1 وَ الْحِسّ قَالْ لَيِّ: «يَا إِبْن آدَمْ، آكُلَهْ. آكُلْ الْكِتَابْ الْمَلْفُوفْ دَا وَ أَمْشِي كَلِّمْ لِبَنِي إِسْرَائِيلْ.» 2 وَ خَلَاصْ، أَنَا فَتَحْت خَشْمِي وَ هُو أَكَّلَانِي الْكِتَابْ الْمَلْفُوفْ دَا. 3 وَ قَالْ لَيِّ: «يَا إِبْن آدَمْ، أَمْلَا بَطْنَكْ وَ أَشْبِعْ نَفْسَكْ بِالْكِتَابْ الْمَلْفُوفْ الْأَنَا قَاعِدْ نَنْطِيهْ لَيْك دَا.» وَ أَنَا أَكَلْتَهْ وَ دَا بِقِي لَيِّ حَلُو فِي خَشْمِي مِثِلْ عَسَلْ.
4 وَ قَالْ لَيِّ بَتَّانْ: «يَا إِبْن آدَمْ، أَمْشِي لِبَنِي إِسْرَائِيلْ وَ حَجِّي لَيْهُمْ بِكَلَامِي. 5 أَنَا مَا نِرَسِّلَكْ لِشَعَبْ اللُّغِّتْهُمْ قَوِيَّةْ وَ كَلَامْهُمْ مَا يِنْعَرِفْ لَاكِنْ نِرَسِّلَكْ لِبَنِي إِسْرَائِيلْ. 6 أَنَا مَا نِرَسِّلَكْ لِشُعُوبْ اللُّغِّتْهُمْ قَوِيَّةْ وَ كَلَامْهُمْ مَا يِنْعَرِفْ حَتَّى كَانْ إِنْتَ مَا تَفْهَمْ كَلَامْهُمْ كُلَ. كَنْ أَنَا رَسَّلْتَكْ كُلَ، أَكِيدْ هُمَّنْ يَسْمَعَوْك. 7 وَ لَاكِنْ بَنِي إِسْرَائِيلْ مَا يِدَوْرُوا يَسْمَعَوْك إِنْتَ أَشَانْ هُمَّنْ مَا يِدَوْرُوا يَسْمَعَوْنِي أَنَا. وَ كُلَّ بَنِي إِسْرَائِيلْ رُوسَيْهُمْ وَ قُلُوبْهُمْ كُلَ قَوِيِّينْ. 8 وَ دَاهُو أَنَا نَنْطِيكْ وِجِهْ أَضْلَمْ زِيَادَةْ مِنْ وُجُوهُّمْ وَ نِقَوِّي رَاسَكْ زِيَادَةْ مِنْ رُوسَيْهُمْ. 9 وَ نِسَوِّي رَاسَكْ قَوِي مِثِلْ الْمَاسّ وَ الْحَجَرْ. مَا تَخَافْ مِنْهُمْ وَ لَا تِنْبَهِتْ قِدَّامْهُمْ أَشَانْ هُمَّنْ شَعَبْ عَاصِيِينْ.»
