Vama nde tam ir Ezekiyel yam asok ma ablarinina
1 Ma didina mi tin abom kanu, Muzuk mama mi van mi i ki sed’en kur hor ra asok suma nga oîd’a kuad’a. 2 Ma didina mi nguyun tita adigam kur hor ndata. Mam nablaud’a, mablarid’a mi.
3 Mi dan ala: Ang gor sana, asok ma wana mi ndak mi hulong mi zlit akulo zu?
An hulong dum ala: Salad’a Ma didina, ni ang ba wë.
4 Mi dan ala: Ang djok vuna masok ma wana, ang dum ala: Ang asok ma ablarina, ang hum zlad’a hi Ma didinid’a. 5 Ma didina mi de masok ma wana ala: Gola! An mba ni mba ki muzu’â kurungû, ang mba zlit akulo. 6 An mba ni mba ki sideina atangû, an mba sang hliwingû, an mba ni zlubung babaka atangû, an mba ni hang muzu’â, ang mba zlit akulo, ang mba wala an ni Ma didina.
7 Kayam ndata, an djok vuna maso’â yam vun ma hed’a hi Ma didinina. Kid’a an nga ni dum zlad’a tua d’a, an hum siwela, asok ma lara pî mi tin ad’ud’a nga mi djak ata tam ki ndrama mi. 8 Kid’a an nga ni golom tua d’a, sideina ki hliuna a mba yam aso’â. Bugola, babaka zlubum yamu, wani muzuk nga kurum mbi.
9 Bugola, Ma didina mi dan ala: Ang gor sana, ang djok vuna mi Muzu’â, ang dum ala: Salad’a Ma didina mi dang ala: Ang Muzu’â, ang tcholï abo yima fid’ina, ang mbeï fo yam mad’a sum ndazina kayam a zlit akulo.
10 Kayam ndata, an djok vuna mi Muzu’â yam vun ma hed’a hi Ma didinina. Fod’a ti kal kur mad’a sum ndazina, azi zlit akulo, a tchol akulo kaseziya, azi ni b’rang nga ablaud’a. 11 Ma didina mi dan ala: Israel-lâ a ni d’igi asok ma wana na. Azi nga de tazi ala: Asogei mi mbut ablarid’a, hur mei ma tinda mi dap peyo, ei bei woi da’! 12 Kayam ndata, ang djok vuna mi Israel-lâ, ang dazi ala: Salad’a Ma didina mi dala: Gola! Agi sum mana, an mba ni mal vun asu magid’a woyo, an mba ni hulongôgï yam andaga d’a Israel-la. 13 Agi sum mana, fata an mal vun asu magid’a woi ni buzugugï woi akulo kur asu magid’id’a, agi mba wagi ala an ni Ma didina. 14 An mba ni fo Muzuk mana kurugiya, agi mba kagagi karid’a. An mba ni siragi sideyegi kä yam andaga magid’a, agi mba wagi ala an Ma didina ni de zlad’a, ni le sunda kat mi! An Ma didina ni de na.
Ma didina mba mi hulong zlap sum mama akulo tu
15 Ma didina mi dan kua ala: 16 Ang gor sana, ang hlaguna tu, ang b’ir atam ala: Wana ni mi Juda ki Israel suma a zlap ki sed’ema. Bugola, ang hlagu ma dingâ, ang b’ir atam ala: Wana ni Josef Efraim abum ki Israel suma a zlap ki sed’ema mi. 17 Bugola, ang ndjagazi vunazi abo tazi tu, ar a ka’î vama tuna hur abongû. 18 Ata yima sum mangâ a mba djobong ad’u zla ndatina, 19 ang hulong dazi ala: Salad’a Ma didina mi dala: Agi golonu! An hlaguna hi Josef ma nga abo Efraim-ma zlapa kandjaf suma Israel suma a nga zlapa ki sed’ema, an mba ni djinizi kaguna hi Juda-na, an mba ni mbud’uzi nagu ma tuna hur abonu. 20 Agu ma ang b’ir kama mba mi arî ved’a abong ngei irazi hina.
