حَنَنْيَا أتْنبّأ بكِدِب
1 وَ فِيَّهْ نَبِي وَاحِدْ أُسْمَهْ حَنَنْيَا وِلَيْد عَزُّورْ مِنْ حِلَّةْ قِبْعُونْ. فِي الشَّهَرْ الْخَامِسْ فِي السَّنَةْ الرَّابْعَةْ فِي بِدَايَةْ حُكُمْ صِدْقِيَّا مَلِكْ يَهُوذَا، حَنَنْيَا جَاءْ وَ حَجَّى لِإِرْمِيَا فِي بَيْت اللّٰهْ قِدَّامْ رُجَالْ الدِّينْ وَ كُلَّ الشَّعَبْ. وَ قَالْ: 2 «دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹أَنَا نِكَسِّرْ دَامِي مَلِكْ بَابِلْ لِنِنَزِّلْ تَقَلَتَهْ مِنْ كَتَافَيْكُو. 3 وَ بَعَدْ سَنْتَيْن، أَنَا نِقَبِّلْ كُلَّ مُعِدَّاتْ بَيْت اللّٰهْ الشَّالَاهُمْ نَبُوخَدْنَصَرْ مَلِكْ بَابِلْ وَ وَدَّاهُمْ فِي بَابِلْ وَ نِجِيبْهُمْ فِي الْبَكَانْ دَا. 4 وَ أَنَا نِقَبِّلْ يُيَكِينْ وِلَيْد يَهُويَقِمْ مَلِكْ يَهُوذَا وَ كُلَّ نَاسْ يَهُوذَا الْوَدَّوْهُمْ فِي الْغُرْبَةْ فِي بَابِلْ وَ نِجِيبْهُمْ فِي الْبَكَانْ دَا. وَ بَيْدَا، أَنَا نِكَسِّرْ دَامِي مَلِكْ بَابِلْ لِنِنَزِّلْ تَقَلَتَهْ مِنْ كَتَافَيْكُو.›» وَ دَا كَلَامْ اللّٰهْ.
5 وَ النَّبِي إِرْمِيَا رَدَّ لِلنَّبِي حَنَنْيَا قِدَّامْ رُجَالْ الدِّينْ وَ كُلَّ الشَّعَبْ الْقَاعِدِينْ فِي بَيْت اللّٰهْ. 6 وَ إِرْمِيَا قَالْ: «آمِينْ! خَلِّي اللّٰهْ يِسَوِّي مِثِلْ دَا! خَلِّي اللّٰهْ يِحَقِّقْ كُلَّ الْكَلَامْ الْإِنْتَ أَتْنَبَّأْت بَيَّهْ وَ يِقَبِّلْ مِنْ بَابِلْ الْمُعِدَّاتْ هَنَا بَيْت اللّٰهْ وَ كُلَّ النَّاسْ الْوَدَّوْهُمْ فِي الْغُرْبَةْ وَ يِجِيبْهُمْ فِي الْبَكَانْ دَا. 7 وَ لَاكِنْ أَسْمَعْ! خُطّ أَدَانَكْ لِلْكَلَامْ النُّقُولَهْ لَيْك إِنْتَ وَ لِكُلَّ الشَّعَبْ. 8 فِي أَنْبِيَاء الْجَوْا قُبَّالِي أَنَا وَ قُبَّالَكْ إِنْتَ مِنْ وَكِتْ طَوِيلْ. وَ أَتْنَبَّأَوْا وَ خَبَّرَوْا بُلْدَانْ كَتِيرِينْ وَ مَمَالِكْ كُبَارْ بِالْحَرِبْ وَ الْفَسَالَةْ وَ الْوَبَاءْ. 9 وَ كَنْ نَبِي وَاحِدْ يَجِي وَ يِتْنَبَّأْ وَ يِخَبِّرْ بِالسَّلَامْ، إِلَّا كَنْ الشَّيّءْ الْهُو أَتْنَبَّأْ بَيَّهْ أَلْحَقَّقْ، خَلَاصْ النَّاسْ يَعَرْفُوا كَدَرْ هُو نَبِي وَ أَكِيدْ اللّٰهْ بَسْ رَسَّلَهْ.»
10 وَ خَلَاصْ، النَّبِي حَنَنْيَا شَالْ عُودْ الدَّامِي مِنْ كَتَافَيْ إِرْمِيَا وَ كَسَّرَهْ. 11 وَ قِدَّامْ كُلَّ الشَّعَبْ، حَنَنْيَا قَالْ: «دَاهُو اللّٰهْ قَالْ: ‹بِمِثِلْ دَا بَعَدْ سَنْتَيْن، أَنَا نِكَسِّرْ دَامِي نَبُوخَدْنَصَرْ مَلِكْ بَابِلْ لِنِنَزِّلْ تَقَلَتَهْ مِنْ كَتَافَيْ كُلَّ الْأُمَمْ.›» وَ خَلَاصْ، إِرْمِيَا شَالْ دَرْبَهْ وَ فَاتْ.
