وَصِيَّةْ لِكَبِيرْ الْغَنَّايِينْ: مَزْمُورْ لِأَسَافْ، حَسَبْ طَرِيقَةْ يَدُوتُونْ
1 لِلرَّبّ، أَنَا نَرْفَعْ حِسِّي وَ نَشْحَدَهْ.
أَيْوَى، لِلرَّبّ، أَنَا نَرْفَعْ حِسِّي وَ هُو يَسْمَعْنِي.
2 فِي يَوْم ضِيقْتِي، أَنَا فَتَّشْت الرَّبّ
وَ بِاللَّيْل، مَدَّيْت إِيدِي بَلَا جُمَّةْ
وَ مَا دَوَّرْت يِصَبُّرُونِي.
3 وَكِتْ أَذَّكَّرْت الرَّبّ، قَنَتّْ
وَ كَنْ فَكَّرْت زِيَادَةْ، نَغْمَرْ. وَقْفَةْ.
4 إِنْتَ بَسْ مَا خَلَّيْتنِي نُنُومْ
وَ أَنَا بَرْجَلْت وَ سَكَتّْ.
5 أَنَا فَكَّرْت فِي الْأَيَّامْ الْفَاتَوْا
وَ فِي السِّنِينْ الزَّمَانْ.
6 بِاللَّيْل، أَنَا أَذَّكَّرْت غِنَيِّ
وَ قَلْبِي فَكَّرْ
وَ نَفْسِي تَسْأَلْ وَ تُقُولْ:
7 «هَلْ الرَّبّ يَابَانَا دَايْماً وَلَّا؟
هَلْ أَبَداً مَا يَقْبَلْنَا وَلَّا؟
8 هَلْ رَحْمَتَهْ وَدَّرَتْ مَرَّةْ وَاحِدْ وَلَّا؟
هَلْ كَلَامَهْ بِقِي مَا فِيهْ مِنْ ذُرِّيَّةْ لِذُرِّيَّةْ وَلَّا؟
9 هَلْ الرَّبّ نِسِي مَا يَرْحَمْ وَلَّا؟
هَلْ الزَّعَلْ قَفَّلْ قَلْبَهْ وَلَّا؟» وَقْفَةْ.
10 أَنَا نُقُولْ وَجَعِي:
«إِيدْ اللّٰهْ الْعَالِي
مَا تَفْزَعْنَا مِثِلْ أَوَّلْ!»
11 أَنَا نِذَّكَّرْ أَعْمَالْ اللّٰهْ.
أَيْوَى، أَنَا نِذَّكَّرْ عَجَايْبَكْ الزَّمَانْ.
12 وَ أَنَا نِحَجِّي بِكُلَّ أَفْعَالَكْ
وَ نِذَّكَّرْ فِي أَعْمَالَكْ.
13 يَا رَبّ، دَرْبَكْ مُقَدَّسْ!
فِي إِلٰـهْ أَكْبَرْ مِنَّكْ وَلَّا؟
14 إِنْتَ الْإِلٰـهْ الْيِسَوِّي الْعَجَايِبْ
وَ عَرَّفْت قُدُرْتَكْ بَيْن الْأُمَمْ.
15 بِإِيدَكْ، إِنْتَ فَدَيْت شَعَبَكْ
ذُرِّيَّةْ يَعْقُوبْ وَ ذُرِّيَّةْ يُوسُفْ. وَقْفَةْ.
16 كُلَّ الْبُحُورْ شَافَوْك، يَا رَبّ!
الْأَلْمِي شَافَكْ وَ أَلْحَرَّكْ
حَتَّى أَلْمِي الْغَرِيقْ كُلَ أَنْهَزَّ.
17 السَّحَابْ صَبَّ أَلْمِي
وَ الرَّعَدْ حِسَّهْ أَنْسَمَعْ.
وَ بَرَّاقْتَكْ تَشْلَعْ
مِثِلْ نَشَاشِيبْ فِي كُلَّ بَكَانْ.
18 رَعَدَكْ دَقْدَقْ
وَ بَرَّاقْتَكْ نَوَّرَتْ الْعَالَمْ
وَ الْأَرْض أَنْهَزَّتْ وَ رَجَفَتْ.
19 يَا رَبّ! فِي الْبَحَرْ، إِنْتَ سَوَّيْت طَرِيقَكْ
وَ فِي الْأَلْمِي الْغَرِيقْ، سَوَّيْت دَبَالِيْك
وَ مَا فِي نَادُمْ الْيَعَرِفْ دَرْبَكْ.
20 إِنْتَ قُدْت شَعَبَكْ مِثِلْ غَنَمْ
بِإِيدْ مُوسَى وَ هَارُونْ.
Wasiiye le kabiir al-khannaayiin : Mazmuur le Asaaf, hasab tariigat Yaduutuun
1 Le l-Rabb, ana narfaʼ hissi wa nachhadah.
Aywa, le l-Rabb, ana narfaʼ hissi wa hu yasmaʼni.
2 Fi yoom diigti, ana fattacht al-Rabb
wa be l-leel, maddeet iidi bala jumma
wa ma dawwart yisabburuuni.
3 Wakit azzakkart al-Rabb, ganatt
wa kan fakkart ziyaada, nakhmar. Wagfa.
4 Inta bas ma khalleetni nunuum
wa ana barjalt wa sakatt.
5 Ana fakkart fi l-ayyaam al-faato
wa fi l-siniin al-zamaan.
6 Be l-leel, ana azzakkart khineeyi
wa galbi fakkar
wa nafsi tasʼal wa tuguul :
7 «Hal al-Rabb yaabaana daayman walla ?
Hal abadan ma yakhbalna walla ?
8 Hal rahmatah waddarat marra waahid walla ?
Hal kalaamah bigi ma fiih min zurriiye le zurriiye walla ?
9 Hal al-Rabb nisi ma yarham walla ?
Hal al-zaʼal gaffal galbah walla ?» Wagfa.
10 Ana nuguul wajaʼi :
«Iid Allah al-Aali
ma tafzaʼna misil awwal !»
11 Ana nizzakkar aʼmaal Allah.
Aywa, ana nizzakkar ajaaybak al-zamaan.
12 Wa ana nihajji be kulla afʼaalak
wa nizzakkar fi aʼmaalak.
13 Ya Rabb, derbak mukhaddas !
Fi ilaah akbar minnak walla ?
14 Inta al-Ilaah al-yisawwi al-ajaayib
wa arraft gudurtak been al-umam.
15 Be iidak, inta fadeet chaʼabak
zurriiyit Yaakhuub wa zurriiyit Yuusuf. Wagfa.
16 Kulla l-buhuur chaafook, ya Rabb !
Al-almi chaafak wa alharrak
hatta almi al-khariig kula anhazza.
17 Al-sahaab sabba almi
wa l-raʼad hissah ansamaʼ.
Wa barraagtak tachlaʼ
misil nachaachiib fi kulla bakaan.
18 Raʼadak dagdag
wa barraagtak nawwarat al-aalam
wa l-ard anhazzat wa rajafat.
19 Ya Rabb ! Fi l-bahar, inta sawweet tariigak
wa fi l-almi al-khariig, sawweet dabaaliik
wa ma fi naadum al-yaʼarif derbak.
20 Inta gudt chaʼabak misil khanam
be iid Muusa wa Haaruun.
