Vun agrek ma abo ma yorogo ma a tinim iram vam mamulîna
1 Sa máma mi hulongôn mi in avun agrek ma abu ma abo ma yorogona hi yima a tinim iram vama. Wani vun agrek máma mi ni duka. 2 Ma didina mi dan ala: Vun agrek máma mba mi arî duka na, ar sa mi malam mbei d’i. Sa mba mi kal kua d’i, kayam an Ma didina Alona hi Israel-lîna ni kal kua da’. Mba mi arî duka na. 3 Wani amulâ ni sama ngolâ, mi ndak á mba á te te ma a tinim iram vama avoronu. Mam mba mi kalï krovo ni ki vun agrek ma abo ma yorogona hi gong nga ngolina hol, mba mi nde woi ni ki vun agrek máma mi.
Andjaf suma dingâ a mba kal kur gong nga kud’ora d’i
4 Bugola, sa máma mi hlan avun agrek ma norâ, mi mban avun gong nga kud’ora hAlonid’a. An gol yina, ni we subura hi Ma didinid’a ti oî gong mam mba kud’ora. An grif kä avoromu. 5 Ma didina mi dan ala: Ang gor sana, ang mal irang ki humang ngeyo, ang gol tang djivi yam ahlena pet suma an dangzi yam vun ma he ma yam gong man nda kud’orina, yam gat ta kata mi. Ang djib’er djivi yam vun ma hed’a ki gata suma an hazi yam kal la klavid’a ki nde d’a woi abud’ina mi.
6 Ang de mi Israel suma bei hum vunina ala: Salad’a Ma didina mi dala: Agi Israel-lâ, an ndak wa ki sun magi d’a ndjendje d’a agi lata. 7 Ata yima agi mbagi kangoyogei suma bei a ngad’azi bayâd’a suma a ge nga yazi kä ad’u vun man ma hed’a d’uo na kur gong man nda kud’orina, agi mbud’ut ndjendjed’a. Ata yima agi nga hagi avungô mana ki mbulâ ki buzuna he d’a hawad’a mi filei magi ma ndjendjed’ina, agi bud’ugi ni vun man ma djin ma an djinim ki sed’egina woyo. 8 Agi tagid’a lagi nga sun manda d’i, wani agi vragagi ni angoyogeina blangâgi á le sun ndata kur gong man nda kud’ora. 9 Kayam ndata, an Salad’a Ma didina ni de woi mbak ala: Angei ma lara pî ma bei ngad’am bayâd’a ma mi ge nga yam kä ad’u vun man ma hed’a d’uo na, le mi nga ni kaka adigagi agi Israel-lâ pî, mba mi kal kur gong man nda kud’ora d’i.
Gat ta yam suma hi Levi-nid’a
10 Ma didina mi de kua ala: Suma hi Levi suma a d’es sei dei ki sed’en ata yima Israel-lâ a d’es sei dei ki sed’en á tit ad’u filei mazinina, a mba zi aneka hi tcho mazid’id’a kaziya. 11 A mba lan sunda, a mba kak ndjola avun agre’â hi gong man nda kud’orina teteng, a mba le sunda kurut teteng mi, a mba ngat d’uwar ma a mba hum vama ngat buzu ma ngalina ki vama a hum yam he d’a hawa d’a dingina, a mba ka’î suma ndjun suma avoron mi. 12 Wani kayamba azi le sun nda ngat buzuna avok fileina á tchuk Israel-lâ kur tchod’id’a, ni kayam ndata ba, an hlabon akulo an gun tan ala: Sum ndazina a mba zi aneka hi tcho mazid’id’a kaziya. An Salad’a Ma didina ni de na. 13 Ar azi mba avoron á le sun nda ngat buzuna d’i, ar azi hut go kahle suma a tinizi irazi vazi kana d’i, ar azi kal kur Yi man ma a tinim iram vam ma kal teglesâ d’uo mi. Hina wani, azi mba zi aneka hi sun mazi d’a zulo d’a ndjendje d’a azi lata kaziya. 14 An mba ni hazi ni sun nda le d’a akid’eid’a kur gong man nda kud’ora.
