Marie ti vo mbulâ yam asem Jesus
(Gol Mat 26.6-13Mar 14.3-9)1 Bur ma vun til ma Pa’â ar karagaya, Jesus mi mba Betani ata yima Lazar ma mam tcholom akulo aduk suma matnina mi nga kuana. 2 Ata yi máma, a lum tena. Marta nga d’i lazi sunda, wani Lazar nga aduk suma a nga kak kä ki Jesus avun tenina. 3 Marie ti hle mbul nar ma d’igila hirwiling ma his ma afufuî ma guzum kal teglesâ ndak nus kilona, ti vom yam asem Jesus, ti sed’emzi woi ki tumus sa kata. Hur azina b’ik kä ki his ma afufuîna b’ib’ik. 4 Wani Judas Iskariyot ma tu ma aduk mam suma hata ma ar go á hum abo sumina, mi dala: 5 Ni kayam me ba, a gus mbul máma woi ir bege d’a hapa kikis hindi á he mi suma houd’a d’uo ge? 6 Mi de hina kayam mi le ni yam suma houd’a d’i, wani kayam mam mi sama kula, bid’im mba gurzud’a nga nabomu, nga mi kul bege d’a azi nga tchugut kura mi.
7 Kayam ndata, Jesus mi dala: Agi arad’u! Agi arat ti ngom mbul máma yam bur ma tos mana. 8 Kayam agi nga ki suma houd’a teteu, wani an nga ki sed’egi teteu d’i.
Juif-fâ a ndjak vunazi yam Lazar
9 Kid’a ablau suma ngola aduk Juif-fâ a hum ala Jesus mi nga avo Betani-d’a, a mba, wani a mba ná we Jesus hol li, wani ná gol Lazar ma mam tcholom akulo aduk suma matnina mi. 10 Wani nglo suma ngat buzuna a ndjak vunazi á tchi Lazar woyo, 11 kayam ablau Juif a wal lei ki sed’ezi ni kayam mamu, a he gagazid’a yam Jesus.
Jesus mi kal kur Jerusalem
(Gol Mat 21.1-11Mar 11.1-11Luc 19.28-40)12 Tcha ndjivinda ablau suma ngola a mba vun tilâ a hum ala Jesus nga mi mba Jerusalem. 13 A yo hum tumura aboziya, a buzuk kei á d’ugulomu, a de ki delezi akulo ala: Ei suburi Alona. Ar Alona mi b’e vunam yam sama nga mi mba ki simiyê Ma didinina. Ar Alona mi b’e vunam yam Amulâ hi Israel-lîna mi.
14 Jesus mi fe gor korona, mi nga kam d’igi a b’ir kur mbaktumba hAlonid’a na ala:
15 Agi suma Siyon-na, agi lagi mandar ri.
Gola! Amul magina nga mi djïya,
mi nga kak kä yam gor korona.
16 Mam suma hata a we nga ad’u zla ndata avok ki, wani kid’a Alona mi hlum akulo mi suburumba, humazi gazi yam zla d’a mbaktumba hAlonid’a ti dat kamba kahle suma azi lazi ki sed’ema mi.
17 Suma pet suma a nga ki Jesus ata yima mi yi Lazar woi kur zula mi tcholom akulo aduk suma matnina, a le glangâsâ yam ahle ndazina. 18 Kayam ndata, ablau suma a buzuk kei á d’ugulomu, kayam a hum zla vama simat ma mi luma. 19 Kayam ndata, Fariziyêna a de tazi ala: Agi gologiya, suma pet a nga i gevemu. Agi ndak á lagi va d’uo d’a.
Gre’â a min á we Jesus
20 Grek suma dingâ a nga aduk suma a i á kud’or Alona ata yima vun tilâ na. 21 Azi i gen Filip ma Betsaida ma Galile-na, a djobom ala: Sama ngolâ, ami min wami Jesus.
22 Filip mi i de mi Andre, azi djak a i de mi Jesus. 23 Jesus mi hulong dazi ala: Yina ndak wa kayam Alona mi suburun an Gor Sana. 24 Gagazi, an nga ni dagiya, le ir awuna nde kä, le mi mit tuo ni, mba mi arî ki tumba. Le mi mid’a ni, mba mi le irâ ablaud’a. 25 Sama le yam tama, mba mi ba tam mbeyo, wani sama noî tam mbei kur duniyad’ina, mba mi fe ari d’a didinda. 26 Le sana mi min á lan sunda ni, mbeî mi tit ad’unu, kayam yima an mba kak kuana, man ma sunda mba mi kak kua mi. Le sana nga mi lan sunda ni, Abun mba mi hum ngola.
