راجِل الموالِف بتعب
1 يَاتُو الْآمَنْ بِالْخَبَّرَوْنَا بَيَّهْ؟
وَ قُدْرَةْ اللّٰهْ بَانَتْ لِيَاتُو؟
2 عَبْد اللّٰهْ كِبِرْ قِدَّامَهْ مِثِلْ بِذْرَةْ
وَ مِثِلْ عِرِقْ الْمَرَقْ مِنْ أَرْض جَفَافْ.
هُو مَا عِنْدَهْ شَكِلْ
وَ لَا عَظَمَةْ لِنِشِيفُوهْ
وَ لَا عِنْدَهْ شَبَهْ الْيَعَجِبْ.
3 النَّاسْ أَبَوْه وَ حَقَرَوْه
وَ هُو رَاجِلْ الْوَجَعْ
وَ مُوَالِفْ بِالتَّعَبْ.
هُو مِثِلْ نَادُمْ النَّاسْ أَنْلَفَتَوْا مِنَّهْ،
هُو الْحَقَرَوْه وَ أَنِحْنَ مَا جَعَلْنَاهْ.
4 أَكِيدْ، التَّعَبْ الْفَوْقنَا أَنِحْنَ،
هُو ذَاتَهْ شَالَهْ
وَ الْوَجَعْ الْفَوْقنَا،
هُو بَسْ حِمْلَهْ.
لَاكِنْ أَنِحْنَ كَمَانْ جَعَلْنَاهْ
مِثِلْ نَادُمْ الْعَاقَبَهْ الرَّبّ
وَ ضَرَبَهْ وَ أَهَانَهْ.
5 وَ لَاكِنْ طَعَنَوْه فِي شَانْ عِصْيَانَّا أَنِحْنَ
وَ تَعَّبَوْه فِي شَانْ خَطَانَا السَّوَّيْنَاهْ.
الْعَذَابْ الْوَقَعْ فَوْقَهْ هُو
يَضْمَنْ لَيْنَا السَّلَامْ.
وَ بِسَبَبْ جُرُوحَهْ،
أَنِحْنَ لِقِينَا الشِّفَاءْ.
6 أَنِحْنَ كُلِّنَا مِثِلْ غَنَمْ الْمُوَدِّرِينْ،
أَيِّ وَاحِدْ شَايِلْ لَيَّهْ دَرِبْ.
وَ اللّٰهْ خَطَّ فَوْقَهْ هُو
خَطَانَا أَنِحْنَ كُلِّنَا.
7 هُو عَذَّبَوْه وَ أَهَانَوْه
وَ مَا فَكَّ خَشْمَهْ.
مِثِلْ حَمَلْ الْيِوَدُّوهْ لِلدَّبِحْ
وَ مِثِلْ نَعَجَةْ سَاكْتَةْ وَكِتْ يِقَصُّصُوا صُوفْهَا،
هُو كُلَ مَا فَكَّ خَشْمَهْ.
8 وَ بِمُضَايَقَةْ وَ شَرِيعَةْ، وَدَّوْه.
وَ مِنْ نَاسْ زَمَنَهْ، يَاتُو الْهَمَّ بَيَّهْ؟
لَاكِنْ فَصَلَوْه مِنْ الْحَيِّينْ
بِسَبَبْ عِصْيَانْ شَعَبِي وَ كَتَلَوْه.
9 خَطَّوْا قَبُرَهْ مَعَ الْعَاصِيِينْ
وَ سَتَرَوْه مَعَ الْغَنِيِّينْ،
حَتَّى كَنْ هُو مَا سَوَّى عُنُفْ كُلَ
وَ فِي خَشْمَهْ، مَا فِي غَشّ.
10 وَ اللّٰهْ رِضِي يَرْحَكَهْ بِالتَّعَبْ
وَ كَنْ حَيَاتَهْ بِقَتْ ضَحِيَّةْ لِكَفَّارَةْ الْخَطَا،
خَلَاصْ هُو يِشِيفْ ذُرِّيّتَهْ.
