1 الْمَرَةْ الْعِنْدَهَا حِكْمَةْ تَبْنِي بَيْتهَا
وَ الْمُنَافِقَةْ بِنَفِسْهَا تَخْرِبْ بَيْتهَا.
2 الْمَاشِي فِي الدَّرِبْ الْعَدِيلْ،
خَايِفْ مِنْ اللّٰهْ.
وَ الشَّايِلْ الدَّرِبْ الْأَعْوَجْ،
عَاصِي اللّٰهْ.
3 كَلَامْ الْمُنَافِقْ الْفَشَّارْ يِجِيبْ لَيَّهْ الدَّقّ
وَ لَاكِنْ لِسَانْ الصَّالِحْ يَحْفَضَهْ.
4 كَنْ مَا فِي تِيرَانْ هَنَا الْحِرَاتَةْ،
الدَّبَنْقَةْ يَابْسَةْ
وَ لَاكِنْ بِقُدْرَةْ التِّيرَانْ،
يَكْتَرْ الْمَعَاشْ.
5 الشَّاهِدْ الْأَمِينْ مَا يَكْدِبْ
وَ لَاكِنْ شَاهِدْ الزُّورْ،
كَلَامَهْ كُلَ كِدِبْ.
6 الشَّمَّاتِي يِفَتِّشْ الْحِكْمَةْ وَ مَا يَلْقَاهَا
وَ لَاكِنْ الْمَعْرَفَةْ لِلْفَاهِمْ، لَقَاهَا هَيِّنْ.
7 أَمْشِي بَعِيدْ مِنْ الْمَطْمُوسْ
أَشَانْ مَا تَلْقَى عِلِمْ مِنْ كَلَامَهْ.
8 حِكْمَةْ الْعَاقِلْ هِي فِهِمْ طَرِيقْ حَيَاتَهْ
وَ لَاكِنْ طَمَاسَةْ الْمَطْمُوسْ تُغُشَّهْ.
9 هَدِيَّةْ الْغُفْرَانْ هَنَا الْمُنَافِقْ تِشَّمَّتْ فَوْقَهْ
وَ لَاكِنْ الْعَدِيلِينْ يَلْقَوْا رِضَى اللّٰهْ.
10 الْقَلِبْ هُو يَعَرِفْ وِجَيْعِتَهْ
وَ فَرْحِتَهْ كُلَ مَا يِقَسِّمْهَا مَعَ الْآخَرِينْ.
11 بَيْت الْعَاصِيِينْ يِدَّمَّرْ
وَ خَيْمَةْ الْعَدِيلِينْ تَعَمِرْ.
12 فِيَّهْ دَرِبْ يِنْشَافْ فِي عُيُونَكْ عَدِيلْ
وَ لَاكِنْ فِي آخِرَهْ، تَلْقَى الْمَوْت.
13 مَرَّاتْ الضِّحِكْ يِلَبِّدْ تَعَبْ الْقَلِبْ
وَ مُمْكِنْ آخِرْ الْفَرَحْ يُكُونْ حِزِنْ.
14 سِيدْ الْقَلِبْ الْهَوَانْ
يَلْقَى نَتِيجَةْ خِدِمْتَهْ
وَ الْيَمْشِي عَدِيلْ
يَلْقَى مُكَافَاةْ زِيَادَةْ.
15 الْجَاهِلْ يِصَدِّقْ
بِكُلَّ الْكَلَامْ الْيُقُولُوهْ لَيَّهْ
وَ الْعَاقِلْ يِفَكِّرْ
حَتَّى فِي الْبَكَانْ الْيُخُطّ فَوْقَهْ رِجْلَهْ.
16 الْحَكِيمْ يَخَافْ
وَ يِبَارِي الْخُطُورَةْ،
الْمَطْمُوسْ مَاشِي
وَ عِنْدَهْ ضَمَانْ فِي نَفْسَهْ.
17 الزَّعَّالْ، هُو مَطْمُوسْ
وَ الْيَنْوِي الْفَسَالَةْ، مَكْرُوهْ.
