Al-zanib wa churuut al-Tawraat
1 Ya akhwaani, intu al-nihajji leeku taʼarfu churuut al-Tawraat. Wa akiid taʼarfu kadar churuut al-Tawraat induhum gudra fi l-naadum wakit hu hayy bas. 2 Masalan, al-mara al-maakhde marbuuta maʼa raajilha be churuut al-Tawraat wakit hu hayy. Laakin kan raajilha maat, al-mara tabga hurra min rubaat churuut al-Tawraat. 3 Wa be misil da, kan machat akhadat raajil aakhar wakit raajilha lissaaʼ gaaʼid hayy, churuut al-Tawraat tuguul hi zaaniye. Laakin kan raajilha maat, hi tabga hurra min al-churuut dool. Wa kan tamchi taakhud raajil aakhar kula, al-chariiʼa ma tuguul hi zaaniye.
4 Ya akhwaani, intu kula bigi leeku misil da. Wakit katalo al-Masiih, intu muttu maʼaayah fi jismah wa bigiitu hurriin min churuut al-Tawraat. Wa be da, tabgo hana sayyid aakhar wa hu al-naadum al-baʼas min ust al-maytiin. Wa khalaas, kullina nisawwu al-kheer al-Allah yidoorah. 5 Achaan wakit aniina lissaaʼna aaychiin fi tabiiʼitna al-insaaniiye bas, churuut al-Tawraat sabbabo fi ajsaamna al-chahwaat al-yiwadduuna le l-zanib. Wa l-chahwaat dool lazzoona le nisawwu al-cheyy al-yiwaddiina le l-moot. 6 Laakin hassaʼ aniina hurriin min churuut al-Tawraat achaan mutna maʼa l-Masiih wa mutna le l-karabaana masaajiin. Wa be misil da, naʼabudu Allah ma be l-ibaada al-gadiime hasab al-kalaam al-maktuub, laakin be gudrat al-Ruuh al-Khudduus fi l-haya al-jadiide.
7 Wa kan nuguulu churuut al-Tawraat sabbabo foogna zunuub, fi l-kalaam da nuguulu al-Tawraat wa l-zunuub humman sawa walla ? La ! Achaan awwal ana ma irift al-zanib laakin al-Tawraat bas arrafaani beyah. Awwal kan al-Tawraat ma gaal : <Ma tatmaʼ>, ana ma naʼarif al-tamaʼ. 8 Laakin al-zanib ligi fursa be l-wasiiye wa sabbab foogi kulli nafar hana l-tamaʼ. Achaan kan al-Tawraat ma fiih, al-zanib mayyit. 9 Awwal ana hayy wa ma irift churuut al-Tawraat laakin al-wasiiye jaat leyi wa l-zanib hiyi foogi 10 wa khalaas ana mutt. Wa be misil da, al-wasiiye al-dawwarat tiwaddiini le l-haya, waddatni le l-moot. 11 Achaan al-zanib ligi fursa be jayyit al-wasiiye wa gamma khachchaani wa karab al-wasiiye achaan yaktulni beeha. 12 Wa misil da khalaas, churuut al-Tawraat mukhaddasiin wa l-wasiiye mukhaddasa wa saalhe wa adiile.
13 Wa be misil da, al-cheyy al-adiil katalaani walla ? La ! Laakin al-zanib karab al-cheyy al-adiil wa beyah sabbab leyi al-moot wa l-zanib yinʼarif. Wa be l-wasiiye bas, charr al-zanib yinʼarif marra waahid. 14 Naʼarfu kadar churuut al-Tawraat jaayiin min Allah, laakin ana insaani bas. Ana misil abid wa l-zanib hu misil siidi. 15 Sahiih, ana ma nafham al-cheyy al-nisawwiih achaan al-cheyy al-ana nidoor nisawwiih, da ma nisawwiih. Laakin al-cheyy al-ma niriidah, da bas al-cheyy al-nisawwiih. 16 Wa kan ana gaaʼid nisawwi al-cheyy al-fi nafsi ma nidoor nisawwiih, misil da ana nistafig maʼa churuut al-Tawraat wa nuguul humman adiiliin wa induhum al-sahiih. 17 Wa be da, ana ma al-naadum al-yisawwi al-fiʼil da. Al-yisawwi al-fiʼil, hu al-zanib al-gaaʼid foogi.
