مَنَسَّى بِقي ملك في يَهُوذَا
1 وَ مَنَسَّى عِنْدَهْ 12 سَنَةْ وَكِتْ بِقِي مَلِكْ وَ حَكَمْ 55 سَنَةْ فِي مَدِينَةْ الْقُدُسْ. 2 وَ هُو سَوَّى الْفَسَالَةْ قِدَّامْ اللّٰهْ. هُو سَوَّى نَفْس الْمُحَرَّمَاتْ السَّوَّوْهُمْ الْأُمَمْ الْاللّٰهْ قَلَعْ مِنْهُمْ أَرْضُهُمْ وَ أَنْطَاهَا لِبَنِي إِسْرَائِيلْ. 3 وَ هُو بَنَى بَتَّانْ الْبَكَانَاتْ الْعَالِيِينْ هَنَا الْعِبَادَةْ الْأَبُوهْ حِزْقِيَّا هَدَّمَاهُمْ. وَ بَنَى مَدَابِحْ لِإِلٰـهْ بَعَلْ وَ غَزَّ عِيدَانْ لِعِبَادَةْ أَشِيرَةْ وَ سَجَدْ قِدَّامْ كُلَّ قُوَّاتْ السَّمَاءْ وَ عَبَدْهُمْ. 4 وَ بَنَى لَيْهُمْ مَدَابِحْ فِي لُبّ بَيْت اللّٰهْ وَ دَا الْبَكَانْ الْاللّٰهْ قَالْ فَوْقَهْ: «فِي مَدِينَةْ الْقُدُسْ بَسْ، نُخُطّ أُسْمِي إِلَى الْأَبَدْ.» 5 وَ بَتَّانْ كُلَ بَنَى مَدَابِحْ لِكُلَّ قُوَّاتْ السَّمَاءْ فِي الْفَضَايَاتْ الْإِتْنَيْن هَنَا بَيْت اللّٰهْ. 6 وَ مَنَسَّى ذَاتَهْ حَرَّقْ أَوْلَادَهْ فِي النَّارْ لِلْأَصْنَامْ فِي وَادِي بَنِي هِنُّومْ. وَ مَشَى لِلشَّدَّارَى وَ الشَّوَّافِينْ وَ السَّحَّارِينْ وَ النَّاسْ الْيِكَلُّمُوا مَعَ الْمَيْتِينْ وَ الْجَنَّانِيِّينْ. وَ قَاعِدْ يِغَضِّبْ اللّٰهْ زِيَادَةْ بِالْفَسَالَةْ الْهُو سَوَّاهَا.
7 وَ هُو خَطَّ فِي بَيْت اللّٰهْ صَنَمْ الْهُو نَجَرَهْ. وَ دَا فِي لُبّ الْبَيْت الْحَجَّى فَوْقَهْ الرَّبّ لِدَاوُدْ وَ لِوِلَيْدَهْ سُلَيْمَانْ وَ قَالْ: «أَنَا نُخُطّ أُسْمِي إِلَى الْأَبَدْ فَوْق الْبَيْت دَا وَ فِي مَدِينَةْ الْقُدُسْ الْمَدِينَةْ الْأَنَا عَزَلْتَهَا مِنْ كُلَّ مُدُنْ قَبَايِلْ بَنِي إِسْرَائِيلْ. 8 وَ بَتَّانْ مَا نَطْرُدْ بَنِي إِسْرَائِيلْ مِنْ الْأَرْض الْأَنَا أَنْطَيْتهَا لِجُدُودْهُمْ كَنْ هُمَّنْ يَحْفَضَوْا وَ يِطَبُّقُوا كُلَّ وَصِيَّاتِي وَ شُرُوطِي وَ قَوَانِينِي الْأَمَرْتُهُمْ بَيْهُمْ بِوَاسِطَةْ مُوسَى.» 9 وَ لَاكِنْ مَنَسَّى لَزَّاهُمْ لِنَاسْ بَلَدْ يَهُوذَا وَ سُكَّانْ مَدِينَةْ الْقُدُسْ لِيِسَوُّوا الْفَسَالَةْ زِيَادَةْ مِنْ الْأُمَمْ الدَّمَّرَاهُمْ اللّٰهْ قِدَّامْ بَنِي إِسْرَائِيلْ.