Jesus mi de woi yam mad’amu
27 Jesus mi dala: Ki tchetchemba, vunadigan ndi pat fek, an mba ni de nana ge? An mba ni dala: Abunu, ang sud’un ndei ata ler ra wanda zu? Hawa, ni kayam ndata ba, an mba á fe ndaka kur ler ra wanda. 28 Abunu, ang subur simiyêngû.
Kayam ndata, dela ti tcholï akulo ti dala: An suburum wa da’, an mba hulong suburum kua d’ei.
29 Kayam ndata, ablau suma a nga tchola ata yi mámina, a hum del ndata, a de tazi ala: Nalona ba, mi breyâ. Suma hiuna ala: Ni malaikana ba, mi de zlad’a ki sed’emu.
30 Jesus mi hulong dazi ala: Del ndata ti de ni kan an ndi, wani ti de ni kagi agiya. 31 Ki tchetchemba, sariyad’a nga yam duniya ndata, an mba ni dik ma te yam duniya ndatina woi abua. 32 Fata a gaban akulod’a, an mba ni tanï suma pet gevenu. 33 Mi de hina ná tak mad’am ma mam mba mi mitna.
34 Ablau suma a hulong dum ala: Ami humumi kur gat meid’a ala Mesi mba mi kak gak didinu mi na. Ni nana ba, ang dala mbeî a mba gap Gor Sana akulo ge? Gor Sana ni nge ge?
35 Kayam ndata, Jesus mi dazi ala: B’od’a nga ki sed’egi tua ndjö. Agi tid’igi kur b’o d’a nga ki sed’egid’a, kayam ar nduvunda ti mba kagi d’i. Sama nga mi tit kur nduvundina, nga mi we yima mi i kuana d’i. 36 Ata yima b’od’a ti nga ki sed’egina, ar agi hagi gagazid’a kad’u, kayam agi mbud’ugi suma hi b’od’ina.
Juif-fâ a he nga gagazid’a yam Jesus d’i
Kid’a Jesus mi de zla ndata dad’a, mi iya, mi ngei tam mbei iraziya. 37 Mi lazi ahle suma ndandalâ ngola hina pî, a he nga gagazid’a kam mbi. 38 Ni kayam zla d’a ma djok vun Alona Isai mi dat ala:
Salad’a, ni nge ba, mi he gagazid’a yam zla d’a ami tchat walata ge?
Ni nge ba, Ma didina mi tagam ad’eng mamba ge d’a ndak memet.
39 Kayam ndata, azi ndak á he gagazid’a d’i, kayam Isai mi de kua ala:
40 Alona mi duguzi iraziya,
mi b’alazi huruzi mi,
kayam azi we ki irazi d’i,
azi wad’ud’a kuruzi d’uo mi
tala azi mbut huruzi mi sud’uziya d’a.
41 Isai mi de zla ndata hina, kayam mi we subura hi Jesus-d’a, mi de kam mi.
42 Hina pî, suma ablaud’a aduk suma nglona a he gagazid’a kamu, wani a de nga woi pid’ak kuo kayam azi le ni mandara Fariziyêna tala azi digizi woi abu kur gong mazi d’a toka d’uo d’a. 43 Ni kayam azi min ni subura hi sumid’a kal subura hAlonid’a.
Zla d’a ded’a hi Jesus-d’a mba d’i ka sariyad’a yam suma
44 Jesus mi de ki delem akulo ala: Sama he gagazid’a kana, mi he ni gagazid’a kan an ndi, wani mi he ni gagazid’a yam mam ma sununïna. 45 Sama wan ki irama, mi we ni mam ma mi sununïna. 46 An ni b’o d’a mba kur duniyad’id’a, kayam sama lara pî ma he gagazid’a kana, mba mi kak kur nduvunda d’i. 47 Le sama hum zla manda, le mi ngomot tuo ni, ni an ba ni kam sariyad’a kam mbi, kayam an mba kur duniyad’a ná ka sariyad’a yam suma yam andagad’ina d’i, wani á sut suma yam andagad’ina. 48 Sama noyôn ndei ma ve zla manda d’uo na, ma mba mi kam sariyad’a kama mi nga. Zla d’a an data, ni ndat ba, mba d’i kam sariyad’a kam kur bur ma dabid’a. 49 Kayam an nga ni de va yam tan ndi, wani Abun ma mi sununïna ba, mi han vuna yam vama an nga ni duma ki zla d’a an mba ni data mi. 50 An we vun mam ma hed’a nari d’a didinda. Kayam ndata, zla d’a an nga ni data, an de ni d’igi Abun dan na mi.
