مَزْمُورْ لِدَاوُدْ، لِيِذَّكَّرَوْا بَيَّهْ
1 يَا اللّٰهْ، عَاقِبْنِي بَلَا غَضَبْ
وَ أَدِّبْنِي بَلَا زَعَلْ.
2 أَشَانْ نَشَاشِيبَكْ طَعَنَوْنِي
وَ إِيدَكْ نَزَلَتْ فَوْقِي.
3 جِسْمِي كُلَّ مَا عَافَيْ
وَ دَا بِسَبَبْ غَضَبَكْ.
مَا فِي صِحَّةْ فِي عُضَامِي
وَ دَا بِسَبَبْ ذُنُوبِي.
4 أَشَانْ خَطَايِ فَاتْ رَاسِي
وَ غَطَّانِي مِثِلْ حِمِلْ تَقِيلْ النَّزَلْ فَوْقِي.
5 جُرُوحِي شَالَوْا وِعَيْ وَ عَفَّنَوْا
وَ دَا بِسَبَبْ نِفَاقِي.
6 وَ ضَهَرِي أَنْعَوَجْ وَ أَنْكَسَرْ
وَ دَايْماً أَنَا قَاعِدْ نُرُوغْ بِتَعَبْ.
7 أَشَانْ صُلْبِي بَوْجَعْنِي
وَ جِسْمِي كُلَّ مَا عَافَيْ.
8 أَنَا عِيِيتْ وَ قُدُرْتِي كَمَّلَتْ
وَ نَقْنِتْ مِنْ ضَرَبَانْ قَلْبِي.
9 يَا رَبّ، كُلَّ طَلَبَاتِي قَاعِدِينْ قِدَّامَكْ
وَ قَنِيتِي مَا مُلَبَّدْ مِنَّكْ.
10 قَلْبِي يَضْرُبْ وَ قُدُرْتِي بِقَتْ مَا فِيهَا
لَحَدِّي وَدَّرْت نُورْ عُيُونِي.
11 بِسَبَبْ جُرُوحِي،
رُفْقَانِي وَ زُمْلَانِي بَعَّدَوْا مِنِّي
وَ أَهَلِي طَرَّفَوْا مِنِّي.
12 الْيِدَوْرُوا مَوْتِي
كَجَّوْا لَيِّ شَرَكْ.
وَ الْيِدَوْرُوا لَيِّ الْفَسَالَةْ يِعَيُّرُونِي
وَ دَايْماً يِحَجُّوا لَيِّ بِغَشّ.
13 وَ لَاكِنْ أَنَا مِثِلْ الْأَطْرَشْ، مَا نَسْمَعْ
وَ مِثِلْ الْأَبْكَمْ، مَا نَفْتَحْ خَشْمِي.
14 أَنَا مِثِلْ النَّادُمْ الْمَا يَسْمَعْ
وَ مَا فِي رَدّ فِي خَشْمَهْ.
15 أَشَانْ يَا اللّٰهْ، فِيكْ إِنْتَ بَسْ عِنْدِي الْعَشَمْ
وَ إِنْتَ بَسْ تُرُدّ لَيِّ، يَا رَبِّي، يَا إِلٰـهِي.
16 أَشَانْ أَنَا قُلْت:
«خَلِّي مَا يِشَّمَّتَوْا لَيِّ.
وَكِتْ رِجِلَيْنِي يِتَّرْتَعَوْا،
خَلِّي مَا يِسْتَكْبَرَوْا فَوْقِي.»
17 أَيْوَى، أَنَا قَرِيبْ نِتَّرْتَعْ
وَ تَعَبِي مَا يِكَمِّلْ أَبَداً.
18 أَنَا نِعْتَرِفْ بِخَطَايِ
وَ نَحْزَنْ بِسَبَبْ ذَنْبِي.
19 عُدْوَانِي حَيِّينْ وَ شُدَادْ
وَ كَتِيرِينْ الْيَكْرَهَوْنِي بَلَا سَبَبْ.
20 وَ الْيِسَوُّوا لَيِّ الشَّرّ فِي بَدَلْ الْخَيْر
يَتْهَمَوْنِي فِي شَانْ الزَّيْن الْأَنَا نِفَتِّشَهْ.
21 يَا اللّٰهْ، مَا تِخَلِّينِي!
يَا إِلٰـهِي، مَا تِبَعِّدْ مِنِّي!
22 يَلَّا عَجَلَةْ، أَفْزَعْنِي!
يَا رَبِّي! يَا مُنَجِّي حَيَاتِي!
Mazmuur le Dawuud, le yizzakkaro beyah
1 Ya Allah, aakhibni bala khadab
wa addibni bala zaʼal.
2 Achaan nachaachiibak taʼanooni
wa iidak nazalat foogi.
3 Jismi kulla ma aafe
wa da be sabab khadabak.
Ma fi sihha fi udaami
wa da be sabab zunuubi.
4 Achaan khataayi faat raasi
wa khattaani misil himil tagiil al-nazal foogi.
5 Juruuhi chaalo wiʼe wa affano
wa da be sabab nifaakhi.
6 Wa dahari anʼawaj wa ankasar
wa daayman ana gaaʼid nuruukh be taʼab.
7 Achaan sulbi boojaʼni
wa jismi kulla ma aafe.
8 Ana iyiit wa gudurti kammalat
wa nagnit min darabaan galbi.
9 Ya Rabb, kulla talabaati gaaʼidiin giddaamak
wa ganiiti ma mulabbad minnak.
10 Galbi yadrub wa gudurti bigat ma fiiha
lahaddi waddart nuur uyuuni.
11 Be sabab juruuhi,
rufgaani wa zumlaani baʼʼado minni
wa ahali tarrafo minni.
12 Al-yidooru mooti
kajjo leyi charak.
Wa l-yidooru leyi al-fasaala yiʼayyuruuni
wa daayman yihajju leyi be khachch.
13 Wa laakin ana misil al-atrach, ma nasmaʼ
wa misil al-abkam, ma naftah khachmi.
14 Ana misil al-naadum al-ma yasmaʼ
wa ma fi radd fi khachmah.
15 Achaan ya Allah, fiik inta bas indi al-acham
wa inta bas turudd leyi, ya Rabbi, ya Ilaahi.
16 Achaan ana gult :
«Khalli ma yichchammato leyi.
Wakit rijileeni yittartaʼo,
khalli ma yistakbaro foogi.»
17 Aywa, ana gariib nittartaʼ
wa taʼabi ma yikammil abadan.
18 Ana niʼtarif be khataayi
wa nahzan be sabab zanbi.
19 Udwaani hayyiin wa chudaad
wa katiiriin al-yakrahooni bala sabab.
20 Wa l-yisawwu leyi al-charr fi badal al-kheer
yathamooni fi chaan al-zeen al-ana nifattichah.
21 Ya Allah, ma tikhalliini !
Ya Ilaahi, ma tibaʼʼid minni !
22 Yalla ajala, afzaʼni !
Ya Rabbi ! Ya munajji hayaati !
