غِنَيْ هَنَا الْحَجّ لِمَدِينَةْ الْقُدُسْ، لِدَاوُدْ
1 أَنَا فِرِحْت وَكِتْ قَالَوْا لَيِّ:
«يَلَّا نَمْشُوا لِبَيْت اللّٰهْ!»
2 وَ دَاهُو أَنِحْنَ وَاقْفِينْ فِي بِيبَانْكِ،
يَا مَدِينَةْ الْقُدُسْ.
3 مَدِينَةْ الْقُدُسْ هِي مَدِينَةْ مَبْنِيَّةْ
بِجَمَالْ وَ مُوَحَّدَةْ.
4 وَ دَا الْبَكَانْ الْيَطْلَعَوْا فَوْقَهْ قَبَايِلْ الرَّبّ
حَسَبْ قَانُونْ بَنِي إِسْرَائِيلْ
لِيِمَجُّدُوا أُسُمْ اللّٰهْ.
5 أَشَانْ الْبَكَانْ دَا،
كُرْسِي الْعَدَالَةْ قَاعِدْ فَوْقَهْ
وَ ذُرِّيَّةْ دَاوُدْ بَسْ
يَحْكُمُوا فَوْقَهْ.
6 أَسْأَلَوْا السَّلَامْ لِمَدِينَةْ الْقُدُسْ وَ قُولُوا:
«خَلِّي الْيِحِبُّوكِ يَقْعُدُوا بِأَمَانْ!
7 وَ خَلِّي السَّلَامْ يَجِي فِي دَرَادِرْكِ
وَ الْأَمَانْ يَدْخُلْ فِي قُصُورْكِ.»
8 وَ فِي شَانْ حُبِّي لِأَخْوَانِي وَ رُفْقَانِي، نُقُولْ:
«أَقْعُدِي بِالسَّلَامْ، يَا مَدِينَةْ الْقُدُسْ!»
9 وَ فِي شَانْ حُبِّي لِبَيْت اللّٰهْ إِلٰـهْنَا،
أَنَا نِتْمَنَّى لَيْكِ الْخَيْر.
Khine hana l-hajj le Madiinat al-Khudus, le Dawuud
1 Ana firiht wakit gaalo leyi :
«Yalla namchu le beet Allah !»
2 Wa daahu aniina waagfiin fi biibaanki,
ya Madiinat al-Khudus.
3 Madiinat al-Khudus hi madiina mabniiye
be jamaal wa muwahhada.
4 Wa da l-bakaan al-yatlaʼo foogah gabaayil al-Rabb
hasab gaanuun Bani Israaʼiil
le yimajjudu usum Allah.
5 Achaan al-bakaan da,
kursi al-adaala gaaʼid foogah
wa zurriiyit Dawuud bas
yahkumu foogah.
6 Asʼalo al-salaam le Madiinat al-Khudus wa guulu :
«Khalli al-yihibbuuki yagoodu be amaan !
7 Wa khalli al-salaam yaji fi daraadirki
wa l-amaan yadkhul fi gusuurki.»
8 Wa fi chaan hubbi le akhwaani wa rufgaani, nuguul :
«Agoodi be l-salaam, ya Madiinat al-Khudus !»
9 Wa fi chaan hubbi le beet Allah Ilaahna,
ana nitmanna leeki al-kheer.
