الجُزُء التاني هنا الزَبُور
وَصِيَّةْ لِكَبِيرْ الْغَنَّايِينْ: تَعْلِيمْ مِنْ أَوْلَادْ قُورَحْ
1 مِثِلْ غَزَالْ مُشْتَاقَةْ لِلْأَلْمِي
أَنَا كُلَ مُشْتَاقْ لَيْك، يَا إِلٰـهِي!
2 أَنَا عَطْشَانْ لِلّٰهْ إِلٰـهِي الْحَيّ.
مَتَى نَدْخُلْ فِي حَضَرَتَهْ وَ نِقَابِلَهْ؟
3 نَبْكِي لَيْل وَ نَهَارْ
وَكِتْ يُقُولُوا لَيِّ كُلَّ يَوْم:
«وَيْن إِلٰـهَكْ؟»
4 وَ قَلْبِي يَحْزَنْ
وَكِتْ نِذَّكَّرْ الْأَيَّامْ الْفَاتَوْا،
وَكِتْ مَشَيْت مَعَ النَّاسْ
وَ قُدْتُهُمْ لِبَيْت اللّٰهْ،
وَكِتْ كُلَّ النَّاسْ عَيَّدَوْا
وَ بِغِنَيْ وَ فَرَحْ، شَكَرَوْه.
5 مَالَا تِأَيِّسِي، يَا نَفْسِي؟
وَ مَالَا تَقِنْتِي مِنْ التَّعَبْ الْفَوْقِي؟
خُطِّي عَشَمْكِ فِي اللّٰهْ إِلٰـهِي.
أَيْوَى، أَنَا نَشْكُرَهْ بَتَّانْ،
هُو إِلٰـهِي الْيِنَجِّينِي.
6 نَفْسِي أَضَّايَقَتْ، يَا إِلٰـهِي،
وَ فِي شَانْ دَا بَسْ، أَنَا أَذَّكَّرْتَكْ
فِي بَلَدْ الْأُرْدُنْ
وَ فِي رَاسْ جَبَلْ حَرْمُونْ
وَ فِي جَبَلْ مِصْعَارْ.
7 وَ مَوْج الْبَحَرْ قَمَّ بِكَتَرَةْ
الْوَاحِدْ بَعَدْ الْآخَرْ.
وَ كُلَّ مَوْجَكْ وَ شَلَّالَكْ غَطَّوْنِي.
8 بِالنَّهَارْ، اللّٰهْ يِسَوِّي لَيِّ خَيْرَهْ
وَ بِاللَّيْل، أَنَا نِمَجِّدَهْ وَ نِصَلِّي لَيَّهْ،
هُو الْيَحْفَضْ حَيَاتِي.
9 أَنَا نُقُولْ: «يَا رَبّ، إِنْتَ جَبَلِي الْيَحْمِينِي.
مَالَا نِسِيتْنِي؟
مَالَا خَلَّيْتنِي نَمْشِي حَزْنَانْ
مِنْ مُطَارَدَةْ الْعُدْوَانْ؟»
10 عُضَامِي مَاعَوْا
وَكِتْ خُصْمَانِي يِعَيُّرُونِي،
وَكِتْ يُقُولُوا لَيِّ كُلَّ يَوْم:
«وَيْن إِلٰـهَكْ؟»
11 مَالَا تِأَيِّسِي، يَا نَفْسِي؟
وَ مَالَا تَقِنْتِي مِنْ التَّعَبْ الْفَوْقِي؟
خُطِّي عَشَمْكِ فِي اللّٰهْ إِلٰـهِي.
أَيْوَى، أَنَا نَشْكُرَهْ بَتَّانْ،
هُو إِلٰـهِي الْيِنَجِّينِي.
Al-juzu al-taani hana l-Zabuur
Wasiiye le kabiir al-khannaayiin : Taʼliim min awlaad Khuurah
1 Misil khazaal muchtaaga le l-almi
ana kula muchtaag leek, ya Ilaahi !
2 Ana atchaan le Allah Ilaahi al-Hayy.
Mata nadkhul fi hadaratah wa nigaabilah ?
3 Nabki leel wa nahaar
wakit yuguulu leyi kulla yoom :
«Ween Ilaahak ?»
4 Wa galbi yahzan
wakit nizzakkar al-ayyaam al-faato,
wakit macheet maʼa l-naas
wa gudtuhum le beet Allah,
wakit kulla l-naas ayyado
wa be khine wa farah, chakarooh.
5 Maala tiʼayyisi, ya nafsi ?
Wa maala taginti min al-taʼab al-foogi ?
Khutti achamki fi Allah Ilaahi.
Aywa, ana nachkurah battaan,
hu Ilaahi al-yinajjiini.
6 Nafsi addaayagat, ya Ilaahi,
wa fi chaan da bas, ana azzakkartak
fi balad al-Urdun
wa fi raas jabal Harmuun
wa fi jabal Misʼaar.
7 Wa mooj al-bahar gamma be katara
al-waahid baʼad al-aakhar.
Wa kulla moojak wa challaalak khattooni.
8 Be l-nahaar, Allah yisawwi leyi kheerah
wa be l-leel, ana nimajjidah wa nisalli leyah,
hu al-yahfad hayaati.
9 Ana nuguul : «Ya Rabb, inta jabali al-yahmiini.
Maala nisiitni ?
Maala khalleetni namchi haznaan
min mutaaradat al-udwaan ?»
10 Udaami maaʼo
wakit khusmaani yiʼayyuruuni,
wakit yuguulu leyi kulla yoom :
«Ween Ilaahak ?»
11 Maala tiʼayyisi, ya nafsi ?
Wa maala taginti min al-taʼab al-foogi ?
Khutti achamki fi Allah Ilaahi.
Aywa, ana nachkurah battaan,
hu Ilaahi al-yinajjiini.