هُو يِطَوِّلْ أَيَّامْ عُمْرَهْ
وَ نِيَّةْ اللّٰهْ تِلْحَقَّقْ بَيَّهْ هُو.
11 وَ بَعَدْ تَعَبَهْ،
هُو يِشِيفْ نُورْ الْحَيَاةْ
وَ يَشْبَعْ مِنَّهْ.
وَ بِتَعَبَهْ، عَبْدِي الصَّالِحْ
يِسَوِّي نَاسْ كَتِيرِينْ صَالِحِينْ
أَشَانْ هُو حِمِلْ خَطَاهُمْ.
12 وَ فِي شَانْ دَا، نَنْطِيهْ قِسِمْ مَعَ نَاسْ كَتِيرِينْ
وَ يَلْقَى قِسِمْ الْغَنِيمَةْ مَعَ نَاسْ شُدَادْ.
أَشَانْ هُو أَنْطَى نَفْسَهْ لِلْمَوْت
وَ حَسَبَوْه مَعَ الْعَاصِيِينْ.
لَاكِنْ هُو حِمِلْ ذَنِبْ الْكَتِيرِينْ
وَ دَافَعْ لِلْعَاصِيِينْ.
Raajil al-muwaalif be taʼab
1 Yaatu al-aaman be l-khabbaroona beyah ?
Wa gudrat Allah baanat le yaatu ?
2 Abd Allah kibir giddaamah misil bizre
wa misil irig al-marag min ard jafaaf.
Hu ma indah chakil
wa la azama le nichiifuuh
wa la indah chabah al-yaʼajib.
3 Al-naas abooh wa hagarooh
wa hu raajil al-wajaʼ
wa muwaalif be l-taʼab.
Hu misil naadum al-naas anlafato minnah,
hu al-hagarooh wa aniina ma jaʼalnaah.
4 Akiid, al-taʼab al-foogna aniina,
hu zaatah chaalah
wa l-wajaʼ al-foogna,
hu bas himlah.
Laakin aniina kamaan jaʼalnaah
misil naadum al-aakhabah al-Rabb
wa darabah wa ahaanah.
5 Wa laakin taʼanooh fi chaan isyaanna aniina
wa taʼʼabooh fi chaan khataana al-sawweenaah.
Al-azaab al-wagaʼ foogah hu
yadman leena al-salaam.
Wa be sabab juruuhah,
aniina ligiina al-chifa.
6 Aniina kullina misil khanam al-muwaddiriin,
ayyi waahid chaayil leyah derib.
Wa Allah khatta foogah hu
khataana aniina kullina.
7 Hu azzabooh wa ahaanooh
wa ma fakka khachmah.
Misil hamal al-yiwadduuh le l-dabih
wa misil naʼaje saakte wakit yigassusu suufha,
hu kula ma fakka khachmah.
8 Wa be mudaayaga wa chariiʼa, waddooh.
Wa min naas zamanah, yaatu al-hamma beyah ?
Laakin fasalooh min al-hayyiin
be sabab isyaan chaʼabi wa katalooh.
9 Khatto khaburah maʼa l-aasiyiin
wa satarooh maʼa l-khaniyiin,
hatta kan hu ma sawwa unuf kula
wa fi khachmah, ma fi khachch.
10 Wa Allah ridi yarhakah be l-taʼab
Wa kan hayaatah bigat dahiiye le kaffaarat al-khata,
khalaas hu yichiif zurriiytah.
Hu yitawwil ayyaam umrah
wa niiyit Allah tilhaggag beyah hu.
11 Wa baʼad taʼabah,
hu yichiif nuur al-haya
wa yachbaʼ minnah.
Wa be taʼabah, abdi al-saalih
yisawwi naas katiiriin saalihiin
achaan hu himil khataahum.
12 Wa fi chaan da, nantiih gisim maʼa naas katiiriin
wa yalga gisim al-khaniime maʼa naas chudaad.
Achaan hu anta nafsah le l-moot
wa hasabooh maʼa l-aasiyiin.
Laakin hu himil zanib al-katiiriin
wa daafaʼ le l-aasiyiin.
