Al-rasuul hazzar al-muʼminiin
1 Wa hassaʼ da, namchi leeku taalit marra. Wa da yabga misil al-cheyy al-maktuub fi l-Kitaab : <Wa l-tuhma ma tasbit illa be chahaada hana naas itneen aw talaata.> 2 Wa l-cheyy al-ana gultah wakit ana gaaʼid maʼaaku al-marra al-taaniye, nuguulah leeku battaan hassaʼ wakit ana khaayib minku. Ana gult le l-naas al-aznabo wa le kulla l-aakhariin kan najiiku battaan, ma nihajji leehum be nafas baarid.
3 Tidooru al-daliil al-yiwassif kadar al-Masiih yihajji leeku be waasitati ana wa daahu ana niwassifah leeku. Al-Masiih ma daʼiif fi l-cheyy al-yisawwiih leeku wa akiid hu yiwassif gudurtah fi usutku. 4 Sahiih, al-Masiih khalla minnah al-gudra wa maat fi l-saliib laakin hu hayy be gudrat Allah. Wa fi alaakhitna maʼaayah, aniina ma indina gudra laakin nahyo maʼaayah be gudrat Allah. Wa l-gudra di, aniina niwassufuuha leeku.
5 Asʼalo nufuusku. Hal be l-sahiih ke intu muʼminiin ? Jarrubu nufuusku. Ma taʼarfu kadar Isa al-Masiih gaaʼid fiiku walla ? Wa da yabga sahiih kan ma fachaltu marra waahid. 6 Wa nitmanna taʼarfu aniina ma fachalna.
7 Wa nasʼalo Allah achaan intu ma tisawwu ayyi khata. Wa suʼaalna da, ma achaan al-naas yichiifu najaahna laakin achaan intu tisawwu al-kheer, hatta kan naas waahidiin yuguulu aniina fachalna kula. 8 Achaan aniina ma nagdaro nisawwu cheyy didd al-hagg. La ! Illa le l-hagg. 9 Wa kan aniina ma indina gudra wa intu bas induku, khalaas aniina farhaaniin. Wa nasʼalo Allah leeku achaan intu tabgo muʼminiin kaamiliin. 10 Wa khalaas, naktib leeku al-kalaam da wakit ana khaayib minku achaan wakit ana gaaʼid maʼaaku, ma waajib leyi nahrijku. Achaan al-sulta al-Rabbina antaani foogku, hi le nigawwiiku fi l-iimaan wa ma le nikharribku.
Nihaayat al-jawaab
11 Wa khalaas ya akhwaani, afraho. Abgo muʼminiin kaamiliin. Achchaajaʼo ambeenaatku. Khalli fikirku yabga waahid. Iichu be l-salaam wa Allah siid al-mahabba wa l-salaam yagood maʼaaku. 12 Assaalamo ambeenaatku be salaam al-saalihiin. 13 Kulla l-akhwaan al-saalihiin al-maʼaayi yisallumuuku. 14 Khalli rahmat Rabbina Isa al-Masiih wa mahabbat Allah wa l-khuuwa al-jaaye min al-Ruuh al-Khudduus yagoodu saabtiin foogku kulluku.
الرسول حذّر المُؤمِنين
1 وَ هَسَّعْ دَا، نَمْشِي لَيْكُو تَالِتْ مَرَّةْ. وَ دَا يَبْقَى مِثِلْ الشَّيّءْ الْمَكْتُوبْ فِي الْكِتَابْ: <وَ التُّهْمَةْ مَا تَثْبِتْ إِلَّا بِشَهَادَةْ هَنَا نَاسْ إِتْنَيْن أَوْ تَلَاتَةْ.> 2 وَ الشَّيّءْ الْأَنَا قُلْتَهْ وَكِتْ أَنَا قَاعِدْ مَعَاكُو الْمَرَّةْ التَّانِيَةْ، نُقُولَهْ لَيْكُو بَتَّانْ هَسَّعْ وَكِتْ أَنَا غَايِبْ مِنْكُو. أَنَا قُلْت لِلنَّاسْ الْأَذْنَبَوْا وَ لِكُلَّ الْآخَرِينْ كَنْ نَجِيكُو بَتَّانْ، مَا نِحَجِّي لَيْهُمْ بِنَفَسْ بَارِدْ.
