Zla d’a Alona mi kak djangûna ki sed’eta
1 Ma didina mi dala: Ni zla d’a hohoud’a
yam agi gro suma bei hum vuna ba na.
Kayam agi nga lagi sunda
yam nga hur ma tcholï nga atan nduo na,
agi nga djinigi vunagi
yam zla d’a bei an kua ba d’a
á tok tchod’a yam ndrat tchod’a.
2 Agi nga igi akoid’a Ezipte bei djobon ndi ba
á halagi yima ngeid’a ata Faron,
á halagi yima kaka ad’u anguzu Ezipte mi.
3 Ngei d’a agi ngeyegi tagi ata Faron-nda
mba d’i mbut ni vama zulona kagiya.
Kak ka agi kagagi ad’u anguzu Ezipte-d’a,
agi mba mangâgi woyo.
4 Le magi suma nglona a iya wa Sowan,
le suma agi sunuzina a kala ni Hanes pî,
5 azi pet a mba mbut zulona
abo suma a ndak á le vama djivi ki sed’ezi d’uo na,
d’oze á ndjunuzi d’oze le vama ding tu kazi d’uo na,
wani a mba mbut ni vama mi mangâzi woina.
Suma a nga i á halï ndjunda Ezipte-na
6 Gola! D’uwarâ nga mi i kahlena huyogom sirad’a
kur lovot ta i abo ma sutnid’a.
A nga tit kur yima hohoud’a ki yima ndaka.
Ni yima azlod’a kazlona ki mageid’a ki dragon ma pira nga kua na.
A nga zi ahle suma ndjondjoîna ki korona ki djambala
mi suma a ndak á le vama djivi mi suma d’uo na,
7 mi Ezipte suma ndjun mazid’a
ni d’igi simetna d’oze vama hawa ya’â na na.
Ni kayam ndata ba, an yazi ala Rahap,
nala, suma abozi nga mi hle á le va d’uo na.
Ge hum mba yam va ma nga mi mbanid’a
8 Ma didina mi de mi Isai ala:
Ki tchetchemba ang i b’ir ahle ndazina kä
kur ahina d’a tchet ta bebed’ed’a kä iraziya,
ang b’irizi kä yam mbaktumba,
kayam zla ndata ti arî vama ge humba gak bur ma danana
á le glangâsâ gak didin bei dabid’a.
9 Kayam sum ndazina a ni suma bei hum vuna,
a ni gro suma ka zlad’a,
a ni gro suma a nga hum gata hi an Ma didinid’a d’uo na mi.
10 A ni suma de mi suma a wahle suma a nga mbana ala:
Ar va mi nde tam mbei iragi d’uo na.
A ni suma a nga de mi suma djok vun Alona ala:
Ar agi djogomi vun ma gagazina woi d’i,
agi dami ni zla d’a lami tami djivid’id’a,
ar agi dami ni zla d’a kad’a mi na.
11 A ni suma a nga dazi ala:
Agi d’ezegi woi kur lovota,
agi walagi woi ki lovot ta gureid’a,
agi hud’ugi sä woi ki Ma tin tam irat vat
yam Israel-lîna hina dei avoromiya na.
B’lak ka ndak nga á minda d’uo d’a
12 Kayam ndata, Ma tin tam irat vat
yam Israel-lîna mi dala:
Kayamba agi noyôgi zla manda, agi tinigi hurugi
yam asa’ata ki zla d’a ka d’a ata yat tuo d’a,
agi mbud’uzi nahle suma agi dengêgi tagi atazina,
13 tcho ndata mba d’i ari kagi d’igi gong nga
ti wak zizirik ti hal á dris kä woid’a hina,
d’igi gulumun ma fiya’â mi wak
mi zirik kä atogo zak na mi.
14 A mba tom mbei d’igi sama min deina mi tom mbei kikizek
bei fe anduruna á yo kakud’a kur givina
d’oze á gul ki mbina golong ba na.
Agi kagagi tchugot, agi tinigi hurugi kanu
15 Salad’a Ma didin ma tin tam irat vat
yam Israel-lîna mi dala:
Le agi kagagi tchugot agi hulongôgi atanu ni,
an mba ni sud’ugiya.
Le agi kagagi tchugot agi tinigi hurugi kanu ni,
nad’eng magid’a.
Wani agi minigi nga d’i!
16 Agi nga dagi ala: Hawa yak!
Ami mba djangâmi kakulumeina!
Gagazi, agi mba djangâgi kakulumeina,
wani ná ringâ!
Agi nga dagi ala: Akulumei mamina a djang heî,
wani suma a mba digigina,
akulumei mazina a mba djang kal tua d’ei!