12 وَ بَعَدْ حَنَنْيَا شَالْ عُودْ الدَّامِي مِنْ كَتَافَيْ إِرْمِيَا وَ كَسَّرَهْ، اللّٰهْ حَجَّى لِإِرْمِيَا وَ قَالْ: 13 «أَمْشِي وَ قُولْ لِحَنَنْيَا: ‹دَاهُو اللّٰهْ قَالْ: ”إِنْتَ كَسَّرْت دَامِي هَنَا حَطَبْ وَ دَاهُو، بَدَّلْتَهْ بِدَامِي هَنَا حَدِيدْ.“› 14 أَشَانْ اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹أَنَا خَطَّيْت دَامِي هَنَا حَدِيدْ فِي كَتَافَيْ كُلَّ الْأُمَمْ دَوْل لِيَخْدُمُوا لِنَبُوخَدْنَصَرْ مَلِكْ بَابِلْ. وَ سَلَّمْت لَيَّهْ حَيْوَانَاتْ الْكَدَادَةْ كُلَ لِيَقْعُدُوا تِحِتْ سُلْطِتَهْ.›»
15 وَ إِرْمِيَا قَالْ لِحَنَنْيَا: «أَسْمَعْ، يَا حَنَنْيَا! اللّٰهْ مَا رَسَّلَكْ وَ إِنْتَ قَاعِدْ تُغُشّ الشَّعَبْ دَا لِيُخُطُّوا عَشَمْهُمْ فِي كِدْبَكْ. 16 وَ فِي شَانْ دَا، دَاهُو اللّٰهْ قَالْ: ‹أَكِيدْ نُقُشَّكْ مِنْ وِجْه الْأَرْض وَ تُمُوتْ فِي السَّنَةْ دِي أَشَانْ إِنْتَ حَرَّشْت الشَّعَبْ يَعَصَوْا اللّٰهْ.›» 17 وَ خَلَاصْ، النَّبِي حَنَنْيَا مَاتْ فِي السَّنَةْ دِي بَسْ فِي الشَّهَرْ السَّابِعْ.
Hananya atnabbaʼ be kidib
1 Wa fiyah nabi waahid usmah Hananya wileed Azzuur min hillit Gibʼuun. Fi l-chahar al-khaamis fi l-sana al-raabʼe fi bidaayit hukum Sidkhiiya malik Yahuuza, Hananya ja wa hajja le Irmiya fi beet Allah giddaam rujaal al-diin wa kulla l-chaʼab. Wa gaal : 2 «Daahu Allah al-Gaadir Ilaah Bani Israaʼiil gaal : ‹Ana nikassir daami malik Baabil le ninazzil tagalatah min kataafeeku. 3 Wa baʼad santeen, ana nigabbil kulla muʼiddaat beet Allah al-chaalaahum Nabuukhadnasar malik Baabil wa waddaahum fi Baabil wa nijiibhum fi l-bakaan da. 4 Wa ana nigabbil Yuyakiin wileed Yahuuyakhim malik Yahuuza wa kulla naas Yahuuza al-waddoohum fi l-khurba fi Baabil wa nijiibhum fi l-bakaan da. Wa be da, ana nikassir daami malik Baabil le ninazzil tagalatah min kataafeeku.›» Wa da kalaam Allah.
5 Wa l-nabi Irmiya radda le l-nabi Hananya giddaam rujaal al-diin wa kulla l-chaʼab al-gaaʼidiin fi beet Allah. 6 Wa Irmiya gaal : «Aamiin ! Khalli Allah yisawwi misil da ! Khalli Allah yihaggig kulla l-kalaam al-inta atnabbaʼt beyah wa yigabbil min Baabil al-muʼiddaat hana beet Allah wa kulla l-naas al-waddoohum fi l-khurba wa yijiibhum fi l-bakaan da. 7 Wa laakin asmaʼ ! Khutt adaanak le l-kalaam al-nuguulah leek inta wa le kulla l-chaʼab. 8 Fi anbiya al-jo gubbaali ana wa gubbaalak inta min wakit tawiil. Wa atnabbaʼo wa khabbaro buldaan katiiriin wa mamaalik kubaar be l-harib wa l-fasaala wa l-waba. 9 Wa kan nabi waahid yaji wa yitnabbaʼ wa yikhabbir be l-salaam, illa kan al-cheyy al-hu atnabbaʼ beyah alhaggag, khalaas al-naas yaʼarfu kadar hu nabi wa akiid Allah bas rassalah.»
10 Wa khalaas, al-nabi Hananya chaal uud al-daami min kataafe Irmiya wa kassarah. 11 Wa giddaam kulla l-chaʼab, Hananya gaal : «Daahu Allah gaal : ‹Be misil da baʼad santeen, ana nikassir daami Nabuukhadnasar malik Baabil le ninazzil tagalatah min kataafe kulla l-umam.›» Wa khalaas, Irmiya chaal derbah wa faat.
12 Wa baʼad Hananya chaal uud al-daami min kataafe Irmiya wa kassarah, Allah hajja le Irmiya wa gaal : 13 «Amchi wa guul le Hananya : ‹Daahu Allah gaal : “Inta kassart daami hana hatab wa daahu, baddaltah be daami hana hadiid.”› 14 Achaan Allah al-Gaadir Ilaah Bani Israaʼiil gaal : ‹Ana khatteet daami hana hadiid fi kataafe kulla l-umam dool le yakhdumu le Nabuukhadnasar malik Baabil. Wa sallamt leyah haywaanaat al-kadaade kula le yagoodu tihit sultitah.›»
15 Wa Irmiya gaal le Hananya : «Asmaʼ, ya Hananya ! Allah ma rassalak wa inta gaaʼid tukhuchch al-chaʼab da le yukhuttu achamhum fi kidbak. 16 Wa fi chaan da, daahu Allah gaal : ‹Akiid nuguchchak min wijh al-ard wa tumuut fi l-sana di achaan inta harracht al-chaʼab yaʼaso Allah.›» 17 Wa khalaas, al-nabi Hananya maat fi l-sana di bas fi l-chahar al-saabiʼ.
