1 Taabuʼu derbi achaan ana gaaʼid nitaabiʼ derib al-Masiih.
Khattiyiin raas al-mara
2 Wa ana farhaan minku achaan intu gaaʼidiin tifakkuru foogi wa titaabuʼu adiil al-aadaat al-allamtuhum leeku. 3 Wa laakin fi cheyy nidoor intu tafhamooh wa da hu. Raʼiis hana ayyi raajil, hu al-Masiih wa raʼiis al-mara, hu al-raajil wa raʼiis al-Masiih, hu Allah. 4 Wa ayyi raajil al-yikhatti raasah wakit yisalli walla yitnabbaʼ, hu yijiib eeb fi l-Masiih al-hu raʼiisah. 5 Wa ayyi mara al-ma tikhatti raasha wakit tisalli walla titnabbaʼ, hi tijiib eeb fi raajilha al-hu raʼiisha. Wa be da, misil zayyano suuf raasha. 6 Wa kan mara taaba ma tikhatti raasha, khalli tuguss chaʼarha. Wa laakin kan gassiin al-chaʼar wa zayyiniin al-raas da eeb le l-mara, khalaas khalli hi tikhatti raasha.
7 Wa ma waajib le l-raajil yikhatti raasah achaan Allah khalagah fi suurtah le yiwassif majdah. Laakin al-mara tiwassif charaf al-raajil. 8 Achaan al-raajil ma maragooh min al-mara laakin al-mara maragooha min al-raajil. 9 Wa Allah ma khalag al-raajil fi chaan al-mara laakin khalag al-mara fi chaan al-raajil. 10 Wa be sabab al-malaaʼika, waajib le l-mara tukhutt cheyy fi raasha al-yiwassif kadar hi indaha al-sulta.
11 Wa da kulla sahiih laakin fi nizaam Rabbina. Bala l-raajil, al-mara ma fiiha. Wa bala l-mara, al-raajil ma fiih. 12 Achaan awwal, al-mara maragooha min al-raajil wa hassaʼ, ayyi raajil mawluud min mara wa kulli cheyy jaayi min Allah.
13 Wa leeku intu, nuguul fakkuru adiil wa mayyuzu al-kalaam da. Kan mara tisalli le Allah wa raasha ma mukhatta, da muwaafig walla ? 14 Wa naʼarfu min al-tabiiʼa kadar al-chaʼar al-tuwaal eeb le l-raajil. 15 Wa laakin kan mara indaha chaʼar tuwaal, da sameh wa da charafha. Wa Allah antaaha chaʼar tuwaal achaan yabga leeha khattaay. 16 Wa kan ayyi naadum yidoor yinaakhich fi l-kalaam da, khalli yaʼarif aniina ma nikhassudu be l-aade al-hu yidoorha wa battaan naas Allah ummat al-Masiih ma yikhassudu beeha fi ayyi bakaan.
Acha al-Masiih
17 Wa laakin fi l-cheyy al-bukhuss al-kalaam al-hassaʼ nihajji foogah, ana ma farhaan beeku marra waahid achaan wakit tilimmu fi malammat al-muʼminiin, al-fasaala katiire min al-kheer. 18 Wa gult al-kalaam da achaan al-khabar al-simiʼtah foogku. Awwal cheyy, yuguulu wakit tilimmu fi jamaaʼat al-muʼminiin, intu mungasimiin. Wa fi fikri, al-kalaam da ma kulla ke kidib. 19 Aywa, laabudda intu mungasimiin achaan kan al-khilaaf ambeenaatku ma fiih, kikkeef al-naas al-iimaanhum saabit yinʼarfu ?
20 Wa wakit tilimmu sawa, al-acha al-taakuluuh da, ma acha Rabbina. 21 Achaan fi wakit al-acha, waahidiin yaakulu ajala gubbaal al-aakhariin. Wa be da, al-aakhariin dool jiiʼaaniin wa l-awwalaaniyiin akalo wa sikro khalaas. 22 Wa da kikkeef ? Ma taakulu wa tacharbo fi buyuutku walla ? Aw tahguru jamaaʼat al-muʼminiin hana Allah wa tidooru tiʼayyubu al-naas al-ma induhum cheyy ? Wa nuguul leeku chunu ? Wa be da, nachkurku walla ? La, abadan.
