بني عَمُّون أنْهزموا
1 وَ فِي السَّنَةْ الْجَدِيدَةْ، فِي الْوَكِتْ الْمُلُوكْ يَمْشُوا الْحَرِبْ، يُوَابْ قَايِدْ الدَّيْش مَشَى دَمَّرْ بَلَدْ بَنِي عَمُّونْ وَ حَاصَرْ مَدِينَةْ رَبَّةْ عَاصِمَتْهُمْ. وَ لَاكِنْ دَاوُدْ قَعَدْ فِي أُورُشَلِيمْ. وَ يُوَابْ شَالْ رَبَّةْ وَ دَمَّرَاهَا. 2 وَ بَعَدْ دَا، دَاوُدْ شَالْ التَّاجْ مِنْ رَاسْ مِلْكُومْ صَنَمْ بَنِي عَمُّونْ. وَ التَّاجْ دَا هَنَا دَهَبْ وَ يَوْزِنْ قَرِيبْ 34 كِيلَوْ وَ مُجَمَّلْ بِحَجَرْ غَالِي. وَ خَطَّوْه فِي رَاسْ دَاوُدْ. وَ شَالَوْا غَنِيمَةْ كَتِيرَةْ مِنْ الْمَدِينَةْ دِي. 3 وَ دَاوُدْ شَالْ نَاسْ الْمَدِينَةْ دِي وَ خَدَّمَاهُمْ بِقُوءْ خِدْمَةْ الْيِسَوُّوهَا بِمُنْشَارْ وَ خَازُوقْ هَنَا حَدِيدْ وَ فَاسْ. وَ هُو سَوَّى مِثِلْ دَا فِي كُلَّ حِلَّالْ بَنِي عَمُّونْ. وَ بَعَدْ دَا، دَاوُدْ وَ كُلَّ الشَّعَبْ قَبَّلَوْا فِي أُورُشَلِيمْ.
الحرْبة مع الفِلِسْطيّين
4 وَ بَعَدْ دَا، قَمَّ حَرِبْ مَعَ الْفِلِسْطِيِّينْ فِي حِلَّةْ قَازَرْ. وَ فِي الْبَكَانْ دَا، سِبَّكَايْ مِنْ حِلَّةْ حُوشَى كَتَلْ سِفَّايْ مِنْ ذُرِّيَّةْ رَافَا. وَ بِمِثِلْ دَا، الْفِلِسْطِيِّينْ أَنْهَزَمَوْا.
5 وَ بَتَّانْ الْحَرِبْ بَدَا مَعَ الْفِلِسْطِيِّينْ. وَ أَلِحَنَانْ وِلَيْد يَعِيرْ كَتَلْ لَحْمِي أَخُو جَالُوتْ مِنْ حِلَّةْ قَاتْ وَ عُودْ حَرِبْتَهْ تَخِينْ مِثِلْ مُرْدَاسْ اللِّقْدَابَةْ.
6 وَ بَتَّانْ كُلَ الْحَرْبَةْ بِقَتْ فِي حِلَّةْ قَاتْ. وَ فِيَّهْ رَاجِلْ وَاحِدْ طَوِيلْ وَ أَصَابِعْ رِجِلَيْنَهْ وَ إِيدَيْنَهْ سِتَّةْ سِتَّةْ وَ كُلُّهُمْ كَيْ 24. وَ هُو كُلَ مِنْ ذُرِّيَّةْ رَافَا. 7 وَ الرَّاجِلْ دَا عَيَّرْ بَنِي إِسْرَائِيلْ. وَ خَلَاصْ، يُونَتَانْ وِلَيْد شِمْعَى أَخُو دَاوُدْ كَتَلَهْ. 8 وَ كُلَّ الرُّجَالْ دَوْل مِنْ ذُرِّيَّةْ رَافَا مِنْ حِلَّةْ قَاتْ. وَ هُمَّنْ مَاتَوْا بِإِيدْ دَاوُدْ وَ نَاسَهْ.
Bani Ammuun anhazamo
1 Wa fi l-sana al-jadiide, fi l-wakit al-muluuk yamchu al-harib, Yuwaab khaayid al-deech macha dammar balad Bani Ammuun wa haasar madiinat Rabba aasimathum. Wa laakin Dawuud gaʼad fi Uruchaliim. Wa Yuwaab chaal Rabba wa dammaraaha. 2 Wa baʼad da, Dawuud chaal al-taaj min raas Milkuum sanam Bani Ammuun. Wa l-taaj da hana dahab wa yawzin gariib 34 kiilo wa mujammal be hajar khaali. Wa khattooh fi raas Dawuud. Wa chaalo khaniime katiire min al-madiina di. 3 Wa Dawuud chaal naas al-madiina di wa khaddamaahum be gu khidme al-yisawwuuha be munchaar wa khaazuug hana hadiid wa faas. Wa hu sawwa misil da fi kulla hillaal Bani Ammuun. Wa baʼad da, Dawuud wa kulla l-chaʼab gabbalo fi Uruchaliim.
Al-harba maʼa l-Filistiyiin
4 Wa baʼad da, gamma harib maʼa l-Filistiyiin fi hillit Gaazar. Wa fi l-bakaan da, Sibbakaay min hillit Huucha katal Siffaay min zurriiyit Raafa. Wa be misil da, al-Filistiyiin anhazamo.
5 Wa battaan al-harib bada maʼa l-Filistiyiin. Wa Alihanaan wileed Yaʼiir katal Lahmi akhu Jaaluut min hillit Gaat wa uud haribtah takhiin misil murdaas al-ligdaabe.
6 Wa battaan kula al-harba bigat fi hillit Gaat. Wa fiyah raajil waahid tawiil wa asaabiʼ rijileenah wa iideenah sitte sitte wa kulluhum ke 24. Wa hu kula min zurriiyit Raafa. 7 Wa l-raajil da ayyar Bani Israaʼiil. Wa khalaas, Yuunataan wileed Chimʼa akhu Dawuud katalah. 8 Wa kulla l-rujaal dool min zurriiyit Raafa min hillit Gaat. Wa humman maato be iid Dawuud wa naasah.