Marie ti vo mbulâ yam asem Jesus
(Gol Mat 26.6-13Mar 14.3-9)1 Bur ma vun til ma Pa’â ar karagaya, Jesus mi mba Betani ata yima Lazar ma mam tcholom akulo aduk suma matnina mi nga kuana. 2 Ata yi máma, a lum tena. Marta nga d’i lazi sunda, wani Lazar nga aduk suma a nga kak kä ki Jesus avun tenina. 3 Marie ti hle mbul nar ma d’igila hirwiling ma his ma afufuî ma guzum kal teglesâ ndak nus kilona, ti vom yam asem Jesus, ti sed’emzi woi ki tumus sa kata. Hur azina b’ik kä ki his ma afufuîna b’ib’ik. 4 Wani Judas Iskariyot ma tu ma aduk mam suma hata ma ar go á hum abo sumina, mi dala: 5 Ni kayam me ba, a gus mbul máma woi ir bege d’a hapa kikis hindi á he mi suma houd’a d’uo ge? 6 Mi de hina kayam mi le ni yam suma houd’a d’i, wani kayam mam mi sama kula, bid’im mba gurzud’a nga nabomu, nga mi kul bege d’a azi nga tchugut kura mi.
7 Kayam ndata, Jesus mi dala: Agi arad’u! Agi arat ti ngom mbul máma yam bur ma tos mana. 8 Kayam agi nga ki suma houd’a teteu, wani an nga ki sed’egi teteu d’i.
Juif-fâ a ndjak vunazi yam Lazar
9 Kid’a ablau suma ngola aduk Juif-fâ a hum ala Jesus mi nga avo Betani-d’a, a mba, wani a mba ná we Jesus hol li, wani ná gol Lazar ma mam tcholom akulo aduk suma matnina mi. 10 Wani nglo suma ngat buzuna a ndjak vunazi á tchi Lazar woyo, 11 kayam ablau Juif a wal lei ki sed’ezi ni kayam mamu, a he gagazid’a yam Jesus.
Jesus mi kal kur Jerusalem
(Gol Mat 21.1-11Mar 11.1-11Luc 19.28-40)12 Tcha ndjivinda ablau suma ngola a mba vun tilâ a hum ala Jesus nga mi mba Jerusalem. 13 A yo hum tumura aboziya, a buzuk kei á d’ugulomu, a de ki delezi akulo ala: Ei suburi Alona. Ar Alona mi b’e vunam yam sama nga mi mba ki simiyê Ma didinina. Ar Alona mi b’e vunam yam Amulâ hi Israel-lîna mi.
14 Jesus mi fe gor korona, mi nga kam d’igi a b’ir kur mbaktumba hAlonid’a na ala:
15 Agi suma Siyon-na, agi lagi mandar ri.
Gola! Amul magina nga mi djïya,
mi nga kak kä yam gor korona.
16 Mam suma hata a we nga ad’u zla ndata avok ki, wani kid’a Alona mi hlum akulo mi suburumba, humazi gazi yam zla d’a mbaktumba hAlonid’a ti dat kamba kahle suma azi lazi ki sed’ema mi.
17 Suma pet suma a nga ki Jesus ata yima mi yi Lazar woi kur zula mi tcholom akulo aduk suma matnina, a le glangâsâ yam ahle ndazina. 18 Kayam ndata, ablau suma a buzuk kei á d’ugulomu, kayam a hum zla vama simat ma mi luma. 19 Kayam ndata, Fariziyêna a de tazi ala: Agi gologiya, suma pet a nga i gevemu. Agi ndak á lagi va d’uo d’a.
Gre’â a min á we Jesus
20 Grek suma dingâ a nga aduk suma a i á kud’or Alona ata yima vun tilâ na. 21 Azi i gen Filip ma Betsaida ma Galile-na, a djobom ala: Sama ngolâ, ami min wami Jesus.
22 Filip mi i de mi Andre, azi djak a i de mi Jesus. 23 Jesus mi hulong dazi ala: Yina ndak wa kayam Alona mi suburun an Gor Sana. 24 Gagazi, an nga ni dagiya, le ir awuna nde kä, le mi mit tuo ni, mba mi arî ki tumba. Le mi mid’a ni, mba mi le irâ ablaud’a. 25 Sama le yam tama, mba mi ba tam mbeyo, wani sama noî tam mbei kur duniyad’ina, mba mi fe ari d’a didinda. 26 Le sana mi min á lan sunda ni, mbeî mi tit ad’unu, kayam yima an mba kak kuana, man ma sunda mba mi kak kua mi. Le sana nga mi lan sunda ni, Abun mba mi hum ngola.