17 Ata ngopa hi sama tunid’a,
suma dubu a mba ringâ,
ata ngopa hi suma vahlîd’a,
agi mba ringîgi gak agi mba aragi
ni d’igi agu ma fiyak ma ar tchola
akulo yam ahinad’a vam tuna na,
d’igi vama tak ma yam yima ndingîna na mi.
Atchogoi d’a suta
18 Kayam ndata, Ma didina nga mi djup á vagi sumad’a,
mba mi tchol akulo á wagi hohowogi mi,
kayam Ma didina nAlo ma d’ingêrâ.
Suma a tin huruzi kama pet a nga le furîd’a!
19 Agi suma Siyon suma nga kaka Jerusalem-ma,
agi mba tchigi d’uo d’a.
Fata agi yumba, mba mi vagi sumad’a!
Ata yima mba mi hum tchi maginina,
mba mi hulongôgi humba mi!
20 Salad’a mba mi hagi avungôna
ki mbina kur ndak magid’a.
Ma had’agina mba mi ngei tam avorogi d’i;
iragi mba d’i we ma had’agina mi.
21 Fata agi mba d’ezegi woi abo ma ndjufâ
d’oze abo ma gulanid’a,
agi mba humugi zla d’a ded’a blogogi ala:
Lovota avorogi wana! Agi hlagiziya!
22 Agi mba gologi kawei ma hap ma agi gulud’ugi ki filei maginina
ki lora a gulud’um ki d’a nahle suma ndjendjed’a,
agi mba durugi to mazi d’a kikizeka woi
d’igi vama ndjendjed’a na,
agi mba dagi kazi ala: Tchuguzi sä woi dei!
23 Ma didina mba mi sagi alona
yam awu ma agi mba zaram kä na.
Awu ma andagad’a mba d’i wulugizina
mba mi mbut ni te ma djivi ma d’or sumina.
Kur bur máma agi pologi d’uwar magina
ata yima te hat ma vivid’i’â mi.
24 Amuzleina ki korona suma a nga zuma,
a mba te ni hat awu ma a tom mbei
ma a yagam ndjuvuna kama.
25 Kur bur ma ngol ma a mba tchim suma
ma gongîyo suma fuyogei suma ndjola a dris kä na,
toliyonda mba d’i djangî kä yam ahuniyô suma fuyogeina,
kä yam yam ndindingâ mi.
26 Kur bur ma Ma didina mba mi djin mbilâ hi sum mamina,
ata yima mam mba mi tchilizi mbilizi ma a kazizina,
b’od’a hi tilîd’a ti mba d’i mbut
ni d’igi b’od’a hafatid’a na,
b’od’a hafatid’a ti mba d’i b’o
kal b’o d’a ti b’o kur burâ b’ob’o kid’iziyad’a na.
Ma didina nga mi djï á ngop Asiri-na
27 Gola! Ma didina mi tcholï ata yima deina,
nga mi djïya, nga mi vat tei kayîna tutunuk,
vunam mi nga tchurota woi kayîna,
zla d’a nga d’i ndavunamba
ni d’igi aku d’a ti ngal yinid’a na.
28 Fo d’a avunamba ti ni d’igi toliyon nda
ti hop gak ti mba avunat akulo mbeî d’a na
á yik andjaf suma yik ka tcho d’a b’laka,
d’igi djama d’a a tchugut avun andjaf suma
á bazi ki woid’a na.
29 Wani agi suma Jerusalem-ma, agi mba hlagi sawala kur andjeged’a d’igi suma a hle sawala ata yima vun tilîna na. Agi mba lagi furîd’a kurugi krovo d’igi suma a tit ad’u tchina hi taulâd’a á i yam ahinad’a hi Ma didinid’a gen Alona ahinad’a hi Israel-lîd’a na.
30 Ma didina mba mi de ki delem mba kal papad’a,
mba mi tak abom ma zid’a woi zi
á to ki suma kur ayî mam ma bibiliuna,
aduk sin aku d’a nga d’i ngal yinid’a,
aduk alo ma mi se ki babarâ ki mogoina mi na.
31 Ata yi máma suma Asiri-na a mba le mandarâ
abo dela hi Ma didinid’a.
Ma didina mba mi tozi ki tatagam mama.
32 Ma didina mba mi tozi ki totogo d’a lara ge d’a mi ngazizi kazid’a. Ata yi máma suma a mba hum tchina hi daliyâd’ina kadingâ, mba mi dur ki sed’ezi kabom ma zid’a woi zina mi.
33 A min gring ma akud’a nadjeu dei yam amul ma Asiri-na.
A minim bubud’a, zula yiyik mi,
a mol aguna kua ngola, nga mi ngal akud’a ngola mi.
Fo d’a avun Ma didina d’a
d’igi toliyon nda sufre d’a nga d’i ngal
d’igi sun akud’a na d’a,
mba d’i dom akud’a.