10 اللّٰهْ حَجَّى لِمَنَسَّى وَ شَعَبَهْ وَ لَاكِنْ هُمَّنْ مَا خَطَّوْا بَالْهُمْ. 11 وَ فِي شَانْ دَا، اللّٰهْ قَوَّمْ ضِدُّهُمْ قُيَّادْ عَسْكَرْ مَلِكْ بَلَدْ أَشُورْ. وَ كَرَبَوْه لِمَنَسَّى وَ دَسَّوْا لَيَّهْ حَدِيدْ مُكَنْجَرْ وَ رَبَطَوْه بِجِنْزِيرْ هَنَا نَحَاسْ مَطْبُوقْ وَ وَدَّوْه بَابِلْ. 12 وَ وَكِتْ قَاعِدْ فِي الضِّيقَةْ، مَنَسَّى بَكَى لِلّٰهْ إِلٰـهَهْ وَ مَسْكَنْ نَفْسَهْ قِدَّامْ اللّٰهْ رَبّ جُدُودَهْ. 13 وَ مَنَسَّى سَأَلْ اللّٰهْ وَ هُو رَحَمَهْ وَ قِبِلْ دُعَايَهْ وَ قَبَّلَهْ فِي مَدِينَةْ الْقُدُسْ لِيَحْكِمْ بَتَّانْ. وَ بِمِثِلْ دَا، مَنَسَّى عِرِفْ كَدَرْ اللّٰهْ هُو بَسْ الْإِلٰـهْ.
14 وَ بَعَدْ دَا، هُو بَنَى دُرْدُرْ طَوِيلْ بِبَرَّا لِمَدِينَةْ دَاوُدْ. وَ الدُّرْدُرْ دَا قَمَّ مِنْ النُّصّ الْغَرْبَانِي لِرِجِلْ قِحُونْ وَ مَاشِي فِي الْوَادِي لَحَدِّي بَابْ الْحُوتْ وَ مُحَوِّقْ حَارَةْ عُفَلْ. وَ مَنَسَّى خَطَّ قُيَّادْ الْعَسْكَرْ فِي كُلَّ الْمُدُنْ الْقَوِيِّينْ هَنَا بَلَدْ يَهُوذَا.
15 وَ هُو مَرَقْ مِنْ بَيْت اللّٰهْ كُلَّ الْإِلٰـهَاتْ الْأَجْنَبِيِّينْ وَ الصَّنَمْ الْأَوَّلْ نَجَرَهْ وَ خَطَّاهْ دَاخَلْ. وَ هَدَّمْ كُلَّ الْمَدَابِحْ الْبَنَاهُمْ فِي جَبَلْ بَيْت اللّٰهْ وَ فِي مَدِينَةْ الْقُدُسْ وَ دَفَّقَاهُمْ بَرَّا مِنْ الْمَدِينَةْ. 16 وَ هُو عَدَّلْ مَدْبَحْ اللّٰهْ وَ قَدَّمْ فَوْقَهْ ضَحَايَا سَلَامَةْ وَ ضَحَايَا شُكُرْ. وَ أَمَرْ نَاسْ بَلَدْ يَهُوذَا خَلِّي يَعَبُدُوا اللّٰهْ إِلٰـهْ بَنِي إِسْرَائِيلْ. 17 وَ الشَّعَبْ لِسَّاعْهُمْ قَاعِدِينْ يِقَدُّمُوا ضَحَايَاهُمْ فِي الْبَكَانَاتْ الْعَالِيِينْ لَاكِنْ دَا، لِلّٰهْ إِلٰـهُّمْ بَسْ.
18 وَ الْبَاقِي مِنْ عَمَلْ مَنَسَّى وَ صَلَاتَهْ لِإِلٰـهَهْ وَ الْكَلَامْ الْكَلَّمَوْه لَيَّهْ الْأَنْبِيَاء الْيِشِيفُوا رُؤْيَةْ بِأُسُمْ اللّٰهْ إِلٰـهْ بَنِي إِسْرَائِيلْ، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. 19 وَ صَلَاتَهْ الْقِبِلْهَا اللّٰهْ وَ ذُنُوبَهْ وَ عِصْيَانَهْ وَ الْبُنَى هَنَا الْبَكَانَاتْ الْعَالِيِينْ الْغَزَّ فَوْقهُمْ عِيدَانْ لِعِبَادَةْ أَشِيرَةْ وَ الْأَصْنَامْ، دَوْل كُلَّ مَكْتُوبِينْ فِي كِتَابْ الْأَنْبِيَاء الْيِشِيفُوا بِرُؤْيَةْ. 20 وَ مَنَسَّى مَاتْ وَ لِحِقْ أَبَّهَاتَهْ وَ دَفَنَوْه فِي أَرْض وَرَثَتَهْ. وَ وِلَيْدَهْ آمُونْ حَكَمْ فِي بَدَلَهْ.
