Malammat Chakiim
1 Wa Rahabʼaam gamma macha hillit Chakiim achaan kulla Bani Israaʼiil gaaʼidiin yarjooh hinaak le yidarrujuuh malik. 2 Wa wakit Yarubaʼaam wileed Nabaat simiʼ al-khabar da, hu lissaaʼ gaaʼid fi Masir al-bakaan al-awwal hu arrad min al-malik Suleymaan. Wa gabbal min Masir. 3 Wa rassalo naadooh le Yarubaʼaam wa hu ja. Wa hu maʼa kulla Bani Israaʼiil gammo hajjo le Rahabʼaam wa gaalo leyah : 4 «Abuuk sawwaana misil abiid wa khatta foogna khidme gaasiye misil daami tagiil fi ragabatna. Wa hassaʼ, nidooru minnak inta tikhaffif leena tagalat al-daami al-abuuk khattaah foogna wa aniina nakhdumu tihtak.» 5 Wa Rahabʼaam gaal leehum : «Gabbulu wa baʼad talaata yoom taʼaalu leyi.» Wa khalaas, al-chaʼab gabbalo buyuuthum.
6 Wa l-malik Rahabʼaam chaawar al-chuyuukh al-awwal gaaʼidiin maʼa abuuh Suleymaan wakit hu hayy. Wa gaal leehum : «Chunu wasiiyitku leyi fi kalaam al-chaʼab da ?» 7 Wa l-chuyuukh raddo leyah wa gaalo : «Kan inta tabga zeen maʼa l-chaʼab wa tarda be kalaamhum wa turudd leehum be kalaam halu, khalaas humman yakhdumu daayman tihtak.»
8 Wa laakin Rahabʼaam aba wasiiyat al-chuyuukh al-antooha leyah. Wa hu chaawar al-subyaan al-kibro maʼaayah sawa wa gaaʼidiin yakhdumu leyah. 9 Wa hu saʼalaahum le l-subyaan dool wa gaal : «Chunu wasiiyitku fi l-chaʼab al-bidooru nikhaffif leehum tagalat al-daami al-abuuyi khattaah fooghum ?» 10 Wa l-subyaan al-kibro maʼaayah gaalo : «Al-chaʼab yachku kadar abuuk khatta fooghum daami tagiil wa yidooru inta tikhaffifah leehum. Wa daahu al-kalaam al-tuguulah leehum : ‹Usbaʼi al-sakhayyar da kabiir min sulub abuuyi. 11 Sahiih abuuyi khatta foogku daami tagiil wa laakin hassaʼ da, ana niziid foogku tagala aakhara ! Abuuyi jaladaaku be soot hana farwa wa laakin ana najlidku be soot al-indah hadiid misil danab al-agrab.›»
12 Wa baʼad talaata yoom, Yarubaʼaam wa kulla l-chaʼab gabbalo jo le Rahabʼaam misil hu gaalah leehum : «Gabbulu wa baʼad talaata yoom, taʼaalu leyi.» 13 Wa l-malik Rahabʼaam aba wasiiyat al-chuyuukh wa hajja le l-chaʼab be kalaam gawi. 14 Wa radda leehum hasab wasiiyat al-subyaan wa gaal leehum : «Abuuyi khatta foogku daami tagiil wa hassaʼ ana niziid foogku tagala aakhara. Abuuyi jaladaaku be soot hana farwa laakin ana najlidku be soot al-indah hadiid misil danab al-agrab.»
15 Wa l-malik ma simiʼ kalaam al-chaʼab. Wa da jaayi min al-Rabb achaan Allah dawwar yihaggig kalaamah al-gaalah le Yarubaʼaam wileed Nabaat be waasitat al-nabi Akhiiya al-min hillit Chiilooh.
Bani Israaʼiil bigo mamlakateen
16 Wa wakit kulla gabaayil Bani Israaʼiil chaafo kadar al-malik ma simiʼ kalaamhum da, gaalo leyah : «Chunu al-yilimmina maʼa zurriiyit Dawuud ? Aniina ma indina warasa maʼa iyaal Yassa ! Yalla, ya gabaayil Israaʼiil, khalli ayyi waahid yigabbil beetah ! Wa hassaʼ da, ya zurriiyit Dawuud, himmu be nufuusku.» Wa khalaas, kulla Bani Israaʼiil chatto wa gabbalo buyuuthum.