Zla d’a Alona mi kak djangûna ki sed’eta
1 Ma didina mi dala: Ni zla d’a hohoud’a
yam agi gro suma bei hum vuna ba na.
Kayam agi nga lagi sunda
yam nga hur ma tcholï nga atan nduo na,
agi nga djinigi vunagi
yam zla d’a bei an kua ba d’a
á tok tchod’a yam ndrat tchod’a.
2 Agi nga igi akoid’a Ezipte bei djobon ndi ba
á halagi yima ngeid’a ata Faron,
á halagi yima kaka ad’u anguzu Ezipte mi.
3 Ngei d’a agi ngeyegi tagi ata Faron-nda
mba d’i mbut ni vama zulona kagiya.
Kak ka agi kagagi ad’u anguzu Ezipte-d’a,
agi mba mangâgi woyo.
4 Le magi suma nglona a iya wa Sowan,
le suma agi sunuzina a kala ni Hanes pî,
5 azi pet a mba mbut zulona
abo suma a ndak á le vama djivi ki sed’ezi d’uo na,
d’oze á ndjunuzi d’oze le vama ding tu kazi d’uo na,
wani a mba mbut ni vama mi mangâzi woina.
Suma a nga i á halï ndjunda Ezipte-na
6 Gola! D’uwarâ nga mi i kahlena huyogom sirad’a
kur lovot ta i abo ma sutnid’a.
A nga tit kur yima hohoud’a ki yima ndaka.
Ni yima azlod’a kazlona ki mageid’a ki dragon ma pira nga kua na.
A nga zi ahle suma ndjondjoîna ki korona ki djambala
mi suma a ndak á le vama djivi mi suma d’uo na,
7 mi Ezipte suma ndjun mazid’a
ni d’igi simetna d’oze vama hawa ya’â na na.
Ni kayam ndata ba, an yazi ala Rahap,
nala, suma abozi nga mi hle á le va d’uo na.
Ge hum mba yam va ma nga mi mbanid’a
8 Ma didina mi de mi Isai ala:
Ki tchetchemba ang i b’ir ahle ndazina kä
kur ahina d’a tchet ta bebed’ed’a kä iraziya,
ang b’irizi kä yam mbaktumba,
kayam zla ndata ti arî vama ge humba gak bur ma danana
á le glangâsâ gak didin bei dabid’a.
9 Kayam sum ndazina a ni suma bei hum vuna,
a ni gro suma ka zlad’a,
a ni gro suma a nga hum gata hi an Ma didinid’a d’uo na mi.
10 A ni suma de mi suma a wahle suma a nga mbana ala:
Ar va mi nde tam mbei iragi d’uo na.
A ni suma a nga de mi suma djok vun Alona ala:
Ar agi djogomi vun ma gagazina woi d’i,
agi dami ni zla d’a lami tami djivid’id’a,
ar agi dami ni zla d’a kad’a mi na.
11 A ni suma a nga dazi ala:
Agi d’ezegi woi kur lovota,
agi walagi woi ki lovot ta gureid’a,
agi hud’ugi sä woi ki Ma tin tam irat vat
yam Israel-lîna hina dei avoromiya na.
B’lak ka ndak nga á minda d’uo d’a
12 Kayam ndata, Ma tin tam irat vat
yam Israel-lîna mi dala:
Kayamba agi noyôgi zla manda, agi tinigi hurugi
yam asa’ata ki zla d’a ka d’a ata yat tuo d’a,
agi mbud’uzi nahle suma agi dengêgi tagi atazina,
13 tcho ndata mba d’i ari kagi d’igi gong nga
ti wak zizirik ti hal á dris kä woid’a hina,
d’igi gulumun ma fiya’â mi wak
mi zirik kä atogo zak na mi.
14 A mba tom mbei d’igi sama min deina mi tom mbei kikizek
bei fe anduruna á yo kakud’a kur givina
d’oze á gul ki mbina golong ba na.
Agi kagagi tchugot, agi tinigi hurugi kanu
15 Salad’a Ma didin ma tin tam irat vat
yam Israel-lîna mi dala:
Le agi kagagi tchugot agi hulongôgi atanu ni,
an mba ni sud’ugiya.
Le agi kagagi tchugot agi tinigi hurugi kanu ni,
nad’eng magid’a.
Wani agi minigi nga d’i!
16 Agi nga dagi ala: Hawa yak!
Ami mba djangâmi kakulumeina!
Gagazi, agi mba djangâgi kakulumeina,
wani ná ringâ!
Agi nga dagi ala: Akulumei mamina a djang heî,
wani suma a mba digigina,
akulumei mazina a mba djang kal tua d’ei!
