1 Jesus mi dazi kua ala: Gagazi, an nga ni dagiya, suma ding suma a nga tchola aduk ka hina a mba bo d’i, gak azi mba wAlona mi mba kad’enga á te leu mamba tua.
Jesus tam mbi mbut vat zenen
(Gol Mat 17.1-13Luc 9.28-36)2 Bugol kur bur ma karagayana, Jesus mi yo Pierre azi ki Jacques ki Jean, mi i ki sed’ezi akulo yam ahina d’a fiyak ka ked’iwurenga woi vaziya. Tam mbi mbut vat zenen avoroziya. 3 Baru mamba ti mbut ngal wiwilik hapa titil, sama b’o barud’a hapa yam andagad’a ka hî ma mi ndak á b’ot hapa hina na nga d’i. 4 Mam suma hat suma hindina a we Elie azi ki Moise a nga yo siretna ki Jesus.
5 Pierre mi de mi Jesus ala: Ma hat suma, djivid’a ei kagei ka hî. Ar ami vami zlub’ud’a hindi, tu kangû, tu yam Moise, tu yam Elie mi. 6 Kayam mi we nga vama mi duma d’i abo mandar ma tchazi su na.
7 D’ugula ti mba, ti kulubuzi kanguzad’u, dela ti tcholï kur d’ugula, ti dala: Wana ni Goron ma an hurun vum heîna; agi humugiziya. 8 Atogo hina zak, suma hata a gol geveziya, wani a we nga sa d’i, ni Jesus hol ki sed’eziya.
9 Kid’a azi nga tchugï asezi kä woi yam ahinad’id’a, Jesus mi gad’azi ala: Agi dagi vama agi wuma mi sa d’i, gak an Gor Sana ni tchol akulo aduk suma matna mbeî tua.
10 Azi ngom zla ndata kuruzi mi, wani a nga djop tazi ala: Tchol la akulo aduk suma matna ndata, ad’ut nana ge? 11 Mam suma hata a djobom ala: Ni kayam me ba, suma hat gata a nga dala: Elie mba mi mba avo’î mam tua ge?
12 Mi hulong dazi ala: Gagazi, Elie mba mi mba avogo, mba mi min ahlena pet ata yazi ma adjeuna. Wani ni kayam me ba, mbaktumba hAlonid’a ti dala an Gor Sana mba ni fe ndaka ngola ki lasa mi ge? 13 Wani an nga ni dagiya, Elie mi mba wa da’, wani azi lum wa ahlena pet suma huruzi mina d’igi mbaktumba hAlonid’a ti de kam na.
Jesus mi sut gor ma nga ki muzuk ma tchona kuruma
(Gol Mat 17.14-21Luc 9.37-43a)14 Kid’a Jesus azi a mba go ki mam suma hatid’a, azi wablau suma a nguyuziya, suma hat gata a nga tchi tuguyod’a ki sed’ezi mi. 15 Ata yi máma na wat, ablau suma ki zlazi pet a wumu, vunadigazi d’i pat fek, a ringî gevemu, a gum depa.
16 Jesus mi djop mam suma hata ala: Ni yam me ba, agi tchagi tuguyod’a ki sed’ezi ge?
17 Sama dingâ aduk ablau suma mi dum ala: Ma hat suma, an mbangî goron ma nga ki muzuk ma tcho ma d’elem bei de zlad’ina. 18 Ata yima lara ge pet ma le mi vum wa ni, mi tchum kä, angufa dap avunam mbei papa, mi mut siyamu, mi so woi ngingring mi. An de mi mang suma hata a digim mbeyo, wani azi ndak ki.
19 Jesus mi hulong dazi ala: Agi suma bei he gagazid’a suma kur atchogoi d’a wandina na, an mba ni kak ki sed’egi gak mindja ge? An mba ni ve tan ki sed’egi gak mindja ge? Agi mbeyendjïya. 20 A mbamziya. Atogo hina zak, kid’a muzuk ma tcho máma mi we Jesus-d’a, mi pret gorâ daraweî, mi puk kä, nga mi mbuzuk kä dudu kangufa avunamu.
