سفر بُولُس
1 وَ وَكِتْ الْبَرْجَالْ كَمَّلْ مَرَّةْ وَاحِدْ، بُولُسْ نَادَى التَّلَامِيذ أَشَانْ يِلِمُّوا وَ حَجَّى لَيْهُمْ. هُو شَجَّعَاهُمْ وَ سَلَّمَاهُمْ وَ فَاتْ لِبَلَدْ مَقِدُونِيَةْ. 2 وَ هِنَاكْ وَكِتْ شَقَّ الْبَلَدْ دِي، هُو عَلَّمْ نَاسْ كَتِيرِينْ وَ شَجَّعَاهُمْ كَتِيرْ. وَ بَعَدْ دَا، مَشَى الْيُونَانْ. 3 وَ قَعَدْ هِنَاكْ مُدَّةْ تَلَاتَةْ شَهَرْ. وَ دَوَّرْ يِسَافِرْ فِي بَلَدْ سُورِيَا. وَ وَكِتْ دَوَّرْ يَرْكَبْ فِي السَّفِينَةْ، هُو سِمِعْ الْيَهُودْ أَلآمَرَوْا فَوْقَهْ أَشَانْ يَكْتُلُوهْ فِي سَفَرَهْ. وَ بَيْدَا، خَلَّى رَكُوبْ السَّفِينَةْ أَشَانْ يِقَبِّلْ فِي آسِيَا بِدَرِبْ هَنَا مَقِدُونِيَةْ.
4 وَ أَخْوَانْ وَاحِدِينْ سَافَرَوْا مَعَايَهْ وَ هُمَّنْ سُوبَاتَرْ وِلَيْد بِرُّسْ مِنْ حِلَّةْ بِرِيَّةْ وَ أَرِسْتَارْكُسْ وَ سُكُونْدُس مِنْ حِلَّةْ تَسَلُونِيكِي وَ غَايُسْ مِنْ حِلَّةْ دَرْبَةْ وَ تِمُوتَاوُسْ. وَ تِشِيكُسْ وَ تُرُوفِيمُسْ مِنْ بَلَدْ آسِيَا. 5 وَ كُلَّ النَّاسْ دَوْل فَاتَوْا أَشَانْ يَرْجَوْنَا فِي حِلَّةْ تُرُوَاسْ. 6 وَ بَعَدْ أُسْبُوعْ هَنَا عِيدْ الْخُبْزَةْ بَلَا تَوَّارَةْ، أَنِحْنَ رِكِبْنَا فِي السَّفِينَةْ وَ سَافَرْنَا مِنْ مَدِينَةْ فِلِبِّي. وَ بَعَدْ خَمْسَةْ يَوْم، وِصِلْنَا فِي تُرُوَاسْ وَ لَمَّيْنَا مَعَاهُمْ. وَ قَعَدْنَا هِنَاكْ سَبْعَةْ يَوْم.
العجب في حِلّة تُرُوَاس
7 وَ يَوْم الْأَحَدْ، وَكِتْ لَمَّيْنَا مَعَ الْمُؤمِنِينْ أَشَانْ نَكْسُرُوا سَوَا الْخُبْزَةْ هَنَا عَشَاءْ الرَّبّ، بُولُسْ قَمَّ فَسَّرْ لَيْنَا لَحَدِّي أُسْط اللَّيْل أَشَانْ دَوَّرْ يِسَافِرْ بِفَجُرْ. 8 وَ الْبَيْت اللَّمَّيْنَا فَوْقَهْ قَصِرْ وَ أَنِحْنَ قَاعِدِينْ فَوْقَهْ فَوْق. وَ فَوَانِيسْ كَتِيرِينْ مُوَلِّعِينْ. 9 وَ صَبِي وَاحِدْ قَاعِدْ أَمْبَيْنَاتْنَا أُسْمَهْ أَفْتِيخُوسْ وَ هُو قَعَدْ تِحِتْ فِي خَشُمْ الشُّبَّاكْ. وَ وَكِتْ بُولُسْ قَاعِدْ يِكَلِّمْ مُدَّةْ طَوِيلَةْ، الصَّبِي دَا نَامْ مَرَّةْ وَاحِدْ وَ وَقَعْ مِنْ الْقَصِرْ التَّالِتْ. وَ وَكِتْ رَفَعَوْه، لِقَوْه مَيِّتْ. 10 وَ بُولُسْ نَزَلْ مِنْ الْبَيْت عَجَلَةْ وَ دَنْقَرْ فَوْقَهْ وَ حَضَنَهْ. وَ قَالْ لَيْهُمْ: «خَلَاصْ مَا تَخَافَوْا! رُوحَهْ قَبَّلَتْ.»
