غِنَيْ، مَزْمُورْ لِأَسَافْ
1 يَا رَبّ، مَا تَسْكُتْ!
وَ مَا تِصْمُتْ وَ لَا تِهْدَأْ، يَا رَبّ.
2 أَشَانْ دَاهُو عُدْوَانَكْ قَاعِدِينْ يِسَوُّوا حَرَكَةْ
وَ الْيَكْرَهَوْك يُقُمُّوا ضِدَّكْ.
3 بِعَشِيرْ، يِخَطُّطُوا بِنَجَاضَةْ ضِدّ شَعَبَكْ.
أَيْوَى، يِشَّاوَرَوْا ضِدّ الْإِنْتَ حَفَضْتُهُمْ.
4 هُمَّنْ قَالَوْا:
«يَلَّا! نُقُشُّوهُمْ مِنْ بَيْن الْأُمَمْ
وَ أُسُمْ بَنِي إِسْرَائِيلْ بَتَّانْ مَا يِذَّكَّرَوْه.»
5 أَيْوَى، هُمَّنْ أَشَّاوَرَوْا كُلُّهُمْ
وَ أَسْتَفَقَوْا ضِدَّكْ.
6 هُمَّنْ نَاسْ أَدَوْم وَ الْإِسْمَاعِيلِيِّينْ
وَ نَاسْ مُوَابْ وَ ذُرِّيَّةْ هَاجَرْ
7 وَ نَاسْ قِبَالْ وَ بَنِي عَمُّونْ وَ الْعَمَالِقْ
وَ الْفِلِسْطِيِّينْ وَ سُكَّانْ صُورْ.
8 وَ نَاسْ أَشُورْ كُلَ لَمَّوْا مَعَاهُمْ
لِيِسَاعُدُوا ذُرِّيَّةْ لُوطْ. وَقْفَةْ.
9 سَوِّي فَوْقهُمْ مِثِلْ سَوَّيْت فِي مِدْيَانْ
وَ فِي سِيسْرَا وَ يَابِينْ فِي وَادِي قِيشُونْ.
10 هُمَّنْ أَدَّمَّرَوْا فِي عَيْن دُورْ
وَ بِقَوْا بَعَرْ دَيَّرَوْا بَيَّهْ الزِّرَاعَةْ.
11 يَا رَبّ! سَوِّي فِي حُكَّامْهُمْ
مِثِلْ سَوَّيْت فِي عُرِيبْ وَ زِيبْ
وَ زَبَحْ وَ صَلْمُونَعْ
وَ كُلَّ كُبَارَاتْهُمْ،
12 هُمَّنْ بَسْ الْقَالَوْا:
«خَلِّي نَقْلَعَوْا أَرْض الرَّبّ.»
13 يَا إِلٰـهِي! سَوِّيهُمْ يُدُورُوا
مِثِلْ قَشّ الشَّايْلَةْ الرِّيحْ.
14 مِثِلْ نَارْ التَّاكُلْ الْغَابَةْ
وَ مِثِلْ أَمْ بَلْبَالَةْ التَّحْرِقْ الْجِبَالْ،
15 أَطْرُدْهُمْ بِرِيحَكْ الشَّدِيدَةْ
وَ خَوِّفْهُمْ بِأَمْ زَوْبَعَانْتَكْ.
16 غَطِّيهُمْ بِالْإِهَانَةْ
لِيِفَتُّشُوكْ، يَا اللّٰهْ!
17 خَلِّي الْعَيْب وَ الْبَهِيتَةْ
يَكُرْبُوهُمْ إِلَى الْأَبَدْ
وَ يُمُوتُوا بَلَا شَرَفْ.
18 وَ خَلَاصْ، يَعَرْفُوا كَدَرْ
إِنْتَ وِحَيْدَكْ بَسْ أُسْمَكْ اللّٰهْ
وَ إِنْتَ بَسْ الْعَالِي فِي كُلَّ الْأَرْض.
Khine, mazmuur le Asaaf
1 Ya Rabb, ma taskut !
Wa ma tasmut wa la tahdaʼ, ya Rabb.
2 Achaan daahu udwaanak gaaʼidiin yisawwu haraka
wa l-yakrahook yugummu diddak.
3 Be achiir, yikhattutu be najaada didd chaʼabak.
Aywa, yichchaawaro didd al-inta hafadtuhum.
4 Humman gaalo :
«Yalla ! Nuguchchuuhum min been al-umam
wa usum Bani Israaʼiil battaan ma yizzakkarooh.»
5 Aywa, humman achchaawaro kulluhum
wa astafago diddak.
6 Humman naas Adoom wa l-Ismaaʼiiliyiin
wa naas Muwaab wa zurriiyit Haajar
7 wa naas Gibaal wa Bani Ammuun wa l-Amaalikh
wa l-Filistiyiin wa sukkaan Suur.
8 Wa naas Achuur kula lammo maʼaahum
le yisaaʼudu zurriiyit Luut. Wagfa.
9 Sawwi fooghum misil sawweet fi Midyaan
wa fi Siisra wa Yaabiin fi waadi Khiichuun.
10 Humman addammaro fi Een Duur
wa bigo baʼar dayyaro beyah al-ziraaʼa.
11 Ya Rabb ! Sawwi fi hukkaamhum
misil sawweet fi Uriib wa Ziib
wa Zabah wa Salmuunaʼ
wa kulla kubaaraathum,
12 humman bas al-gaalo :
«Khalli naglaʼo ard al-Rabb.»
13 Ya Ilaahi ! Sawwiihum yuduuru
misil gechch al-chaayle al-riih.
14 Misil naar al-taakul al-khaaba
wa misil ambalbaala al-tahrig al-jibaal,
15 atrudhum be riihak al-chadiide
wa khawwifhum be amzoobaʼaantak.
16 Khattiihum be l-ihaana
le yifattuchuuk, ya Allah !
17 Khalli al-eeb wa l-bahiite
yakurbuuhum ila l-abad
wa yumuutu bala charaf.
18 Wa khalaas, yaʼarfu kadar
inta wiheedak bas usmak Allah
wa inta bas al-Aali fi kulla l-ard.