18 الْجُهَّالْ يَوْرُثُوا إِلَّا النِّفَاقْ
وَ لَاكِنْ الْعِلِمْ يَبْقَى تَاجْ لِلْعَاقِلْ.
19 الْفَسْلِينْ يَسْجُدُوا لِلزَّيْنِينْ
وَ الْعَاصِيِينْ يَشْحَدَوْا فِي بِيبَانْ الصَّالِحِينْ.
20 الْفَقْرِي، يَكْرَهَوْه نَاسَهْ الْقَرِيبِينْ
وَ الْغَنِيْ، الْيِحِبُّوهْ كَتِيرِينْ!
21 الْيَحْقِرْ جِيرَانَهْ يِزِيدْ ذُنُوبَهْ
وَ لَاكِنْ مَبْرُوكْ لِلْيِحِنّ فِي الْمَسَاكِينْ.
22 الْيَنْوِي الْفَسَالَةْ يِوَدِّرْ نَفْسَهْ
وَ الْيَنْوِي الْخَيْر يَلْقَى رَحْمَةْ وَ أَمَانْ.
23 الْيَخْدِمْ بِوَغَرَهْ يَلْقَى نَتِيجَةْ
وَ لَاكِنْ كَلَامْ سَاكِتْ وِحَيْدَهْ يِجِيبْ الْفَقُرْ.
24 الْغُنَى تَاجْ لِلْحَكِيمْ
وَ الْمُنَافِقْ مَطْمُوسْ وَ يَقْعُدْ بِنِفَاقَهْ.
25 الْيَشْهَدْ بِالْحَقّ، يِنَجِّي النَّاسْ
وَ الْيَشْهَدْ بِكِدِبْ، غَشَّاشْ.
26 الْخَوْف مِنْ اللّٰهْ يِعَيِّشَكْ فِي أَمَانْ كَامِلْ
وَ أَوْلَادَكْ يَلْقَوْا بَكَانْ الْيَلْجَأَوْا لَيَّهْ.
27 الْخَوْف مِنْ اللّٰهْ
مِثِلْ عَيْن أَلْمِي التَّنْطِي الْحَيَاةْ
وَ يِنَجِّيكْ مِنْ الشَّرَكْ
الْيِجِيبْ الْمَوْت.
28 كَتَرَةْ الشَّعَبْ شَرَفْ لِلْمَلِكْ
وَ قِلَّةْ الشَّعَبْ خَرَابْ لِلْحَاكِمْ.
29 الْمَا يَزْعَلْ عَجَلَةْ
يِوَصِّفْ فِهِمَهْ لِلنَّاسْ
لَاكِنْ الزَّعَّالْ
يِوَصِّفْ كَدَرْ هُو مَا عِنْدَهْ رَاسْ.
30 الْقَلِبْ الطَّيِّبْ يَنْطِي حَيَاةْ لِجِسْمَكْ
وَ الْقَلِبْ الْحَسُودْ مِثِلْ سُوسَةْ فِي عُضَامَكْ.
31 الْيَظْلُمْ الْمِسْكِينْ يَحْقِرْ خَالِقَهْ
وَ لَاكِنْ الْيِحِنّ فِي الْمِسْكِينْ يِمَجِّدَهْ.
32 الْعَاصِي يَقَعْ فِي فَسَالْتَهْ
وَ لَاكِنْ الصَّالِحْ حَتَّى فِي مَوْتَهْ يَلْقَى مَلْجَأْ.
33 فِي قَلِبْ الْفَاهِمْ،
تَسْكُنْ الْحِكْمَةْ.
وَ لَاكِنْ فِي قَلِبْ الْمَطْمُوسْ،
هِي تِنْلَقِي وَلَّا؟
34 الْعَدَالَةْ تِشَرِّفْ الْأُمَّةْ
وَ لَاكِنْ الذَّنِبْ يِعَيِّبْ الشَّعَبْ.
35 الْخَدَّامْ الْفَهِيمْ
يَلْقَى رِضَى مِنْ الْمَلِكْ
وَ لَاكِنْ الْيِجِيبْ الْعَيْب
يَلْقَى غَضَبَهْ.