10 وَ الْحِسّ قَالْ لَيِّ: «يَا إِبْن آدَمْ، أَفْتَحْ أَدَانَكْ وَ أَحْفَضْ فِي قَلْبَكْ كُلَّ الْكَلَامْ النُّقُولَهْ لَيْك. 11 يَلَّا! أَمْشِي لِلنَّاسْ الْجَابَوْهُمْ فِي الْغُرْبَةْ الْهُمَّنْ عِيَالْ شَعَبَكْ وَ حَجِّي لَيْهُمْ. وَ كَنْ يَسْمَعَوْك وَلَّا مَا يَسْمَعَوْك كُلَ، إِنْتَ قُولْ لَيْهُمْ: ‹دَاهُو كَلَامْ اللّٰهْ الرَّبّ.›»
12 وَ خَلَاصْ، رُوحْ اللّٰهْ رَفَعَانِي فَوْق وَ أَنَا سِمِعْت حِسّ شَدِيدْ الْبُقُولْ: «مُبَارَكْ مَجْد اللّٰهْ فِي مَسْكَنَهْ.» 13 وَ أَنَا سِمِعْت حَرَكَةْ جَنَاحَيْ الْمَخْلُوقِينْ الْقَاعِدِينْ يِنْضَرْبُوا أَمْبَيْنَاتْهُمْ وَ حَرَكَةْ الْعَجَلَاتْ الْجَنْبُهُمْ وَ دِي حَرَكَةْ شَدِيدَةْ. 14 وَ الرُّوحْ رَفَعَانِي فَوْق وَ وَدَّانِي وَ أَنَا مَشَيْت بِغَضَبْ شَدِيدْ فِي نَفْسِي. وَ قُدْرَةْ اللّٰهْ قَاعِدَةْ فَوْقِي بِشِدَّةْ. 15 وَ بَيْدَا، أَنَا جِيتْ لِلنَّاسْ الْجَابَوْهُمْ فِي الْغُرْبَةْ السَّاكْنِينْ جَنْب بَحَرْ خَابُورْ فِي حِلَّةْ تَلّ أَبِيبْ فِي بَابِلْ. وَ هِنَاكْ، أَنَا قَعَدْت سَبْعَةْ يَوْم مُتَحَيِّرْ فِي أُسُطْهُمْ.
حِزْقِيال بِقي حرس لبني إسرائيل
16 وَ بَعَدْ السَّبْعَةْ يَوْم دَا، اللّٰهْ حَجَّى لَيِّ وَ قَالْ: 17 «يَا إِبْن آدَمْ، أَنَا نُخُطَّكْ حَرَسْ فِي بَنِي إِسْرَائِيلْ. كَنْ سِمِعْت كَلَامْ مِنْ خَشْمِي، تِحَذِّرْهُمْ بَيَّهْ. 18 وَ كَنْ نُقُولْ لِلْعَاصِي هُو يُمُوتْ وَ إِنْتَ مَا تِحَجِّي لَيَّهْ وَ لَا تِحَذِّرَهْ مِنْ دَرْبَهْ الْفَسِلْ لِحَيَاتَهْ تَنْجَى، الْعَاصِي دَا كَنْ يُمُوتْ فِي خَطَايَهْ، أَنَا نَطْلُبْ دِمِّتَهْ مِنَّكْ. 19 وَ لَاكِنْ كَنْ إِنْتَ حَذَّرْت الْعَاصِي وَ هُو أَبَى مَا يِخَلِّي عِصْيَانَهْ وَلَّا دَرْبَهْ الْفَسِلْ، خَلَاصْ هُو يُمُوتْ فِي خَطَايَهْ وَ لَاكِنْ إِنْتَ نَجَّيْت نَفْسَكْ. 20 وَ كَنْ نَادُمْ صَالِحْ قَبَّلْ مِنْ عَدَالْتَهْ وَ قَمَّ يِسَوِّي ظُلُمْ، أَنَا نُخُطّ قِدَّامَهْ حَجَرْ وَ هُو يِنْطَقَّ فَوْقَهْ وَ يُمُوتْ. وَ كَنْ إِنْتَ مَا حَذَّرْتَهْ، خَلَاصْ هُو يُمُوتْ بِسَبَبْ ذَنْبَهْ وَ مَا يِذَّكَّرَوْا الْعَدَالَةْ الْهُو سَوَّاهَا أَوَّلْ. وَ لَاكِنْ مِنَّكْ إِنْتَ، أَنَا نَطْلُبْ دِمِّتَهْ. 21 وَ بِالْعَكْس، كَنْ إِنْتَ حَذَّرْت نَادُمْ صَالِحْ لِمَا يَذْنِبْ وَ النَّادُمْ دَا مَا أَذْنَبْ، خَلَاصْ هُو يِعِيشْ أَشَانْ إِنْتَ حَذَّرْتَهْ. وَ إِنْتَ كُلَ نَجَّيْت نَفْسَكْ.»
