Wasaaya le l-awiin wa l-rujaal
1 Wa leekan intan al-awiin kula, khalli ayyi mara tasmaʼ adiil kalaam raajilha. Wa kan fiyah rujaal al-ma gaaʼidiin yitaabuʼu kalaam Allah, akuun al-haal al-adiile hana awiinhum tijiibhum fi derib Allah. Wa da ma be kalaam 2 achaan yichiifu fooghin al-ihtiraam wa l-haal al-saalhe.
3 Ma tinkariban fi l-jamaal al-barraani misil al-muchaat wa ziina hana l-dahab wa l-lubaas al-sameh. 4 Fi badalah, ankarban fi l-jamaal al-dakhlaani wa hu jamaal al-nafas al-baarid wa l-hudu. Wa l-jamaal al-dakhlaani, hu misil hajar khaali al-abadan ma yatlaf wa khiimtah kabiire giddaam Allah. 5 Wa misil da bas, zamaan al-awiin al-saalhaat al-achamhin saabit fi Allah jammalan nufuushin wa simʼan adiil kalaam rujaalhin. 6 Wa misil da, Saara simʼat kalaam Ibraahiim wa naadatah sayyidha. Wa hassaʼ kan tisawwan al-kheer wa ma tikhallan ayyi khoof yakrubkan, intan tabgan banaatha.
7 Wa leeku intu al-rujaal kula, khalli ayyi raajil yagood maʼa martah be mufaahama wa yaʼarif tamaam kadar hi ma gawiiye mislah. Karrumu awiinku achaan hinna kula yawrisan maʼaaku niʼmat al-haya al-Allah yantiiha leeku. Wa taabuʼu kalaami da achaan cheyy ma yibarjil salaawaatku.
Wasaaya le kulla l-muʼminiin
8 Wa aakhir cheyy nuguulah leeku kulluku, khalli galibku yabga waahid wa khalli ruuhku tabga tawiile. Arraayado ambeenaatku be mahabba akhawiiye wa be galib hanuun wa maskunu nufuusku. 9 Kan al-naas yisawwu foogku chokhol fasil, ma turuddu leehum be chokhol fasil. Wa kan yiʼayyuruuku, ma turuddu leehum be muʼyaar. Laakin baarukuuhum, achaan Allah naadaaku fi derbah le tibaaruku al-naas wa tawrusu baraka min Allah. 10 Wa maktuub fi l-Kitaab :
<Ayyi naadum al-yidoor yiʼiich ayyaam saʼiidiin
khalli yahfad lisaanah min al-kalaam al-fasil
wa khachmah min al-kalaam al-kidib
11 Khalli yibaʼʼid min al-fasaala
wa yisawwi al-kheer.
Khalli yifattich al-salaam
wa yitaabiʼah be niiye waahide.
12 Achaan een Allah tiraakhib al-saalihiin
wa hu yasmaʼ salaawaathum.
Laakin Allah yugumm
didd al-fasliin.>
Al-taʼab fi chaan al-kheer
13 Wa yaatu al-yisawwi leeku cheyy fasil, kan intu munkaribiin fi l-kheer ? 14 Wa kan yitaʼʼubuuku be sabab intu saalihiin kula, intu mubaarakiin. Ma takhaafo minhum wa ma tibarjulu. 15 Laakin khuttu fi guluubku kadar al-Masiih, hu khudduus wa hu Rabbuku. Agoodu daayman jaahiziin achaan turuddu le ayyi naadum al-yatlub minku daliil hana l-acham al-induku. 16 Laakin hajju leyah be nafas baarid wa ihtiraam. Sawwu kulla cheyy be niiye mukhlisa. Wa be da, al-eeb yisawwiihum le l-naas al-yathamooku wa yiʼayyuruuku fi chaan al-kheer al-tisawwuuh fi derib al-Masiih. 17 Wa kan Allah yanti izin le l-naas achaan yitaʼʼubuuku, akheer yitaʼʼubuuku be sabab al-kheer al-intu sawweetuuh min yitaʼʼubuuku be sabab intu sawweetu fasaala.
18 Wa l-Masiih kula tiʼib taʼab waahid wa nihaaʼi fi chaan zunuub al-naas. Al-saalih maat fi chaan al-muznibiin wa be da, yiwaddiiku kulluku fi hadarat Allah. Hu katalooh wa maat misil moot al-naas wa Allah hayyaah be l-Ruuh al-Khudduus.
19 Wa be gudrat al-Ruuh al-Khudduus, hu macha wa ballakh le l-arwaah al-gaaʼidiin fi l-sijin. 20 Zamaan, al-arwaah dool abo ma taabaʼo kalaam Allah wakit Allah al-Sabuur gaaʼid yarja lahaddi Nooh yikammil al-safiina. Wa naas chiyya bas rikbo fi l-safiina wa adadhum tamaane wa humman dool nijo be sabab al-almi al-rafaʼ al-safiina. 21 Wa da masal hana l-khattisiin al-hassaʼ yinajjiiku. Wa l-muhimm fi l-khattisiin ma khasuul al-jilid min al-wasakh laakin hu al-ahad al-tisawwuuh maʼa Allah be niiye mukhlisa. Wa l-khattisiin yinajjiiku be sabab buʼaas Isa al-Masiih.
