لِدَاوُدْ
1 يَا اللّٰهْ! خَاصِمْ الْيِخَاصُمُونِي
وَ حَارِبْ الْيِحَارُبُونِي!
2 شِيلْ دَرَقَتَكْ وَ دِرْعَكْ
وَ قُمّ أَفْزَعْنِي!
3 مِدّ حَرِبْتَكْ وَ أَرْفَعْ طَبِيقَكْ
لِتِقَابِلْ الْيِطَارُدُونِي.
وَ قُولْ لَيِّ: «أَنَا مُنَجِّيكْ!»
4 خَلِّي يِعِيبُوا وَ يِنْهَانَوْا،
هُمَّنْ الْيِدَوْرُوا مَوْتِي!
خَلِّي يِعَرُّدُوا خَجْلَانِينْ،
هُمَّنْ الْيِدَوْرُوا لَيِّ الْفَسَالَةْ!
5 خَلِّي يَبْقَوْا مِثِلْ أُتَّابْ فِي أُسْط الرِّيحْ
وَكِتْ مَلَكْ اللّٰهْ يِطَارِدْهُمْ!
6 خَلِّي دَرِبْهُمْ يَبْقَى أَضْلَمْ وَ أَمْ ظَحَلَوْطَةْ
وَكِتْ مَلَكْ اللّٰهْ يَطْرُدْهُمْ!
7 أَشَانْ بَلَا جَنِيَّةْ، كَجَّوْا لَيِّ شَرَكْ
وَ بَلَا جَنِيَّةْ، نَكَتَوْا نُقْرَةْ لِيَرْمُونِي.
8 خَلِّي يَقَعْ فَوْقهُمْ هَلَاكْ بِغَفْلَةْ
وَ يَكْرُبْهُمْ شَرَكْهُمْ اللَّبَّدَوْه
وَ فِي الْهَلَاكْ يَقَعَوْا!
9 لَاكِنْ نَفْسِي تِنْبَسِطْ بِاللّٰهْ
وَ أَنَا نَفْرَحْ بِنَجَاتَهْ.
10 وَ فِي نَفْسِي نُقُولْ:
«يَا اللّٰهْ، يَاتُو مِثْلَكْ؟
إِنْتَ تِنَجِّي الْمِسْكِينْ
مِنْ الْقَوِي مِنَّهْ
وَ تِنَجِّي الْمِسْكِينْ وَ الضَّعِيفْ
مِنْ الْيَقْلَعْ مِنْهُمْ.»
11 شُهُودْ الزُّورْ قَمَّوْا يَتْهَمَوْنِي
بِشَيّءْ الْأَنَا مَا نَعَرْفَهْ.
12 وَ هُمَّنْ يِسَوُّوا لَيِّ فَسِلْ
فِي بَدَلْ الزَّيْن
وَ أَنَا فَضَّلْت وِحَيْدِي.
13 وَ فِي وَكِتْ مَرَضْهُمْ،
أَنَا لِبِسْت خُلْقَانْ الْحِزِنْ
وَ مَسْكَنْت نَفْسِي بِصِيَامْ
وَ قَاعِدْ نِصَلِّي دَايْماً لَيْهُمْ.
14 أَنَا مَشَيْت وَ جِيتْ
مِثِلْ فِي مَوْت هَنَا أَخُو أَوْ رَفِيقْ
وَ دَنْقَرْت رَاسِي
مِثِلْ الْحَزْنَانْ لِأَمَّهْ.
15 لَاكِنْ وَكِتْ أَتَّرْتَعْت،
هُمَّنْ لَمَّوْا ضِدِّي وَ فِرْحَوْا.
وَ مِنْ دُونْ نَعَرْفَهْ،
الْفَسْلِينْ قَمَّوْا ضِدِّي
وَ دَايْماً يِقَطُّعُوا لَحَمْ جِلْدِي.