1 الْمَرَةْ الْعِنْدَهَا حِكْمَةْ تَبْنِي بَيْتهَا
وَ الْمُنَافِقَةْ بِنَفِسْهَا تَخْرِبْ بَيْتهَا.
2 الْمَاشِي فِي الدَّرِبْ الْعَدِيلْ،
خَايِفْ مِنْ اللّٰهْ.
وَ الشَّايِلْ الدَّرِبْ الْأَعْوَجْ،
عَاصِي اللّٰهْ.
3 كَلَامْ الْمُنَافِقْ الْفَشَّارْ يِجِيبْ لَيَّهْ الدَّقّ
وَ لَاكِنْ لِسَانْ الصَّالِحْ يَحْفَضَهْ.
4 كَنْ مَا فِي تِيرَانْ هَنَا الْحِرَاتَةْ،
الدَّبَنْقَةْ يَابْسَةْ
وَ لَاكِنْ بِقُدْرَةْ التِّيرَانْ،
يَكْتَرْ الْمَعَاشْ.
5 الشَّاهِدْ الْأَمِينْ مَا يَكْدِبْ
وَ لَاكِنْ شَاهِدْ الزُّورْ،
كَلَامَهْ كُلَ كِدِبْ.
6 الشَّمَّاتِي يِفَتِّشْ الْحِكْمَةْ وَ مَا يَلْقَاهَا
وَ لَاكِنْ الْمَعْرَفَةْ لِلْفَاهِمْ، لَقَاهَا هَيِّنْ.
7 أَمْشِي بَعِيدْ مِنْ الْمَطْمُوسْ
أَشَانْ مَا تَلْقَى عِلِمْ مِنْ كَلَامَهْ.
8 حِكْمَةْ الْعَاقِلْ هِي فِهِمْ طَرِيقْ حَيَاتَهْ
وَ لَاكِنْ طَمَاسَةْ الْمَطْمُوسْ تُغُشَّهْ.
9 هَدِيَّةْ الْغُفْرَانْ هَنَا الْمُنَافِقْ تِشَّمَّتْ فَوْقَهْ
وَ لَاكِنْ الْعَدِيلِينْ يَلْقَوْا رِضَى اللّٰهْ.
10 الْقَلِبْ هُو يَعَرِفْ وِجَيْعِتَهْ
وَ فَرْحِتَهْ كُلَ مَا يِقَسِّمْهَا مَعَ الْآخَرِينْ.
11 بَيْت الْعَاصِيِينْ يِدَّمَّرْ
وَ خَيْمَةْ الْعَدِيلِينْ تَعَمِرْ.
12 فِيَّهْ دَرِبْ يِنْشَافْ فِي عُيُونَكْ عَدِيلْ
وَ لَاكِنْ فِي آخِرَهْ، تَلْقَى الْمَوْت.
13 مَرَّاتْ الضِّحِكْ يِلَبِّدْ تَعَبْ الْقَلِبْ
وَ مُمْكِنْ آخِرْ الْفَرَحْ يُكُونْ حِزِنْ.
14 سِيدْ الْقَلِبْ الْهَوَانْ
يَلْقَى نَتِيجَةْ خِدِمْتَهْ
وَ الْيَمْشِي عَدِيلْ
يَلْقَى مُكَافَاةْ زِيَادَةْ.
15 الْجَاهِلْ يِصَدِّقْ
بِكُلَّ الْكَلَامْ الْيُقُولُوهْ لَيَّهْ
وَ الْعَاقِلْ يِفَكِّرْ
حَتَّى فِي الْبَكَانْ الْيُخُطّ فَوْقَهْ رِجْلَهْ.
16 الْحَكِيمْ يَخَافْ
وَ يِبَارِي الْخُطُورَةْ،
الْمَطْمُوسْ مَاشِي
وَ عِنْدَهْ ضَمَانْ فِي نَفْسَهْ.
17 الزَّعَّالْ، هُو مَطْمُوسْ
وَ الْيَنْوِي الْفَسَالَةْ، مَكْرُوهْ.
