Sawul’g loo-siée’g wa.
Abisai ila keneŋ pana: Ma nja m’a kaw səi.
7 Dabid gə Abisai d’aw loo-si njérɔje’g loondul’g. Nɛ aa oo, Sawul toɓi dan dee’g dana bab ndá yeḛ ɔs ko̰-niŋga ləa naŋg mbɔr négəd dəa’g. Abner gə kudu-njérɔje ɓa to gugu dəa sub. 8 Yen ŋga Abisai ula Dabid pana: Ɓogənè Ala ila njeba̰ ləi meḛ jii’g. M’ra ndòo rɔi’g, ya̰ loo am m’ɔsee gə ko̰-niŋga ya, m’a kɔsee ji kára ba ya kɔree naŋg ɓó m’a tel kɔsee ji joo el.
9 Nɛ Dabid ula Abisai pana: Tɔlee el! Mbata see na̰ ɓa a kaskəm kun jia kɔrɔ ne rɔ yeḛ gə́ Njesigənea̰ wa dəa gə ubu lé lal kar bo̰ nérea ɔs təa’g wa. 10 Dabid pana: Njesigənea̰ si kəmba ya! Ndá to ta lə Njesigənea̰ ya kára ba gə mba ra səa né ya, banelə ndɔ ləa a kas ndá a kwəi əsé a kaw loo-rɔ’g ɓa a kwəi keneŋ ɓəi. 11 Wah! Ma ɓa yḛ̀, maji kar Njesigənea̰ ɔgm loo kun jim kɔrɔ ne rɔ yeḛ gə́ Njesigənea̰ wa dəa gə́ ubu lé! Nɛ maji kari un ko̰-niŋga ləa gə́ to mbɔr négəd dəa’g ləm, gə ku-gwɔb-mán ləa ləm tɔ ndá ar sí j’ɔd j’awje .
12 Dabid un ko̰-niŋga gə ku-gwɔb-mán gə́ to mbɔr négəd dɔ Sawul’g ndá d’ɔd d’aw. Dəw kára kara oo dee el ləm, gər né kára el ləma, ndel dɔ ɓi’g el ləm tɔ mbata deḛ lai d’oso gə ɓi gə́ dum kun rɔ ɓidi gə́ ḭ rɔ Njesigənea̰’g ɓa tɔl dee pərəg. 13 Dabid ɔd aw kel loo gə́ raŋg’d, aw aar əw dɔ sém mbal’g ar mbuna loo-si dee to əw gə na̰. 14 Ndá Dabid ra né wəl ar njérɔje ləm, gə Abner, ŋgolə Ner ləm tɔ pana: See i Abner a pata kára el wa.
Abner tel ilá’g pana: See i to na̰ ɓa ra né wəl-wəl dɔ mbai’g wa.
15 Dabid ula Abner pana: See i to diŋgam el wa. See na̰ ɓa as səi mbuna Israɛlje’g ɓəi wa. See ban ɓa i si kəmba aa dɔ mbai gə́ to ɓéije lé el wa. Mbata dəw kára ree gə mba tɔl mbai gə́ to ɓéije lé. 16 Né gə́ i ra neelé to lée’g el. Njesigənea̰ si kəmba ya! I lé kəm kari wəi ya mbata i si kəmba aa dɔ ɓéije gə́ Njesigənea̰ wa dəa gə ubu lé el. Aa loo oo ɓasinè, ko̰-niŋga lə mbai, gə ku-gwɔb-mán ləa gə́ to mbɔr négəd dəa’g lé see to ra wa.
17 Sawul gər ndu Dabid ndá yeḛ pana: Ŋgonəm Dabid, see to ndui-i ya wa.
Dabid tel ilá keneŋ pana: Ǝi mbai gə́ to mbai ləm, to ndum-ma ya.
18 Tɔɓəi yeḛ pana: See gelee ban ɓa mbai ləm un goo kura ləi lad-lad wa. See ɗi ɓa m’ra wa. Esé see ta ɗi ɓa wa dɔm wa. 19 Ɓasinè maji kar mbai gə́ to mbai ləm ur mbia oo ne ta lə kura ləa. Ɓó lé to Njesigənea̰ ya ɓa ɔsi ɓɔḭ-ɓɔḭ gə mba kari oma̰ səm ndá maji karee taa nékar gə́ baḭyee ə̰də lel lé ɓa. Nɛ ɓó lé to dəwje ndá maji kar ndɔl wa dɔ dee no̰ Njesigənea̰’g ya tɔ, mbata deḛ tubam ɓogənè mba kɔrm dan nédɔji’g lə Njesigənea̰ ləm, deḛ d’ulam pana: Maji kam m’aw m’pole magəje gə́ dɔɓee’g ləm tɔ. 20 Wai! Maji kar məsm ɔm naŋg əw gə Njesigənea̰ el. Mbata mbai lə Israɛlje ɔr rɔ aw saŋg ndisa ba ya to gə́ d’aw ne ndo̰ kɛrɛ dɔ mbalje’g bèe.