آمُون بِقي ملك في يَهُوذَا
21 آمُونْ عِنْدَهْ 22 سَنَةْ وَكِتْ بِقِي مَلِكْ وَ حَكَمْ سَنْتَيْن فِي مَدِينَةْ الْقُدُسْ. 22 وَ آمُونْ كُلَ سَوَّى الْفَسَالَةْ قِدَّامْ اللّٰهْ مِثِلْ أَبُوهْ مَنَسَّى. هُو قَدَّمْ ضَحَايَا وَ عَبَدْ كُلَّ الْأَصْنَامْ السَّوَّاهُمْ أَبُوهْ مَنَسَّى. 23 وَ لَاكِنْ آمُونْ مَا مَسْكَنْ نَفْسَهْ قِدَّامْ اللّٰهْ مِثِلْ أَبُوهْ مَنَسَّى سَوَّاهْ وَ هُو خَطَا زِيَادَةْ مِنْ أَبُوهْ. 24 وَ مَسَائِيلَهْ أَتْمَرَّدَوْا ضِدَّهْ وَ كَتَلَوْه فِي لُبّ بَيْتَهْ. 25 وَ لَاكِنْ شَعَبْ الْبَلَدْ كَتَلَوْا كُلَّ النَّاسْ الْأَتْمَرَّدَوْا ضِدّ الْمَلِكْ آمُونْ. وَ دَرَّجَوْا وِلَيْدَهْ يُوشِيَّا مَلِكْ فِي بَدَلَهْ.
مَنَسَّى بِقي ملك في يَهُوذَا
1 وَ مَنَسَّى عِنْدَهْ 12 سَنَةْ وَكِتْ بِقِي مَلِكْ وَ حَكَمْ 55 سَنَةْ فِي مَدِينَةْ الْقُدُسْ. 2 وَ هُو سَوَّى الْفَسَالَةْ قِدَّامْ اللّٰهْ. هُو سَوَّى نَفْس الْمُحَرَّمَاتْ السَّوَّوْهُمْ الْأُمَمْ الْاللّٰهْ قَلَعْ مِنْهُمْ أَرْضُهُمْ وَ أَنْطَاهَا لِبَنِي إِسْرَائِيلْ. 3 وَ هُو بَنَى بَتَّانْ الْبَكَانَاتْ الْعَالِيِينْ هَنَا الْعِبَادَةْ الْأَبُوهْ حِزْقِيَّا هَدَّمَاهُمْ. وَ بَنَى مَدَابِحْ لِإِلٰـهْ بَعَلْ وَ غَزَّ عِيدَانْ لِعِبَادَةْ أَشِيرَةْ وَ سَجَدْ قِدَّامْ كُلَّ قُوَّاتْ السَّمَاءْ وَ عَبَدْهُمْ. 4 وَ بَنَى لَيْهُمْ مَدَابِحْ فِي لُبّ بَيْت اللّٰهْ وَ دَا الْبَكَانْ الْاللّٰهْ قَالْ فَوْقَهْ: «فِي مَدِينَةْ الْقُدُسْ بَسْ، نُخُطّ أُسْمِي إِلَى الْأَبَدْ.» 5 وَ بَتَّانْ كُلَ بَنَى مَدَابِحْ لِكُلَّ قُوَّاتْ السَّمَاءْ فِي الْفَضَايَاتْ الْإِتْنَيْن هَنَا بَيْت اللّٰهْ. 6 وَ مَنَسَّى ذَاتَهْ حَرَّقْ أَوْلَادَهْ فِي النَّارْ لِلْأَصْنَامْ فِي وَادِي بَنِي هِنُّومْ. وَ مَشَى لِلشَّدَّارَى وَ الشَّوَّافِينْ وَ السَّحَّارِينْ وَ النَّاسْ الْيِكَلُّمُوا مَعَ الْمَيْتِينْ وَ الْجَنَّانِيِّينْ. وَ قَاعِدْ يِغَضِّبْ اللّٰهْ زِيَادَةْ بِالْفَسَالَةْ الْهُو سَوَّاهَا.