اللّه سكّت حِزْقِيال
22 وَ فِي الْوَكِتْ دَا، قُدْرَةْ اللّٰهْ قَاعِدَةْ فَوْقِي وَ هُو قَالْ لَيِّ: «قُمّ! أَمْشِي الْوَادِي وَ أَنَا نِحَجِّي لَيْك.» 23 وَ أَنَا قَمَّيْت وَ مَشَيْت الْوَادِي وَ دَاهُو أَنَا شِفْت مَجْد اللّٰهْ وَاقِفْ مِثِلْ الْمَجْد الْأَنَا شِفْتَهْ فِي خَشُمْ بَحَرْ خَابُورْ. وَ خَلَاصْ، أَنَا وَقَعْت بِوِجْهِي فِي الْأَرْض. 24 وَ رُوحْ اللّٰهْ نَزَلْ فَوْقِي وَ قَوَّمَانِي بِطُولِي. وَ اللّٰهْ حَجَّى لَيِّ وَ قَالْ: «تَعَالْ وَ سِدّ نَفْسَكْ فِي بَيْتَكْ. 25 أَسْمَعْ، يَا إِبْن آدَمْ، يِجِيبُوا حُبَالْ وَ يِرَبُّطُوكْ وَ بَتَّانْ مَا تَمْرُقْ فِي أُسْط النَّاسْ. 26 أَنَا نِلَصِّقْ لَيْك لِسَانَكْ فِي سُقْعَكْ. تَبْقَى أَبْكَمْ وَ مَا تَقْدَرْ تُلُومْهُمْ أَشَانْ هُمَّنْ شَعَبْ عَاصِيِينْ. 27 وَ لَاكِنْ وَكِتْ نِكَلِّمْ لَيْك، أَنَا نُفُكّ خَشْمَكْ وَ إِنْتَ تِحَجِّي لَيْهُمْ وَ تُقُولْ: ‹دَاهُو كَلَامْ اللّٰهْ الرَّبّ.› الْيِدَوْر يَسْمَعْ، خَلِّي يَسْمَعْ وَ الْمَا يِدَوْر يَسْمَعْ، خَلِّي مَا يَسْمَعْ أَشَانْ هُمَّنْ شَعَبْ عَاصِيِينْ.»
1 Wa l-hiss gaal leyi : «Ya ibn Adam, aakulah. Aakul al-kitaab al-malfuuf da wa amchi kallim le Bani Israaʼiil.» 2 Wa khalaas, ana fataht khachmi wa hu akkalaani al-kitaab al-malfuuf da. 3 Wa gaal leyi : «Ya ibn Adam, amla batnak wa achbiʼ nafsak be l-kitaab al-malfuuf al-ana gaaʼid nantiih leek da.» Wa ana akaltah wa da bigi leyi halu fi khachmi misil asal.
4 Wa gaal leyi battaan : «Ya ibn Adam, amchi le Bani Israaʼiil wa hajji leehum be kalaami. 5 Ana ma nirassilak le chaʼab al-lukhkhithum gawiiye wa kalaamhum ma yinʼarif laakin nirassilak le Bani Israaʼiil. 6 Ana ma nirassilak le chuʼuub al-lukhkhithum gawiiye wa kalaamhum ma yinʼarif hatta kan inta ma tafham kalaamhum kula. Kan ana rassaltak kula, akiid humman yasmaʼook. 7 Wa laakin Bani Israaʼiil ma yidooru yasmaʼook inta achaan humman ma yidooru yasmaʼooni ana. Wa kulla Bani Israaʼiil ruuseehum wa guluubhum kula gawiyiin. 8 Wa daahu ana nantiik wijih adlam ziyaada min wujuuhhum wa nigawwi raasak ziyaada min ruuseehum. 9 Wa nisawwi raasak gawi misil al-maass wa l-hajar. Ma takhaaf minhum wa la tinbahit giddaamhum achaan humman chaʼab aasiyiin.»