Jesus mi de woi yam mad’amu
27 Jesus mi dala: Ki tchetchemba, vunadigan ndi pat fek, an mba ni de nana ge? An mba ni dala: Abunu, ang sud’un ndei ata ler ra wanda zu? Hawa, ni kayam ndata ba, an mba á fe ndaka kur ler ra wanda. 28 Abunu, ang subur simiyêngû.
Kayam ndata, dela ti tcholï akulo ti dala: An suburum wa da’, an mba hulong suburum kua d’ei.
29 Kayam ndata, ablau suma a nga tchola ata yi mámina, a hum del ndata, a de tazi ala: Nalona ba, mi breyâ. Suma hiuna ala: Ni malaikana ba, mi de zlad’a ki sed’emu.
30 Jesus mi hulong dazi ala: Del ndata ti de ni kan an ndi, wani ti de ni kagi agiya. 31 Ki tchetchemba, sariyad’a nga yam duniya ndata, an mba ni dik ma te yam duniya ndatina woi abua. 32 Fata a gaban akulod’a, an mba ni tanï suma pet gevenu. 33 Mi de hina ná tak mad’am ma mam mba mi mitna.
34 Ablau suma a hulong dum ala: Ami humumi kur gat meid’a ala Mesi mba mi kak gak didinu mi na. Ni nana ba, ang dala mbeî a mba gap Gor Sana akulo ge? Gor Sana ni nge ge?
35 Kayam ndata, Jesus mi dazi ala: B’od’a nga ki sed’egi tua ndjö. Agi tid’igi kur b’o d’a nga ki sed’egid’a, kayam ar nduvunda ti mba kagi d’i. Sama nga mi tit kur nduvundina, nga mi we yima mi i kuana d’i. 36 Ata yima b’od’a ti nga ki sed’egina, ar agi hagi gagazid’a kad’u, kayam agi mbud’ugi suma hi b’od’ina.
Juif-fâ a he nga gagazid’a yam Jesus d’i
Kid’a Jesus mi de zla ndata dad’a, mi iya, mi ngei tam mbei iraziya. 37 Mi lazi ahle suma ndandalâ ngola hina pî, a he nga gagazid’a kam mbi. 38 Ni kayam zla d’a ma djok vun Alona Isai mi dat ala:
Salad’a, ni nge ba, mi he gagazid’a yam zla d’a ami tchat walata ge?
Ni nge ba, Ma didina mi tagam ad’eng mamba ge d’a ndak memet.
39 Kayam ndata, azi ndak á he gagazid’a d’i, kayam Isai mi de kua ala:
40 Alona mi duguzi iraziya,
mi b’alazi huruzi mi,
kayam azi we ki irazi d’i,
azi wad’ud’a kuruzi d’uo mi
tala azi mbut huruzi mi sud’uziya d’a.
41 Isai mi de zla ndata hina, kayam mi we subura hi Jesus-d’a, mi de kam mi.
42 Hina pî, suma ablaud’a aduk suma nglona a he gagazid’a kamu, wani a de nga woi pid’ak kuo kayam azi le ni mandara Fariziyêna tala azi digizi woi abu kur gong mazi d’a toka d’uo d’a. 43 Ni kayam azi min ni subura hi sumid’a kal subura hAlonid’a.
Zla d’a ded’a hi Jesus-d’a mba d’i ka sariyad’a yam suma
44 Jesus mi de ki delem akulo ala: Sama he gagazid’a kana, mi he ni gagazid’a kan an ndi, wani mi he ni gagazid’a yam mam ma sununïna. 45 Sama wan ki irama, mi we ni mam ma mi sununïna. 46 An ni b’o d’a mba kur duniyad’id’a, kayam sama lara pî ma he gagazid’a kana, mba mi kak kur nduvunda d’i. 47 Le sama hum zla manda, le mi ngomot tuo ni, ni an ba ni kam sariyad’a kam mbi, kayam an mba kur duniyad’a ná ka sariyad’a yam suma yam andagad’ina d’i, wani á sut suma yam andagad’ina. 48 Sama noyôn ndei ma ve zla manda d’uo na, ma mba mi kam sariyad’a kama mi nga. Zla d’a an data, ni ndat ba, mba d’i kam sariyad’a kam kur bur ma dabid’a. 49 Kayam an nga ni de va yam tan ndi, wani Abun ma mi sununïna ba, mi han vuna yam vama an nga ni duma ki zla d’a an mba ni data mi. 50 An we vun mam ma hed’a nari d’a didinda. Kayam ndata, zla d’a an nga ni data, an de ni d’igi Abun dan na mi.