21 Sawul pana: Ma m’ra kaiya. Maji kari tel ree, ŋgonəm Dabid, mbata m’a ra səi némajel el ŋga mbata ɓogənè i oo loo si kəmba ləm gə́ né gə́ gadee to yaa̰ kəmi’g ya. Ma ɓa m’ra né to gə́ mbə bèe ləm, m’ra majel gə́ al dɔ loo sula ləm tɔ.
22 Dabid tel pana: Aa oo, ko̰-niŋga lə mbai lé ɓa nee. Maji kar dəw kára mbuna njérɔje’g ləi ree taa. 23 Njesigənea̰ a ra gə nana kara gə goo nérea gə́ gə dɔ najee ləm, gə goo ŋgonkoji ləa ləm tɔ mbata Njesigənea̰ ilai jim’g ɓogənè nɛ ma ɓa m’ndigi kun jim kɔrɔ ne rɔ yeḛ gə́ Njesigənea̰ wa dəa gə ubu lé el. 24 To gə́ ɓogənè si kəmba ləi to né gə́ gadee to yaa̰ kəm’g lé si kəmba ləm-ma kara gadee a to yaa̰ kəm Njesigənea̰’g tɔ, tɔɓəi yeḛ a kɔrm dan néurtije’g lai tɔ.
25 Yen ŋga Sawul ula Dabid pana: Maji kar dɔ ŋgonəm Dabid ai səgərə! I a teḛkɔr dɔ kula raije’g ya.
Bèe ɓa Dabid un rəw ləa aw ləm, Sawul kara tel aw kəi ləa ləm tɔ.
Dabid aw loo-si Sawul’g nɛ yeḛ mbad tɔlee
1 Dəwje gə́ Jip d’aw rɔ Sawul’g loo gə́ Gibea’g d’aw d’ulá pana: See Dabid iya rəa dɔdərloo gə́ Hakila gə́ wɔji dɔ dɔdilaloo njoroŋ lé el wa .
2 Togə́bè ɓa Sawul ḭ aw dɔdilaloo’d gə́ Jip gə njérɔje gə́ Israɛl gə́ siŋga dee to kɔgərɔ-kɔgərɔ gə́ d’ur dɔ mar deeje’g d’as tɔl-dɔg-loo-munda (3.000) mba saŋg ne Dabid dɔdilaloo gə́ Jip lé. 3 Sawul wa loo-siée dɔdərloo gə́ Hakila gə́ wɔji dɔ dɔdilaloo njoroŋ mbɔr rəw’g. Dabid si dɔdilaloo’g ndá loo gə́ yeḛ oo to gə́ Sawul aw tuba gée dɔdilaloo’g ndá 4 yeḛ ula njétənlooje gə́ keneŋ ndá oo gao to gə́ Sawul ree mba̰ ya. 5 Yen ŋga Dabid ḭ aw loo gə́ Sawul wa loo-siée keneŋ ndá yeḛ oo loo gə́ Sawul gə Abner, ŋgolə Ner, yeḛ gə́ to mbai dɔ njérɔje ləa to keneŋ lé. Sawul to dan dee’g dana bab ndá kudu-njérɔje gugu dəa sub.
6 Dabid un ta pa ar Ahimelek, dəw gə́ Het gə Abisai, ŋgolə Seruja gə́ to ŋgoko̰ Joab pana: See na̰ ɓa ndigi kaw səm rɔ Sawul’g loo-siée’g wa.
Abisai ila keneŋ pana: Ma nja m’a kaw səi.
7 Dabid gə Abisai d’aw loo-si njérɔje’g loondul’g. Nɛ aa oo, Sawul toɓi dan dee’g dana bab ndá yeḛ ɔs ko̰-niŋga ləa naŋg mbɔr négəd dəa’g. Abner gə kudu-njérɔje ɓa to gugu dəa sub. 8 Yen ŋga Abisai ula Dabid pana: Ɓogənè Ala ila njeba̰ ləi meḛ jii’g. M’ra ndòo rɔi’g, ya̰ loo am m’ɔsee gə ko̰-niŋga ya, m’a kɔsee ji kára ba ya kɔree naŋg ɓó m’a tel kɔsee ji joo el.
9 Nɛ Dabid ula Abisai pana: Tɔlee el! Mbata see na̰ ɓa a kaskəm kun jia kɔrɔ ne rɔ yeḛ gə́ Njesigənea̰ wa dəa gə ubu lé lal kar bo̰ nérea ɔs təa’g wa. 10 Dabid pana: Njesigənea̰ si kəmba ya! Ndá to ta lə Njesigənea̰ ya kára ba gə mba ra səa né ya, banelə ndɔ ləa a kas ndá a kwəi əsé a kaw loo-rɔ’g ɓa a kwəi keneŋ ɓəi. 11 Wah! Ma ɓa yḛ̀, maji kar Njesigənea̰ ɔgm loo kun jim kɔrɔ ne rɔ yeḛ gə́ Njesigənea̰ wa dəa gə́ ubu lé! Nɛ maji kari un ko̰-niŋga ləa gə́ to mbɔr négəd dəa’g ləm, gə ku-gwɔb-mán ləa ləm tɔ ndá ar sí j’ɔd j’awje .