17 Wa be da, Rahabʼaam gaaʼid yahkim fi gabaayil Israaʼiil al-saakniin fi hillaal balad Yahuuza bas. 18 Wa l-malik Rahabʼaam rassal Aduraam muraakhib hana l-khidme al-ijbaariiye le gabaayil Bani Israaʼiil al-saakniin fi munchaakh al-balad. Laakin humman dool lammo foogah wa rajamooh wa maat. Wa l-malik Rahabʼaam zaatah yalla yalla rikib fi arabatah wa arrad macha Madiinat al-Khudus. 19 Wa be misil da, gabaayil Israaʼiil al-saakniin fi l-munchaakh atmarrado didd zurriiyit Dawuud lahaddi l-yoom.
ملمّة شَكِيم
1 وَ رَحَبْعَامْ قَمَّ مَشَى حِلَّةْ شَكِيمْ أَشَانْ كُلَّ بَنِي إِسْرَائِيلْ قَاعِدِينْ يَرْجَوْه هِنَاكْ لِيِدَرُّجُوهْ مَلِكْ. 2 وَ وَكِتْ يَرُبَعَامْ وِلَيْد نَبَاتْ سِمِعْ الْخَبَرْ دَا، هُو لِسَّاعْ قَاعِدْ فِي مَصِرْ الْبَكَانْ الْأَوَّلْ هُو عَرَّدْ مِنْ الْمَلِكْ سُلَيْمَانْ. وَ قَبَّلْ مِنْ مَصِرْ. 3 وَ رَسَّلَوْا نَادَوْه لِيَرُبَعَامْ وَ هُو جَاءْ. وَ هُو مَعَ كُلَّ بَنِي إِسْرَائِيلْ قَمَّوْا حَجَّوْا لِرَحَبْعَامْ وَ قَالَوْا لَيَّهْ: 4 «أَبُوكْ سَوَّانَا مِثِلْ عَبِيدْ وَ خَطَّ فَوْقنَا خِدْمَةْ قَاسِيَةْ مِثِلْ دَامِي تَقِيلْ فِي رَقَبَتْنَا. وَ هَسَّعْ، نِدَوْرُوا مِنَّكْ إِنْتَ تِخَفِّفْ لَيْنَا تَقَلَةْ الدَّامِي الْأَبُوكْ خَطَّاهْ فَوْقنَا وَ أَنِحْنَ نَخْدُمُوا تِحْتَكْ.» 5 وَ رَحَبْعَامْ قَالْ لَيْهُمْ: «قَبُّلُوا وَ بَعَدْ تَلَاتَةْ يَوْم تَعَالُوا لَيِّ.» وَ خَلَاصْ، الشَّعَبْ قَبَّلَوْا بُيُوتْهُمْ.
6 وَ الْمَلِكْ رَحَبْعَامْ شَاوَرْ الشُّيُوخْ الْأَوَّلْ قَاعِدِينْ مَعَ أَبُوهْ سُلَيْمَانْ وَكِتْ هُو حَيّ. وَ قَالْ لَيْهُمْ: «شُنُو وَصِيِّتْكُو لَيِّ فِي كَلَامْ الشَّعَبْ دَا؟» 7 وَ الشُّيُوخْ رَدَّوْا لَيَّهْ وَ قَالَوْا: «كَنْ إِنْتَ تَبْقَى زَيْن مَعَ الشَّعَبْ وَ تَرْضَى بِكَلَامْهُمْ وَ تُرُدّ لَيْهُمْ بِكَلَامْ حَلُو، خَلَاصْ هُمَّنْ يَخْدُمُوا دَايْماً تِحْتَكْ.»
8 وَ لَاكِنْ رَحَبْعَامْ أَبَى وَصِيَّةْ الشُّيُوخْ الْأَنْطَوْهَا لَيَّهْ. وَ هُو شَاوَرْ الصُّبْيَانْ الْكِبْرَوْا مَعَايَهْ سَوَا وَ قَاعِدِينْ يَخْدُمُوا لَيَّهْ. 9 وَ هُو سَأَلَاهُمْ لِلصُّبْيَانْ دَوْل وَ قَالْ: «شُنُو وَصِيِّتْكُو فِي الشَّعَبْ الْبِدَوْرُوا نِخَفِّفْ لَيْهُمْ تَقَلَةْ الدَّامِي الْأَبُويِ خَطَّاهْ فَوْقهُمْ؟» 