21 Jesus mi de mi gorâ abum ala: Tugud’ei ndata ti fumî mindja dei ge?
Mi dum ala: Ni ki gogorom dei. 22 Wani nga mi gum aduk akud’a teteu, mi gum aduk mbina mi á tchum mbeyo. Wani le ang ndak á le va ni, ang wami hohowomiya, ang ndjunumiya.
23 Jesus mi dum ala: Ni kayam me ba, ang dala: Le ang ndaga ge? Sama he gagazid’ina, mi ndak á lahlena pet.
24 Ata yi máma na wat, gorâ abum mi er ad’um tchina akulo, mi dala: An he wa gagazid’a, ang ndjunun yam bei he gagazi manda.
25 Wani ata yima Jesus mi wablau suma a nga ringî gevezina, mi ngop muzuk ma tcho ma d’elem bei de zlad’a bei hum zlad’ina ala: An hang vuna, ang nde woi kur gorâ, ang hulong kurum mbuo d’a.
26 Wani ata yima mi er ad’um tchina akulona, mi pred’em kua kua, mi nde woyo. Gorâ mbut d’igi sama matna na; ablau suma a nga dala: Mi mit wa. 27 Wani Jesus mi vum abom mi tcholom akulo; mam tchol akulo mi.
28 Kid’a Jesus mi kal avod’a, mam suma hata a djobom gumun vazi ala: Ni kayam me ba, ami ndak á dik muzuk ma tcho máma woi d’uo ge?
29 Mi dazi ala: Andjaf muzuk ma hina na, ang tchenî Alona tua ba, ang digim mbei tua.
Jesus mi de kua yam mad’am ki tchol mamba
(Gol Mat 17.22-23Luc 9.43b-45)30 Jesus azi ki mam suma hata a buzuk kei ata yi máma, a hle yam andaga d’a Galile-d’a. Jesus mi min ala sa wum mbi, 31 kayam nga mi hat mam suma hata ala: A mba han an Gor Sana abo suma; azi mba tchanu. Fata a tchanda, an mba ni tchol akulo aduk suma matna kur bur ma hindina. 32 Wani azi we nga zla ndata ad’ut ti, a le mandarâ á djobomu.
Ma ngol ma adigazina ni nge ge?
(Gol Mat 18.1-5Luc 9.46-48)33 Jesus azi ki mam suma hata a mba kur Kapernayum. Kid’a Jesus mi nga avod’a, mi djop mam suma hata ala: Agi tchagi tagi gagad’a lovot ni yam me ge?
34 Wani a seng silil, kayam me a tchi tazi tuguyod’a kur lovota ala sama ngol ma adigazina ni nge ge? 35 Jesus mi kak kä, mi yi suma dogo yam mbàna, mi dazi ala: Le sana mi min á kak ma avo’â ni, djivid’a mi mbut tam ma blogogi kisâ, mi mbut nazong magina mi.
36 Wani ata yi máma mi ve gogorâ, mi tinim adigaziya. Kid’a mi hlum akulo ahlabamba, mi dazi ala: 37 Sama lara pî ma ve gogorâ d’igi ma wana na atam ki simiyêna, mi van ni anu; sama lara pî ma vana, mi van ni an hol li, wani mi ve ni Ma mi sununïna mi.
Sama nga mi lei huneîd’a d’uo na ni meina
(Gol Luc 9.49-50)38 Jean mi dum ala: Ma hat suma, ami wami sana nga mi tit ki sed’ei d’uo na, nga mi dik muzuk ma teteng ma tchona woi ki simiyêngû. Ami d’elemu, kayam me nga mi tit ki sed’ei d’i.
39 Jesus mi dazi ala: Agi d’elem mbi, kayam me le sana nga mi le sun nda ndandala ki simiyênu ni, mi ndak á de zla d’a tchod’a kan atogo d’i. 40 Kayam sama nga mi lei huneîd’a d’uo na ni meina. 41 Wani sama lara pî ma hagi mbiyo ma tched’a kur kopma yam simiyêna kayambala agi ni suma hi an Christ-sâ d’a ni, gagazi, an nga ni dagiya, Alona mba mi wuragamu.
