وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ، حَسَبْ طَرِيقَةْ يَدُوتُونْ
1 أَنَا قُلْت: «نَحْفَضْ دُرُوبِي
أَشَانْ مَا نَقَعْ فِي الذَّنِبْ بِلِسَانِي
وَ نِبَلِّمْ خَشْمِي
وَكِتْ الْعَاصِي قَاعِدْ قِدَّامِي.»
2 أَنَا سَكَتّْ سُكُوتْ تَامّ
وَ مَا كَلَّمْت حَتَّى بِالْخَيْر.
وَ وَجَعِي بِقِي زِيَادَةْ،
مَا بِنْحَمِلْ.
3 قَلْبِي حِرِقْ فِي دَخَلْ صَدْرِي
وَ ضَلِيمْتِي بِقَتْ مِثِلْ نَارْ.
وَ خَلَاصْ لِسَانِي كَلَّمْ وَ قَالْ:
4 «يَا اللّٰهْ! عَرِّفْنِي نِهَايْتِي
وَ عَدَدْ أَيَّامِي
لِنَعَرِفْ كَدَرْ أَنَا زَايِلْ.
5 دَاهُو إِنْتَ أَنْطَيْتنِي أَيَّامْ
طُولْهُمْ مِثِلْ أَرْبَعَةْ أُصْبَعْ
وَ عَدَدْ أَيَّامِي مَا يِسَاوِي شَيّءْ قِدَّامَكْ.
أَيْوَى، أَيِّ إِنْسَانْ مَخْلُوقْ زَايِلْ.» وَقْفَةْ.
6 أَيْوَى! الْإِنْسَانْ يَمْشِي وَ يَجِي
مِثِلْ ضُلّ يُزُولْ
وَ كُلَّ خِدِمْتَهْ
مَا عِنْدَهَا مَعَنَى.
هُو يِلِمّ الْغُنَى
وَ مَا يَعَرِفْ يَاتُو الْيِشِيلْهَا.
7 وَ هَسَّعْ، يَا رَبّ، نَرْجَى شُنُو؟
عَشَمِي كُلَّ فَوْقَكْ إِنْتَ.
8 أَمْرُقْنِي مِنْ كُلَّ خَطَايِ
وَ مَا تِخَلِّينِي نَبْقَى مُعْيَارْ لِلْمَطَامِيسْ.
9 أَنَا سَكَتّْ وَ بَتَّانْ مَا نُفُكّ خَشْمِي
أَشَانْ إِنْتَ بَسْ خَطَّيْتنِي فِي الْحَالَةْ دِي.
10 أَرْفَعْ مِنِّي ضَرَبَانَكْ
أَشَانْ أَنَا أَدَّمَّرْت مِنْ هُجُومْ إِيدَكْ.
11 لِلْإِنْسَانْ، تِأَدِّبَهْ
وَ تِعَاقِبَهْ حَسَبْ خَطَايَهْ.
وَ مِثِلْ السُّوسَةْ تَاكُلْ الْحَطَبْ،
إِنْتَ تِدَمِّرْ أَيِّ شَيّءْ الْيِحِبَّهْ.
وَ كُلَّ النَّاسْ يُزُولُوا. وَقْفَةْ.
12 أَسْمَعْ صَلَاتِي وَ صِرَاخِي، يَا اللّٰهْ!
أَسْمَعْ بَكِيِّ وَ مَا تَابَى!
أَشَانْ أَنَا مِثِلْ أَجْنَبِي فِي بَكَانَكْ
وَ ضَيْف مِثِلْ كُلَّ جُدُودِي.
13 خَلِّينِي وَ أَنَا نَقْدَرْ نَفْرَحْ
قَبُلْ مَا نُفُوتْ وَ نَبْقَى مَا فِينِي.
Wasiiye le kabiir al-khannaayiin : Mazmuur le Dawuud, hasab tariigat Yaduutuun
1 Ana gult : «Nahfad duruubi
achaan ma nagaʼ fi l-zanib be lisaani
wa niballim khachmi
wakit al-aasi gaaʼid giddaami.»
2 Ana sakatt sukuut taamm
wa ma kallamt hatta be l-kheer.
Wa wajaʼi bigi ziyaada,
ma binhamil.
3 Galbi hirig fi dakhal sadri
wa daliimti bigat misil naar.
Wa khalaas lisaani kallam wa gaal :
4 «Ya Allah ! Arrifni nihaayti
wa adad ayyaami
le naʼarif kadar ana zaayil.
5 Daahu inta anteetni ayyaam
tuulhum misil arbaʼa usbaʼ
wa adad ayyaami ma yisaawi cheyy giddaamak.
Aywa, ayyi insaan makhluug zaayil.» Wagfa.
6 Aywa ! Al-insaan yamchi wa yaji
misil dull yuzuul
wa kulla khidimtah
ma indaha maʼana.
Hu yilimm al-khuna
wa ma yaʼarif yaatu al-yichiilha.
7 Wa hassaʼ, ya Rabb, narja chunu ?
Achami kulla foogak inta.
8 Amrugni min kulla khataayi
wa ma tikhalliini nabga muʼyaar le l-mataamiis.
9 Ana sakatt wa battaan ma nufukk khachmi
achaan inta bas khatteetni fi l-haala di.
10 Arfaʼ minni darabaanak
achaan ana addammart min hujuum iidak.
11 Le l-insaan, tiʼaddibah
wa tiʼaakhibah hasab khataayah.
Wa misil al-suusa taakul al-hatab,
inta tidammir ayyi cheyy al-yihibbah.
Wa kulla l-naas yuzuulu. Wagfa.
12 Asmaʼ salaati wa siraakhi, ya Allah !
Asmaʼ bakiiyi wa ma taaba !
Achaan ana misil ajnabi fi bakaanak
wa deef misil kulla juduudi.
13 Khalliini wa ana nagdar nafrah
gabul ma nufuut wa nabga ma fiini.
