غِنَيْ فَتِحِينْ بَيْت اللّٰهْ، مَزْمُورْ لِدَاوُدْ
1 أَنَا نِعَظِّمَكْ، يَا اللّٰهْ،
أَشَانْ إِنْتَ مَرَقْتِنِي مِنْ النُّقْرَةْ
وَ مَا خَلَّيْت عُدْوَانِي يَفْرَحَوْا بِسَبَبِي.
2 يَا اللّٰهْ إِلٰـهِي!
أَنَا نَادَيْتَكْ لِتَفْزَعْنِي
وَ إِنْتَ شَفَيْتنِي.
3 يَا اللّٰهْ! إِنْتَ مَرَقْتِنِي مِنْ الْمَوْت
وَ مِنْ الْيَنْزُلُوا فِي الْقُبُورْ،
إِنْتَ أَنْطَيْتنِي الْحَيَاةْ.
4 غَنُّوا لِلّٰهْ، إِنْتُو مُؤمِنِينَهْ،
أَشْكُرُوهْ وَ أَذْكُرُوا أُسْمَهْ الْقُدُّوسْ.
5 أَشَانْ غَضَبَهْ يَقْعُدْ لِوَكِتْ شِيَّةْ
وَ لَاكِنْ رِضَايَهْ يَقْعُدْ مُدَّةْ عُمُرْ.
بِعَشِيَّةْ، الْبَكِي يَجِي
وَ لَاكِنْ بِفَجُرْ، الزَّغْرَاطْ يِنْسَمِعْ.
6 وَ فِي رَاحْتِي، أَنَا قُلْت:
«مَا نِتَّرْتَعْ أَبَداً.»
7 أَشَانْ فِي وَكِتْ رِضَاكْ، يَا اللّٰهْ،
إِنْتَ قَوَّيْتنِي مِثِلْ جَبَلْ.
لَاكِنْ وَكِتْ إِنْتَ مَا وَجَّهْت عَلَيِّ،
أَنَا أَنْبَهَتْ.
8 يَا اللّٰهْ، أَنَا نَادَيْتَكْ!
أَيْوَى، لِرَبِّي أَنَا شَحَدْتَهْ وَ قُلْت:
9 «شُنُو الْفَايْدَةْ التَّلْقَاهَا
كَنْ دَمِّي يِدَفِّقْ
أَوْ كَنْ نَنْزِلْ فِي الْقَبُرْ؟
التُّرَابْ يَقْدَرْ يَشْكُرَكْ
وَ يِحَجِّي بِصِدْقَكْ وَلَّا؟»
10 أَسْمَعْ، يَا اللّٰهْ، أَرْحَمْنِي!
يَا اللّٰهْ، أَفْزَعْنِي.
11 إِنْتَ بَدَّلْت حِزْنِي بِالْفَرْحَةْ
وَ خُلْقَانِي هَنَا الْحِزِنْ،
بَدَّلْتُهُمْ بِخُلْقَانْ هَنَا الْفَرْحَةْ.
12 وَ بَيْدَا، قَلْبِي يِغَنِّي لَيْك، مَا يَسْكُتْ.
يَا اللّٰهْ إِلٰـهِي، نَشْكُرَكْ إِلَى الْأَبَدْ!
Khine fatihiin beet Allah, mazmuur le Dawuud
1 Ana niʼazzimak, ya Allah,
achaan inta maragtini min al-nugra
wa ma khalleet udwaani yafraho be sababi.
2 Ya Allah Ilaahi !
Ana naadeetak le tafzaʼni
wa inta chafeetni.
3 Ya Allah ! Inta maragtini min al-moot
wa min al-yanzulu fi l-khubuur,
inta anteetni al-haya.
4 Khannu le Allah, intu muʼminiinah,
achkuruuh wa azkuru usmah al-Khudduus.
5 Achaan khadabah yagood le wakit chiyya
wa laakin ridaayah yagood muddit umur.
Be achiiye, al-baki yaji
wa laakin be fajur, al-zakhraat yinsamiʼ.
6 Wa fi raahti, ana gult :
«Ma nittartaʼ abadan.»
7 Achaan fi wakit ridaak, ya Allah,
inta gawweetni misil jabal.
Laakin wakit inta ma wajjaht aleyi,
ana anbahat.
8 Ya Allah, ana naadeetak !
Aywa, le Rabbi ana chahadtah wa gult :
9 «Chunu al-faayde al-talgaaha
kan dammi yidaffig
aw kan nanzil fi l-khabur ?
Al-turaab yagdar yachkurak
wa yihajji be sidkhak walla ?»
10 Asmaʼ, ya Allah, arhamni !
Ya Allah, afzaʼni.
11 Inta baddalt hizni be l-farha
wa khulgaani hana l-hizin,
baddaltuhum be khulgaan hana l-farha.
12 Wa be da, galbi yikhanni leek, ma yaskut.
Ya Allah Ilaahi, nachkurak ila l-abad !