18 Naʼarif ma fi cheyy adiil gaaʼid foogi, yaʼni fi tabiiʼti al-insaaniiye. Indi niiye nisawwi al-kheer laakin ma nagdar. 19 Ma nisawwi al-kheer al-nidoor nisawwiih laakin al-fasaala al-ma nidoor nisawwiiha, di bas al-cheyy al-nisawwiih. 20 Wa kan ana gaaʼid nisawwi al-cheyy al-ma nidoor nisawwiih, be misil da al-bisawwiih ma ana laakin hu al-zanib al-gaaʼid foogi.
21 Wa khalaas, daahu al-cheyy al-daayman bigi leyi. Kan nidoor nisawwi al-kheer, al-fasaala bas taji leyi. 22 Fi galbi, ana niriid wasaaya Allah 23 laakin nihiss fi nafsi cheyy aakhar al-gaaʼid fi jismi al-yidoor yamlukni wa hu yidaawis maʼa fikri. Wa khalaas, ana bigiit masjuun tihit muluk al-zanib al-gaaʼid fi jismi. 24 Ya ana al-taʼbaan ! Yaatu al-yafzaʼni min jismi al-yiwaddiini le l-moot ? 25 Illa Allah yinajjiini be Rabbina Isa al-Masiih wa l-hamdulillah. Wa khalaas, be misil da be agli ana abd Allah wa nidoor nitaabiʼ wasiiyaatah. Laakin be tabiiʼti al-insaaniiye, ana kula abid le l-zanib wa nitaabiʼ hasab al-yidoorah al-zanib achaan ana insaan bas.
الذنِب و شُروط التَوْراة
1 يَا أَخْوَانِي، إِنْتُو النِّحَجِّي لَيْكُو تَعَرْفُوا شُرُوطْ التَّوْرَاةْ. وَ أَكِيدْ تَعَرْفُوا كَدَرْ شُرُوطْ التَّوْرَاةْ عِنْدُهُمْ قُدْرَةْ فِي النَّادُمْ وَكِتْ هُو حَيّ بَسْ. 2 مَثَلاً، الْمَرَةْ الْمَاخْدَةْ مَرْبُوطَةْ مَعَ رَاجِلْهَا بِشُرُوطْ التَّوْرَاةْ وَكِتْ هُو حَيّ. لَاكِنْ كَنْ رَاجِلْهَا مَاتْ، الْمَرَةْ تَبْقَى حُرَّةْ مِنْ رُبَاطْ شُرُوطْ التَّوْرَاةْ. 3 وَ بِمِثِلْ دَا، كَنْ مَشَتْ أَخَدَتْ رَاجِلْ آخَرْ وَكِتْ رَاجِلْهَا لِسَّاعْ قَاعِدْ حَيّ، شُرُوطْ التَّوْرَاةْ تُقُولْ هِي زَانِيَةْ. لَاكِنْ كَنْ رَاجِلْهَا مَاتْ، هِي تَبْقَى حُرَّةْ مِنْ الشُّرُوطْ دَوْل. وَ كَنْ تَمْشِي تَاخُدْ رَاجِلْ آخَرْ كُلَ، الشَّرِيعَةْ مَا تُقُولْ هِي زَانِيَةْ.