11 وَ بُولُسْ قَبَّلْ فَوْق فِي الْقَصِرْ وَ كَسَّرْ الْخُبْزَةْ وَ أَكَلْ مَعَاهُمْ. وَ بَعَدْ دَا، قَمَّ يِكَلِّمْ بَتَّانْ لَحَدِّي الْفَجُرْ. وَ فَجُرْ قَمَّ سَافَرْ. 12 وَ الصَّبِي دَا جَابَوْه فِي بَيْتَهْ حَيّ وَ قُلُوبْهُمْ رَاقْدِينْ مَرَّةْ وَاحِدْ.
كلام بُولُس للكُبارات
13 قُبَّالْ بُولُسْ مَا يَمْشِي بِدَرِبْ هَنَا حِلَّةْ أَسُّوسْ، هُو أَوْرَانَا أَشَانْ نَمْشُوا بِالْبَحَرْ وَ نِوَصُّلُوا قِدَّامَهْ فِي أَسُّوسْ وَ نَرْجَوْه لَحَدِّي يَجِي لَيْنَا. وَ خَلَاصْ، أَنِحْنَ رِكِبْنَا فِي السَّفِينَةْ وَ مَشَيْنَا. 14 وَ وَكِتْ بُولُسْ جَاءْ لَيْنَا فِي أَسُّوسْ، رَكَّبْنَاهْ مَعَانَا فِي السَّفِينَةْ وَ مَشَيْنَا لِحِلَّةْ مِتِلِينِي. 15 وَ مِنْهَا مَشَيْنَا قِدَّامْ وَ أَمْبَاكِرْ جِينَا قَرِيبْ لِجَزِيرَةْ خِيُوسْ. وَ الْيَوْم التَّالِتْ، جِينَا قَرِيبْ لِجَزِيرَةْ سَامُوسْ. وَ الْيَوْم الرَّابِعْ، فُتْنَا قِدَّامْ لِمَدِينَةْ أَفَسُسْ وَ وَقَفْنَا فِي حِلَّةْ مِلِيتُسْ. 16 وَ مَا وَقَفْنَا فِي أَفَسُسْ أَشَانْ بُولُسْ مَا دَوَّرْ يِأَخِّرْ فِي بَلَدْ آسِيَا. هُو دَوَّرْ يَمْشِي عَجَلَةْ. وَ كَنْ مُمْكِنْ، يَلْحَقْ مَدِينَةْ الْقُدُسْ قُبَّالْ عِيدْ الْخَمْسِينْ.
17 وَ مِنْ مِلِيتُسْ، بُولُسْ رَسَّلْ فِي أَفَسُسْ لِكُبَارَاتْ جَمَاعَةْ الْمُؤمِنِينْ أَشَانْ يَجُوا لَيَّهْ. 18 وَ وَكِتْ الْكُبَارَاتْ جَوْا، بُولُسْ كَلَّمْ لَيْهُمْ وَ قَالْ: «إِنْتُو تَعَرْفُوا حَالْتِي كِكَّيْف كُلَّ الْمُدَّةْ الْقَعَدْتَهَا مَعَاكُو فِي بَلَدْ آسِيَا مِنْ أَوَّلْ يَوْم جِيتْ. 19 كُلَّ يَوْم، أَنَا خَدَمْت لِرَبِّنَا مِثِلْ مِسْكِينْ وَ دُمُوعِي دَفَّقَوْا كَتِيرْ فِي شَانْكُو. وَ إِنْتُو تَعَرْفُوا كِكَّيْف الْيَهُودْ أَلآمَرَوْا فَوْقِي وَ التَّعَبْ دَا بِقِي لَيِّ قَاسِي. 20 وَ تَعَرْفُوا وَكِتْ أَنَا قَاعِدْ نِعَلِّمْكُو، أَنَا مَا لَبَّدْت لَيْكُو أَيِّ كَلَامْ هَنَا فَايْدِتْكُو وَ بَلَّغْت لَيْكُو نَفْس الْبِشَارَةْ كَنْ بَرَّا قِدَّامْ نَاسْ الْحِلَّةْ وَلَّا دَاخَلْ فِي بُيُوتْكُو. 21 وَ نِحَذِّرْ الْيَهُودْ وَ الْيُونَانِيِّينْ بِنَفْس الْكَلَامْ وَ نُقُولْ كَدَرْ وَاجِبْ كُلُّهُمْ يُتُوبُوا لِلّٰهْ وَ يِآمُنُوا بِرَبِّنَا عِيسَى.
