1 مَالَا تِبَعِّدْ، يَا اللّٰهْ؟
وَ مَالَا مَا تِبِينْ فِي وَكْت الضِّيقَةْ؟
2 بِإِسْتِكْبَارَهْ، الْعَاصِي يِدَمِّرْ الْمِسْكِينْ.
الْمِسْكِينْ يَقَعْ فِي خِطِّتَهْ الْفَسْلَةْ.
3 أَشَانْ الْعَاصِي فَرْحَانْ بِطَمَعَهْ
وَ وَكِتْ يِوَصِّلْ هَدَفَهْ،
هُو يِعَيِّرْ اللّٰهْ.
4 الْعَاصِي الْمُسْتَكْبِرْ مَا يِفَتِّشَهْ
وَ يُقُولْ: «مَا فِي إِلٰـهْ!»
وَ دَا بَسْ كُلَّ فِكْرَهْ.
5 دُرُوبْ الْعَاصِي يَنْجَحَوْا فِي كُلَّ وَكِتْ،
شَرِيعْتَكْ بَعِيدْ مِنْ فِكْرَهْ
وَ هُو يَبْزُقْ فِي كُلَّ عُدْوَانَهْ.
6 وَ يُقُولْ فِي نَفْسَهْ:
«أَنَا مَا نِلْبَرْجَلْ
وَ أَنَا مَحْفُوضْ دَايْماً مِنْ الْفَسَالَةْ.»
7 وَ كَلَامَهْ إِلَّا لَعَنَةْ وَ غَشّ وَ عُنُفْ
وَ فِي لِسَانَهْ، تَعَبْ وَ فَسَالَةْ.
8 هُو كَارِسْ جَنْب الْحِلَّةْ
وَ بِعَشِيرْ، يَكْتُلْ الْبَرِي
وَ يُخُطّ عُيُونَهْ فِي الضَّعِيفْ.
9 هُو كَارِسْ فِي بَكَانْ طَرَفْ
مِثِلْ دُودْ فِي نُقُرْتَهْ.
هُو كَارِسْ لِيِغَفِّلْ الْمِسْكِينْ
وَ يَكْرُبْ الْمِسْكِينْ وَ يَرْمِيهْ فِي شَرَكَهْ.
10 هُو مِثِلْ دُودْ،
يَبْرُكْ وَ يَحْبِي.
وَ الْمِسْكِينْ يَقَعْ
تِحِتْ خَنَافْرَهْ الْقَوِيِّينْ.
11 وَ الْعَاصِي يُقُولْ فِي نَفْسَهْ:
«الرَّبّ يَنْسَى وَ مَا يِدَوْر يَعَرِفْ شَيّءْ
وَ بَتَّانْ مَا يِشِيفْ شَيّءْ!»
12 قُمّ، يَا اللّٰهْ!
يَا رَبّ، أَرْفَعْ إِيدَكْ!
مَا تَنْسَى الْمَسَاكِينْ!
13 مَالَا الْعَاصِي يِعَيِّرْ الرَّبّ؟
وَ مَالَا يُقُولْ فِي نَفْسَهْ:
«إِنْتَ مَا تِعَاقِبْ!»
14 وَ لَاكِنْ، يَا رَبّ، إِنْتَ شِفْت وَ قَاعِدْ تِشِيفْ
التَّعْبَانِينْ وَ الْحَزْنَانِينْ
لِتِدَافِعْ لَيْهُمْ.
الضَّعِيفْ يِتْوَكَّلْ عَلَيْك
وَ إِنْتَ بَسْ التَّفْزَعْ الْأَتِيمْ.
15 أَكْسِرْ دُرَاعْ الْعَاصِي!
وَ عَاقِبَهْ فِي فَسَالْتَهْ
لَحَدِّي فَسَالْتَهْ دِي تَبْقَى مَا فِيهَا!
16 اللّٰهْ مَلِكْ إِلَى الْأَبَدْ
وَ الْأُمَمْ يِنْقَشَّوْا مِنْ بَلَدَهْ.
17 يَا اللّٰهْ، إِنْتَ سِمِعْت مُنَى الْمَسَاكِينْ
وَ رَقَّدْت قُلُوبْهُمْ.
إِنْتَ قَاعِدْ تَسْمَعْهُمْ
18 لِتَنْطِي الْحَقّ لِلْأَتِيمْ وَ الْمَظْلُومْ.
أَشَانْ الْإِنْسَانْ الْمَخْلُوقْ مِنْ التُّرَابْ
مَا يِرَجِّفْ بَتَّانْ الْآخَرِينْ.
1 Maala tibaʼʼid, ya Allah ?
Wa maala ma tibiin fi wakt al-diige ?
2 Be istikbaarah, al-aasi yidammir al-miskiin.
Al-miskiin yagaʼ fi khittitah al-fasle.
3 Achaan al-aasi farhaan be tamaʼah
wa wakit yiwassil hadafah,
hu yiʼayyir Allah.
4 Al-aasi al-mustakbir ma yifattichah
wa yuguul : «Ma fi Ilaah !»
Wa da bas kulla fikrah.
5 Duruub al-aasi yanjaho fi kulla wakit,
chariiʼtak baʼiid min fikrah
wa hu yabzukh fi kulla udwaanah.
6 Wa yuguul fi nafsah :
«Ana ma nilbarjal
wa ana mahfuud daayman min al-fasaala.»
7 Wa kalaamah illa laʼana wa khachch wa unuf
wa fi lisaanah, taʼab wa fasaala.
8 Hu kaaris jamb al-hille
wa be achiir, yaktul al-bari
wa yukhutt uyuunah fi l-daʼiif.
9 Hu kaaris fi bakaan taraf
misil duud fi nugurtah.
Hu kaaris le yikhaffil al-miskiin
wa yakrub al-miskiin wa yarmiih fi charakah.
10 Hu misil duud,
yabruk wa yahbi.
Wa l-miskiin yagaʼ
tihit khanaafrah al-gawiyiin.
11 Wa l-aasi yuguul fi nafsah :
«Al-Rabb yansa wa ma yidoor yaʼarif cheyy
wa battaan ma yichiif cheyy !»
12 Gumm, ya Allah !
Ya Rabb, arfaʼ iidak !
Ma tansa al-masaakiin !
13 Maala al-aasi yiʼayyir al-Rabb ?
Wa maala yuguul fi nafsah :
«Inta ma tiʼaakhib !»
14 Wa laakin, ya Rabb, inta chift wa gaaʼid tichiif
al-taʼbaaniin wa l-haznaaniin
le tidaafiʼ leehum.
Al-daʼiif yitwakkal aleek
wa inta bas al-tafzaʼ al-atiim.
15 Aksir duraaʼ al-aasi !
Wa aakhibah fi fasaaltah
lahaddi fasaaltah di tabga ma fiiha !
16 Allah malik ila l-abad
wa l-umam yingachcho min baladah.
17 Ya Allah, inta simiʼt muna al-masaakiin
wa raggadt guluubhum.
Inta gaaʼid tasmaʼhum
18 le tanti al-hagg le l-atiim wa l-mazluum.
Achaan al-insaan al-makhluug min al-turaab
ma yirajjif battaan al-aakhariin.
