فَشْحُور قمّ ضِدّ إرْمِيا
1 وَ فِيَّهْ رَاجِلْ وَاحِدْ أُسْمَهْ فَشْحُورْ وِلَيْد إِمِّيرْ وَ هُو رَاجِلْ دِينْ وَ كَبِيرْ الْحَرَسْ هَنَا بَيْت اللّٰهْ. الرَّاجِلْ دَا سِمِعْ إِرْمِيَا قَاعِدْ يِتْنَبَّأْ بِكَلَامْ ضِدّ مَدِينَةْ الْقُدُسْ. 2 وَ خَلَاصْ، فَشْحُورْ قَمَّ كَرَبَهْ لِلنَّبِي إِرْمِيَا وَ فَرَشَهْ وَ قَيَّدَهْ فِي الْبَابْ الْعَالِي الْأُسْمَهْ بَنْيَامِينْ فِي بَيْت اللّٰهْ. 3 وَ أَمْبَاكِرْ فَجُرْ وَكِتْ فَشْحُورْ جَاءْ حَلَّ الْقَيْد مِنْ إِرْمِيَا، إِرْمِيَا قَالْ: «اللّٰهْ قَالْ بَتَّانْ مَا يِنَادُوكْ فَشْحُورْ لَاكِنْ يِنَادُوكْ الْمُخِيفْ فِي كُلَّ بَكَانْ. 4 أَشَانْ دَاهُو اللّٰهْ قَالْ: ‹أَكِيدْ أَنَا نِسَلِّمَكْ لِلْمُخِيفْ، إِنْتَ وَ رُفْقَانَكْ. هُمَّنْ يُمُوتُوا قِدَّامَكْ فِي الْحَرِبْ مَعَ عُدْوَانْهُمْ. وَ نِسَلِّمْ نَاسْ يَهُوذَا فِي إِيدْ مَلِكْ بَابِلْ وَ هُو يِوَدِّيهُمْ فِي الْغُرْبَةْ فِي بَابِلْ وَ يَكْتُلْهُمْ بِالْسَّيْف. 5 وَ أَنَا نِسَلِّمْ كُلَّ مَالْ الْمَدِينَةْ وَ كُلَّ إِنْتَاجْهَا وَ كُلَّ شَيّءْ الْغَالِي الْعِنْدَهَا. وَ نِسَلِّمْ كُلَّ مَخَازِنْ مُلُوكْ يَهُوذَا فِي إِيدَيْن عُدْوَانْهُمْ وَ يَنْهَبَوْهُمْ وَ يِشِيلُوهُمْ وَ يِوَدُّوهُمْ فِي بَابِلْ. 6 وَ إِنْتَ، يَا فَشْحُورْ، وَ كُلَّ نَاسْ بَيْتَكْ يَكُرْبُوكُو مَسَاجِينْ وَ يِوَدُّوكُو فِي بَابِلْ. وَ هِنَاكْ، إِنْتَ تُمُوتْ وَ يَدْفُنُوكْ إِنْتَ وَ كُلَّ رُفْقَانَكْ الْأَتْنَبَّأْت لَيْهُمْ بِكِدِبْ.›»
إرْمِيا شكى للّه و حمده
7 يَا اللّٰهْ! إِنْتَ بَسْ سَوَّيْتنِي نَبِي بَلَا رَايّ
وَ أَنَا مَا نَعَرِفْ شَيّءْ وَ قَصَّدْت.
إِنْتَ قَوِي مِنِّي
وَ غَلَبْتِنِي!
وَ دَاهُو، طُولْ النَّهَارْ،
أَنَا بِقِيتْ مَضْحَكَةْ
وَ كُلَّ النَّاسْ يِشَّمَّتَوْا فَوْقِي.
8 وَ كَنْ نِحَجِّي، نِعِيطْ وَ نُقُولْ:
«الْعُنُفْ وَ الْخَرَابْ جَايِينْ!»
وَ كَنْ نِحَجِّي بِكَلَامَكْ، يَا اللّٰهْ،
يِجِيبْ لَيِّ الْعَيْب
وَ طُولْ النَّهَارْ،
يِشَّمَّتَوْا فَوْقِي.
9 وَ كَنْ نُقُولْ فِي نَفْسِي
مَا نِفَكِّرْ لِلّٰهْ
وَ لَا نِحَجِّي بَتَّانْ
بِكَلَامَهْ الْأَمَرَانِي بَيَّهْ،
خَلَاصْ دَا يَبْقَى لَيِّ
مِثِلْ نَارْ تَحْرِقْنِي فِي دَاخِلِي
وَ مِثِلْ جَمُرْ فِي عُضَامِي.