22 Wa l-Masiih hu al-macha foog fi l-samaawaat wa hassaʼ gaaʼid jamb Allah fi nussah al-zeenaay. Wa tihtah al-malaaʼika wa hukkaam wa kubaaraat al-arwaah.
وصايا للعوين و الرجال
1 وَ لَيْكَنْ إِنْتَنْ الْعَوِينْ كُلَ، خَلِّي أَيِّ مَرَةْ تَسْمَعْ عَدِيلْ كَلَامْ رَاجِلْهَا. وَ كَنْ فِيَّهْ رُجَالْ الْمَا قَاعِدِينْ يِتَابُعُوا كَلَامْ اللّٰهْ، أَكُونْ الْحَالْ الْعَدِيلَةْ هَنَا عَوِينْهُمْ تِجِيبْهُمْ فِي دَرِبْ اللّٰهْ. وَ دَا مَا بِكَلَامْ 2 أَشَانْ يِشِيفُوا فَوْقهِنْ الْإِحْتِرَامْ وَ الْحَالْ الصَّالْحَةْ.
3 مَا تِنْكَرْبَنْ فِي الْجَمَالْ الْبَرَّانِي مِثِلْ الْمُشَاطْ وَ زِينَةْ هَنَا الدَّهَبْ وَ اللُّبَاسْ السَّمَحْ. 4 فِي بَدَلَهْ، أَنْكَرْبَنْ فِي الْجَمَالْ الدَّخْلَانِي وَ هُو جَمَالْ النَّفَسْ الْبَارِدْ وَ الْهُدُوءْ. وَ الْجَمَالْ الدَّخْلَانِي، هُو مِثِلْ حَجَرْ غَالِي الْأَبَداً مَا يَتْلَفْ وَ قِيمْتَهْ كَبِيرَةْ قِدَّامْ اللّٰهْ. 5 وَ مِثِلْ دَا بَسْ، زَمَانْ الْعَوِينْ الصَّالْحَاتْ الْعَشَمْهِنْ ثَابِتْ فِي اللّٰهْ جَمَّلَنْ نُفُوسْهِنْ وَ سِمْعَنْ عَدِيلْ كَلَامْ رُجَالْهِنْ. 6 وَ مِثِلْ دَا، سَارَةْ سِمْعَتْ كَلَامْ إِبْرَاهِيمْ وَ نَادَتَهْ سَيِّدْهَا. وَ هَسَّعْ كَنْ تِسَوَّنْ الْخَيْر وَ مَا تِخَلَّنْ أَيِّ خَوْف يَكْرُبْكَنْ، إِنْتَنْ تَبْقَنْ بَنَاتْهَا.
7 وَ لَيْكُو إِنْتُو الرُّجَالْ كُلَ، خَلِّي أَيِّ رَاجِلْ يَقْعُدْ مَعَ مَرْتَهْ بِمُفَاهَمَةْ وَ يَعَرِفْ تَمَامْ كَدَرْ هِي مَا قَوِيَّةْ مِثْلَهْ. كَرُّمُوا عَوِينْكُو أَشَانْ هِنَّ كُلَ يَوْرِثَنْ مَعَاكُو نِعْمَةْ الْحَيَاةْ الْاللّٰهْ يَنْطِيهَا لَيْكُو. وَ تَابُعُوا كَلَامِي دَا أَشَانْ شَيّءْ مَا يِبَرْجِلْ صَلَاوَاتْكُو.
وصايا لكل المُؤمِنين
8 وَ آخِرْ شَيّءْ نُقُولَهْ لَيْكُو كُلُّكُو، خَلِّي قَلِبْكُو يَبْقَى وَاحِدْ وَ خَلِّي رُوحْكُو تَبْقَى طَوِيلَةْ. أَرَّايَدَوْا أَمْبَيْنَاتْكُو بِمَحَبَّةْ أَخَوِيَّةْ وَ بِقَلِبْ حَنُونْ وَ مَسْكُنُوا نُفُوسْكُو. 9 كَنْ النَّاسْ يِسَوُّوا فَوْقكُو شُغُلْ فَسِلْ، مَا تُرُدُّوا لَيْهُمْ بِشُغُلْ فَسِلْ. وَ كَنْ يِعَيُّرُوكُو، مَا تُرُدُّوا لَيْهُمْ بِمُعْيَارْ. لَاكِنْ بَارُكُوهُمْ، أَشَانْ اللّٰهْ نَادَاكُو فِي دَرْبَهْ لِتِبَارُكُوا النَّاسْ وَ تَوْرُثُوا بَرَكَةْ مِنْ اللّٰهْ. 10 وَ مَكْتُوبْ فِي الْكِتَابْ:
<أَيِّ نَادُمْ الْيِدَوْر يِعِيشْ أَيَّامْ سَعِيدِينْ
خَلِّي يَحْفَضْ لِسَانَهْ مِنْ الْكَلَامْ الْفَسِلْ
وَ خَشْمَهْ مِنْ الْكَلَامْ الْكِدِبْ
11 خَلِّي يِبَعِّدْ مِنْ الْفَسَالَةْ
وَ يِسَوِّي الْخَيْر.