21 Ang mba dazi ala: Salad’a Ma didina mi dagi ala: Agi golonu! An mba ni prut Israel-lâ pet suma a nga kaka aduk andjaf suma ata yima azi i kuana woyo, an mba ni togozï woi ata yima lara ge pet, an mba ni hulongôzï yam andaga mazid’a. 22 An mba ni mbud’uzi andjaf ma tuna yam andaga mazid’a yam ahuniyô suma Israel-lâ, amul ma mba mi te kazina ni tu. Azi mba kak andjafâ mbà d’uo d’a, azi mba wal leud’a kä mbà d’uo mi. 23 Azi mba mbut tazi ndjendjed’a ki filei mazi ma tchet ma ndjendjed’a kandjaf tcho mazi d’a tetenga d’uo d’a. An mba ni prud’uzi woi kur yima lara ge ma azi kak kua ma azi le tchod’a kuana, an mba ni mbud’uzi yed’et. Azi mba ka’î sum mana, an mba ni ka’î Alo mazina mi.
24 Azong mana David mba mi kak amul mazina, azi pet a mba kak ki ma pola tu mi. Azi mba tit ad’u gat manda, azi mba ge yazi kä ad’u vun man ma hed’a, azi mba le sunda kazi mi. 25 Azi mba kak yam andaga d’a an hat mazong mana Jakob pa abuyozi ngolo a kak kuad’a. Azi tazid’a, grozina ki grozi ngolona a mba kak kua ki irazi fafat. Azong mana David mba mi tamula kazi gak didin mi. 26 An mba ni djin vun ma halasa ki sed’eziya. Ni vun ma djin ma gak didina. An mba ni tinizi kua, an mba ni zuluziya, an mba ni tin gong man nda kud’ora adigazi gak didin mi. 27 An mba ni min yan ma kaka nadigaziya. An mba ni ka’î Alo mazina, azi mba ka’î sum mana mi. 28 Fata gong man nda kud’ora ti kak aduk Israel-lâ gak didinda, andjaf suma dingâ a mba wala an ni Ma didin ma ni tin Israel-lâ irazi vazina.
Vama nde tam ir Ezekiyel yam asok ma ablarinina
1 Ma didina mi tin abom kanu, Muzuk mama mi van mi i ki sed’en kur hor ra asok suma nga oîd’a kuad’a. 2 Ma didina mi nguyun tita adigam kur hor ndata. Mam nablaud’a, mablarid’a mi.
3 Mi dan ala: Ang gor sana, asok ma wana mi ndak mi hulong mi zlit akulo zu?
An hulong dum ala: Salad’a Ma didina, ni ang ba wë.
4 Mi dan ala: Ang djok vuna masok ma wana, ang dum ala: Ang asok ma ablarina, ang hum zlad’a hi Ma didinid’a. 5 Ma didina mi de masok ma wana ala: Gola! An mba ni mba ki muzu’â kurungû, ang mba zlit akulo. 6 An mba ni mba ki sideina atangû, an mba sang hliwingû, an mba ni zlubung babaka atangû, an mba ni hang muzu’â, ang mba zlit akulo, ang mba wala an ni Ma didina.
7 Kayam ndata, an djok vuna maso’â yam vun ma hed’a hi Ma didinina. Kid’a an nga ni dum zlad’a tua d’a, an hum siwela, asok ma lara pî mi tin ad’ud’a nga mi djak ata tam ki ndrama mi. 8 Kid’a an nga ni golom tua d’a, sideina ki hliuna a mba yam aso’â. Bugola, babaka zlubum yamu, wani muzuk nga kurum mbi.
9 Bugola, Ma didina mi dan ala: Ang gor sana, ang djok vuna mi Muzu’â, ang dum ala: Salad’a Ma didina mi dang ala: Ang Muzu’â, ang tcholï abo yima fid’ina, ang mbeï fo yam mad’a sum ndazina kayam a zlit akulo.