Gat ta yam suma ngat buzunid’a
15 Ma didina mi de kua ala: Suma hi Levi suma ngat buzu suma ad’u andjafâ hi Sadok suma a ngom sun manda ata yima Israel-lâ a d’es sei dei ki sed’ena, azi a mba hud’ï geven go á lan sunda, a mba tchol avoron á han mbulâ ki buzuna mi. An Salad’a Ma didina ni de na. 16 Sum ndazina a mba kal kur gong man nda kud’ora, a mba hut go ki tabul mana á lan sunda, a mba ngom sun manda mi. 17 Fata azi mba kal avun agre’â hatrang nga krovod’ina, azi tchu’î baru d’a luluîd’a ataziya. Ata yima azi nga le sunda kur atrang nga krovod’a kur gong man nda kud’ora mi na, azi tchuk baru ma a tchilim ki tumus tumiyônina atazi d’i. 18 Azi tin ni djum mba baru d’a luluîd’a kaziya, a tchuk kalsong ma baru ma luluîna furuzi mi. Azi tchuk baru ma mi gazi tazi zumalina d’uo mi. 19 Ata yima a mba buzuk kei á i hur atrang nga abud’a gen suma a nga tokina, a fok baru ma a le ki sundina kä woyo, a tchuguzi kur gongîyo suma a tinizi irazi vazina. Bugola, a tchu’î baru ma dingâ atazi ba, a buzuk ki woi abua. Hina wani, suma hawana a mba fe lovota á mbut suma a tinizi irazi vazina d’uo mi.
20 Ar azi wel yazi woi d’i, a ar tumuzuzi ti se fiyaka d’uo mi, wani ar azi ngad’at ni ngad’a. 21 Ma ngat buzu ma lara pî mi tche süm guguzlud’a ata yima nga mi kal hur atrang nga krovod’ina d’i. 22 Sama lara pî adigazi mi vatcha d’a modonod’a d’oze atcha d’a ndjuvut mi digit teid’a d’i, wani ar mi ve ni gor wei d’a Israel la bei ngaf ki mandjufâ d’oze atcha d’a modonod’a hi ma ngat buzunid’a.
23 Azi mba hat sum mana a wal ir ahle suma hawana kahle suma a tinizi irazi vazina, á wal ir ahle suma ndjendjed’a kahle suma yed’etna mi. 24 Le zlad’a nde aduk suma ni, azi mba ka’î suma ka sariyad’a, azi mba ka ni sariya d’a d’ingêra yam gat manda. Azi mba le vun til mana yam gat manda ki vun man ma hed’a, azi mba ngom bur man ma sabatna á tinim iram vam mi.
25 Ar ma ngat buzuna mi hut go ki matna á mbut ki tam ndjendjed’a d’i. Wani mi mbut tam ndjendjed’a ni ki mad’a abumu, mad’a asumu, mad’a goroma, mad’a goromba, mad’a wiyema d’oze mad’a wiyem mba bei ve mandjufîd’a hol. 26 Bugol matna, le mi mbut tam yed’et da ni, mi djup gak burâ kid’iziya. 27 Kur bur ma mi kal hur atrang nga krovod’a avun gong man nda kud’orina, ar mi he vama ngat buzu ma yam tchod’ina. An Salad’a Ma didina ni de na.
28 Agi Israel-lâ, an ni djona hi suma ngat buzunina. Ar agi hagizi djona adigagi d’i, kayam an tanda ni va mazi ma djona. 29 Azi mba wul tazi ni ki he d’a hawa d’a afuta kahle suma ngat buzu suma yam tchod’ina kahle suma ngat buzu suma yam vat hurîna mi. Ahlena pet suma a tinizi irazi vazi yam an Ma didinina, a mba arî mazina mi. 30 Vud’agu ma ne avo’â kahle suma a handjina pet ni mazina. Avungô ma agi mba ilim avo’â, agi mba humî mi suma ngat buzuna. Hina wani, an mba ni b’e vunan yam aziyagiya. 31 Ar suma ngat buzuna a mut d’uwar roze alei ma matna d’oze ma vana vuma d’uo mi.