Jesus nga mi hat yam tcho d’a ngol la kala
(Gol Mat 18.6-9Luc 17.1-2)42 Jesus mi hat mam suma hata kua ala: Nge nge pî ma nga mi le vama b’lak gogorâ aduk gugurei suma a he gagazid’a kana ni, djivid’a hotei a djinim ahina d’a ngola kelemu, a gumza kä aduk alum ma ngolâ. 43 Le abong nga mi ing kur tchod’a ni, ang kam mbeyo. Djivid’a hotei ang kal kur arid’a kabong ma mututungâ tala a ing kur Jahanama aduk aku d’a bei mit teid’a kabong ma dja’â d’a. [44 Ata yi máma, ndjuvulâ nga mi mit ti, akud’a nga d’i mit tuo mi.]
45 Le aseng nga mi ing kur tchod’a ni, ang kam mbeyo. Djivid’a hotei ang kal kur arid’a ki dileîd’a tala a gang aduk Jahanama kaseng djagu d’a. [46 Ata yi máma, ndjuvulâ nga mi mit ti, akud’a nga d’i mit tuo mi.]
47 Le irang nga d’i ing kur tchod’a ni, ang pad’at teyo. Djivid’a kal la ang kal kur leud’a hAlonid’a ki irang mbeka tala a gang aduk Jahanama ki irang zla tat djagu d’a. 48 Ata yi máma, ndjuvulâ nga mi bo d’i, akud’a nga d’i mit tei d’uo mi. 49 Kayam suma pet a mba gozozi kakud’a d’igi a gos ndjuvuna na.
50 Ndjuvuna ni vama djivina, wani le ayâm mi pat teyo ni, ni ki me ba, a mba minim ki blangâma kamas ke? Agi mbud’ugi ni d’igi ndjuvuna na, agi kagagi ki halasa aduk tagiya.
1 Jesus mi dazi kua ala: Gagazi, an nga ni dagiya, suma ding suma a nga tchola aduk ka hina a mba bo d’i, gak azi mba wAlona mi mba kad’enga á te leu mamba tua.
Jesus tam mbi mbut vat zenen
(Gol Mat 17.1-13Luc 9.28-36)2 Bugol kur bur ma karagayana, Jesus mi yo Pierre azi ki Jacques ki Jean, mi i ki sed’ezi akulo yam ahina d’a fiyak ka ked’iwurenga woi vaziya. Tam mbi mbut vat zenen avoroziya. 3 Baru mamba ti mbut ngal wiwilik hapa titil, sama b’o barud’a hapa yam andagad’a ka hî ma mi ndak á b’ot hapa hina na nga d’i. 4 Mam suma hat suma hindina a we Elie azi ki Moise a nga yo siretna ki Jesus.
5 Pierre mi de mi Jesus ala: Ma hat suma, djivid’a ei kagei ka hî. Ar ami vami zlub’ud’a hindi, tu kangû, tu yam Moise, tu yam Elie mi. 6 Kayam mi we nga vama mi duma d’i abo mandar ma tchazi su na.
7 D’ugula ti mba, ti kulubuzi kanguzad’u, dela ti tcholï kur d’ugula, ti dala: Wana ni Goron ma an hurun vum heîna; agi humugiziya. 8 Atogo hina zak, suma hata a gol geveziya, wani a we nga sa d’i, ni Jesus hol ki sed’eziya.
9 Kid’a azi nga tchugï asezi kä woi yam ahinad’id’a, Jesus mi gad’azi ala: Agi dagi vama agi wuma mi sa d’i, gak an Gor Sana ni tchol akulo aduk suma matna mbeî tua.
10 Azi ngom zla ndata kuruzi mi, wani a nga djop tazi ala: Tchol la akulo aduk suma matna ndata, ad’ut nana ge? 11 Mam suma hata a djobom ala: Ni kayam me ba, suma hat gata a nga dala: Elie mba mi mba avo’î mam tua ge?