4 يَا أَخْوَانِي، إِنْتُو كُلَ بِقِي لَيْكُو مِثِلْ دَا. وَكِتْ كَتَلَوْا الْمَسِيحْ، إِنْتُو مُتُّوا مَعَايَهْ فِي جِسْمَهْ وَ بِقِيتُوا حُرِّينْ مِنْ شُرُوطْ التَّوْرَاةْ. وَ بَيْدَا، تَبْقَوْا هَنَا سَيِّدْ آخَرْ وَ هُو النَّادُمْ الْبَعَثْ مِنْ أُسْط الْمَيْتِينْ. وَ خَلَاصْ، كُلِّنَا نِسَوُّوا الْخَيْر الْاللّٰهْ يِدَوْرَهْ. 5 أَشَانْ وَكِتْ أَنِحْنَ لِسَّاعْنَا عَايْشِينْ فِي طَبِيعِتْنَا الْإِنْسَانِيَّةْ بَسْ، شُرُوطْ التَّوْرَاةْ سَبَّبَوْا فِي أَجْسَامْنَا الشَّهْوَاتْ الْيِوَدُّونَا لِلذَّنِبْ. وَ الشَّهْوَاتْ دَوْل لَزَّوْنَا لِنِسَوُّوا الشَّيّءْ الْيِوَدِّينَا لِلْمَوْت. 6 لَاكِنْ هَسَّعْ أَنِحْنَ حُرِّينْ مِنْ شُرُوطْ التَّوْرَاةْ أَشَانْ مُتْنَا مَعَ الْمَسِيحْ وَ مُتْنَا لِلْكَرَبَانَا مَسَاجِينْ. وَ بِمِثِلْ دَا، نَعَبُدُوا اللّٰهْ مَا بِالْعِبَادَةْ الْقَدِيمَةْ حَسَبْ الْكَلَامْ الْمَكْتُوبْ، لَاكِنْ بِقُدْرَةْ الرُّوحْ الْقُدُّوسْ فِي الْحَيَاةْ الْجَدِيدَةْ.
7 وَ كَنْ نُقُولُوا شُرُوطْ التَّوْرَاةْ سَبَّبَوْا فَوْقنَا ذُنُوبْ، فِي الْكَلَامْ دَا نُقُولُوا التَّوْرَاةْ وَ الذُّنُوبْ هُمَّنْ سَوَا وَلَّا؟ لَا! أَشَانْ أَوَّلْ أَنَا مَا عِرِفْت الذَّنِبْ لَاكِنْ التَّوْرَاةْ بَسْ عَرَّفَانِي بَيَّهْ. أَوَّلْ كَنْ التَّوْرَاةْ مَا قَالْ: <مَا تَطْمَعْ>، أَنَا مَا نَعَرِفْ الطَّمَعْ. 8 لَاكِنْ الذَّنِبْ لِقِي فُرْصَةْ بِالْوَصِيَّةْ وَ سَبَّبْ فَوْقِي كُلِّ نَفَرْ هَنَا الطَّمَعْ. أَشَانْ كَنْ التَّوْرَاةْ مَا فِيهْ، الذَّنِبْ مَيِّتْ. 9 أَوَّلْ أَنَا حَيّ وَ مَا عِرِفْت شُرُوطْ التَّوْرَاةْ لَاكِنْ الْوَصِيَّةْ جَاتْ لَيِّ وَ الذَّنِبْ حِيِي فَوْقِي 10 وَ خَلَاصْ أَنَا مُتّْ. وَ بِمِثِلْ دَا، الْوَصِيَّةْ الدَّوَّرَتْ تِوَدِّينِي لِلْحَيَاةْ، وَدَّتْنِي لِلْمَوْت. 11 أَشَانْ الذَّنِبْ لِقِي فُرْصَةْ بِجَيَّةْ الْوَصِيَّةْ وَ قَمَّ غَشَّانِي وَ كَرَبْ الْوَصِيَّةْ أَشَانْ يَكْتُلْنِي بَيْهَا. 12 وَ مِثِلْ دَا خَلَاصْ، شُرُوطْ التَّوْرَاةْ مُقَدَّسِينْ وَ الْوَصِيَّةْ مُقَدَّسَةْ وَ صَالْحَةْ وَ عَدِيلَةْ.