22 «وَ الْيَوْم بَسْ، أَنَا مُسَافِرْ وَ مَاشِي لِمَدِينَةْ الْقُدُسْ. رُوحْ اللّٰهْ يُسُوقْنِي وَ مَا نَعَرِفْ الشَّيّءْ الْيَبْقَى فَوْقِي هِنَاكْ 23 إِلَّا فِي أَيِّ حِلَّةْ النَّمْشِي فَوْقهَا، الرُّوحْ الْقُدُّوسْ يِحَذِّرْنِي كَدَرْ هِنَاكْ يِدِسُّونِي فِي السِّجِنْ وَ يِتَعُّبُونِي كَتِيرْ. 24 حَيَاتِي مَا مُهِمَّةْ لَيِّ. لَاكِنْ الْمُهِمّ لَيِّ نِكَمِّلْ خِدْمَةْ رَبِّنَا عِيسَى الْهُو أَنْطَاهَا لَيِّ. وَاجِبْ نَشْهَدْ لِلنَّاسْ وَ نِأَوْرِيهُمْ بِالْبِشَارَةْ هَنَا نِعْمَةْ اللّٰهْ.
25 «خَلَاصْ، أَنَا جِيتْ قَعَدْت مَعَاكُو وَ بَلَّغْت لَيْكُو الْبِشَارَةْ هَنَا مَمْلَكَةْ اللّٰهْ. وَ هَسَّعْ نَعَرِفْ مِنْ بَعَدْ الْيَوْم نَادُمْ وَاحِدْ مِنْكُو مَا بِشِيفْنِي بَتَّانْ. 26 أَسْمَعَوْا عَدِيلْ. أَنَا نَشْهَدْ كَدَرْ إِنْتُو مَسْؤُولِينْ مِنْ الشَّيّءْ الْيَجِي فَوْقكُو. أَنَا بَرِي مِنْكُو! 27 أَنَا بَلَّغْت لَيْكُو هَدَفْ اللّٰهْ كُلَّ كَيْ وَ مَا لَبَّدْت مِنْكُو شَيّءْ وَاحِدْ.
28 «فَكُّرُوا فِي نُفُوسْكُو وَ فِي كُلَّ جَمَاعَةْ الْمُؤمِنِينْ هَنَا اللّٰهْ أَشَانْ الرُّوحْ الْقُدُّوسْ خَطَّاكُو فَوْقهُمْ رُعْيَانْ. أَيْوَى، أَسْرَحَوْا بِجَمَاعَةْ الْمُؤمِنِينْ الْاللّٰهْ شَرَاهُمْ بِدَمّ إِبْنَهْ. 29 وَ أَنَا نَعَرِفْ كَدَرْ بَعَدْ أَنَا مَشَيْت خَلَاصْ، نَاسْ فَسْلِينْ يَدْخُلُوا فِي أُسُطْكُو مِثِلْ الْمَرَافْعِينْ يِنْدَسَّوْا فِي أُسْط الْغَنَمْ وَ يَاكُلُوهُمْ. 30 وَ نَاسْ وَاحِدِينْ مِنْكُو كُلَ يُقُمُّوا يِعَلُّمُوا كَلَامْ مَا صَحِيحْ أَشَانْ يِدَوْرُوا يَلْقَوْا مِنْكُو تَلَامِيذ يِتَابُعُوهُمْ. 31 وَ أَشَانْ دَا، خُطُّوا بَالْكُو. مَا تَنْسَوْا كِكَّيْف أَنَا قَاعِدْ نِوَصِّي أَيِّ وَاحِدْ مِنْكُو لَيْل وَ نَهَارْ مُدَّةْ تَلَاتَةْ سَنَةْ وَ مَا تَنْسَوْا دُمُوعِي فِي شَانْكُو.