خَلِّي يِفَتِّشْ السَّلَامْ
وَ يِتَابِعَهْ بِنِيَّةْ وَاحِدَةْ.
12 أَشَانْ عَيْن اللّٰهْ تِرَاقِبْ الصَّالِحِينْ
وَ هُو يَسْمَعْ صَلَاوَاتْهُمْ.
لَاكِنْ اللّٰهْ يُقُمّ
ضِدّ الْفَسْلِينْ.>
التعب في شان الخَيْر
13 وَ يَاتُو الْيِسَوِّي لَيْكُو شَيّءْ فَسِلْ، كَنْ إِنْتُو مُنْكَرِبِينْ فِي الْخَيْر؟ 14 وَ كَنْ يِتَعُّبُوكُو بِسَبَبْ إِنْتُو صَالِحِينْ كُلَ، إِنْتُو مُبَارَكِينْ. مَا تَخَافَوْا مِنْهُمْ وَ مَا تِبَرْجُلُوا. 15 لَاكِنْ خُطُّوا فِي قُلُوبْكُو كَدَرْ الْمَسِيحْ، هُو قُدُّوسْ وَ هُو رَبُّكُو. أَقْعُدُوا دَايْماً جَاهِزِينْ أَشَانْ تُرُدُّوا لِأَيِّ نَادُمْ الْيَطْلُبْ مِنْكُو دَلِيلْ هَنَا الْعَشَمْ الْعِنْدُكُو. 16 لَاكِنْ حَجُّوا لَيَّهْ بِنَفَسْ بَارِدْ وَ إِحْتِرَامْ. سَوُّوا كُلَّ شَيّءْ بِنِيَّةْ مُخْلِصَةْ. وَ بَيْدَا، الْعَيْب يِسَوِّيهُمْ لِلنَّاسْ الْيَتْهَمَوْكُو وَ يِعَيُّرُوكُو فِي شَانْ الْخَيْر التِّسَوُّوهْ فِي دَرِبْ الْمَسِيحْ. 17 وَ كَنْ اللّٰهْ يَنْطِي إِذِنْ لِلنَّاسْ أَشَانْ يِتَعُّبُوكُو، أَخَيْر يِتَعُّبُوكُو بِسَبَبْ الْخَيْر الْإِنْتُو سَوَّيْتُوهْ مِنْ يِتَعُّبُوكُو بِسَبَبْ إِنْتُو سَوَّيْتُوا فَسَالَةْ.
18 وَ الْمَسِيحْ كُلَ تِعِبْ تَعَبْ وَاحِدْ وَ نِهَائِي فِي شَانْ ذُنُوبْ النَّاسْ. الصَّالِحْ مَاتْ فِي شَانْ الْمُذْنِبِينْ وَ بَيْدَا، يِوَدِّيكُو كُلُّكُو فِي حَضَرَةْ اللّٰهْ. هُو كَتَلَوْه وَ مَاتْ مِثِلْ مَوْت النَّاسْ وَ اللّٰهْ حَيَّاهْ بِالرُّوحْ الْقُدُّوسْ.
19 وَ بِقُدْرَةْ الرُّوحْ الْقُدُّوسْ، هُو مَشَى وَ بَلَّغْ لِلْأَرْوَاحْ الْقَاعِدِينْ فِي السِّجِنْ. 20 زَمَانْ، الْأَرْوَاحْ دَوْل أَبَوْا مَا تَابَعَوْا كَلَامْ اللّٰهْ وَكِتْ اللّٰهْ الصَّبُورْ قَاعِدْ يَرْجَى لَحَدِّي نُوحْ يِكَمِّلْ السَّفِينَةْ. وَ نَاسْ شِيَّةْ بَسْ رِكْبَوْا فِي السَّفِينَةْ وَ عَدَدْهُمْ تَمَانَةْ وَ هُمَّنْ دَوْل نِجَوْا بِسَبَبْ الْأَلْمِي الرَّفَعْ السَّفِينَةْ. 21 وَ دَا مَثَلْ هَنَا الْغَطِّسِينْ الْهَسَّعْ يِنَجِّيكُو. وَ الْمُهِمّ فِي الْغَطِّسِينْ مَا غَسُولْ الْجِلِدْ مِنْ الْوَسَخْ لَاكِنْ هُو الْعَهَدْ التِّسَوُّوهْ مَعَ اللّٰهْ بِنِيَّةْ مُخْلِصَةْ. وَ الْغَطِّسِينْ يِنَجِّيكُو بِسَبَبْ بُعَاثْ عِيسَى الْمَسِيحْ.
22 وَ الْمَسِيحْ هُو الْمَشَى فَوْق فِي السَّمَاوَاتْ وَ هَسَّعْ قَاعِدْ جَنْب اللّٰهْ فِي نُصَّهْ الزَّيْنَايْ. وَ تِحْتَهْ الْمَلَائِكَةْ وَ حُكَّامْ وَ كُبَارَاتْ الْأَرْوَاحْ.