12 Mi hulong dazi ala: Gagazi, Elie mba mi mba avogo, mba mi min ahlena pet ata yazi ma adjeuna. Wani ni kayam me ba, mbaktumba hAlonid’a ti dala an Gor Sana mba ni fe ndaka ngola ki lasa mi ge? 13 Wani an nga ni dagiya, Elie mi mba wa da’, wani azi lum wa ahlena pet suma huruzi mina d’igi mbaktumba hAlonid’a ti de kam na.
Jesus mi sut gor ma nga ki muzuk ma tchona kuruma
(Gol Mat 17.14-21Luc 9.37-43a)14 Kid’a Jesus azi a mba go ki mam suma hatid’a, azi wablau suma a nguyuziya, suma hat gata a nga tchi tuguyod’a ki sed’ezi mi. 15 Ata yi máma na wat, ablau suma ki zlazi pet a wumu, vunadigazi d’i pat fek, a ringî gevemu, a gum depa.
16 Jesus mi djop mam suma hata ala: Ni yam me ba, agi tchagi tuguyod’a ki sed’ezi ge?
17 Sama dingâ aduk ablau suma mi dum ala: Ma hat suma, an mbangî goron ma nga ki muzuk ma tcho ma d’elem bei de zlad’ina. 18 Ata yima lara ge pet ma le mi vum wa ni, mi tchum kä, angufa dap avunam mbei papa, mi mut siyamu, mi so woi ngingring mi. An de mi mang suma hata a digim mbeyo, wani azi ndak ki.
19 Jesus mi hulong dazi ala: Agi suma bei he gagazid’a suma kur atchogoi d’a wandina na, an mba ni kak ki sed’egi gak mindja ge? An mba ni ve tan ki sed’egi gak mindja ge? Agi mbeyendjïya. 20 A mbamziya. Atogo hina zak, kid’a muzuk ma tcho máma mi we Jesus-d’a, mi pret gorâ daraweî, mi puk kä, nga mi mbuzuk kä dudu kangufa avunamu.
21 Jesus mi de mi gorâ abum ala: Tugud’ei ndata ti fumî mindja dei ge?
Mi dum ala: Ni ki gogorom dei. 22 Wani nga mi gum aduk akud’a teteu, mi gum aduk mbina mi á tchum mbeyo. Wani le ang ndak á le va ni, ang wami hohowomiya, ang ndjunumiya.
23 Jesus mi dum ala: Ni kayam me ba, ang dala: Le ang ndaga ge? Sama he gagazid’ina, mi ndak á lahlena pet.
24 Ata yi máma na wat, gorâ abum mi er ad’um tchina akulo, mi dala: An he wa gagazid’a, ang ndjunun yam bei he gagazi manda.
25 Wani ata yima Jesus mi wablau suma a nga ringî gevezina, mi ngop muzuk ma tcho ma d’elem bei de zlad’a bei hum zlad’ina ala: An hang vuna, ang nde woi kur gorâ, ang hulong kurum mbuo d’a.
26 Wani ata yima mi er ad’um tchina akulona, mi pred’em kua kua, mi nde woyo. Gorâ mbut d’igi sama matna na; ablau suma a nga dala: Mi mit wa. 27 Wani Jesus mi vum abom mi tcholom akulo; mam tchol akulo mi.
28 Kid’a Jesus mi kal avod’a, mam suma hata a djobom gumun vazi ala: Ni kayam me ba, ami ndak á dik muzuk ma tcho máma woi d’uo ge?
29 Mi dazi ala: Andjaf muzuk ma hina na, ang tchenî Alona tua ba, ang digim mbei tua.
Jesus mi de kua yam mad’am ki tchol mamba
(Gol Mat 17.22-23Luc 9.43b-45)30 Jesus azi ki mam suma hata a buzuk kei ata yi máma, a hle yam andaga d’a Galile-d’a. Jesus mi min ala sa wum mbi, 31 kayam nga mi hat mam suma hata ala: A mba han an Gor Sana abo suma; azi mba tchanu. Fata a tchanda, an mba ni tchol akulo aduk suma matna kur bur ma hindina. 32 Wani azi we nga zla ndata ad’ut ti, a le mandarâ á djobomu.
