اللّه نادى بني إسرائيل ليجوا ليه
1 قَبُّلُوا لِلّٰهْ إِلٰـهْكُو، يَا بَنِي إِسْرَائِيلْ،
أَشَانْ خَطَاكُو بَسْ رَمَاكُو!
2 جَهُّزُوا كَلَامْكُو
وَ قَبُّلُوا لِلّٰهْ قُولُوا:
«أَغْفِرْ كُلَّ خَطَانَا
وَ فِي بَدَلْ ضَحَايَا التِّيرَانْ،
أَقْبَلْ كَلَامْ خُشُومْنَا.
3 بَلَدْ أَشُورْ مَا تَقْدَرْ تِنَجِّينَا
وَ أَنِحْنَ مَا نِتْوَكَّلَوْا
عَلَيْ خَيْل الْحَرِبْ كُلَ.
بَتَّانْ مَا نُقُولُوا: ‹يَا إِلٰـهْنَا›
لِلصَّنَمْ الصَّنَعْنَاهْ بِإِيدَيْنَّا.
بَيْك إِنْتَ بَسْ، يَا رَبّ،
الْأَتِيمْ يَلْقَى الْمَحَنَّةْ!»
4 «أَنَا نَشْفِيهُمْ مِنْ مَرَضْ الْكُفُرْ
وَ نِحِبُّهُمْ بِنِيَّةْ وَاحِدَةْ
أَشَانْ غَضَبِي وَقَفْ مِنْهُمْ.
5 أَنَا نَبْقَى مِثِلْ مَطَرْ لِبَنِي إِسْرَائِيلْ
وَ هُمَّنْ يِنَوُّرُوا مِثِلْ السِّتَّيْب.
يِدِسُّوا عُرُوقْهُمْ مِثِلْ شَدَرْ لُبْنَانْ
6 وَ فُرُوعْهُمْ يُطُولُوا.
وَ يَبْقَوْا جَمِيلِينْ مِثِلْ شَدَرَةْ الزَّيْتُونْ
وَ رِيحِتْهُمْ حَلُوَّةْ مِثِلْ رِيحَةْ أَرْز لُبْنَانْ.
7 وَ بَنِي إِسْرَائِيلْ يِقَبُّلُوا لَيِّ
وَ يَقْعُدُوا فِي ضُلِّي.
يِتَيْرُبُوا الْقَمَحْ
وَ يِنَوُّرُوا مِثِلْ الْعِنَبْ.
وَ نَاسْ يِحَجُّوا بَيْهُمْ
مِثِلْ الْخَمَرْ اللَّذِيذْ هَنَا لُبْنَانْ.
8 يَا نَاسْ أَفْرَايِمْ!
هَلْ فِي شَبَهْ بَيْنِي أَنَا وَ الْأَصْنَامْ؟
أَنَا بَسْ نَقْبَلْكُو
وَ نِرَاقِبْ فَوْقكُو.
وَ أَنَا مِثِلْ شَدَرَةْ السَّرْوِي الْخَضْرَةْ
وَ مِنِّي أَنَا بَسْ، تَلْقَوْا إِنْتَاجْ.»
9 خَلِّي الْحَكِيمْ يَفْهَمْ الْأَشْيَاءْ دَوْل
وَ خَلِّي الْفَاهِمْ يَعَرِفْهُمْ.
أَشَانْ دَرِبْ اللّٰهْ عَدِيلْ الْفَوْقَهْ
الصَّالِحِينْ يُرُوغُوا
وَ الْعَاصِيِينْ يِتَّرْتَعَوْا.
Allah naada Bani Israaʼiil le yaju leyah
1 Gabbulu le Allah Ilaahku, ya Bani Israaʼiil,
achaan khataaku bas ramaaku !
2 Jahhuzu kalaamku
wa gabbulu le Allah guulu :
«Akhfir kulla khataana
wa fi badal dahaaya al-tiiraan,
akhbal kalaam khuchuumna.
3 Balad Achuur ma tagdar tinajjiina
wa aniina ma nitwakkalo
ale kheel al-harib kula.
Battaan ma nuguulu : ‹Ya ilaahna›
le l-sanam al-sanaʼnaah be iideenna.
Beek inta bas, ya Rabb,
al-atiim yalga al-mahanna !»
4 «Ana nachfiihum min marad al-kufur
wa nihibbuhum be niiye waahide
achaan khadabi wagaf minhum.
5 Ana nabga misil matar le Bani Israaʼiil
wa humman yinawwuru misil al-sitteeb.
Yidissu uruughum misil chadar Lubnaan
6 wa furuuʼhum yutuulu.
Wa yabgo jamiiliin misil chadarat al-zaytuun
wa riihithum haluuwe misil riihit arz Lubnaan.
7 Wa Bani Israaʼiil yigabbulu leyi
wa yagoodu fi dulli.
Yiteerubu al-gameh
wa yinawwuru misil al-inab.
Wa naas yihajju beehum
misil al-khamar al-laziiz hana Lubnaan.
8 Ya naas Afraayim !
Hal fi chabah beeni ana wa l-asnaam ?
Ana bas nakhbalku
wa niraakhib foogku.
Wa ana misil chadarat al-sarwi al-khadra
wa minni ana bas, talgo intaaj.»
9 Khalli al-hakiim yafham al-achya dool
wa khalli al-faahim yaʼarifhum.
Achaan derib Allah adiil al-foogah
al-saalihiin yuruukhu
wa l-aasiyiin yittartaʼo.