23 Asmaʼo, da bas al-kalaam al-ligiitah min Rabbina wa allamtuku leyah. Fi l-leele al-yukhuunu foogha Rabbina Isa, hu chaal khubza waahide 24 wa chakar Allah wa kasarha wa gaal : «Da jismi al-nantiih fi chaanku. Sawwu misil da le tizzakkarooni beyah.» 25 Wa baʼad al-acha, hu sawwa nafs al-cheyy be l-kaas. Hu chaalah wa gaal : «Al-kaas da yiwassif al-muʼaahada al-jadiide al-nisawwiiha maʼaaku be dammi. Ayyi wakit al-tacharbo minnah, sawwu misil da le tizakkuruuni beyah.» 26 Wa be da, fi ayyi wakit kan taakulu al-khubza di wa tacharbo min al-kaas da, tiballukhu moot Rabbina Isa lahaddi hu yaji battaan.
27 Wa achaan da battaan, ayyi naadum al-yaakul khubzat Rabbina wa yachrab min kaasah wa niiytah ma mukhlisa, hu yudurr jisim Rabbina wa dammah. 28 Khalli ayyi naadum yijarrib nafsah gubbaal ma yaakul al-khubza wa yachrab min al-kaas. 29 Achaan ayyi naadum al-yaakul wa yachrab acha al-Masiih bala fikir fi jisim al-Masiih, hu yijiib al-azaab fi nafsah. 30 Wa achaan da bas, katiiriin minku ayyaaniin wa mardaaniin wa waahidiin maato kula.
31 Wa kan awwal nifakkuru fi nufuusna adiil, khalaas al-azaab ma yanzil foogna. 32 Wa laakin Rabbina yihaasibna wa yiʼaddibna achaan al-azaab al-yanzil fi naas al-dunya ma yanzil foogna. 33 Achaan da, ya akhwaani, wakit tilimmu achaan taakulu acha al-Masiih, khalli ayyi naadum yarja akhwaanah. 34 Kan naadum jiiʼaan wa ma yagdar yarja al-aakhariin, akheer yaakul gubbaal fi beetah. Wa be da, malammitku ma tijiib al-azaab foogku.
Wa khalaas, fi l-cheyy al-bukhuss al-suʼaalaat al-aakhariin, nantiiku wasaaya wakit najiiku.
1 Taabuʼu derbi achaan ana gaaʼid nitaabiʼ derib al-Masiih.
Khattiyiin raas al-mara
2 Wa ana farhaan minku achaan intu gaaʼidiin tifakkuru foogi wa titaabuʼu adiil al-aadaat al-allamtuhum leeku. 3 Wa laakin fi cheyy nidoor intu tafhamooh wa da hu. Raʼiis hana ayyi raajil, hu al-Masiih wa raʼiis al-mara, hu al-raajil wa raʼiis al-Masiih, hu Allah. 4 Wa ayyi raajil al-yikhatti raasah wakit yisalli walla yitnabbaʼ, hu yijiib eeb fi l-Masiih al-hu raʼiisah. 5 Wa ayyi mara al-ma tikhatti raasha wakit tisalli walla titnabbaʼ, hi tijiib eeb fi raajilha al-hu raʼiisha. Wa be da, misil zayyano suuf raasha. 6 Wa kan mara taaba ma tikhatti raasha, khalli tuguss chaʼarha. Wa laakin kan gassiin al-chaʼar wa zayyiniin al-raas da eeb le l-mara, khalaas khalli hi tikhatti raasha.
7 Wa ma waajib le l-raajil yikhatti raasah achaan Allah khalagah fi suurtah le yiwassif majdah. Laakin al-mara tiwassif charaf al-raajil. 8 Achaan al-raajil ma maragooh min al-mara laakin al-mara maragooha min al-raajil. 9 Wa Allah ma khalag al-raajil fi chaan al-mara laakin khalag al-mara fi chaan al-raajil. 10 Wa be sabab al-malaaʼika, waajib le l-mara tukhutt cheyy fi raasha al-yiwassif kadar hi indaha al-sulta.
11 Wa da kulla sahiih laakin fi nizaam Rabbina. Bala l-raajil, al-mara ma fiiha. Wa bala l-mara, al-raajil ma fiih. 12 Achaan awwal, al-mara maragooha min al-raajil wa hassaʼ, ayyi raajil mawluud min mara wa kulli cheyy jaayi min Allah.
