Al-haal al-saalhe
1 Ya akhwaani, asmaʼo kalaami battaan. Awwal allamtu minnina al-haal al-waajbe achaan Allah yarda beeku. Wa khalaas intu maachiin adiil. Wa achaan da, nachhadooku wa niwassuuku be usum al-Rabb Isa achaan tamchu adiil be ziyaada. 2 Taʼarfu al-wasaaya al-anteenaahum leeku be usum Rabbina Isa.
3 Al-cheyy al-Allah yidoorah leeku hu al-haal al-saalhe. Ma tigarrubu le l-zina. 4 Hu yidoor ayyi naadum yaʼarif kikkeef yamluk nafsah be haal saalhe al-indaha ikraam. 5 Ma tikhallu chahwaatku yamulku foogku. Ma tabgo misil al-naas al-ma muʼminiin al-ma yaʼarfu Allah. 6 Fi l-kalaam da, khalli naadum ma yakhta fi akhuuh wa la yukhuchchah achaan hazzarnaaku min awwal be kalaam waadih, Allah yiʼaakhib al-naas al-yisawwu kulla l-zunuub al-misil dool. 7 Achaan Allah ma naadaana le l-fasaad. Allah naadaana le nabgo saalihiin. 8 Wa achaan da, ayyi naadum al-yaaba al-kalaam da, ma yaaba kalaam insaani bas laakin yaaba kalaam Allah al-nazzal foogku al-Ruuh al-Khudduus.
9 Wa akiid, Allah zaatah allamaaku kadar waajib tirraayado ambeenaatku. Wa achaan da, intu ma hawjaaniin aniina naktubu leeku fi l-mahabba al-akhawiiye. 10 Wa da bas al-intu gaaʼidiin tisawwuuh achaan tihibbu kulla l-akhwaan al-fi balad Magiduuniya. Laakin ya akhwaani, niwassuuku achaan tirraayado be ziyaada battaan.
11 Chiilu niiye achaan tiʼiichu be haal haadiye. Wa ma tadkhulu fi chuʼuun al-naas. Akhdumu be duraaʼku misil aniina wasseenaaku beyah. 12 Kan intu gaaʼidiin tisawwu misil da, al-naas al-ma muʼminiin yikarrumuuku wa intu ma tihtaajo le cheyy min ayyi naadum.
Buʼaas al-muʼminiin
13 Ya akhwaani, nidooru niʼooruuku be haalat al-muʼminiin al-atwaffo achaan ma tahzano misil al-naas al-ma induhum acham fi Rabbina. 14 Aamanna kadar Isa maat wa baʼas. Wa achaan da, waajib niʼaamunu kadar yoom Isa yaji, Allah yabʼas al-muʼminiin al-maato wa yijiibhum maʼaayah.
15 Wa hasab al-kalaam al-Rabbina zaatah ooraana beyah, nuguulu leeku kadar aniina al-hayyiin fi yoom jayyit al-Rabb, abadan ma nigaddumu le akhwaanna al-maato khalaas. 16 Achaan al-Rabb Isa zaatah yanzil min al-sama wa yaamur be hiss aali. Wa hiss hana kabiir al-malaaʼika yinsamiʼ wa maʼaayah hiss hana burunji Allah. Wa awwal cheyy, al-muʼminiin be l-Masiih al-maytiin yabʼaso. 17 Wa baʼad da, aniina al-hayyiin al-lissaaʼna ma mutna, Allah yarfaʼna maʼaahum sawa fi l-sahaab wa nilimmu maʼa l-Rabb foog fi l-sama. Wa khalaas, nagoodu daayman maʼa l-Rabb. 18 Achaan da, achchaajaʼo ambeenaatku be l-kalaam da.
الحال الصالْحة
1 يَا أَخْوَانِي، أَسْمَعَوْا كَلَامِي بَتَّانْ. أَوَّلْ عَلَّمْتُوا مِنِّنَا الْحَالْ الْوَاجْبَةْ أَشَانْ اللّٰهْ يَرْضَى بَيْكُو. وَ خَلَاصْ إِنْتُو مَاشِينْ عَدِيلْ. وَ أَشَانْ دَا، نَشْحَدَوْكُو وَ نِوَصُّوكُو بِأُسُمْ الرَّبّ عِيسَى أَشَانْ تَمْشُوا عَدِيلْ بِزِيَادَةْ. 2 تَعَرْفُوا الْوَصَايَا الْأَنْطَيْنَاهُمْ لَيْكُو بِأُسُمْ رَبِّنَا عِيسَى.