17 Ata ngopa hi sama tunid’a,
suma dubu a mba ringâ,
ata ngopa hi suma vahlîd’a,
agi mba ringîgi gak agi mba aragi
ni d’igi agu ma fiyak ma ar tchola
akulo yam ahinad’a vam tuna na,
d’igi vama tak ma yam yima ndingîna na mi.
Atchogoi d’a suta
18 Kayam ndata, Ma didina nga mi djup á vagi sumad’a,
mba mi tchol akulo á wagi hohowogi mi,
kayam Ma didina nAlo ma d’ingêrâ.
Suma a tin huruzi kama pet a nga le furîd’a!
19 Agi suma Siyon suma nga kaka Jerusalem-ma,
agi mba tchigi d’uo d’a.
Fata agi yumba, mba mi vagi sumad’a!
Ata yima mba mi hum tchi maginina,
mba mi hulongôgi humba mi!
20 Salad’a mba mi hagi avungôna
ki mbina kur ndak magid’a.
Ma had’agina mba mi ngei tam avorogi d’i;
iragi mba d’i we ma had’agina mi.
21 Fata agi mba d’ezegi woi abo ma ndjufâ
d’oze abo ma gulanid’a,
agi mba humugi zla d’a ded’a blogogi ala:
Lovota avorogi wana! Agi hlagiziya!
22 Agi mba gologi kawei ma hap ma agi gulud’ugi ki filei maginina
ki lora a gulud’um ki d’a nahle suma ndjendjed’a,
agi mba durugi to mazi d’a kikizeka woi
d’igi vama ndjendjed’a na,
agi mba dagi kazi ala: Tchuguzi sä woi dei!
23 Ma didina mba mi sagi alona
yam awu ma agi mba zaram kä na.
Awu ma andagad’a mba d’i wulugizina
mba mi mbut ni te ma djivi ma d’or sumina.
Kur bur máma agi pologi d’uwar magina
ata yima te hat ma vivid’i’â mi.
24 Amuzleina ki korona suma a nga zuma,
a mba te ni hat awu ma a tom mbei
ma a yagam ndjuvuna kama.
25 Kur bur ma ngol ma a mba tchim suma
ma gongîyo suma fuyogei suma ndjola a dris kä na,
toliyonda mba d’i djangî kä yam ahuniyô suma fuyogeina,
kä yam yam ndindingâ mi.
26 Kur bur ma Ma didina mba mi djin mbilâ hi sum mamina,
ata yima mam mba mi tchilizi mbilizi ma a kazizina,
b’od’a hi tilîd’a ti mba d’i mbut
ni d’igi b’od’a hafatid’a na,
b’od’a hafatid’a ti mba d’i b’o
kal b’o d’a ti b’o kur burâ b’ob’o kid’iziyad’a na.
Ma didina nga mi djï á ngop Asiri-na
27 Gola! Ma didina mi tcholï ata yima deina,
nga mi djïya, nga mi vat tei kayîna tutunuk,
vunam mi nga tchurota woi kayîna,
zla d’a nga d’i ndavunamba
ni d’igi aku d’a ti ngal yinid’a na.
28 Fo d’a avunamba ti ni d’igi toliyon nda
ti hop gak ti mba avunat akulo mbeî d’a na
á yik andjaf suma yik ka tcho d’a b’laka,
d’igi djama d’a a tchugut avun andjaf suma
á bazi ki woid’a na.
29 Wani agi suma Jerusalem-ma, agi mba hlagi sawala kur andjeged’a d’igi suma a hle sawala ata yima vun tilîna na. Agi mba lagi furîd’a kurugi krovo d’igi suma a tit ad’u tchina hi taulâd’a á i yam ahinad’a hi Ma didinid’a gen Alona ahinad’a hi Israel-lîd’a na.
30 Ma didina mba mi de ki delem mba kal papad’a,
mba mi tak abom ma zid’a woi zi
á to ki suma kur ayî mam ma bibiliuna,
aduk sin aku d’a nga d’i ngal yinid’a,
aduk alo ma mi se ki babarâ ki mogoina mi na.
31 Ata yi máma suma Asiri-na a mba le mandarâ
abo dela hi Ma didinid’a.
Ma didina mba mi tozi ki tatagam mama.
32 Ma didina mba mi tozi ki totogo d’a lara ge d’a mi ngazizi kazid’a. Ata yi máma suma a mba hum tchina hi daliyâd’ina kadingâ, mba mi dur ki sed’ezi kabom ma zid’a woi zina mi.
33 A min gring ma akud’a nadjeu dei yam amul ma Asiri-na.
A minim bubud’a, zula yiyik mi,
a mol aguna kua ngola, nga mi ngal akud’a ngola mi.
Fo d’a avun Ma didina d’a
d’igi toliyon nda sufre d’a nga d’i ngal
d’igi sun akud’a na d’a,
mba d’i dom akud’a.