16 مَعَ الشَّمَّاتِينْ، يَضْحَكَوْا فَوْقِي
وَ دَايْماً يِوَصُّفُونِي سُنُونْهُمْ الطُّرَانْ.
17 يَا رَبّ، كِكَّيْف تَحْمَلْ الشَّيّءْ دَا؟
نَجِّي رُوحِي مِنْ دَمَارْهُمْ
وَ نَجِّي نَفْسِي مِنْ الدِّيدَانْ دَوْل!
18 فِي لُبّ الْمُجْتَمَعْ، أَنَا نَشْكُرَكْ
أَيْوَى، فِي لُبّ النَّاسْ الْكَتِيرِينْ، نَحْمُدَكْ.
19 هُمَّنْ الْبِقَوْا عُدْوَانِي بَلَا جَنِيَّةْ،
خَلِّي مَا يَفْرَحَوْا بِسَبَبِي.
هُمَّنْ الْيَكْرَهَوْنِي بَلَا جَنِيَّةْ،
خَلِّي مَا يُكُجُّوا عُيُونْهُمْ لِيِعَيُّرُونِي!
20 أَشَانْ أَبَداً مَا يِحَجُّوا بِسَلَامْ
ضِدّ سُكَّانْ الْعَايْشِينْ بِهُدُوءْ فِي الْبَلَدْ.
وَ كُلَّ شَيّءْ الْيُقُولُوا،
هُو كَلَامْ غَشّ.
21 وَ يَفْتَحَوْا خُشُومْهُمْ كُبَارْ
وَ يُقُولُوا ضِدِّي:
«هَا هَا! عُيُونَّا شَافَوْه!»
22 وَ إِنْتَ كُلَ شِفْت، يَا اللّٰهْ. مَا تَسْكُتْ!
يَا رَبِّي، مَا تِبَعِّدْ مِنِّي!
23 قُمّ، يَا إِلٰـهِي، دَافِعْ لَيِّ فِي ضَلِيمْتِي!
وَ دَافِعْ لَيِّ فِي شَانْ حُقُوقِي، يَا رَبِّي!
24 حَاكِمْنِي حَسَبْ عَدَالْتَكْ، يَا اللّٰهْ إِلٰـهِي،
وَ خَلِّي عُدْوَانِي مَا يَفْرَحَوْا بِسَبَبِي.
25 وَ خَلِّي مَا يُقُولُوا فِي قُلُوبْهُمْ:
«هَا هَا! هُو دَا، لُقْمَةْ وَاحِدَةْ مَا تَمَّ!»
وَ خَلِّي مَا يُقُولُوا:
«دَا خَلَاصْ! أَنِحْنَ زَرَطْنَاهْ!»
26 خَلِّي الْعَيْب وَ الشَّمَاتَةْ يَكُرْبُوهُمْ،
هُمَّنْ الْيَفْرَحَوْا بِمَصِيبْتِي.
خَلِّي الْعَيْب وَ الْإِهَانَةْ يِغَطُّوهُمْ،
هُمَّنْ الْيُقُمُّوا ضِدِّي.
27 خَلِّي يِعِيطُوا وَ يِزَغْرُطُوا مِنْ الْفَرَحْ
هُمَّنْ الْيِدَوْرُوا لَيِّ الْعَدَالَةْ
وَ دَايْماً يُقُولُوا:
«اللّٰهْ هُو أَكْبَرْ! هُو يِدَوْر سَلَامَةْ عَبْدَهْ.»
28 وَ خَلَاصْ، لِسَانِي يِكَلِّمْ بِعَدَالْتَكْ
أَيْوَى، كُلَّ يَوْم نَحْمُدَكْ.
Le Dawuud
1 Ya Allah ! Khaasim al-yikhaasumuuni
wa haarib al-yihaarubuuni !
2 Chiil daragatak wa dirʼak
wa gumm afzaʼni !
3 Midd haribtak wa arfaʼ tabiigak
le tigaabil al-yitaaruduuni.