32 «وَ هَسَّعْ نِأَمِّنْكُو لِلّٰهْ وَ لِكَلَامْ نِعْمَتَهْ الْكَلَّمْتُكُو بَيْهَا. أَشَانْ الْكَلَامْ دَا يَقْدَرْ يِقَوِّي إِيمَانْكُو. وَ بِالْكَلَامْ دَا، تَلْقَوْا الْوَرَثَةْ الْاللّٰهْ يَنْطِيهَا لِكُلَّ النَّاسْ الْخَاصِّيْن لَيَّهْ. 33 أَبَداً أَنَا مَا دَوَّرْت نِشِيلْ شَيّءْ مِنْ أَيِّ وَاحِدْ مِنْكُو وَ لَا فُضَّةْ وَ لَا دَهَبْ وَ لَا خَلَقْ. 34 إِنْتُو ذَاتْكُو تَعَرْفُوا كَدَرْ أَنَا خَدَمْت بِدُرَاعِي لِنِعِيشْ وَ لِنِعَيِّشْ النَّاسْ الْمَعَايِ. 35 وَ أَنَا دَايْماً وَصَّفْتُكُو بِالشَّيّءْ السَّوَّيْتَهْ فِي أُسُطْكُو كَدَرْ وَاجِبْ نَخْدُمُوا أَشَانْ نِعَاوُنُوا التَّعْبَانِينْ. وَ مَا وَاجِبْ نَنْسَوْا كَلَامْ رَبِّنَا عِيسَى وَكِتْ قَالْ: ‹فَرْحَةْ هَنَا الْبَنْطِي أَكْبَرْ مِنْ فَرْحَةْ هَنَا الْبِشِيلْ.›»
36 وَ وَكِتْ بُولُسْ كَلَّمْ الْكَلَامْ دَا، هُو بَرَكْ وَ صَلَّى مَعَاهُمْ. 37 وَ كُلُّهُمْ بَكَوْا وَ حَضَنَوْا بُولُسْ وَ حَبَّوْه. 38 وَ هُمَّنْ حَزْنَانِينْ بِلْحَيْن أَشَانْ هُو قَالْ لَيْهُمْ بَتَّانْ مَا يِشِيفُوهْ. وَ خَلَاصْ عَدَّوْه لِلسَّفِينَةْ.
سفر بُولُس
1 وَ وَكِتْ الْبَرْجَالْ كَمَّلْ مَرَّةْ وَاحِدْ، بُولُسْ نَادَى التَّلَامِيذ أَشَانْ يِلِمُّوا وَ حَجَّى لَيْهُمْ. هُو شَجَّعَاهُمْ وَ سَلَّمَاهُمْ وَ فَاتْ لِبَلَدْ مَقِدُونِيَةْ. 2 وَ هِنَاكْ وَكِتْ شَقَّ الْبَلَدْ دِي، هُو عَلَّمْ نَاسْ كَتِيرِينْ وَ شَجَّعَاهُمْ كَتِيرْ. وَ بَعَدْ دَا، مَشَى الْيُونَانْ. 3 وَ قَعَدْ هِنَاكْ مُدَّةْ تَلَاتَةْ شَهَرْ. وَ دَوَّرْ يِسَافِرْ فِي بَلَدْ سُورِيَا. وَ وَكِتْ دَوَّرْ يَرْكَبْ فِي السَّفِينَةْ، هُو سِمِعْ الْيَهُودْ أَلآمَرَوْا فَوْقَهْ أَشَانْ يَكْتُلُوهْ فِي سَفَرَهْ. وَ بَيْدَا، خَلَّى رَكُوبْ السَّفِينَةْ أَشَانْ يِقَبِّلْ فِي آسِيَا بِدَرِبْ هَنَا مَقِدُونِيَةْ.
4 وَ أَخْوَانْ وَاحِدِينْ سَافَرَوْا مَعَايَهْ وَ هُمَّنْ سُوبَاتَرْ وِلَيْد بِرُّسْ مِنْ حِلَّةْ بِرِيَّةْ وَ أَرِسْتَارْكُسْ وَ سُكُونْدُس مِنْ حِلَّةْ تَسَلُونِيكِي وَ غَايُسْ مِنْ حِلَّةْ دَرْبَةْ وَ تِمُوتَاوُسْ. وَ تِشِيكُسْ وَ تُرُوفِيمُسْ مِنْ بَلَدْ آسِيَا. 5 وَ كُلَّ النَّاسْ دَوْل فَاتَوْا أَشَانْ يَرْجَوْنَا فِي حِلَّةْ تُرُوَاسْ. 6 وَ بَعَدْ أُسْبُوعْ هَنَا عِيدْ الْخُبْزَةْ بَلَا تَوَّارَةْ، أَنِحْنَ رِكِبْنَا فِي السَّفِينَةْ وَ سَافَرْنَا مِنْ مَدِينَةْ فِلِبِّي. وَ بَعَدْ خَمْسَةْ يَوْم، وِصِلْنَا فِي تُرُوَاسْ وَ لَمَّيْنَا مَعَاهُمْ. وَ قَعَدْنَا هِنَاكْ سَبْعَةْ يَوْم.