13 Wa leeku intu, nuguul fakkuru adiil wa mayyuzu al-kalaam da. Kan mara tisalli le Allah wa raasha ma mukhatta, da muwaafig walla ? 14 Wa naʼarfu min al-tabiiʼa kadar al-chaʼar al-tuwaal eeb le l-raajil. 15 Wa laakin kan mara indaha chaʼar tuwaal, da sameh wa da charafha. Wa Allah antaaha chaʼar tuwaal achaan yabga leeha khattaay. 16 Wa kan ayyi naadum yidoor yinaakhich fi l-kalaam da, khalli yaʼarif aniina ma nikhassudu be l-aade al-hu yidoorha wa battaan naas Allah ummat al-Masiih ma yikhassudu beeha fi ayyi bakaan.
Acha al-Masiih
17 Wa laakin fi l-cheyy al-bukhuss al-kalaam al-hassaʼ nihajji foogah, ana ma farhaan beeku marra waahid achaan wakit tilimmu fi malammat al-muʼminiin, al-fasaala katiire min al-kheer. 18 Wa gult al-kalaam da achaan al-khabar al-simiʼtah foogku. Awwal cheyy, yuguulu wakit tilimmu fi jamaaʼat al-muʼminiin, intu mungasimiin. Wa fi fikri, al-kalaam da ma kulla ke kidib. 19 Aywa, laabudda intu mungasimiin achaan kan al-khilaaf ambeenaatku ma fiih, kikkeef al-naas al-iimaanhum saabit yinʼarfu ?
20 Wa wakit tilimmu sawa, al-acha al-taakuluuh da, ma acha Rabbina. 21 Achaan fi wakit al-acha, waahidiin yaakulu ajala gubbaal al-aakhariin. Wa be da, al-aakhariin dool jiiʼaaniin wa l-awwalaaniyiin akalo wa sikro khalaas. 22 Wa da kikkeef ? Ma taakulu wa tacharbo fi buyuutku walla ? Aw tahguru jamaaʼat al-muʼminiin hana Allah wa tidooru tiʼayyubu al-naas al-ma induhum cheyy ? Wa nuguul leeku chunu ? Wa be da, nachkurku walla ? La, abadan.
23 Asmaʼo, da bas al-kalaam al-ligiitah min Rabbina wa allamtuku leyah. Fi l-leele al-yukhuunu foogha Rabbina Isa, hu chaal khubza waahide 24 wa chakar Allah wa kasarha wa gaal : «Da jismi al-nantiih fi chaanku. Sawwu misil da le tizzakkarooni beyah.» 25 Wa baʼad al-acha, hu sawwa nafs al-cheyy be l-kaas. Hu chaalah wa gaal : «Al-kaas da yiwassif al-muʼaahada al-jadiide al-nisawwiiha maʼaaku be dammi. Ayyi wakit al-tacharbo minnah, sawwu misil da le tizakkuruuni beyah.» 26 Wa be da, fi ayyi wakit kan taakulu al-khubza di wa tacharbo min al-kaas da, tiballukhu moot Rabbina Isa lahaddi hu yaji battaan.
27 Wa achaan da battaan, ayyi naadum al-yaakul khubzat Rabbina wa yachrab min kaasah wa niiytah ma mukhlisa, hu yudurr jisim Rabbina wa dammah. 28 Khalli ayyi naadum yijarrib nafsah gubbaal ma yaakul al-khubza wa yachrab min al-kaas. 29 Achaan ayyi naadum al-yaakul wa yachrab acha al-Masiih bala fikir fi jisim al-Masiih, hu yijiib al-azaab fi nafsah. 30 Wa achaan da bas, katiiriin minku ayyaaniin wa mardaaniin wa waahidiin maato kula.
31 Wa kan awwal nifakkuru fi nufuusna adiil, khalaas al-azaab ma yanzil foogna. 32 Wa laakin Rabbina yihaasibna wa yiʼaddibna achaan al-azaab al-yanzil fi naas al-dunya ma yanzil foogna. 33 Achaan da, ya akhwaani, wakit tilimmu achaan taakulu acha al-Masiih, khalli ayyi naadum yarja akhwaanah. 34 Kan naadum jiiʼaan wa ma yagdar yarja al-aakhariin, akheer yaakul gubbaal fi beetah. Wa be da, malammitku ma tijiib al-azaab foogku.
Wa khalaas, fi l-cheyy al-bukhuss al-suʼaalaat al-aakhariin, nantiiku wasaaya wakit najiiku.