7 وَ هُو خَطَّ فِي بَيْت اللّٰهْ صَنَمْ الْهُو نَجَرَهْ. وَ دَا فِي لُبّ الْبَيْت الْحَجَّى فَوْقَهْ الرَّبّ لِدَاوُدْ وَ لِوِلَيْدَهْ سُلَيْمَانْ وَ قَالْ: «أَنَا نُخُطّ أُسْمِي إِلَى الْأَبَدْ فَوْق الْبَيْت دَا وَ فِي مَدِينَةْ الْقُدُسْ الْمَدِينَةْ الْأَنَا عَزَلْتَهَا مِنْ كُلَّ مُدُنْ قَبَايِلْ بَنِي إِسْرَائِيلْ. 8 وَ بَتَّانْ مَا نَطْرُدْ بَنِي إِسْرَائِيلْ مِنْ الْأَرْض الْأَنَا أَنْطَيْتهَا لِجُدُودْهُمْ كَنْ هُمَّنْ يَحْفَضَوْا وَ يِطَبُّقُوا كُلَّ وَصِيَّاتِي وَ شُرُوطِي وَ قَوَانِينِي الْأَمَرْتُهُمْ بَيْهُمْ بِوَاسِطَةْ مُوسَى.» 9 وَ لَاكِنْ مَنَسَّى لَزَّاهُمْ لِنَاسْ بَلَدْ يَهُوذَا وَ سُكَّانْ مَدِينَةْ الْقُدُسْ لِيِسَوُّوا الْفَسَالَةْ زِيَادَةْ مِنْ الْأُمَمْ الدَّمَّرَاهُمْ اللّٰهْ قِدَّامْ بَنِي إِسْرَائِيلْ.
10 اللّٰهْ حَجَّى لِمَنَسَّى وَ شَعَبَهْ وَ لَاكِنْ هُمَّنْ مَا خَطَّوْا بَالْهُمْ. 11 وَ فِي شَانْ دَا، اللّٰهْ قَوَّمْ ضِدُّهُمْ قُيَّادْ عَسْكَرْ مَلِكْ بَلَدْ أَشُورْ. وَ كَرَبَوْه لِمَنَسَّى وَ دَسَّوْا لَيَّهْ حَدِيدْ مُكَنْجَرْ وَ رَبَطَوْه بِجِنْزِيرْ هَنَا نَحَاسْ مَطْبُوقْ وَ وَدَّوْه بَابِلْ. 12 وَ وَكِتْ قَاعِدْ فِي الضِّيقَةْ، مَنَسَّى بَكَى لِلّٰهْ إِلٰـهَهْ وَ مَسْكَنْ نَفْسَهْ قِدَّامْ اللّٰهْ رَبّ جُدُودَهْ. 13 وَ مَنَسَّى سَأَلْ اللّٰهْ وَ هُو رَحَمَهْ وَ قِبِلْ دُعَايَهْ وَ قَبَّلَهْ فِي مَدِينَةْ الْقُدُسْ لِيَحْكِمْ بَتَّانْ. وَ بِمِثِلْ دَا، مَنَسَّى عِرِفْ كَدَرْ اللّٰهْ هُو بَسْ الْإِلٰـهْ.
14 وَ بَعَدْ دَا، هُو بَنَى دُرْدُرْ طَوِيلْ بِبَرَّا لِمَدِينَةْ دَاوُدْ. وَ الدُّرْدُرْ دَا قَمَّ مِنْ النُّصّ الْغَرْبَانِي لِرِجِلْ قِحُونْ وَ مَاشِي فِي الْوَادِي لَحَدِّي بَابْ الْحُوتْ وَ مُحَوِّقْ حَارَةْ عُفَلْ. وَ مَنَسَّى خَطَّ قُيَّادْ الْعَسْكَرْ فِي كُلَّ الْمُدُنْ الْقَوِيِّينْ هَنَا بَلَدْ يَهُوذَا.