Wa guul leyi : «Ana munajjiik !»
4 Khalli yiʼiibu wa yinhaano,
humman al-yidooru mooti !
Khalli yiʼarrudu khajlaaniin,
humman al-yidooru leyi al-fasaala !
5 Khalli yabgo misil uttaab fi ust al-riih
wakit malak Allah yitaaridhum !
6 Khalli deribhum yabga adlam wa amzahaloota
wakit malak Allah yatrudhum !
7 Achaan bala janiiye, kajjo leyi charak
wa bala janiiye, nakato nugra le yarmuuni.
8 Khalli yagaʼ fooghum halaak be khafla
wa yakrubhum charakhum al-labbadooh
wa fi l-halaak yagaʼo !
9 Laakin nafsi tinbasit be Allah
wa ana nafrah be najaatah.
10 Wa fi nafsi nuguul :
«Ya Allah, yaatu mislak ?
Inta tinajji al-miskiin
min al-gawi minnah
wa tinajji al-miskiin wa l-daʼiif
min al-yaglaʼ minhum.»
11 Chuhuud al-zuur gammo yathamooni
be cheyy al-ana ma naʼarfah.
12 Wa humman yisawwu leyi fasil
fi badal al-zeen
wa ana faddalt wiheedi.
13 Wa fi wakit maradhum,
ana libist khulgaan al-hizin
wa maskant nafsi be siyaam
wa gaaʼid nisalli daayman leehum.
14 Ana macheet wa jiit
misil fi moot hana akhu aw rafiig
wa dangart raasi
misil al-haznaan le ammah.
15 Laakin wakit attartaʼt,
humman lammo diddi wa firho.
Wa min duun naʼarfah,
al-fasliin gammo diddi
wa daayman yigattuʼu laham jildi.
16 Maʼa l-chammaatiin, yadhako foogi
wa daayman yiwassufuuni sunuunhum al-turaan.
17 Ya Rabb, kikkeef tahmal al-cheyy da ?
Najji ruuhi min damaarhum
wa najji nafsi min al-diidaan dool !
18 Fi lubb al-mujtamaʼ, ana nachkurak
aywa, fi lubb al-naas al-katiiriin, nahmudak.
19 Humman al-bigo udwaani bala janiiye,
khalli ma yafraho be sababi.
Humman al-yakrahooni bala janiiye,
khalli ma yukujju uyuunhum le yiʼayyuruuni !
20 Achaan abadan ma yihajju be salaam
didd sukkaan al-aaychiin be hudu fi l-balad.
Wa kulla cheyy al-yuguulu,
hu kalaam khachch.
21 Wa yaftaho khuchuumhum kubaar
wa yuguulu diddi :
«Ha ha ! Uyuunna chaafooh !»
22 Wa inta kula chift, ya Allah. Ma taskut !
Ya Rabbi, ma tibaʼʼid minni !
23 Gumm, ya Ilaahi, daafiʼ leyi fi daliimti !
Wa daafiʼ leyi fi chaan huguugi, ya Rabbi !
24 Haakimni hasab adaaltak, ya Allah Ilaahi,
wa khalli udwaani ma yafraho be sababi.
25 Wa khalli ma yuguulu fi guluubhum :
«Ha ha ! Hu da, lugma waahide ma tamma !»
Wa khalli ma yuguulu :
«Da khalaas ! Aniina zaratnaah !»
26 Khalli al-eeb wa l-chamaate yakurbuuhum,
humman al-yafraho be masiibti.
Khalli al-eeb wa l-ihaana yikhattuuhum,
humman al-yugummu diddi.
27 Khalli yiʼiitu wa yizakhrutu min al-farah
humman al-yidooru leyi al-adaala
wa daayman yuguulu :
«Allah hu akbar ! Hu yidoor salaamat abdah.»
28 Wa khalaas, lisaani yikallim be adaaltak
aywa, kulla yoom nahmudak.