10 Wa l-hiss gaal leyi : «Ya ibn Adam, aftah adaanak wa ahfad fi galbak kulla l-kalaam al-nuguulah leek. 11 Yalla ! Amchi le l-naas al-jaaboohum fi l-khurba al-humman iyaal chaʼabak wa hajji leehum. Wa kan yasmaʼook walla ma yasmaʼook kula, inta guul leehum : ‹Daahu kalaam Allah al-Rabb.›»
12 Wa khalaas, Ruuh Allah rafaʼaani foog wa ana simiʼt hiss chadiid al-buguul : «Mubaarak majd Allah fi maskanah.» 13 Wa ana simiʼt harakat janaahe al-makhluugiin al-gaaʼidiin yindarbu ambeenaathum wa harakat al-ajalaat al-jambuhum wa di haraka chadiide. 14 Wa l-ruuh rafaʼaani foog wa waddaani wa ana macheet be khadab chadiid fi nafsi. Wa gudrat Allah gaaʼide foogi be chidde. 15 Wa be da, ana jiit le l-naas al-jaaboohum fi l-khurba al-saakniin jamb bahar Khaabuur fi hillit Tall Abiib fi Baabil. Wa hinaak, ana gaʼadt sabʼa yoom mutahayyir fi usuthum.
Hizgiyaal bigi haras le Bani Israaʼiil
16 Wa baʼad al-sabʼa yoom da, Allah hajja leyi wa gaal : 17 «Ya ibn Adam, ana nukhuttak haras fi Bani Israaʼiil. Kan simiʼt kalaam min khachmi, tihazzirhum beyah. 18 Wa kan nuguul le l-aasi hu yumuut wa inta ma tihajji leyah wa la tihazzirah min derbah al-fasil le hayaatah tanja, al-aasi da kan yumuut fi khataayah, ana natlub dimmitah minnak. 19 Wa laakin kan inta hazzart al-aasi wa hu aba ma yikhalli isyaanah walla derbah al-fasil, khalaas hu yumuut fi khataayah wa laakin inta najjeet nafsak. 20 Wa kan naadum saalih gabbal min adaaltah wa gamma yisawwi zulum, ana nukhutt giddaamah hajar wa hu yintagga foogah wa yumuut. Wa kan inta ma hazzartah, khalaas hu yumuut be sabab zanbah wa ma yizzakkaro al-adaala al-hu sawwaaha awwal. Wa laakin minnak inta, ana natlub dimmitah. 21 Wa be l-aks, kan inta hazzart naadum saalih le ma yaznib wa l-naadum da ma aznab, khalaas hu yiʼiich achaan inta hazzartah. Wa inta kula najjeet nafsak.»
Allah sakkat Hizgiyaal
22 Wa fi l-wakit da, gudrat Allah gaaʼide foogi wa hu gaal leyi : «Gumm ! Amchi al-waadi wa ana nihajji leek.» 23 Wa ana gammeet wa macheet al-waadi wa daahu ana chift majd Allah waagif misil al-majd al-ana chiftah fi khachum bahar Khaabuur. Wa khalaas, ana wagaʼt be wijhi fi l-ard. 24 Wa Ruuh Allah nazal foogi wa gawwamaani be tuuli. Wa Allah hajja leyi wa gaal : «Taʼaal wa sidd nafsak fi beetak. 25 Asmaʼ, ya ibn Adam, yijiibu hubaal wa yirabbutuuk wa battaan ma tamrug fi ust al-naas. 26 Ana nilassig leek lisaanak fi sugʼak. Tabga abkam wa ma tagdar tuluumhum achaan humman chaʼab aasiyiin. 27 Wa laakin wakit nikallim leek, ana nufukk khachmak wa inta tihajji leehum wa tuguul : ‹Daahu kalaam Allah al-Rabb.› Al-yidoor yasmaʼ, khalli yasmaʼ wa l-ma yidoor yasmaʼ, khalli ma yasmaʼ achaan humman chaʼab aasiyiin.»
