وَصِيَّةْ لِكَبِيرْ الْغَنَّايِينْ: مَزْمُورْ لِأَوْلَادْ قُورَحْ
1 يَا اللّٰهْ، إِنْتَ وَصَّفْت مَحَبِّتَكْ لِبَلَدَكْ
وَ قَبَّلْت ذُرِّيَّةْ يَعْقُوبْ مِنْ بَلَدْ الْغُرْبَةْ.
2 وَ إِنْتَ مَحَيْت ذُنُوبْ شَعَبَكْ
وَ غَفَرْت كُلَّ خَطَايَاهُمْ. وَقْفَةْ.
3 إِنْتَ خَلَّيْت كُلَّ زَعَلَكْ
وَ وَقَّفْت غَضَبَكْ الْمُحْرِقْ.
4 قَبِّلْنَا عَلَيْك، يَا إِلٰـهْنَا وَ مُنَجِّينَا،
وَ مَا تِخَلِّي غَضَبَكْ يَلْحَقْنَا.
5 دَايْماً إِنْتَ تَغْضَبْ ضِدِّنَا وَلَّا؟
وَ زَعَلَكْ يَقْعُدْ فَوْقنَا مِنْ ذُرِّيَّةْ لِذُرِّيَّةْ وَلَّا؟
6 مَا إِنْتَ بَسْ التِّقَبِّلْ لَيْنَا وَ تَحَيِينَا
وَ تَبْقَى فَرَحْ لِشَعَبَكْ؟
7 يَا اللّٰهْ! وَصِّفْ لَيْنَا رَحْمَتَكْ
وَ أَنْطِينَا نَجَاتَكْ.
8 أَنَا نَسْمَعْ كَلَامْ اللّٰهْ الرَّبّ.
هُو حَجَّى بِالسَّلَامْ لِشَعَبَهْ وَ مُؤمِنِينَهْ
أَشَانْ مَا يِقَبُّلُوا فِي طَمَاسِتْهُمْ.
9 أَيْوَى، نَجَاتَهْ قَاعِدَةْ قَرِيبْ لِلْيَخَافَوْا مِنَّهْ
وَ دَا أَشَانْ مَجْدَهْ يَسْكُنْ فِي بَلَدْنَا.
10 الرَّحْمَةْ وَ الْحَقّ أَلَّاقَوْا
وَ الْعَدَالَةْ مَعَ السَّلَامْ لَمَّوْا.
11 الْحَقّ يَبْذُرْ مِنْ الْأَرْض
وَ الْعَدَالَةْ تَنْزِلْ مِنْ السَّمَاءْ.
12 اللّٰهْ هُو ذَاتَهْ يَنْطِي الْخَيْر
وَ أَرْضِنَا تَنْطِي إِنْتَاجْهَا.
13 الْعَدَالَةْ مَاشَةْ قِدَّامَهْ
وَ تِجَهِّزْ لَيَّهْ الدَّرِبْ.
Wasiiye le kabiir al-khannaayiin : Mazmuur le awlaad Khuurah
1 Ya Allah, inta wassaft mahabbitak le baladak
wa gabbalt zurriiyit Yaakhuub min balad al-khurba.
2 Wa inta maheet zunuub chaʼabak
wa khafart kulla khataayaahum. Wagfa.
3 Inta khalleet kulla zaʼalak
wa waggaft khadabak al-muhrig.
4 Gabbilna aleek, ya Ilaahna wa munajjiina,
wa ma tikhalli khadabak yalhagna.
5 Daayman inta takhdab diddina walla ?
Wa zaʼalak yagood foogna min zurriiye le zurriiye walla ?
6 Ma inta bas al-tigabbil leena wa tahayiina
wa tabga farah le chaʼabak ?
7 Ya Allah ! Wassif leena rahmatak
wa antiina najaatak.
8 Ana nasmaʼ kalaam Allah al-Rabb.
Hu hajja be l-salaam le chaʼabah wa muʼminiinah
achaan ma yigabbulu fi tamaasithum.
9 Aywa, najaatah gaaʼide gariib le l-yakhaafo minnah
wa da achaan majdah yaskun fi baladna.
10 Al-rahma wa l-hagg allaago
wa l-adaala maʼa l-salaam lammo.
11 Al-hagg yabzur min al-ard
wa l-adaala tanzil min al-sama.
12 Allah hu zaatah yanti al-kheer
wa ardina tanti intaajha.
13 Al-adaala maache giddaamah
wa tijahhiz leyah al-derib.