15 وَ هُو مَرَقْ مِنْ بَيْت اللّٰهْ كُلَّ الْإِلٰـهَاتْ الْأَجْنَبِيِّينْ وَ الصَّنَمْ الْأَوَّلْ نَجَرَهْ وَ خَطَّاهْ دَاخَلْ. وَ هَدَّمْ كُلَّ الْمَدَابِحْ الْبَنَاهُمْ فِي جَبَلْ بَيْت اللّٰهْ وَ فِي مَدِينَةْ الْقُدُسْ وَ دَفَّقَاهُمْ بَرَّا مِنْ الْمَدِينَةْ. 16 وَ هُو عَدَّلْ مَدْبَحْ اللّٰهْ وَ قَدَّمْ فَوْقَهْ ضَحَايَا سَلَامَةْ وَ ضَحَايَا شُكُرْ. وَ أَمَرْ نَاسْ بَلَدْ يَهُوذَا خَلِّي يَعَبُدُوا اللّٰهْ إِلٰـهْ بَنِي إِسْرَائِيلْ. 17 وَ الشَّعَبْ لِسَّاعْهُمْ قَاعِدِينْ يِقَدُّمُوا ضَحَايَاهُمْ فِي الْبَكَانَاتْ الْعَالِيِينْ لَاكِنْ دَا، لِلّٰهْ إِلٰـهُّمْ بَسْ.
18 وَ الْبَاقِي مِنْ عَمَلْ مَنَسَّى وَ صَلَاتَهْ لِإِلٰـهَهْ وَ الْكَلَامْ الْكَلَّمَوْه لَيَّهْ الْأَنْبِيَاء الْيِشِيفُوا رُؤْيَةْ بِأُسُمْ اللّٰهْ إِلٰـهْ بَنِي إِسْرَائِيلْ، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. 19 وَ صَلَاتَهْ الْقِبِلْهَا اللّٰهْ وَ ذُنُوبَهْ وَ عِصْيَانَهْ وَ الْبُنَى هَنَا الْبَكَانَاتْ الْعَالِيِينْ الْغَزَّ فَوْقهُمْ عِيدَانْ لِعِبَادَةْ أَشِيرَةْ وَ الْأَصْنَامْ، دَوْل كُلَّ مَكْتُوبِينْ فِي كِتَابْ الْأَنْبِيَاء الْيِشِيفُوا بِرُؤْيَةْ. 20 وَ مَنَسَّى مَاتْ وَ لِحِقْ أَبَّهَاتَهْ وَ دَفَنَوْه فِي أَرْض وَرَثَتَهْ. وَ وِلَيْدَهْ آمُونْ حَكَمْ فِي بَدَلَهْ.
آمُون بِقي ملك في يَهُوذَا
21 آمُونْ عِنْدَهْ 22 سَنَةْ وَكِتْ بِقِي مَلِكْ وَ حَكَمْ سَنْتَيْن فِي مَدِينَةْ الْقُدُسْ. 22 وَ آمُونْ كُلَ سَوَّى الْفَسَالَةْ قِدَّامْ اللّٰهْ مِثِلْ أَبُوهْ مَنَسَّى. هُو قَدَّمْ ضَحَايَا وَ عَبَدْ كُلَّ الْأَصْنَامْ السَّوَّاهُمْ أَبُوهْ مَنَسَّى. 23 وَ لَاكِنْ آمُونْ مَا مَسْكَنْ نَفْسَهْ قِدَّامْ اللّٰهْ مِثِلْ أَبُوهْ مَنَسَّى سَوَّاهْ وَ هُو خَطَا زِيَادَةْ مِنْ أَبُوهْ. 24 وَ مَسَائِيلَهْ أَتْمَرَّدَوْا ضِدَّهْ وَ كَتَلَوْه فِي لُبّ بَيْتَهْ. 25 وَ لَاكِنْ شَعَبْ الْبَلَدْ كَتَلَوْا كُلَّ النَّاسْ الْأَتْمَرَّدَوْا ضِدّ الْمَلِكْ آمُونْ. وَ دَرَّجَوْا وِلَيْدَهْ يُوشِيَّا مَلِكْ فِي بَدَلَهْ.