وَ دَا فَاتَانِي،
مَا نَقْدَرْ نَحْمَلَهْ.
10 أَنَا سِمِعْت مُعْيَارْ مِنْ نَاسْ كَتِيرِينْ
الْيِنَادُونِي بِأُسُمْ
الْمُخِيفْ فِي كُلَّ بَكَانْ.
وَ بُقُولُوا: «بَيُّنُوهْ!
أَيْوَى، بَيُّنُوهْ!»
وَ كُلَّ رُفْقَانِي
قَاعِدِينْ يَرْجَوْا وَقَعَانِي.
وَ بُقُولُوا: «مُمْكِنْ بَلَا رَايْه،
أَنِحْنَ نَغَلْبُوهْ
وَ نِشِيلُوا فَوْقَهْ التَّارْ.»
11 وَ لَاكِنْ إِنْتَ، يَا اللّٰهْ، قَاعِدْ مَعَايِ
مِثِلْ فَارِسْ الْأَبَداً مَا يِنْهَزِمْ.
وَ بَيْدَا، الْيَهْجُمُونِي يَقَعَوْا
وَ مَا يِنَّصُرُوا فَوْقِي.
وَ الْعَيْب يِغَطِّيهُمْ مَرَّةْ وَاحِدْ
وَ أَبَداً مَا يَنْجَحَوْا.
وَ يِوَدُّرُوا شَرَفْهُمْ لِلْأَبَدْ
وَ يَلْقَوْا إِهَانَةْ الْأَبَداً مَا يَنْسَوْهَا.
12 يَا اللّٰهْ الْقَادِرْ!
إِنْتَ بَسْ التَّكْشِفْ الصَّالِحْ
وَ تِشِيفْ الْفِي قَلِبْ الْإِنْسَانْ وَ الْفِي دَاخِلَهْ.
خَلِّي إِنْتَ تِشِيلْ لَيِّ التَّارْ فَوْقهُمْ
أَشَانْ أَنَا خَطَّيْت شَكْوِتِي فِي إِيدَيْنَكْ.
13 غَنُّوا لِلّٰهْ
وَ أَحْمُدُوهْ.
أَشَانْ هُو يِنَجِّي حَيَاةْ الْمِسْكِينْ
مِنْ إِيدْ الْفَسْلِينْ.
إرْمِيا نِدِم لحياته
14 مَلْعُونْ
الْيَوْم الْوِلْدَوْنِي فَوْقَهْ.
وَ الْيَوْم الْجَابَتْنِي فَوْقَهْ أَمِّي،
خَلِّي مَا يَلْقَى بَرَكَةْ.
15 مَلْعُونْ النَّادُمْ
الْبَشَّرْ أَبُويِ وَ قَالْ:
«جَابَوْا لَيْك وِلَيْد.
أَفْرَحْ زِيَادَةْ!»
16 وَ النَّادُمْ دَا، خَلِّي يَبْقَى
مِثِلْ الْمُدُنْ الدَّمَّرَاهُمْ اللّٰهْ
بَلَا مَحَنَّةْ.
وَ خَلِّي يِنْسَمِعْ فِي بَيْت النَّادُمْ دَا
كُرَوْرَاكْ الْفَزَعْ بِفَجُرْ
وَ بِقَايْلَةْ، صِرَاخْ الْحَرِبْ.