18 الْجُهَّالْ يَوْرُثُوا إِلَّا النِّفَاقْ
وَ لَاكِنْ الْعِلِمْ يَبْقَى تَاجْ لِلْعَاقِلْ.
19 الْفَسْلِينْ يَسْجُدُوا لِلزَّيْنِينْ
وَ الْعَاصِيِينْ يَشْحَدَوْا فِي بِيبَانْ الصَّالِحِينْ.
20 الْفَقْرِي، يَكْرَهَوْه نَاسَهْ الْقَرِيبِينْ
وَ الْغَنِيْ، الْيِحِبُّوهْ كَتِيرِينْ!
21 الْيَحْقِرْ جِيرَانَهْ يِزِيدْ ذُنُوبَهْ
وَ لَاكِنْ مَبْرُوكْ لِلْيِحِنّ فِي الْمَسَاكِينْ.
22 الْيَنْوِي الْفَسَالَةْ يِوَدِّرْ نَفْسَهْ
وَ الْيَنْوِي الْخَيْر يَلْقَى رَحْمَةْ وَ أَمَانْ.
23 الْيَخْدِمْ بِوَغَرَهْ يَلْقَى نَتِيجَةْ
وَ لَاكِنْ كَلَامْ سَاكِتْ وِحَيْدَهْ يِجِيبْ الْفَقُرْ.
24 الْغُنَى تَاجْ لِلْحَكِيمْ
وَ الْمُنَافِقْ مَطْمُوسْ وَ يَقْعُدْ بِنِفَاقَهْ.
25 الْيَشْهَدْ بِالْحَقّ، يِنَجِّي النَّاسْ
وَ الْيَشْهَدْ بِكِدِبْ، غَشَّاشْ.
26 الْخَوْف مِنْ اللّٰهْ يِعَيِّشَكْ فِي أَمَانْ كَامِلْ
وَ أَوْلَادَكْ يَلْقَوْا بَكَانْ الْيَلْجَأَوْا لَيَّهْ.
27 الْخَوْف مِنْ اللّٰهْ
مِثِلْ عَيْن أَلْمِي التَّنْطِي الْحَيَاةْ
وَ يِنَجِّيكْ مِنْ الشَّرَكْ
الْيِجِيبْ الْمَوْت.
28 كَتَرَةْ الشَّعَبْ شَرَفْ لِلْمَلِكْ
وَ قِلَّةْ الشَّعَبْ خَرَابْ لِلْحَاكِمْ.
29 الْمَا يَزْعَلْ عَجَلَةْ
يِوَصِّفْ فِهِمَهْ لِلنَّاسْ
لَاكِنْ الزَّعَّالْ
يِوَصِّفْ كَدَرْ هُو مَا عِنْدَهْ رَاسْ.
30 الْقَلِبْ الطَّيِّبْ يَنْطِي حَيَاةْ لِجِسْمَكْ
وَ الْقَلِبْ الْحَسُودْ مِثِلْ سُوسَةْ فِي عُضَامَكْ.
31 الْيَظْلُمْ الْمِسْكِينْ يَحْقِرْ خَالِقَهْ
وَ لَاكِنْ الْيِحِنّ فِي الْمِسْكِينْ يِمَجِّدَهْ.
32 الْعَاصِي يَقَعْ فِي فَسَالْتَهْ
وَ لَاكِنْ الصَّالِحْ حَتَّى فِي مَوْتَهْ يَلْقَى مَلْجَأْ.
33 فِي قَلِبْ الْفَاهِمْ،
تَسْكُنْ الْحِكْمَةْ.
وَ لَاكِنْ فِي قَلِبْ الْمَطْمُوسْ،
هِي تِنْلَقِي وَلَّا؟
34 الْعَدَالَةْ تِشَرِّفْ الْأُمَّةْ
وَ لَاكِنْ الذَّنِبْ يِعَيِّبْ الشَّعَبْ.
35 الْخَدَّامْ الْفَهِيمْ
يَلْقَى رِضَى مِنْ الْمَلِكْ
وَ لَاكِنْ الْيِجِيبْ الْعَيْب
يَلْقَى غَضَبَهْ.