Ma ngol ma adigazina ni nge ge?
(Gol Mat 18.1-5Luc 9.46-48)33 Jesus azi ki mam suma hata a mba kur Kapernayum. Kid’a Jesus mi nga avod’a, mi djop mam suma hata ala: Agi tchagi tagi gagad’a lovot ni yam me ge?
34 Wani a seng silil, kayam me a tchi tazi tuguyod’a kur lovota ala sama ngol ma adigazina ni nge ge? 35 Jesus mi kak kä, mi yi suma dogo yam mbàna, mi dazi ala: Le sana mi min á kak ma avo’â ni, djivid’a mi mbut tam ma blogogi kisâ, mi mbut nazong magina mi.
36 Wani ata yi máma mi ve gogorâ, mi tinim adigaziya. Kid’a mi hlum akulo ahlabamba, mi dazi ala: 37 Sama lara pî ma ve gogorâ d’igi ma wana na atam ki simiyêna, mi van ni anu; sama lara pî ma vana, mi van ni an hol li, wani mi ve ni Ma mi sununïna mi.
Sama nga mi lei huneîd’a d’uo na ni meina
(Gol Luc 9.49-50)38 Jean mi dum ala: Ma hat suma, ami wami sana nga mi tit ki sed’ei d’uo na, nga mi dik muzuk ma teteng ma tchona woi ki simiyêngû. Ami d’elemu, kayam me nga mi tit ki sed’ei d’i.
39 Jesus mi dazi ala: Agi d’elem mbi, kayam me le sana nga mi le sun nda ndandala ki simiyênu ni, mi ndak á de zla d’a tchod’a kan atogo d’i. 40 Kayam sama nga mi lei huneîd’a d’uo na ni meina. 41 Wani sama lara pî ma hagi mbiyo ma tched’a kur kopma yam simiyêna kayambala agi ni suma hi an Christ-sâ d’a ni, gagazi, an nga ni dagiya, Alona mba mi wuragamu.
Jesus nga mi hat yam tcho d’a ngol la kala
(Gol Mat 18.6-9Luc 17.1-2)42 Jesus mi hat mam suma hata kua ala: Nge nge pî ma nga mi le vama b’lak gogorâ aduk gugurei suma a he gagazid’a kana ni, djivid’a hotei a djinim ahina d’a ngola kelemu, a gumza kä aduk alum ma ngolâ. 43 Le abong nga mi ing kur tchod’a ni, ang kam mbeyo. Djivid’a hotei ang kal kur arid’a kabong ma mututungâ tala a ing kur Jahanama aduk aku d’a bei mit teid’a kabong ma dja’â d’a. [44 Ata yi máma, ndjuvulâ nga mi mit ti, akud’a nga d’i mit tuo mi.]
45 Le aseng nga mi ing kur tchod’a ni, ang kam mbeyo. Djivid’a hotei ang kal kur arid’a ki dileîd’a tala a gang aduk Jahanama kaseng djagu d’a. [46 Ata yi máma, ndjuvulâ nga mi mit ti, akud’a nga d’i mit tuo mi.]
47 Le irang nga d’i ing kur tchod’a ni, ang pad’at teyo. Djivid’a kal la ang kal kur leud’a hAlonid’a ki irang mbeka tala a gang aduk Jahanama ki irang zla tat djagu d’a. 48 Ata yi máma, ndjuvulâ nga mi bo d’i, akud’a nga d’i mit tei d’uo mi. 49 Kayam suma pet a mba gozozi kakud’a d’igi a gos ndjuvuna na.
50 Ndjuvuna ni vama djivina, wani le ayâm mi pat teyo ni, ni ki me ba, a mba minim ki blangâma kamas ke? Agi mbud’ugi ni d’igi ndjuvuna na, agi kagagi ki halasa aduk tagiya.