Vun agrek ma abo ma yorogo ma a tinim iram vam mamulîna
1 Sa máma mi hulongôn mi in avun agrek ma abu ma abo ma yorogona hi yima a tinim iram vama. Wani vun agrek máma mi ni duka. 2 Ma didina mi dan ala: Vun agrek máma mba mi arî duka na, ar sa mi malam mbei d’i. Sa mba mi kal kua d’i, kayam an Ma didina Alona hi Israel-lîna ni kal kua da’. Mba mi arî duka na. 3 Wani amulâ ni sama ngolâ, mi ndak á mba á te te ma a tinim iram vama avoronu. Mam mba mi kalï krovo ni ki vun agrek ma abo ma yorogona hi gong nga ngolina hol, mba mi nde woi ni ki vun agrek máma mi.
Andjaf suma dingâ a mba kal kur gong nga kud’ora d’i
4 Bugola, sa máma mi hlan avun agrek ma norâ, mi mban avun gong nga kud’ora hAlonid’a. An gol yina, ni we subura hi Ma didinid’a ti oî gong mam mba kud’ora. An grif kä avoromu. 5 Ma didina mi dan ala: Ang gor sana, ang mal irang ki humang ngeyo, ang gol tang djivi yam ahlena pet suma an dangzi yam vun ma he ma yam gong man nda kud’orina, yam gat ta kata mi. Ang djib’er djivi yam vun ma hed’a ki gata suma an hazi yam kal la klavid’a ki nde d’a woi abud’ina mi.
6 Ang de mi Israel suma bei hum vunina ala: Salad’a Ma didina mi dala: Agi Israel-lâ, an ndak wa ki sun magi d’a ndjendje d’a agi lata. 7 Ata yima agi mbagi kangoyogei suma bei a ngad’azi bayâd’a suma a ge nga yazi kä ad’u vun man ma hed’a d’uo na kur gong man nda kud’orina, agi mbud’ut ndjendjed’a. Ata yima agi nga hagi avungô mana ki mbulâ ki buzuna he d’a hawad’a mi filei magi ma ndjendjed’ina, agi bud’ugi ni vun man ma djin ma an djinim ki sed’egina woyo. 8 Agi tagid’a lagi nga sun manda d’i, wani agi vragagi ni angoyogeina blangâgi á le sun ndata kur gong man nda kud’ora. 9 Kayam ndata, an Salad’a Ma didina ni de woi mbak ala: Angei ma lara pî ma bei ngad’am bayâd’a ma mi ge nga yam kä ad’u vun man ma hed’a d’uo na, le mi nga ni kaka adigagi agi Israel-lâ pî, mba mi kal kur gong man nda kud’ora d’i.
Gat ta yam suma hi Levi-nid’a
10 Ma didina mi de kua ala: Suma hi Levi suma a d’es sei dei ki sed’en ata yima Israel-lâ a d’es sei dei ki sed’en á tit ad’u filei mazinina, a mba zi aneka hi tcho mazid’id’a kaziya. 11 A mba lan sunda, a mba kak ndjola avun agre’â hi gong man nda kud’orina teteng, a mba le sunda kurut teteng mi, a mba ngat d’uwar ma a mba hum vama ngat buzu ma ngalina ki vama a hum yam he d’a hawa d’a dingina, a mba ka’î suma ndjun suma avoron mi. 12 Wani kayamba azi le sun nda ngat buzuna avok fileina á tchuk Israel-lâ kur tchod’id’a, ni kayam ndata ba, an hlabon akulo an gun tan ala: Sum ndazina a mba zi aneka hi tcho mazid’id’a kaziya. An Salad’a Ma didina ni de na. 13 Ar azi mba avoron á le sun nda ngat buzuna d’i, ar azi hut go kahle suma a tinizi irazi vazi kana d’i, ar azi kal kur Yi man ma a tinim iram vam ma kal teglesâ d’uo mi. Hina wani, azi mba zi aneka hi sun mazi d’a zulo d’a ndjendje d’a azi lata kaziya. 14 An mba ni hazi ni sun nda le d’a akid’eid’a kur gong man nda kud’ora.