العجب في حِلّة تُرُوَاس
7 وَ يَوْم الْأَحَدْ، وَكِتْ لَمَّيْنَا مَعَ الْمُؤمِنِينْ أَشَانْ نَكْسُرُوا سَوَا الْخُبْزَةْ هَنَا عَشَاءْ الرَّبّ، بُولُسْ قَمَّ فَسَّرْ لَيْنَا لَحَدِّي أُسْط اللَّيْل أَشَانْ دَوَّرْ يِسَافِرْ بِفَجُرْ. 8 وَ الْبَيْت اللَّمَّيْنَا فَوْقَهْ قَصِرْ وَ أَنِحْنَ قَاعِدِينْ فَوْقَهْ فَوْق. وَ فَوَانِيسْ كَتِيرِينْ مُوَلِّعِينْ. 9 وَ صَبِي وَاحِدْ قَاعِدْ أَمْبَيْنَاتْنَا أُسْمَهْ أَفْتِيخُوسْ وَ هُو قَعَدْ تِحِتْ فِي خَشُمْ الشُّبَّاكْ. وَ وَكِتْ بُولُسْ قَاعِدْ يِكَلِّمْ مُدَّةْ طَوِيلَةْ، الصَّبِي دَا نَامْ مَرَّةْ وَاحِدْ وَ وَقَعْ مِنْ الْقَصِرْ التَّالِتْ. وَ وَكِتْ رَفَعَوْه، لِقَوْه مَيِّتْ. 10 وَ بُولُسْ نَزَلْ مِنْ الْبَيْت عَجَلَةْ وَ دَنْقَرْ فَوْقَهْ وَ حَضَنَهْ. وَ قَالْ لَيْهُمْ: «خَلَاصْ مَا تَخَافَوْا! رُوحَهْ قَبَّلَتْ.»
11 وَ بُولُسْ قَبَّلْ فَوْق فِي الْقَصِرْ وَ كَسَّرْ الْخُبْزَةْ وَ أَكَلْ مَعَاهُمْ. وَ بَعَدْ دَا، قَمَّ يِكَلِّمْ بَتَّانْ لَحَدِّي الْفَجُرْ. وَ فَجُرْ قَمَّ سَافَرْ. 12 وَ الصَّبِي دَا جَابَوْه فِي بَيْتَهْ حَيّ وَ قُلُوبْهُمْ رَاقْدِينْ مَرَّةْ وَاحِدْ.
كلام بُولُس للكُبارات
13 قُبَّالْ بُولُسْ مَا يَمْشِي بِدَرِبْ هَنَا حِلَّةْ أَسُّوسْ، هُو أَوْرَانَا أَشَانْ نَمْشُوا بِالْبَحَرْ وَ نِوَصُّلُوا قِدَّامَهْ فِي أَسُّوسْ وَ نَرْجَوْه لَحَدِّي يَجِي لَيْنَا. وَ خَلَاصْ، أَنِحْنَ رِكِبْنَا فِي السَّفِينَةْ وَ مَشَيْنَا. 14 وَ وَكِتْ بُولُسْ جَاءْ لَيْنَا فِي أَسُّوسْ، رَكَّبْنَاهْ مَعَانَا فِي السَّفِينَةْ وَ مَشَيْنَا لِحِلَّةْ مِتِلِينِي. 15 وَ مِنْهَا مَشَيْنَا قِدَّامْ وَ أَمْبَاكِرْ جِينَا قَرِيبْ لِجَزِيرَةْ خِيُوسْ. وَ الْيَوْم التَّالِتْ، جِينَا قَرِيبْ لِجَزِيرَةْ سَامُوسْ. وَ الْيَوْم الرَّابِعْ، فُتْنَا قِدَّامْ لِمَدِينَةْ أَفَسُسْ وَ وَقَفْنَا فِي حِلَّةْ مِلِيتُسْ. 16 وَ مَا وَقَفْنَا فِي أَفَسُسْ أَشَانْ بُولُسْ مَا دَوَّرْ يِأَخِّرْ فِي بَلَدْ آسِيَا. هُو دَوَّرْ يَمْشِي عَجَلَةْ. وَ كَنْ مُمْكِنْ، يَلْحَقْ مَدِينَةْ الْقُدُسْ قُبَّالْ عِيدْ الْخَمْسِينْ.