3 تِدَوْرُوا الدَّلِيلْ الْيِوَصِّفْ كَدَرْ الْمَسِيحْ يِحَجِّي لَيْكُو بِوَاسِطَتِي أَنَا وَ دَاهُو أَنَا نِوَصِّفَهْ لَيْكُو. الْمَسِيحْ مَا ضَعِيفْ فِي الشَّيّءْ الْيِسَوِّيهْ لَيْكُو وَ أَكِيدْ هُو يِوَصِّفْ قُدُرْتَهْ فِي أُسُطْكُو. 4 صَحِيحْ، الْمَسِيحْ خَلَّى مِنَّهْ الْقُدْرَةْ وَ مَاتْ فِي الصَّلِيبْ لَاكِنْ هُو حَيّ بِقُدْرَةْ اللّٰهْ. وَ فِي عَلَاقِتْنَا مَعَايَهْ، أَنِحْنَ مَا عِنْدِنَا قُدْرَةْ لَاكِنْ نَحْيَوْا مَعَايَهْ بِقُدْرَةْ اللّٰهْ. وَ الْقُدْرَةْ دِي، أَنِحْنَ نِوَصُّفُوهَا لَيْكُو.
5 أَسْأَلَوْا نُفُوسْكُو. هَلْ بِالصَّحِيحْ كَيْ إِنْتُو مُؤمِنِينْ؟ جَرُّبُوا نُفُوسْكُو. مَا تَعَرْفُوا كَدَرْ عِيسَى الْمَسِيحْ قَاعِدْ فِيكُو وَلَّا؟ وَ دَا يَبْقَى صَحِيحْ كَنْ مَا فَشَلْتُوا مَرَّةْ وَاحِدْ. 6 وَ نِتْمَنَّى تَعَرْفُوا أَنِحْنَ مَا فَشَلْنَا.
7 وَ نَسْأَلَوْا اللّٰهْ أَشَانْ إِنْتُو مَا تِسَوُّوا أَيِّ خَطَا. وَ سُؤَالْنَا دَا، مَا أَشَانْ النَّاسْ يِشِيفُوا نَجَاحْنَا لَاكِنْ أَشَانْ إِنْتُو تِسَوُّوا الْخَيْر، حَتَّى كَانْ نَاسْ وَاحِدِينْ يُقُولُوا أَنِحْنَ فَشَلْنَا كُلَ. 8 أَشَانْ أَنِحْنَ مَا نَقْدَرَوْا نِسَوُّوا شَيّءْ ضِدّ الْحَقّ. لَا! إِلَّا لِلْحَقّ. 9 وَ كَنْ أَنِحْنَ مَا عِنْدِنَا قُدْرَةْ وَ إِنْتُو بَسْ عِنْدُكُو، خَلَاصْ أَنِحْنَ فَرْحَانِينْ. وَ نَسْأَلَوْا اللّٰهْ لَيْكُو أَشَانْ إِنْتُو تَبْقَوْا مُؤمِنِينْ كَامِلِينْ. 10 وَ خَلَاصْ، نَكْتِبْ لَيْكُو الْكَلَامْ دَا وَكِتْ أَنَا غَايِبْ مِنْكُو أَشَانْ وَكِتْ أَنَا قَاعِدْ مَعَاكُو، مَا وَاجِبْ لَيِّ نَهْرِجْكُو. أَشَانْ السُّلْطَةْ الرَّبِّنَا أَنْطَانِي فَوْقكُو، هِي لِنِقَوِّيكُو فِي الْإِيمَانْ وَ مَا لِنِخَرِّبْكُو.
نِهاية الجواب
11 وَ خَلَاصْ يَا أَخْوَانِي، أَفْرَحَوْا. أَبْقَوْا مُؤمِنِينْ كَامِلِينْ. أَشَّاجَعَوْا أَمْبَيْنَاتْكُو. خَلِّي فِكِرْكُو يَبْقَى وَاحِدْ. عِيشُوا بِالسَّلَامْ وَ اللّٰهْ سِيدْ الْمَحَبَّةْ وَ السَّلَامْ يَقْعُدْ مَعَاكُو. 12 أَسَّالَمَوْا أَمْبَيْنَاتْكُو بِسَلَامْ الصَّالِحِينْ. 13 كُلَّ الْأَخْوَانْ الصَّالِحِينْ الْمَعَايِ يِسَلُّمُوكُو. 14 خَلِّي رَحْمَةْ رَبِّنَا عِيسَى الْمَسِيحْ وَ مَحَبَّةْ اللّٰهْ وَ الْخُوَّةْ الْجَايَةْ مِنْ الرُّوحْ الْقُدُّوسْ يَقْعُدُوا ثَابْتِينْ فَوْقكُو كُلُّكُو.
