لِدَاوُدْ
1 يَا اللّٰهْ!
أَنَا وَجَّهْت عَلَيْك.
2 يَا إِلٰـهِي!
أَنَا أَتْوَكَّلْت عَلَيْك، مَا تِعَيِّبْنِي
وَ مَا تِخَلِّي عُدْوَانِي يَفْرَحَوْا فِي شَانِي.
3 الْيُخُطّ عَشَمَهْ فَوْقَكْ مَا يَلْقَى عَيْب
وَ لَاكِنْ الْعَيْب لِلْيُخُونُوا بَلَا سَبَبْ.
4 عَرِّفْنِي دُرُوبَكْ، يَا اللّٰهْ،
وَ عَلِّمْنِي طُرُقَكْ.
5 قُودْنِي بِأَمَانْ وَ عَلِّمْنِي
أَشَانْ إِنْتَ بَسْ إِلٰـهِي الْيِنَجِّينِي
وَ نُخُطّ عَشَمِي فَوْقَكْ دَايْماً.
6 يَا اللّٰهْ! فَكِّرْ فِي رَحْمَتَكْ وَ خَيْرَكْ
أَشَانْ هُمَّنْ قَاعِدِينْ دَايْماً.
7 مَا تِذَّكَّرْ ذُنُوبِي هَنَا صُبَايِ وَ كُلَّ خَطَايِ،
أَذَّكَّرْنِي بِرَحْمَتَكْ بِسَبَبْ خَيْرَكْ، يَا اللّٰهْ!
8 اللّٰهْ عَادِلْ وَ رَحِيمْ
وَ فِي شَانْ دَا، يِوَصِّفْ لِلْمُذْنِبِينْ الدَّرِبْ.
9 وَ هُو يُقُودْ الْمَسَاكِينْ فِي الْعَدَالَةْ
وَ يِعَلِّمْهُمْ دَرْبَهْ.
10 كُلَّ دُرُوبْ اللّٰهْ رَحْمَةْ وَ حَقّ
لِلْيَحْفَضَوْا فَرَايْضَهْ وَ مُعَاهَدَتَهْ.
11 وَ فِي شَانْ أُسْمَكْ، يَا اللّٰهْ،
أَغْفِرْ لَيِّ ذُنُوبِي،
أَيْوَى، ذُنُوبِي الْكَتِيرِينْ.
12 فِي نَادُمْ يَخَافْ مِنْ اللّٰهْ وَلَّا؟
اللّٰهْ يِوَصِّفْ لَيَّهْ الدَّرِبْ الْهُو يَعَزِلَهْ.
13 النَّادُمْ دَا يِعِيشْ فِي الرَّاحَةْ
وَ ذُرِّيّتَهْ يَوْرُثُوا الْأَرْض.
14 اللّٰهْ يَنْطِي سِرَّهْ لِلْيَخَافَوْا مِنَّهْ
لِيِعَرِّفْهُمْ مُعَاهَدَتَهْ.
15 أَنَا دَايْماً نَرْفَعْ عُيُونِي لِلّٰهْ
أَشَانْ هُو بَسْ يَمْرُقْ رِجِلَيْنِي مِنْ الشَّرَكْ.
16 وَجِّهْ عَلَيِّ وَ أَرْحَمْنِي، يَا رَبِّي،
أَشَانْ أَنَا وِحَيْدِي وَ مِسْكِينْ.
17 التَّعَبْ مَلَا قَلْبِي،
أَمْرُقْنِي مِنْ ضِيقْتِي!
18 شِيفْ مُرِّي وَ تَعَبِي
وَ أَغْفِرْ كُلَّ ذُنُوبِي.
19 شِيفْ عُدْوَانِي أَشَانْ هُمَّنْ كَتِيرِينْ
وَ هُمَّنْ يَكْرَهَوْنِي بِعُنُفْ شَدِيدْ.
20 أَحْفَضْنِي وَ نَجِّينِي!
مَا تِخَلِّي الْعَيْب يَكْرُبْنِي
أَشَانْ أَنَا لَجَأْت لَيْك.
21 خَلِّي كَمَالَكْ وَ عَدَالْتَكْ يَحْفَضَوْنِي
أَشَانْ أَنَا خَطَّيْت عَشَمِي فَوْقَكْ.
22 يَا إِلٰـهِي! أَفْدَى بَنِي إِسْرَائِيلْ
مِنْ كُلَّ ضِيقِتْهُمْ!
Le Dawuud
1 Ya Allah !
Ana wajjaht aleek.
2 Ya Ilaahi !
Ana atwakkalt aleek, ma tiʼayyibni
wa ma tikhalli udwaani yafraho fi chaani.
3 Al-yukhutt achamah foogak ma yalga eeb
wa laakin al-eeb le l-yukhuunu bala sabab.
4 Arrifni duruubak, ya Allah,
wa allimni turugak.
5 Guudni be amaan wa allimni
achaan inta bas Ilaahi al-yinajjiini
wa nukhutt achami foogak daayman.
6 Ya Allah ! Fakkir fi rahmatak wa kheerak
achaan humman gaaʼidiin daayman.
7 Ma tizzakkar zunuubi hana subaayi wa kulla khataayi,
azzakkarni be rahmatak be sabab kheerak, ya Allah !
8 Allah aadil wa rahiim
wa fi chaan da, yiwassif le l-muznibiin al-derib.
9 Wa hu yuguud al-masaakiin fi l-adaala
wa yiʼallimhum derbah.
10 Kulla duruub Allah rahma wa hagg
le l-yahfado faraaydah wa muʼaahadatah.
11 Wa fi chaan usmak, ya Allah,
akhfir leyi zunuubi,
aywa, zunuubi al-katiiriin.
12 Fi naadum yakhaaf min Allah walla ?
Allah yiwassif leyah al-derib al-hu yaʼazilah.
13 Al-naadum da yiʼiich fi l-raaha
wa zurriiytah yawrusu al-ard.
14 Allah yanti sirrah le l-yakhaafo minnah
le yiʼarrifhum muʼaahadatah.
15 Ana daayman narfaʼ uyuuni le Allah
achaan hu bas yamrug rijileeni min al-charak.
16 Wajjih aleyi wa arhamni, ya Rabbi,
achaan ana wiheedi wa miskiin.
17 Al-taʼab mala galbi,
amrugni min diigti !
18 Chiif murri wa taʼabi
wa akhfir kulla zunuubi.
19 Chiif udwaani achaan humman katiiriin
wa humman yakrahooni be unuf chadiid.
20 Ahfadni wa najjiini !
Ma tikhalli al-eeb yakrubni
achaan ana lajaʼt leek.
21 Khalli kamaalak wa adaaltak yahfadooni
achaan ana khatteet achami foogak.
22 Ya Ilaahi ! Afda Bani Israaʼiil
min kulla diigithum !