17 وَ مِنْ مِلِيتُسْ، بُولُسْ رَسَّلْ فِي أَفَسُسْ لِكُبَارَاتْ جَمَاعَةْ الْمُؤمِنِينْ أَشَانْ يَجُوا لَيَّهْ. 18 وَ وَكِتْ الْكُبَارَاتْ جَوْا، بُولُسْ كَلَّمْ لَيْهُمْ وَ قَالْ: «إِنْتُو تَعَرْفُوا حَالْتِي كِكَّيْف كُلَّ الْمُدَّةْ الْقَعَدْتَهَا مَعَاكُو فِي بَلَدْ آسِيَا مِنْ أَوَّلْ يَوْم جِيتْ. 19 كُلَّ يَوْم، أَنَا خَدَمْت لِرَبِّنَا مِثِلْ مِسْكِينْ وَ دُمُوعِي دَفَّقَوْا كَتِيرْ فِي شَانْكُو. وَ إِنْتُو تَعَرْفُوا كِكَّيْف الْيَهُودْ أَلآمَرَوْا فَوْقِي وَ التَّعَبْ دَا بِقِي لَيِّ قَاسِي. 20 وَ تَعَرْفُوا وَكِتْ أَنَا قَاعِدْ نِعَلِّمْكُو، أَنَا مَا لَبَّدْت لَيْكُو أَيِّ كَلَامْ هَنَا فَايْدِتْكُو وَ بَلَّغْت لَيْكُو نَفْس الْبِشَارَةْ كَنْ بَرَّا قِدَّامْ نَاسْ الْحِلَّةْ وَلَّا دَاخَلْ فِي بُيُوتْكُو. 21 وَ نِحَذِّرْ الْيَهُودْ وَ الْيُونَانِيِّينْ بِنَفْس الْكَلَامْ وَ نُقُولْ كَدَرْ وَاجِبْ كُلُّهُمْ يُتُوبُوا لِلّٰهْ وَ يِآمُنُوا بِرَبِّنَا عِيسَى.
22 «وَ الْيَوْم بَسْ، أَنَا مُسَافِرْ وَ مَاشِي لِمَدِينَةْ الْقُدُسْ. رُوحْ اللّٰهْ يُسُوقْنِي وَ مَا نَعَرِفْ الشَّيّءْ الْيَبْقَى فَوْقِي هِنَاكْ 23 إِلَّا فِي أَيِّ حِلَّةْ النَّمْشِي فَوْقهَا، الرُّوحْ الْقُدُّوسْ يِحَذِّرْنِي كَدَرْ هِنَاكْ يِدِسُّونِي فِي السِّجِنْ وَ يِتَعُّبُونِي كَتِيرْ. 24 حَيَاتِي مَا مُهِمَّةْ لَيِّ. لَاكِنْ الْمُهِمّ لَيِّ نِكَمِّلْ خِدْمَةْ رَبِّنَا عِيسَى الْهُو أَنْطَاهَا لَيِّ. وَاجِبْ نَشْهَدْ لِلنَّاسْ وَ نِأَوْرِيهُمْ بِالْبِشَارَةْ هَنَا نِعْمَةْ اللّٰهْ.
25 «خَلَاصْ، أَنَا جِيتْ قَعَدْت مَعَاكُو وَ بَلَّغْت لَيْكُو الْبِشَارَةْ هَنَا مَمْلَكَةْ اللّٰهْ. وَ هَسَّعْ نَعَرِفْ مِنْ بَعَدْ الْيَوْم نَادُمْ وَاحِدْ مِنْكُو مَا بِشِيفْنِي بَتَّانْ. 26 أَسْمَعَوْا عَدِيلْ. أَنَا نَشْهَدْ كَدَرْ إِنْتُو مَسْؤُولِينْ مِنْ الشَّيّءْ الْيَجِي فَوْقكُو. أَنَا بَرِي مِنْكُو! 27 أَنَا بَلَّغْت لَيْكُو هَدَفْ اللّٰهْ كُلَّ كَيْ وَ مَا لَبَّدْت مِنْكُو شَيّءْ وَاحِدْ.
