وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 يَا اللّٰهْ! لَيْك إِنْتَ أَنَا نَلْجَأْ دَايْماً،
خَلِّي مَا نَلْقَى عَيْب.
بِعَدَالْتَكْ، نَجِّينِي!
2 خُطّ أَدَانَكْ لَيِّ
وَ أَفْزَعْنِي عَجَلَةْ!
أَبْقَى لَيِّ مَلْجَأْ قَوِي
وَ بَيْت قَوِي النَّلْقَى فَوْقَهْ النَّجَاةْ.
3 أَشَانْ إِنْتَ جَبَلِي وَ بَكَانِي الْقَوِي
وَ فِي شَانْ أُسْمَكْ، تُقُودْنِي وَ تِوَدِّينِي.
4 وَ إِنْتَ تَمْرُقْنِي
مِنْ أَمْ كَجَّامَةْ الْكَجَّوْهَا لَيِّ
أَشَانْ إِنْتَ بَسْ مَلْجَئِي.
5 وَ رُوحِي نَنْطِيهَا لَيْك فِي إِيدَكْ.
يَا اللّٰهْ إِلٰـهْ الْحَقّ، إِنْتَ فَدَيْتنِي.
6 أَنَا نَكْرَهْ الْيِنْرَبْطُوا فِي الْأَصْنَامْ
وَ أَنَا نِتْوَكَّلْ عَلَيْ اللّٰهْ.
7 أَنَا نِنْبَسِطْ وَ نَفْرَحْ بِرَحْمَتَكْ
أَشَانْ إِنْتَ شِفْت تَعَبِي
وَ عِرِفْت ضِيقْتِي.
8 وَ إِنْتَ مَا سَلَّمْتِنِي فِي إِيدْ عُدْوَانِي،
إِنْتَ وَقَّفْتِنِي بِطُولِي
وَ خَطَّيْتنِي فِي بَكَانْ وَسِيعْ.
9 حِنّ فَوْقِي، يَا اللّٰهْ،
أَشَانْ أَنَا فِي الضِّيقَةْ،
الْحِزِنْ ضَعَّفْ عُيُونِي وَ نَفْسِي وَ جِسْمِي.
10 حَيَاتِي قَاعِدَةْ تِكَمِّلْ فِي الْحِزِنْ
وَ سِنِينِي فَاتَوْا فِي الْقَنِتِينْ
وَ بِسَبَبْ خَطَايِ، قُدُرْتِي وَدَّرَتْ
وَ عُضَامِي بِقَوْا ضَعِيفِينْ.
11 كُلَّ خُصْمَانِي يِعَيُّرُونِي
وَ جِيرَانِي يِعَيُّبُونِي زِيَادَةْ.
الْيَعَرْفُونِي يَخَافَوْا مِنِّي
وَ كَنْ يِشِيفُونِي فِي الشَّارِعْ، يِعَرُّدُوا مِنِّي.
12 هُمَّنْ نِسَوْنِي مَرَّةْ وَاحِدْ مِثِلْ مَيِّتْ
وَ أَنَا بِقِيتْ مِثِلْ مَاعُونْ مُكَسَّرْ.
13 أَنَا سِمِعْت كَتِيرْ قُوَالَةْ النَّاسْ
لَحَدِّي الرُّعُبْ جَانِي مِنْ كُلَّ بَكَانْ
وَكِتْ هُمَّنْ يِشَّاوَرَوْا سَوَا ضِدِّي
وَ يِخَطُّطُوا لِيَكْتُلُونِي.
14 لَاكِنْ أَنَا أَتْوَكَّلْ عَلَيْك، يَا اللّٰهْ،
وَ قُلْت: «إِنْتَ بَسْ إِلٰـهِي.»
15 أَيَّامْ حَيَاتِي فِي إِيدَيْنَكْ إِنْتَ.
خَلِّصْنِي مِنْ إِيدْ عُدْوَانِي
وَ مِنْ الْيِطَارُدُونِي.
16 وَجِّهْ نُورْ وِجْهَكْ عَلَيِّ أَنَا عَبْدَكْ
وَ نَجِّينِي بِرَحْمَتَكْ.
17 يَا اللّٰهْ! خَلِّي مَا نَلْقَى عَيْب
وَكِتْ نَشْحَدَكْ.
وَ لَاكِنْ خَلِّي الْعَاصِيِينْ يَخْجَلَوْا
وَ يَنْزُلُوا فِي الْقَبُرْ وَ يَسْكُتُوا.
18 خَلِّي الْكَدَّابِينْ دَوْل يَبْقَوْا بُكُمْ،
هُمَّنْ الْيِكَلُّمُوا ضِدّ الصَّالِحْ
بِحُقْرَةْ وَ إِسْتِكْبَارْ وَ كَرَاهِيَّةْ.
19 يَا اللّٰهْ! خَيْرَكْ كَتِيرْ
الْحَفَضْتَهْ لِلنَّاسْ الْيَخَافَوْا مِنَّكْ.
وَ تَنْطِيهْ لِلْيَلْجَأَوْا لَيْك
قِدَّامْ كُلَّ النَّاسْ.