10 Kayam ndata, an djok vuna mi Muzu’â yam vun ma hed’a hi Ma didinina. Fod’a ti kal kur mad’a sum ndazina, azi zlit akulo, a tchol akulo kaseziya, azi ni b’rang nga ablaud’a. 11 Ma didina mi dan ala: Israel-lâ a ni d’igi asok ma wana na. Azi nga de tazi ala: Asogei mi mbut ablarid’a, hur mei ma tinda mi dap peyo, ei bei woi da’! 12 Kayam ndata, ang djok vuna mi Israel-lâ, ang dazi ala: Salad’a Ma didina mi dala: Gola! Agi sum mana, an mba ni mal vun asu magid’a woyo, an mba ni hulongôgï yam andaga d’a Israel-la. 13 Agi sum mana, fata an mal vun asu magid’a woi ni buzugugï woi akulo kur asu magid’id’a, agi mba wagi ala an ni Ma didina. 14 An mba ni fo Muzuk mana kurugiya, agi mba kagagi karid’a. An mba ni siragi sideyegi kä yam andaga magid’a, agi mba wagi ala an Ma didina ni de zlad’a, ni le sunda kat mi! An Ma didina ni de na.
Ma didina mba mi hulong zlap sum mama akulo tu
15 Ma didina mi dan kua ala: 16 Ang gor sana, ang hlaguna tu, ang b’ir atam ala: Wana ni mi Juda ki Israel suma a zlap ki sed’ema. Bugola, ang hlagu ma dingâ, ang b’ir atam ala: Wana ni Josef Efraim abum ki Israel suma a zlap ki sed’ema mi. 17 Bugola, ang ndjagazi vunazi abo tazi tu, ar a ka’î vama tuna hur abongû. 18 Ata yima sum mangâ a mba djobong ad’u zla ndatina, 19 ang hulong dazi ala: Salad’a Ma didina mi dala: Agi golonu! An hlaguna hi Josef ma nga abo Efraim-ma zlapa kandjaf suma Israel suma a nga zlapa ki sed’ema, an mba ni djinizi kaguna hi Juda-na, an mba ni mbud’uzi nagu ma tuna hur abonu. 20 Agu ma ang b’ir kama mba mi arî ved’a abong ngei irazi hina.
21 Ang mba dazi ala: Salad’a Ma didina mi dagi ala: Agi golonu! An mba ni prut Israel-lâ pet suma a nga kaka aduk andjaf suma ata yima azi i kuana woyo, an mba ni togozï woi ata yima lara ge pet, an mba ni hulongôzï yam andaga mazid’a. 22 An mba ni mbud’uzi andjaf ma tuna yam andaga mazid’a yam ahuniyô suma Israel-lâ, amul ma mba mi te kazina ni tu. Azi mba kak andjafâ mbà d’uo d’a, azi mba wal leud’a kä mbà d’uo mi. 23 Azi mba mbut tazi ndjendjed’a ki filei mazi ma tchet ma ndjendjed’a kandjaf tcho mazi d’a tetenga d’uo d’a. An mba ni prud’uzi woi kur yima lara ge ma azi kak kua ma azi le tchod’a kuana, an mba ni mbud’uzi yed’et. Azi mba ka’î sum mana, an mba ni ka’î Alo mazina mi.
24 Azong mana David mba mi kak amul mazina, azi pet a mba kak ki ma pola tu mi. Azi mba tit ad’u gat manda, azi mba ge yazi kä ad’u vun man ma hed’a, azi mba le sunda kazi mi. 25 Azi mba kak yam andaga d’a an hat mazong mana Jakob pa abuyozi ngolo a kak kuad’a. Azi tazid’a, grozina ki grozi ngolona a mba kak kua ki irazi fafat. Azong mana David mba mi tamula kazi gak didin mi. 26 An mba ni djin vun ma halasa ki sed’eziya. Ni vun ma djin ma gak didina. An mba ni tinizi kua, an mba ni zuluziya, an mba ni tin gong man nda kud’ora adigazi gak didin mi. 27 An mba ni min yan ma kaka nadigaziya. An mba ni ka’î Alo mazina, azi mba ka’î sum mana mi. 28 Fata gong man nda kud’ora ti kak aduk Israel-lâ gak didinda, andjaf suma dingâ a mba wala an ni Ma didin ma ni tin Israel-lâ irazi vazina.