12 Dabid un ko̰-niŋga gə ku-gwɔb-mán gə́ to mbɔr négəd dɔ Sawul’g ndá d’ɔd d’aw. Dəw kára kara oo dee el ləm, gər né kára el ləma, ndel dɔ ɓi’g el ləm tɔ mbata deḛ lai d’oso gə ɓi gə́ dum kun rɔ ɓidi gə́ ḭ rɔ Njesigənea̰’g ɓa tɔl dee pərəg. 13 Dabid ɔd aw kel loo gə́ raŋg’d, aw aar əw dɔ sém mbal’g ar mbuna loo-si dee to əw gə na̰. 14 Ndá Dabid ra né wəl ar njérɔje ləm, gə Abner, ŋgolə Ner ləm tɔ pana: See i Abner a pata kára el wa.
Abner tel ilá’g pana: See i to na̰ ɓa ra né wəl-wəl dɔ mbai’g wa.
15 Dabid ula Abner pana: See i to diŋgam el wa. See na̰ ɓa as səi mbuna Israɛlje’g ɓəi wa. See ban ɓa i si kəmba aa dɔ mbai gə́ to ɓéije lé el wa. Mbata dəw kára ree gə mba tɔl mbai gə́ to ɓéije lé. 16 Né gə́ i ra neelé to lée’g el. Njesigənea̰ si kəmba ya! I lé kəm kari wəi ya mbata i si kəmba aa dɔ ɓéije gə́ Njesigənea̰ wa dəa gə ubu lé el. Aa loo oo ɓasinè, ko̰-niŋga lə mbai, gə ku-gwɔb-mán ləa gə́ to mbɔr négəd dəa’g lé see to ra wa.
17 Sawul gər ndu Dabid ndá yeḛ pana: Ŋgonəm Dabid, see to ndui-i ya wa.
Dabid tel ilá keneŋ pana: Ǝi mbai gə́ to mbai ləm, to ndum-ma ya.
18 Tɔɓəi yeḛ pana: See gelee ban ɓa mbai ləm un goo kura ləi lad-lad wa. See ɗi ɓa m’ra wa. Esé see ta ɗi ɓa wa dɔm wa. 19 Ɓasinè maji kar mbai gə́ to mbai ləm ur mbia oo ne ta lə kura ləa. Ɓó lé to Njesigənea̰ ya ɓa ɔsi ɓɔḭ-ɓɔḭ gə mba kari oma̰ səm ndá maji karee taa nékar gə́ baḭyee ə̰də lel lé ɓa. Nɛ ɓó lé to dəwje ndá maji kar ndɔl wa dɔ dee no̰ Njesigənea̰’g ya tɔ, mbata deḛ tubam ɓogənè mba kɔrm dan nédɔji’g lə Njesigənea̰ ləm, deḛ d’ulam pana: Maji kam m’aw m’pole magəje gə́ dɔɓee’g ləm tɔ. 20 Wai! Maji kar məsm ɔm naŋg əw gə Njesigənea̰ el. Mbata mbai lə Israɛlje ɔr rɔ aw saŋg ndisa ba ya to gə́ d’aw ne ndo̰ kɛrɛ dɔ mbalje’g bèe.
21 Sawul pana: Ma m’ra kaiya. Maji kari tel ree, ŋgonəm Dabid, mbata m’a ra səi némajel el ŋga mbata ɓogənè i oo loo si kəmba ləm gə́ né gə́ gadee to yaa̰ kəmi’g ya. Ma ɓa m’ra né to gə́ mbə bèe ləm, m’ra majel gə́ al dɔ loo sula ləm tɔ.
22 Dabid tel pana: Aa oo, ko̰-niŋga lə mbai lé ɓa nee. Maji kar dəw kára mbuna njérɔje’g ləi ree taa. 23 Njesigənea̰ a ra gə nana kara gə goo nérea gə́ gə dɔ najee ləm, gə goo ŋgonkoji ləa ləm tɔ mbata Njesigənea̰ ilai jim’g ɓogənè nɛ ma ɓa m’ndigi kun jim kɔrɔ ne rɔ yeḛ gə́ Njesigənea̰ wa dəa gə ubu lé el. 24 To gə́ ɓogənè si kəmba ləi to né gə́ gadee to yaa̰ kəm’g lé si kəmba ləm-ma kara gadee a to yaa̰ kəm Njesigənea̰’g tɔ, tɔɓəi yeḛ a kɔrm dan néurtije’g lai tɔ.
25 Yen ŋga Sawul ula Dabid pana: Maji kar dɔ ŋgonəm Dabid ai səgərə! I a teḛkɔr dɔ kula raije’g ya.
Bèe ɓa Dabid un rəw ləa aw ləm, Sawul kara tel aw kəi ləa ləm tɔ.