28 «فَكُّرُوا فِي نُفُوسْكُو وَ فِي كُلَّ جَمَاعَةْ الْمُؤمِنِينْ هَنَا اللّٰهْ أَشَانْ الرُّوحْ الْقُدُّوسْ خَطَّاكُو فَوْقهُمْ رُعْيَانْ. أَيْوَى، أَسْرَحَوْا بِجَمَاعَةْ الْمُؤمِنِينْ الْاللّٰهْ شَرَاهُمْ بِدَمّ إِبْنَهْ. 29 وَ أَنَا نَعَرِفْ كَدَرْ بَعَدْ أَنَا مَشَيْت خَلَاصْ، نَاسْ فَسْلِينْ يَدْخُلُوا فِي أُسُطْكُو مِثِلْ الْمَرَافْعِينْ يِنْدَسَّوْا فِي أُسْط الْغَنَمْ وَ يَاكُلُوهُمْ. 30 وَ نَاسْ وَاحِدِينْ مِنْكُو كُلَ يُقُمُّوا يِعَلُّمُوا كَلَامْ مَا صَحِيحْ أَشَانْ يِدَوْرُوا يَلْقَوْا مِنْكُو تَلَامِيذ يِتَابُعُوهُمْ. 31 وَ أَشَانْ دَا، خُطُّوا بَالْكُو. مَا تَنْسَوْا كِكَّيْف أَنَا قَاعِدْ نِوَصِّي أَيِّ وَاحِدْ مِنْكُو لَيْل وَ نَهَارْ مُدَّةْ تَلَاتَةْ سَنَةْ وَ مَا تَنْسَوْا دُمُوعِي فِي شَانْكُو.
32 «وَ هَسَّعْ نِأَمِّنْكُو لِلّٰهْ وَ لِكَلَامْ نِعْمَتَهْ الْكَلَّمْتُكُو بَيْهَا. أَشَانْ الْكَلَامْ دَا يَقْدَرْ يِقَوِّي إِيمَانْكُو. وَ بِالْكَلَامْ دَا، تَلْقَوْا الْوَرَثَةْ الْاللّٰهْ يَنْطِيهَا لِكُلَّ النَّاسْ الْخَاصِّيْن لَيَّهْ. 33 أَبَداً أَنَا مَا دَوَّرْت نِشِيلْ شَيّءْ مِنْ أَيِّ وَاحِدْ مِنْكُو وَ لَا فُضَّةْ وَ لَا دَهَبْ وَ لَا خَلَقْ. 34 إِنْتُو ذَاتْكُو تَعَرْفُوا كَدَرْ أَنَا خَدَمْت بِدُرَاعِي لِنِعِيشْ وَ لِنِعَيِّشْ النَّاسْ الْمَعَايِ. 35 وَ أَنَا دَايْماً وَصَّفْتُكُو بِالشَّيّءْ السَّوَّيْتَهْ فِي أُسُطْكُو كَدَرْ وَاجِبْ نَخْدُمُوا أَشَانْ نِعَاوُنُوا التَّعْبَانِينْ. وَ مَا وَاجِبْ نَنْسَوْا كَلَامْ رَبِّنَا عِيسَى وَكِتْ قَالْ: ‹فَرْحَةْ هَنَا الْبَنْطِي أَكْبَرْ مِنْ فَرْحَةْ هَنَا الْبِشِيلْ.›»
36 وَ وَكِتْ بُولُسْ كَلَّمْ الْكَلَامْ دَا، هُو بَرَكْ وَ صَلَّى مَعَاهُمْ. 37 وَ كُلُّهُمْ بَكَوْا وَ حَضَنَوْا بُولُسْ وَ حَبَّوْه. 38 وَ هُمَّنْ حَزْنَانِينْ بِلْحَيْن أَشَانْ هُو قَالْ لَيْهُمْ بَتَّانْ مَا يِشِيفُوهْ. وَ خَلَاصْ عَدَّوْه لِلسَّفِينَةْ.