3 الشَّيّءْ الْاللّٰهْ يِدَوْرَهْ لَيْكُو هُو الْحَالْ الصَّالْحَةْ. مَا تِقَرُّبُوا لِلزِّنَى. 4 هُو يِدَوْر أَيِّ نَادُمْ يَعَرِفْ كِكَّيْف يَمْلُكْ نَفْسَهْ بِحَالْ صَالْحَةْ الْعِنْدَهَا إِكْرَامْ. 5 مَا تِخَلُّوا شَهْوَاتْكُو يَمُلْكُوا فَوْقكُو. مَا تَبْقَوْا مِثِلْ النَّاسْ الْمَا مُؤمِنِينْ الْمَا يَعَرْفُوا اللّٰهْ. 6 فِي الْكَلَامْ دَا، خَلِّي نَادُمْ مَا يَخْطَا فِي أَخُوهْ وَ لَا يُغُشَّهْ أَشَانْ حَذَّرْنَاكُو مِنْ أَوَّلْ بِكَلَامْ وَاضِحْ، اللّٰهْ يِعَاقِبْ النَّاسْ الْيِسَوُّوا كُلَّ الذُّنُوبْ الْمِثِلْ دَوْل. 7 أَشَانْ اللّٰهْ مَا نَادَانَا لِلْفَسَادْ. اللّٰهْ نَادَانَا لِنَبْقَوْا صَالِحِينْ. 8 وَ أَشَانْ دَا، أَيِّ نَادُمْ الْيَابَى الْكَلَامْ دَا، مَا يَابَى كَلَامْ إِنْسَانِي بَسْ لَاكِنْ يَابَى كَلَامْ اللّٰهْ النَّزَّلْ فَوْقكُو الرُّوحْ الْقُدُّوسْ.
9 وَ أَكِيدْ، اللّٰهْ ذَاتَهْ عَلَّمَاكُو كَدَرْ وَاجِبْ تِرَّايَدَوْا أَمْبَيْنَاتْكُو. وَ أَشَانْ دَا، إِنْتُو مَا حَوْجَانِينْ أَنِحْنَ نَكْتُبُوا لَيْكُو فِي الْمَحَبَّةْ الْأَخَوِيَّةْ. 10 وَ دَا بَسْ الْإِنْتُو قَاعِدِينْ تِسَوُّوهْ أَشَانْ تِحِبُّوا كُلَّ الْأَخْوَانْ الْفِي بَلَدْ مَقِدُونِيَةْ. لَاكِنْ يَا أَخْوَانِي، نِوَصُّوكُو أَشَانْ تِرَّايَدَوْا بِزِيَادَةْ بَتَّانْ.
11 شِيلُوا نِيَّةْ أَشَانْ تِعِيشُوا بِحَالْ هَادِيَةْ. وَ مَا تَدْخُلُوا فِي شُؤُونْ النَّاسْ. أَخْدُمُوا بِدُرَاعْكُو مِثِلْ أَنِحْنَ وَصَّيْنَاكُو بَيَّهْ. 12 كَنْ إِنْتُو قَاعِدِينْ تِسَوُّوا مِثِلْ دَا، النَّاسْ الْمَا مُؤمِنِينْ يِكَرُّمُوكُو وَ إِنْتُو مَا تِحْتَاجَوْا لِشَيّءْ مِنْ أَيِّ نَادُمْ.
بُعاث المُؤمِنين
13 يَا أَخْوَانِي، نِدَوْرُوا نِأَوْرُوكُو بِحَالَةْ الْمُؤمِنِينْ الْأَتْوَفَّوْا أَشَانْ مَا تَحْزَنَوْا مِثِلْ النَّاسْ الْمَا عِنْدُهُمْ عَشَمْ فِي رَبِّنَا. 14 آمَنَّا كَدَرْ عِيسَى مَاتْ وَ بَعَثْ. وَ أَشَانْ دَا، وَاجِبْ نِآمُنُوا كَدَرْ يَوْم عِيسَى يَجِي، اللّٰهْ يَبْعَثْ الْمُؤمِنِينْ الْمَاتَوْا وَ يِجِيبْهُمْ مَعَايَهْ.
15 وَ حَسَبْ الْكَلَامْ الرَّبِّنَا ذَاتَهْ أَوْرَانَا بَيَّهْ، نُقُولُوا لَيْكُو كَدَرْ أَنِحْنَ الْحَيِّينْ فِي يَوْم جَيَّةْ الرَّبّ، أَبَداً مَا نِقَدُّمُوا لِأَخْوَانَّا الْمَاتَوْا خَلَاصْ. 16 أَشَانْ الرَّبّ عِيسَى ذَاتَهْ يَنْزِلْ مِنْ السَّمَاءْ وَ يَامُرْ بِحِسّ عَالِي. وَ حِسّ هَنَا كَبِيرْ الْمَلَائِكَةْ يِنْسَمِعْ وَ مَعَايَهْ حِسّ هَنَا بُرُنْجِي اللّٰهْ. وَ أَوَّلْ شَيّءْ، الْمُؤمِنِينْ بِالْمَسِيحْ الْمَيْتِينْ يَبْعَثَوْا. 17 وَ بَعَدْ دَا، أَنِحْنَ الْحَيِّينْ اللِّسَّاعْنَا مَا مُتْنَا، اللّٰهْ يَرْفَعْنَا مَعَاهُمْ سَوَا فِي السَّحَابْ وَ نِلِمُّوا مَعَ الرَّبّ فَوْق فِي السَّمَاءْ. وَ خَلَاصْ، نَقْعُدُوا دَايْماً مَعَ الرَّبّ. 18 أَشَانْ دَا، أَشَّاجَعَوْا أَمْبَيْنَاتْكُو بِالْكَلَامْ دَا.