20 وَ إِنْتَ تِلَبِّدْهُمْ فِي حَضَرَتَكْ،
بَعِيدْ مِنْ مُؤآمَرَةْ الْإِنْسَانْ
وَ تَحْفَضْهُمْ فِي مَسْكَنَكْ،
بَعِيدْ مِنْ هُجُومْ اللِّسَانْ.
21 بَارَكْ اللّٰهْ!
أَشَانْ هُو وَصَّفْ لَيِّ رَحْمَتَهْ الْعَجِيبَةْ
فِي مَدِينَةْ مُحَاصَرَةْ.
22 وَ فِي بَرْجَلَتِي، أَنَا قُلْت:
«أَنَا مَطْرُودْ بَعِيدْ مِنْ حَضَرَتَكْ!»
وَ لَاكِنْ إِنْتَ سِمِعْت شِحِدْتِي
وَكِتْ كَوْرَكْت لِلْفَزَعْ.
23 حِبُّوا اللّٰهْ، إِنْتُو الْمُؤمِنِينْ بَيَّهْ!
اللّٰهْ يَحْفَضْ الْأَمِينِينْ.
وَ لَاكِنْ لِلْمُسْتَكْبِرِينْ
يِحَاسِبْهُمْ بِعَمَلْهُمْ.
24 أَبْقَوْا شُدَادْ وَ فَحَلِينْ
إِنْتُو كُلُّكُو الْعِنْدُكُو عَشَمْ فِي اللّٰهْ.
Wasiiye le kabiir al-khannaayiin : Mazmuur le Dawuud
1 Ya Allah ! Leek inta ana naljaʼ daayman,
khalli ma nalga eeb.
Be adaaltak, najjiini !
2 Khutt adaanak leyi
wa afzaʼni ajala !
Abga leyi maljaʼ gawi
wa beet gawi al-nalga foogah al-naja.
3 Achaan inta jabali wa bakaani al-gawi
wa fi chaan usmak, tuguudni wa tiwaddiini.
4 Wa inta tamrugni
min amkajjaama al-kajjooha leyi
achaan inta bas maljaʼi.
5 Wa ruuhi nantiiha leek fi iidak.
Ya Allah Ilaah al-Hagg, inta fadeetni.
6 Ana nakrah al-yinrabtu fi l-asnaam
wa ana nitwakkal ale Allah.
7 Ana ninbasit wa nafrah be rahmatak
achaan inta chift taʼabi
wa irift diigti.
8 Wa inta ma sallamtini fi iid udwaani,
inta waggaftini be tuuli
wa khatteetni fi bakaan wasiiʼ.
9 Hinn foogi, ya Allah,
achaan ana fi l-diige,
al-hizin daʼʼaf uyuuni wa nafsi wa jismi.
10 Hayaati gaaʼide tikammil fi l-hizin
wa siniini faato fi l-ganitiin
wa be sabab khataayi, gudurti waddarat
wa udaami bigo daʼiifiin.
11 Kulla khusmaani yiʼayyuruuni
wa jiiraani yiʼayyubuuni ziyaada.
Al-yaʼarfuuni yakhaafo minni
wa kan yichiifuuni fi l-chaariʼ, yiʼarrudu minni.
12 Humman nisooni marra waahid misil mayyit
wa ana bigiit misil maaʼuun mukassar.
13 Ana simiʼt katiir guwaalit al-naas
lahaddi al-ruʼub jaani min kulla bakaan
wakit humman yichchaawaro sawa diddi
wa yikhattutu le yaktuluuni.
14 Laakin ana atwakkal aleek, ya Allah,
wa gult : «Inta bas Ilaahi.»
15 Ayyaam hayaati fi iideenak inta.
Khallisni min iid udwaani
wa min al-yitaaruduuni.
16 Wajjih nuur wijhak aleyi ana abdak
wa najjiini be rahmatak.
17 Ya Allah ! Khalli ma nalga eeb
wakit nachhadak.
Wa laakin khalli al-aasiyiin yakhjalo
wa yanzulu fi l-khabur wa yaskutu.
18 Khalli al-kaddaabiin dool yabgo bukum,
humman al-yikallumu didd al-saalih
be hugra wa istikbaar wa karaahiiye.
19 Ya Allah ! Kheerak katiir
al-hafadtah le l-naas al-yakhaafo minnak.
Wa tantiih le l-yaljaʼo leek
giddaam kulla l-naas.
20 Wa inta tilabbidhum fi hadaratak,
baʼiid min muʼaamarat al-insaan
wa tahfadhum fi maskanak,
baʼiid min hujuum al-lisaan.
21 Baarak Allah !
Achaan hu wassaf leyi rahmatah al-ajiibe
fi madiina muhaasara.
22 Wa fi barjalati, ana gult :
«Ana matruud baʼiid min hadaratak !»
Wa laakin inta simiʼt chihidti
wakit koorakt le l-fazaʼ.
23 Hibbu Allah, intu al-muʼminiin beyah !
Allah yahfad al-amiiniin.
Wa laakin le l-mustakbiriin
yihaasibhum be amalhum.
24 Abgo chudaad wa fahaliin
intu kulluku al-induku acham fi Allah.
