وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 مَبْرُوكْ لِلْيِفَكِّرْ فِي الضَّعِيفِينْ!
فِي يَوْم الْفَسَالَةْ، اللّٰهْ يِنَجِّيهْ.
2 اللّٰهْ يَحْفَضَهْ وَ يَنْطِيهْ الْحَيَاةْ
وَ يِسَوِّي حَالْتَهْ عَدِيلَةْ فِي الْأَرْض
وَ مَا يِسَلِّمَهْ فِي إِيدْ عُدْوَانَهْ.
3 اللّٰهْ يِسَاعِدَهْ فِي سَرِيرَهْ هَنَا التَّعَبْ
وَ يِهْتَمَّا بَيَّهْ فِي فُرَاشَهْ وَكِتْ مَرْضَانْ.
4 وَ أَنَا قُلْت:
«يَا اللّٰهْ! بِرَحْمَتَكْ أَشْفِينِي،
أَشَانْ أَنَا أَعْتَرَفْت بِذَنْبِي.»
5 عُدْوَانِي يِحَجُّوا فَوْقِي بِالْفَسَالَةْ وَ يُقُولُوا:
«مَتَى يُمُوتْ وَ أُسْمَهْ يِوَدِّرْ؟»
6 وَكِتْ وَاحِدْ يُزُورْنِي،
هُو يِحَجِّي مَعَايِ بِكِدِبْ
وَ يِفَتِّشْ يِلِمّ الْفَسَالَةْ الْفِي كَلَامِي
وَ يَمْشِي يِحَجِّي بَيْهَا بَرَّا فِي الشَّوَارِعْ.
7 كُلَّ عُدْوَانِي يِوَسْوُسُوا سَوَا فَوْقِي
وَ يِلآمَرَوْا ضِدِّي
وَ يِجَهُّزُوا الْفَسَالَةْ لَيِّ وَ يُقُولُوا:
8 «هُو كَرَبَهْ مَرَضْ خَطِيرْ
السِّيدَهْ كَنْ رَقَدْ، أَبَداً مَا يُقُمّ!»
9 حَتَّى رَفِيقِي الْمُنْتَكِلْ عَلَيَّهْ
وَ يَاكُلْ مَعَايِ خُبْزِتِي،
هُو أَنْقَلَبْ ضِدِّي.
10 لَاكِنْ إِنْتَ، يَا اللّٰهْ،
بِرَحْمَتَكْ أَشْفِينِي
وَ نِلْكَفَّى فَوْقهُمْ!
11 كَنْ عُدْوَانِي مَا يِشَّمَّتَوْا فَوْقِي
خَلَاصْ، أَنَا عِرِفْت كَدَرْ إِنْتَ فِرِحْت بَيِّ.
12 إِنْتَ سَاعَدْتِنِي وَ شَفَيْتنِي
وَ خَطَّيْتنِي قِدَّامَكْ إِلَى الْأَبَدْ.
13 بَارَكْ اللّٰهْ إِلٰـهْ بَنِي إِسْرَائِيلْ
دَايْماً وَ إِلَى الْأَبَدْ!
آمِينْ وَ آمِينْ!
Wasiiye le kabiir al-khannaayiin : Mazmuur le Dawuud
1 Mabruuk le l-yifakkir fi l-daʼiifiin !
Fi yoom al-fasaala, Allah yinajjiih.
2 Allah yahfadah wa yantiih al-haya
wa yisawwi haaltah adiile fi l-ard
wa ma yisallimah fi iid udwaanah.
3 Allah yisaaʼidah fi sariirah hana l-taʼab
wa yihtamma beyah fi furaachah wakit mardaan.
4 Wa ana gult :
«Ya Allah ! Be rahmatak achfiini,
achaan ana aʼtaraft be zanbi.»
5 Udwaani yihajju foogi be l-fasaala wa yuguulu :
«Mata yumuut wa usmah yiwaddir ?»
6 Wakit waahid yuzuurni,
hu yihajji maʼaayi be kidib
wa yifattich yilimm al-fasaala al-fi kalaami
wa yamchi yihajji beeha barra fi l-chawaariʼ.
7 Kulla udwaani yiwaswusu sawa foogi
wa yilʼaamaro diddi
wa yijahhuzu al-fasaala leyi wa yuguulu :
8 «Hu karabah marad khatiir
al-siidah kan ragad, abadan ma yugumm !»
9 Hatta rafiigi al-muntakil aleyah
wa yaakul maʼaayi khubziti,
hu angalab diddi.
10 Laakin inta, ya Allah,
be rahmatak achfiini
wa nilkaffa fooghum !
11 Kan udwaani ma yichchammato foogi
khalaas, ana irift kadar inta firiht beyi.
12 Inta saaʼadtini wa chafeetni
wa khatteetni giddaamak ila l-abad.
13 Baarak Allah Ilaah Bani Israaʼiil
daayman wa ila l-abad !
Aamiin wa aamiin !