13 وَ بِمِثِلْ دَا، الشَّيّءْ الْعَدِيلْ كَتَلَانِي وَلَّا؟ لَا! لَاكِنْ الذَّنِبْ كَرَبْ الشَّيّءْ الْعَدِيلْ وَ بَيَّهْ سَبَّبْ لَيِّ الْمَوْت وَ الذَّنِبْ يِنْعَرِفْ. وَ بِالْوَصِيَّةْ بَسْ، شَرّ الذَّنِبْ يِنْعَرِفْ مَرَّةْ وَاحِدْ. 14 نَعَرْفُوا كَدَرْ شُرُوطْ التَّوْرَاةْ جَايِينْ مِنْ اللّٰهْ، لَاكِنْ أَنَا إِنْسَانِي بَسْ. أَنَا مِثِلْ عَبِدْ وَ الذَّنِبْ هُو مِثِلْ سِيدِي. 15 صَحِيحْ، أَنَا مَا نَفْهَمْ الشَّيّءْ النِّسَوِّيهْ أَشَانْ الشَّيّءْ الْأَنَا نِدَوْر نِسَوِّيهْ، دَا مَا نِسَوِّيهْ. لَاكِنْ الشَّيّءْ الْمَا نِرِيدَهْ، دَا بَسْ الشَّيّءْ النِّسَوِّيهْ. 16 وَ كَنْ أَنَا قَاعِدْ نِسَوِّي الشَّيّءْ الْفِي نَفْسِي مَا نِدَوْر نِسَوِّيهْ، مِثِلْ دَا أَنَا نِسْتَفِقْ مَعَ شُرُوطْ التَّوْرَاةْ وَ نُقُولْ هُمَّنْ عَدِيلِينْ وَ عِنْدُهُمْ الصَّحِيحْ. 17 وَ بَيْدَا، أَنَا مَا النَّادُمْ الْيِسَوِّي الْفِعِلْ دَا. الْيِسَوِّي الْفِعِلْ، هُو الذَّنِبْ الْقَاعِدْ فَوْقِي.
18 نَعَرِفْ مَا فِي شَيّءْ عَدِيلْ قَاعِدْ فَوْقِي، يَعْنِي فِي طَبِيعْتِي الْإِنْسَانِيَّةْ. عِنْدِي نِيَّةْ نِسَوِّي الْخَيْر لَاكِنْ مَا نَقْدَرْ. 19 مَا نِسَوِّي الْخَيْر النِّدَوْر نِسَوِّيهْ لَاكِنْ الْفَسَالَةْ الْمَا نِدَوْر نِسَوِّيهَا، دِي بَسْ الشَّيّءْ النِّسَوِّيهْ. 20 وَ كَنْ أَنَا قَاعِدْ نِسَوِّي الشَّيّءْ الْمَا نِدَوْر نِسَوِّيهْ، بِمِثِلْ دَا الْبِسَوِّيهْ مَا أَنَا لَاكِنْ هُو الذَّنِبْ الْقَاعِدْ فَوْقِي.
21 وَ خَلَاصْ، دَاهُو الشَّيّءْ الدَّايْماً بِقِي لَيِّ. كَنْ نِدَوْر نِسَوِّي الْخَيْر، الْفَسَالَةْ بَسْ تَجِي لَيِّ. 22 فِي قَلْبِي، أَنَا نِرِيدْ وَصَايَا اللّٰهْ 23 لَاكِنْ نِحِسّ فِي نَفْسِي شَيّءْ آخَرْ الْقَاعِدْ فِي جِسْمِي الْيِدَوْر يَمْلُكْنِي وَ هُو يِدَاوِسْ مَعَ فِكْرِي. وَ خَلَاصْ، أَنَا بِقِيتْ مَسْجُونْ تِحِتْ مُلُكْ الذَّنِبْ الْقَاعِدْ فِي جِسْمِي. 24 يَا أَنَا التَّعْبَانْ! يَاتُو الْيَفْزَعْنِي مِنْ جِسْمِي الْيِوَدِّينِي لِلْمَوْت؟ 25 إِلَّا اللّٰهْ يِنَجِّينِي بِرَبِّنَا عِيسَى الْمَسِيحْ وَ الْحَمْدُ للّٰهْ. وَ خَلَاصْ، بِمِثِلْ دَا بِعَقْلِي أَنَا عَبْد اللّٰهْ وَ نِدَوْر نِتَابِعْ وَصِيَّاتَهْ. لَاكِنْ بِطَبِيعْتِي الْإِنْسَانِيَّةْ، أَنَا كُلَ عَبِدْ لِلذَّنِبْ وَ نِتَابِعْ حَسَبْ الْيِدَوْرَهْ الذَّنِبْ أَشَانْ أَنَا إِنْسَانْ بَسْ.