10 وَ الصُّبْيَانْ الْكِبْرَوْا مَعَايَهْ قَالَوْا: «الشَّعَبْ يَشْكُوا كَدَرْ أَبُوكْ خَطَّ فَوْقهُمْ دَامِي تَقِيلْ وَ يِدَوْرُوا إِنْتَ تِخَفِّفَهْ لَيْهُمْ. وَ دَاهُو الْكَلَامْ التُّقُولَهْ لَيْهُمْ: ‹أُصْبَعِي الصَّغَيَّرْ دَا كَبِيرْ مِنْ صُلُبْ أَبُويِ. 11 صَحِيحْ أَبُويِ خَطَّ فَوْقكُو دَامِي تَقِيلْ وَ لَاكِنْ هَسَّعْ دَا، أَنَا نِزِيدْ فَوْقكُو تَقَلَةْ آخَرَةْ! أَبُويِ جَلَدَاكُو بِسَوْط هَنَا فَرْوَةْ وَ لَاكِنْ أَنَا نَجْلِدْكُو بِسَوْط الْعِنْدَهْ حَدِيدْ مِثِلْ دَنَبْ الْعَقْرَبْ.›»
12 وَ بَعَدْ تَلَاتَةْ يَوْم، يَرُبَعَامْ وَ كُلَّ الشَّعَبْ قَبَّلَوْا جَوْا لِرَحَبْعَامْ مِثِلْ هُو قَالَهْ لَيْهُمْ: «قَبُّلُوا وَ بَعَدْ تَلَاتَةْ يَوْم، تَعَالُوا لَيِّ.» 13 وَ الْمَلِكْ رَحَبْعَامْ أَبَى وَصِيَّةْ الشُّيُوخْ وَ حَجَّى لِلشَّعَبْ بِكَلَامْ قَوِي. 14 وَ رَدَّ لَيْهُمْ حَسَبْ وَصِيَّةْ الصُّبْيَانْ وَ قَالْ لَيْهُمْ: «أَبُويِ خَطَّ فَوْقكُو دَامِي تَقِيلْ وَ هَسَّعْ أَنَا نِزِيدْ فَوْقكُو تَقَلَةْ آخَرَةْ. أَبُويِ جَلَدَاكُو بِسَوْط هَنَا فَرْوَةْ لَاكِنْ أَنَا نَجْلِدْكُو بِسَوْط الْعِنْدَهْ حَدِيدْ مِثِلْ دَنَبْ الْعَقْرَبْ.»
15 وَ الْمَلِكْ مَا سِمِعْ كَلَامْ الشَّعَبْ. وَ دَا جَايِ مِنْ الرَّبّ أَشَانْ اللّٰهْ دَوَّرْ يِحَقِّقْ كَلَامَهْ الْقَالَهْ لِيَرُبَعَامْ وِلَيْد نَبَاتْ بِوَاسِطَةْ النَّبِي أَخِيَّا الْمِنْ حِلَّةْ شِيلَوْه.
بني إسرائيل بِقوا ممْلكتَيْن
16 وَ وَكِتْ كُلَّ قَبَايِلْ بَنِي إِسْرَائِيلْ شَافَوْا كَدَرْ الْمَلِكْ مَا سِمِعْ كَلَامْهُمْ دَا، قَالَوْا لَيَّهْ: «شُنُو الْيِلِمِّنَا مَعَ ذُرِّيَّةْ دَاوُدْ؟ أَنِحْنَ مَا عِنْدِنَا وَرَثَةْ مَعَ عِيَالْ يَسَّى! يَلَّا، يَا قَبَايِلْ إِسْرَائِيلْ، خَلِّي أَيِّ وَاحِدْ يِقَبِّلْ بَيْتَهْ! وَ هَسَّعْ دَا، يَا ذُرِّيَّةْ دَاوُدْ، هِمُّوا بِنُفُوسْكُو.» وَ خَلَاصْ، كُلَّ بَنِي إِسْرَائِيلْ شَتَّوْا وَ قَبَّلَوْا بُيُوتْهُمْ.
17 وَ بَيْدَا، رَحَبْعَامْ قَاعِدْ يَحْكِمْ فِي قَبَايِلْ إِسْرَائِيلْ السَّاكْنِينْ فِي حِلَّالْ بَلَدْ يَهُوذَا بَسْ. 18 وَ الْمَلِكْ رَحَبْعَامْ رَسَّلْ أَدُرَامْ مُرَاقِبْ هَنَا الْخِدْمَةْ الْإِجْبَارِيَّةْ لِقَبَايِلْ بَنِي إِسْرَائِيلْ السَّاكْنِينْ فِي مُنْشَاقْ الْبَلَدْ. لَاكِنْ هُمَّنْ دَوْل لَمَّوْا فَوْقَهْ وَ رَجَمَوْه وَ مَاتْ. وَ الْمَلِكْ رَحَبْعَامْ ذَاتَهْ يَلَّا يَلَّا رِكِبْ فِي عَرَبَتَهْ وَ عَرَّدْ مَشَى مَدِينَةْ الْقُدُسْ. 19 وَ بِمِثِلْ دَا، قَبَايِلْ إِسْرَائِيلْ السَّاكْنِينْ فِي الْمُنْشَاقْ أَتْمَرَّدَوْا ضِدّ ذُرِّيَّةْ دَاوُدْ لَحَدِّي الْيَوْم.
