Ma didina mi hat Israel-lâ abagei hur fulâ
1 Moise mi dazi kua ala: Agi ngomogi vun ma he ma an hagizi inina, agi tid’igi kam mi, tala agi kagagi karid’a, agi zulugiya, agi kalagi kur ambas sa agi nga hlat ta Ma didina mi gun tam kat á hat mabuyogi ngolo d’a. 2 Agi djib’eregi yam tit ta fiyak ka Ma didina Alo magina mi tinizi kagi á tita abagei hur fulâ gak bizad’a dok fid’id’a á hulongôgi yagi kä, á kugugi á we djib’er magid’a, na ni agi mba ngomogi vun mam ma hed’a d’oze ngomom mbuo zi ge d’a. 3 Mi hulongôgi yagi kä, mi tchagi ki meid’a, mi hagi man ma agi d’oze abuyogi ngolo a wum nga yazi tu d’uo na á tagagi woi ala: Sana mi kak karid’a ni yam tena hol li, wani ni ki zla d’a lara ge pet ta ndeï avun Ma didinid’a. 4 Kur biza d’a dok fid’i ndata baru magina mi tumus nga atagi d’i, asegi mi hop nga d’uo mi. 5 Agi wagi kurugi ala Ma didina Alo magina mi had’agi ni d’igi sana mi hat goroma na. 6 Agi ngomogi vun ma hed’a hi Ma didina Alo maginina, agi tid’igi kur lovot mamba á lum mandaram mi.
Kuk ka kur ambas sa Alona mi hle vunam kata
7 Moise mi dazi kua ala: Ma didina Alo magina nga mi kalagi kur ambas sa djivi d’a toliyon nda nga d’i djang kuad’a, d’a golongeî suma laud’a a nga kuad’a, d’a mbiyo ma ad’u andagad’a kä na nga mi sulul lei kur hora akulo yam ahuniyôna mi d’a. 8 Nambas sa wul gemena, awu orsâ, guguzlud’a, tuluma kagu grenatna. Nambas sa mbul olifâ ki mbul ayuma a nga kuad’a. 9 Nambas sa agi mba tagi avuna kua ngola heîd’a. Va mba kid’agi kua d’i. Nambas sa ahuniyô matna ni kaweinid’a. Ahuniyô matna ni suma agi djugud’ogi kawei ma hleuna kua d’a.
10 Fata agi tagi agi hobogid’a, agi mba lagi mersi mi Ma didina Alo magina yam ambas sa djivi d’a mi hagizid’a. 11 Agi gologi tagi djiviya, agi maragi yam Ma didina Alo magina á ngomogi vun mam ma hed’a ki gat ta teteng nga an nga ni hagizi ini wanda d’i. 12 Fata agi tagi agi hobogid’a, fata agi minigi gongîyo suma djivi suma agi mba burugi kuruzina, 13 fata amuzleina kahok magina ki bege magid’a ki lor magid’a a mba zul kahle magi suma lara ge pet suma a mba i avogovo’îd’a, 14 agi gologi tagi djiviya, ar agi maragi yam Ma didina Alo magi ma buzugugï woi kur ambas sa Ezipte-d’a kur yima a lagi magomba kuana d’i. 15 Ni mam ma mi tid’ï ki sed’egi hur ful ma tcho ma duwak ma guguyo suma ayîna ki hurdud’a a nga kuana; ata yima ga’al ma bei mbina ba na, mi ndagi mbina ata ahina d’a ad’eng mata kal teglesa mi. 16 Ni mam ma mi hagi man ma abuyogi ngolo a wum nga yazi tu d’uo abagei hur fulâ á ted’a á hulongôgi yagi kä á lagi djivid’a bugolâ. 17 Agi gologi tagi djiviya! Ar agi dagi kurugi ala nad’eng magid’a ki sib’ik magid’a ba, ti fahle suma ndjondjoî ndazina d’i. 18 Agi djib’eregi yam Ma didina Alo magina. Ni mam ba mba mi hagi ad’enga á fahle suma ndjondjoî ndazina á ndak vun ahle ndazina d’igi mam lazi ini na yam vun ma djin ma mam djinim kabuyogi ngolona. 19 Wani le agi maragi yam Ma didina Alo magina, le agi igi bugol alo ma dingâ, le agi lum sunda agi grivigi kä avoromu ni, an nga ni dagi ini woi avunagiya, agi mba dabagi woyo. 20 Gagazi, agi mba dabagi woi d’igi andjaf ma Ma didina mba mi dabam mbei avorogina na kayam agi humugi nga Ma didina Alo magina vunam mbi.
