غِنَيْ، مَزْمُورْ لِأَوْلَادْ قُورَحْ
1 اللّٰهْ هُو عَظِيمْ
وَ وَاجِبْ لَيَّهْ الْحَمْد
فِي مَدِينَةْ إِلٰـهْنَا،
فِي جَبَلَهْ الْمُقَدَّسْ.
2 الْجَبَلْ دَا جَمِيلْ وَ سُرُورْ لِكُلَّ الْأَرْض
وَ فِي آخِرْ الْمُنْشَاقْ.
وَ هُو جَبَلْ صَهْيُون،
مَدِينَةْ الْمَلِكْ الْكَبِيرْ.
3 وَ فِي قُصُورْ صَهْيُون،
الرَّبّ مَعْرُوفْ مِثِلْ مَلْجَأْ قَوِي.
4 دَاهُو مُلُوكْ حَدَّدَوْا وَكِتْ
لِيِلِمُّوا وَ يَمْشُوا ضِدّ الْمَدِينَةْ.
5 هُمَّنْ شَافَوْهَا وَ طَوَّالِي أَنْبَهَتَوْا
وَ رَجَفَوْا وَ عَرَّدَوْا.
6 فِي الْبَكَانْ دَا، أَمْ رَجَّافَةْ كَرَبَتْهُمْ
وَ أَتَّنَّوْا مِثِلْ مَرَةْ الْقَاعِدَةْ تِطَالِقْ.
7 وَ أَدَّمَّرَوْا مِثِلْ سُفُنْ تَرْشِيشْ
الْكَسَّرَتْهُمْ رِيحْ الصَّبَاحْ.
8 الْحَجَّوْا لَيْنَا بَيَّهْ، أَنِحْنَ شِفْنَاهْ
فِي مَدِينَةْ اللّٰهْ الْقَادِرْ،
فِي مَدِينَةْ رَبِّنَا.
الرَّبّ يِثَبِّتْهَا إِلَى الْأَبَدْ. وَقْفَةْ.
9 يَا إِلٰـهْنَا! ذَكَّرْنَا رَحْمَتَكْ
فِي لُبّ بَيْتَكْ الْمُقَدَّسْ.
10 يَا رَبّ! مِثِلْ أُسْمَكْ،
حَمْدَكْ قَاعِدْ لَحَدِّي آخِرْ الْأَرْض.
إِيدَكْ الزَّيْنَةْ مَلَانَةْ بِالْعَدِلْ.
11 بِسَبَبْ عَدَالْتَكْ،
جَبَلْ صَهْيُون يَفْرَحْ
وَ حِلَّالْ بَلَدْ يَهُوذَا يِنْبَسْطُوا.
12 رُوغُوا فِي دُرْدُرْ صَهْيُون وَ حَوُّقُوهْ
وَ أَحْسُبُوا عَدَدْ بُيُوتَهْ هَنَا الْمُرَاقَبَةْ.
13 شِيفُوا عَدِيلْ دُرْدُرَهْ
وَ أَحْسُبُوا عَدَدْ قُصُورَهْ
أَشَانْ تِكَلُّمُوا بَيَّهْ
لِلذُّرِّيَّةْ الْبَعَدْكُو.
14 أَشَانْ الرَّبّ دَا، هُو إِلٰـهْنَا
دَايْماً وَ إِلَى الْأَبَدْ.
هُو يُقُودْنَا لَحَدِّي الْمَوْت.
Khine, mazmuur le awlaad Khuurah
1 Allah hu aziim
wa waajib leyah al-hamd
fi madiinat Ilaahna,
fi jabalah al-mukhaddas.
2 Al-jabal da jamiil wa suruur le kulla l-ard
wa fi aakhir al-munchaakh.
Wa hu jabal Sahyuun,
madiinat al-malik al-kabiir.
3 Wa fi gusuur Sahyuun,
al-Rabb maʼruuf misil maljaʼ gawi.
4 Daahu muluuk haddado wakit
le yilimmu wa yamchu didd al-madiina.
5 Humman chaafooha wa tawwaali anbahato
wa rajafo wa arrado.
6 Fi l-bakaan da, amrajjaafa karabathum
wa attanno misil mara al-gaaʼide titaalig.
7 Wa addammaro misil sufun Tarchiich
al-kassarathum riih al-sabaah.
8 Al-hajjo leena beyah, aniina chifnaah
fi madiinat Allah al-Gaadir,
fi madiinat Rabbina.
Al-Rabb yisabbitha ila l-abad. Wagfa.
9 Ya Ilaahna ! Zakkarna rahmatak
fi lubb beetak al-mukhaddas.
10 Ya Rabb ! Misil usmak,
hamdak gaaʼid lahaddi aakhir al-ard.
Iidak al-zeene malaane be l-adil.
11 Be sabab adaaltak,
jabal Sahyuun yafrah
wa hillaal balad Yahuuza yinbastu.
12 Ruukhu fi durdur Sahyuun wa hawwuguuh
wa ahsubu adad buyuutah hana l-muraakhaba.
13 Chiifu adiil durdurah
wa ahsubu adad gusuurah
achaan tikallumu beyah
le l-zurriiye al-baʼadku.
14 Achaan al-Rabb da, hu Ilaahna
daayman wa ila l-abad.
Hu yuguudna lahaddi l-moot.
