1 اللّٰهْ هُو الْمَلِكْ.
خَلِّي الْأَرْض تِنْبَسِطْ
وَ كُلَّ الْجَزَايِرْ يَفْرَحَوْا!
2 السَّحَابْ وَ الْغَمَامْ مُحَوِّقِينَهْ
وَ الْحَقّ وَ الْعَدَالَةْ، هُمَّنْ أَسَاسْ عَرْشَهْ.
3 نَارْ مَاشَةْ قِدَّامَهْ
وَ تَاكُلْ عُدْوَانَهْ الْمُحَوِّقِينَهْ.
4 بَرَّاقْتَهْ نَوَّرَتْ الْعَالَمْ،
الْأَرْض شَافَتَهْ وَ رَجَفَتْ.
5 الْجِبَالْ بِقَوْا مِثِلْ الشَّمْعَةْ
وَ مَاعَوْا قِدَّامْ اللّٰهْ،
قِدَّامْ رَبّ كُلَّ الْأَرْض.
6 السَّمَاوَاتْ بَلَّغَوْا بِعَدَالْتَهْ
وَ كُلَّ الشُّعُوبْ شَافَوْا عَظَمَتَهْ.
7 الْعَيْب لِكُلَّ عَابِدِينْ الْأَصْنَامْ،
هُمَّنْ الْيَشْكُرُوا إِلٰـهَاتْهُمْ.
وَ إِنْتُو كُلُّكُو الْإِلٰـهَاتْ،
أَسْجُدُوا لِلّٰهْ!
8 سُكَّانْ صَهْيُون سِمْعَوْا وَ فِرْحَوْا
وَ حِلَّالْ بَلَدْ يَهُوذَا أَنْبَسَطَوْا
بِسَبَبْ شَرِيعْتَكْ، يَا اللّٰهْ!
9 أَشَانْ إِنْتَ بَسْ الْعَالِي
فَوْق كُلَّ الْأَرْض، يَا اللّٰهْ!
أَيْوَى، إِنْتَ عَالِي زِيَادَةْ
مِنْ كُلَّ الْإِلٰـهَاتْ.
10 إِنْتُو التِّحِبُّوا اللّٰهْ،
أَكْرَهَوْا الْفَسَالَةْ!
هُو يَحْفَضْ حَيَاةْ مُؤمِنِينَهْ
وَ يِنَجِّيهُمْ مِنْ إِيدْ الْعَاصِيِينْ.
11 أَيْوَى لِلصَّالِحْ، نُورْ طَالِعْ
وَ لِلنَّاسْ الْقَلِبْهُمْ عَدِيلْ، فَرْحَةْ.
12 أَفْرَحَوْا بِاللّٰهْ، يَا الصَّالِحِينْ،
وَ أَذْكُرُوا أُسْمَهْ الْقُدُّوسْ!
1 Allah hu al-malik.
Khalli al-ard tinbasit
wa kulla l-jazaayir yafraho !
2 Al-sahaab wa l-khamaam muhawwigiinah
wa l-hagg wa l-adaala, humman asaas archah.
3 Naar maache giddaamah
wa taakul udwaanah al-muhawwigiinah.
4 Barraagtah nawwarat al-aalam,
al-ard chaafatah wa rajafat.
5 Al-jibaal bigo misil al-chamʼe
wa maaʼo giddaam Allah,
giddaam Rabb kulla l-ard.
6 Al-samaawaat ballakho be adaaltah
wa kulla l-chuʼuub chaafo azamatah.
7 Al-eeb le kulla aabidiin al-asnaam,
humman al-yachkuru ilaahaathum.
Wa intu kulluku al-ilaahaat,
asjudu le Allah !
8 Sukkaan Sahyuun simʼo wa firho
wa hillaal balad Yahuuza anbasato
be sabab chariiʼtak, ya Allah !
9 Achaan inta bas al-Aali
foog kulla l-ard, ya Allah !
Aywa, inta aali ziyaada
min kulla l-ilaahaat.
10 Intu al-tihibbu Allah,
akraho al-fasaala !
Hu yahfad hayaat muʼminiinah
wa yinajjiihum min iid al-aasiyiin.
11 Aywa le l-saalih, nuur taaliʼ
wa le l-naas al-galibhum adiil, farha.
12 Afraho be Allah, ya l-saalihiin,
wa azkuru usmah al-Khudduus !