Ma didina mi hat Israel-lâ abagei hur fulâ
1 Moise mi dazi kua ala: Agi ngomogi vun ma he ma an hagizi inina, agi tid’igi kam mi, tala agi kagagi karid’a, agi zulugiya, agi kalagi kur ambas sa agi nga hlat ta Ma didina mi gun tam kat á hat mabuyogi ngolo d’a. 2 Agi djib’eregi yam tit ta fiyak ka Ma didina Alo magina mi tinizi kagi á tita abagei hur fulâ gak bizad’a dok fid’id’a á hulongôgi yagi kä, á kugugi á we djib’er magid’a, na ni agi mba ngomogi vun mam ma hed’a d’oze ngomom mbuo zi ge d’a. 3 Mi hulongôgi yagi kä, mi tchagi ki meid’a, mi hagi man ma agi d’oze abuyogi ngolo a wum nga yazi tu d’uo na á tagagi woi ala: Sana mi kak karid’a ni yam tena hol li, wani ni ki zla d’a lara ge pet ta ndeï avun Ma didinid’a. 4 Kur biza d’a dok fid’i ndata baru magina mi tumus nga atagi d’i, asegi mi hop nga d’uo mi. 5 Agi wagi kurugi ala Ma didina Alo magina mi had’agi ni d’igi sana mi hat goroma na. 6 Agi ngomogi vun ma hed’a hi Ma didina Alo maginina, agi tid’igi kur lovot mamba á lum mandaram mi.
Kuk ka kur ambas sa Alona mi hle vunam kata
7 Moise mi dazi kua ala: Ma didina Alo magina nga mi kalagi kur ambas sa djivi d’a toliyon nda nga d’i djang kuad’a, d’a golongeî suma laud’a a nga kuad’a, d’a mbiyo ma ad’u andagad’a kä na nga mi sulul lei kur hora akulo yam ahuniyôna mi d’a. 8 Nambas sa wul gemena, awu orsâ, guguzlud’a, tuluma kagu grenatna. Nambas sa mbul olifâ ki mbul ayuma a nga kuad’a. 9 Nambas sa agi mba tagi avuna kua ngola heîd’a. Va mba kid’agi kua d’i. Nambas sa ahuniyô matna ni kaweinid’a. Ahuniyô matna ni suma agi djugud’ogi kawei ma hleuna kua d’a.
10 Fata agi tagi agi hobogid’a, agi mba lagi mersi mi Ma didina Alo magina yam ambas sa djivi d’a mi hagizid’a. 11 Agi gologi tagi djiviya, agi maragi yam Ma didina Alo magina á ngomogi vun mam ma hed’a ki gat ta teteng nga an nga ni hagizi ini wanda d’i. 12 Fata agi tagi agi hobogid’a, fata agi minigi gongîyo suma djivi suma agi mba burugi kuruzina, 13 fata amuzleina kahok magina ki bege magid’a ki lor magid’a a mba zul kahle magi suma lara ge pet suma a mba i avogovo’îd’a, 14 agi gologi tagi djiviya, ar agi maragi yam Ma didina Alo magi ma buzugugï woi kur ambas sa Ezipte-d’a kur yima a lagi magomba kuana d’i. 15 Ni mam ma mi tid’ï ki sed’egi hur ful ma tcho ma duwak ma guguyo suma ayîna ki hurdud’a a nga kuana; ata yima ga’al ma bei mbina ba na, mi ndagi mbina ata ahina d’a ad’eng mata kal teglesa mi. 16 Ni mam ma mi hagi man ma abuyogi ngolo a wum nga yazi tu d’uo abagei hur fulâ á ted’a á hulongôgi yagi kä á lagi djivid’a bugolâ. 17 Agi gologi tagi djiviya! Ar agi dagi kurugi ala nad’eng magid’a ki sib’ik magid’a ba, ti fahle suma ndjondjoî ndazina d’i. 18 Agi djib’eregi yam Ma didina Alo magina. Ni mam ba mba mi hagi ad’enga á fahle suma ndjondjoî ndazina á ndak vun ahle ndazina d’igi mam lazi ini na yam vun ma djin ma mam djinim kabuyogi ngolona. 19 Wani le agi maragi yam Ma didina Alo magina, le agi igi bugol alo ma dingâ, le agi lum sunda agi grivigi kä avoromu ni, an nga ni dagi ini woi avunagiya, agi mba dabagi woyo. 20 Gagazi, agi mba dabagi woi d’igi andjaf ma Ma didina mba mi dabam mbei avorogina na kayam agi humugi nga Ma didina Alo magina vunam mbi.