17 وَ مَالَا اللّٰهْ مَا كَتَلْنِي
فِي بَطُنْ أَمِّي؟
وَ مَالَا بَطُنْ أَمِّي
مَا بِقَتْ لَيِّ قَبُرْ؟
وَ مَالَا مَا نَقْعُدْ
فِي بَطُنْهَا إِلَى الْأَبَدْ؟
18 وَ مَالَا مَرَقْت مِنْ بَطُنْ أَمِّي
لِنِشِيفْ التَّعَبْ وَ الضِّيقَةْ
وَ نِعِيشْ كُلَّ أَيَّامِي فِي الْعَيْب؟
Fachhuur gamma didd Irmiya
1 Wa fiyah raajil waahid usmah Fachhuur wileed Immiir wa hu raajil diin wa kabiir al-haras hana beet Allah. Al-raajil da simiʼ Irmiya gaaʼid yitnabbaʼ be kalaam didd Madiinat al-Khudus. 2 Wa khalaas, Fachhuur gamma karabah le l-nabi Irmiya wa farachah wa gayyadah fi l-baab al-aali al-usmah Banyaamiin fi beet Allah. 3 Wa ambaakir fajur wakit Fachhuur ja halla al-geed min Irmiya, Irmiya gaal : «Allah gaal battaan ma yinaaduuk Fachhuur laakin yinaaduuk al-Mukhiif fi Kulla Bakaan. 4 Achaan daahu Allah gaal : ‹Akiid ana nisallimak le l-Mukhiif, inta wa rufgaanak. Humman yumuutu giddaamak fi l-harib maʼa udwaanhum. Wa nisallim naas Yahuuza fi iid malik Baabil wa hu yiwaddiihum fi l-khurba fi Baabil wa yaktulhum be l-seef. 5 Wa ana nisallim kulla maal al-madiina wa kulla intaajha wa kulla cheyy al-khaali al-indaha. Wa nisallim kulla makhaazin muluuk Yahuuza fi iideen udwaanhum wa yanhaboohum wa yichiiluuhum wa yiwadduuhum fi Baabil. 6 Wa inta, ya Fachhuur, wa kulla naas beetak yakurbuuku masaajiin wa yiwadduuku fi Baabil. Wa hinaak, inta tumuut wa yadfunuuk inta wa kulla rufgaanak al-atnabbaʼt leehum be kidib.›»
Irmiya chaka le Allah wa hamadah
7 Ya Allah ! Inta bas sawweetni nabi bala raayi
wa ana ma naʼarif cheyy wa khassadt.
Inta gawi minni
wa khalabtini !
Wa daahu, tuul al-nahaar,
ana bigiit madhaka
wa kulla l-naas yichchammato foogi.
8 Wa kan nihajji, niʼiit wa nuguul :
«Al-unuf wa l-kharaab jaayiin !»
Wa kan nihajji be kalaamak, ya Allah,
yijiib leyi al-eeb
wa tuul al-nahaar,
yichchammato foogi.
9 Wa kan nuguul fi nafsi
ma nifakkir le Allah
wa la nihajji battaan
be kalaamah al-amaraani beyah,
khalaas da yabga leyi
misil naar tahrigni fi daakhili
wa misil jamur fi udaami.
Wa da faataani,
ma nagdar nahmalah.
10 Ana simiʼt muʼyaar min naas katiiriin
al-yinaaduuni be usum
al-Mukhiif fi Kulla Bakaan.
Wa buguulu : «Bayyunuuh !
Aywa, bayyunuuh !»
Wa kulla rufgaani
gaaʼidiin yarjo wagaʼaani.
Wa buguulu : «Mumkin bala raayah,
aniina nakhalbuuh
wa nichiilu foogah al-taar.»
11 Wa laakin inta, ya Allah, gaaʼid maʼaayi
misil faaris al-abadan ma yinhazim.
Wa be da, al-yahjumuuni yagaʼo
wa ma yinnasru foogi.
Wa l-eeb yikhattiihum marra waahid
wa abadan ma yanjaho.
Wa yiwadduru charafhum le l-abad
wa yalgo ihaana al-abadan ma yansooha.
12 Ya Allah al-Gaadir !
Inta bas al-takchif al-saalih
wa tichiif al-fi galib al-insaan wa l-fi daakhilah.
Khalli inta tichiil leyi al-taar fooghum
achaan ana khatteet chakwiti fi iideenak.
13 Khannu le Allah
wa ahmuduuh.
Achaan hu yinajji hayaat al-miskiin
min iid al-fasliin.
Irmiya nidim le hayaatah
14 Malʼuun
al-yoom al-wildooni foogah.
Wa l-yoom al-jaabatni foogah ammi,
khalli ma yalga baraka.
15 Malʼuun al-naadum
al-bachchar abuuyi wa gaal :
«Jaabo leek wileed.
Afrah ziyaada !»
16 Wa l-naadum da, khalli yabga
misil al-mudun al-dammaraahum Allah
bala mahanna.
Wa khalli yinsamiʼ fi beet al-naadum da
korooraak al-fazaʼ be fajur
wa be gaayle, siraakh al-harib.
17 Wa maala Allah ma katalni
fi batun ammi ?
Wa maala batun ammi
ma bigat leyi khabur ?
Wa maala ma nagood
fi batunha ila l-abad ?
18 Wa maala maragt min batun ammi
le nichiif al-taʼab wa l-diige
wa niʼiich kulla ayyaami fi l-eeb ?