Gat ta yam suma ngat buzunid’a
15 Ma didina mi de kua ala: Suma hi Levi suma ngat buzu suma ad’u andjafâ hi Sadok suma a ngom sun manda ata yima Israel-lâ a d’es sei dei ki sed’ena, azi a mba hud’ï geven go á lan sunda, a mba tchol avoron á han mbulâ ki buzuna mi. An Salad’a Ma didina ni de na. 16 Sum ndazina a mba kal kur gong man nda kud’ora, a mba hut go ki tabul mana á lan sunda, a mba ngom sun manda mi. 17 Fata azi mba kal avun agre’â hatrang nga krovod’ina, azi tchu’î baru d’a luluîd’a ataziya. Ata yima azi nga le sunda kur atrang nga krovod’a kur gong man nda kud’ora mi na, azi tchuk baru ma a tchilim ki tumus tumiyônina atazi d’i. 18 Azi tin ni djum mba baru d’a luluîd’a kaziya, a tchuk kalsong ma baru ma luluîna furuzi mi. Azi tchuk baru ma mi gazi tazi zumalina d’uo mi. 19 Ata yima a mba buzuk kei á i hur atrang nga abud’a gen suma a nga tokina, a fok baru ma a le ki sundina kä woyo, a tchuguzi kur gongîyo suma a tinizi irazi vazina. Bugola, a tchu’î baru ma dingâ atazi ba, a buzuk ki woi abua. Hina wani, suma hawana a mba fe lovota á mbut suma a tinizi irazi vazina d’uo mi.
20 Ar azi wel yazi woi d’i, a ar tumuzuzi ti se fiyaka d’uo mi, wani ar azi ngad’at ni ngad’a. 21 Ma ngat buzu ma lara pî mi tche süm guguzlud’a ata yima nga mi kal hur atrang nga krovod’ina d’i. 22 Sama lara pî adigazi mi vatcha d’a modonod’a d’oze atcha d’a ndjuvut mi digit teid’a d’i, wani ar mi ve ni gor wei d’a Israel la bei ngaf ki mandjufâ d’oze atcha d’a modonod’a hi ma ngat buzunid’a.
23 Azi mba hat sum mana a wal ir ahle suma hawana kahle suma a tinizi irazi vazina, á wal ir ahle suma ndjendjed’a kahle suma yed’etna mi. 24 Le zlad’a nde aduk suma ni, azi mba ka’î suma ka sariyad’a, azi mba ka ni sariya d’a d’ingêra yam gat manda. Azi mba le vun til mana yam gat manda ki vun man ma hed’a, azi mba ngom bur man ma sabatna á tinim iram vam mi.
25 Ar ma ngat buzuna mi hut go ki matna á mbut ki tam ndjendjed’a d’i. Wani mi mbut tam ndjendjed’a ni ki mad’a abumu, mad’a asumu, mad’a goroma, mad’a goromba, mad’a wiyema d’oze mad’a wiyem mba bei ve mandjufîd’a hol. 26 Bugol matna, le mi mbut tam yed’et da ni, mi djup gak burâ kid’iziya. 27 Kur bur ma mi kal hur atrang nga krovod’a avun gong man nda kud’orina, ar mi he vama ngat buzu ma yam tchod’ina. An Salad’a Ma didina ni de na.
28 Agi Israel-lâ, an ni djona hi suma ngat buzunina. Ar agi hagizi djona adigagi d’i, kayam an tanda ni va mazi ma djona. 29 Azi mba wul tazi ni ki he d’a hawa d’a afuta kahle suma ngat buzu suma yam tchod’ina kahle suma ngat buzu suma yam vat hurîna mi. Ahlena pet suma a tinizi irazi vazi yam an Ma didinina, a mba arî mazina mi. 30 Vud’agu ma ne avo’â kahle suma a handjina pet ni mazina. Avungô ma agi mba ilim avo’â, agi mba humî mi suma ngat buzuna. Hina wani, an mba ni b’e vunan yam aziyagiya. 31 Ar suma ngat buzuna a mut d’uwar roze alei ma matna d’oze ma vana vuma d’uo mi.
