1 Wa be misil da, taʼarfu kadar al-Masiih ligi taʼab fi jismah. Wa gawwu nufuusku be fikir misil fikrah achaan al-naadum al-khibil taʼab al-jisim khalla minnah al-zunuub. 2 Wa hu ma yidoor yitaabiʼ chahwat al-naas battaan, laakin yidoor yitaabiʼ al-Allah yidoorah tuul al-wakit al-faddal leyah fi l-dunya. 3 Kafaaku ! Achaan min zamaan, intu gaʼadtu wakit tawiil fi amal al-gaaʼidiin yisawwu al-naas al-ma muʼminiin. Humman gaaʼidiin yisawwu al-fasaad wa chahwaathum al-cheeniin wa l-sakar wa haflaat al-zina wa l-safaaha. Wa yaʼabudu al-asnaam al-Allah harramaahum.
4 Wa humman yiʼajjubu minku achaan ma tilimmu maʼaahum fi fasaadhum al-ma indah hadd wa achaan da yiʼayyuruuku. 5 Laakin fi l-akhiir Rabbina yihaasibhum fi fiʼilhum. Hu jaahiz achaan yihaasib al-hayyiin wa l-maytiin. 6 Wa fi chaan da bas, al-bichaara ballakhooha hatta le l-naas al-maytiin. Wa kan hakamo leehum be l-moot misil naas al-dunya kula, humman yiʼiichu giddaam Allah be gudrat al-Ruuh al-Khudduus.
Al-masʼuuliiye al-akhawiiye
7 Kumaalit kulla cheyy gariib. Achaan da, khuttu baalku wa agoodu saabtiin daayman achaan tagdaro tisallu fi ayyi wakit. 8 Gubbaal kulla cheyy, arraayado ambeenaatku be mahabba chadiide achaan al-indah mahabba yisaamih ziyaada le l-naas al-yakhto foogah. 9 Khalli ayyi naadum minku yifaddil akhwaanah al-yaju leyah wa ma yachki.
10 Allah anta ayyi naadum minku gudra achaan yakhdim beeha le akhwaanah. Wa khalli ayyi naadum yichiil masʼuuliiytah fi barakat Allah al-gaaʼide tisawwi ambeenaatku khidme chig chig. 11 Masalan, ayyi naadum al-yikallim le l-akhwaan fi l-malamma, khalli yikallim leehum be kalaam Allah. Wa ayyi naadum al-yakhdim le l-akhwaan, khalli yakhdim be l-gudra al-Allah antaaha leyah. Achaan kulla cheyy al-tisawwuuh yimajjid Allah be waasitat Isa al-Masiih. Wa leyah hu al-majd wa l-muluk daayman wa ila l-abad. Aamiin.
Chaarikiin fi taʼab al-Masiih
12 Ya akhwaani al-nihibbuku, ma tiʼajjubu min al-taʼab al-chadiid al-yaji foogku achaan yijarribku. Ma tuguulu da cheyy ma maʼruuf ja foogku. 13 Intu gaaʼidiin tichaaruku fi taʼab al-Masiih wa achaan da, afraho fi ust al-taʼab. Wa kan chaaraktu fi taʼab al-Masiih da, tafraho farha chadiide wakit hu yibiin fi majdah.
14 Kan al-naas yiʼayyuruuku achaan intu naas al-Masiih, khalaas induku baraka achaan Ruuh Allah al-majiid gaaʼid foogku. 15 Wa khalli naadum minku abadan ma yitaʼʼubuuh be sabab katiliin dimme walla sirge walla jariime walla dakhiliin fi chuʼuun al-naas. 16 Wa laakin kan yitaʼʼubuuh achaan hu Masiihi bas, khalli ma yakhjal. Fi badalah, khalli yimajjid Allah achaan al-naas jaʼalooh naadum hana l-Masiih. 17 Achaan al-wakit tamma wa l-hisaab yabda. Wa akiid yabda be naas beet Allah. Wa kan al-hisaab yabda beena aniina al-muʼminiin, yabga kikkeef le l-naas al-abo ma taabaʼo bichaarat Allah ? 18 <Kan yabga gaasi le l-naadum al-saalih le yalga al-naja, kikkeef yabga le l-aasi wa l-muznib ?> 19 Wa be misil da, khalli al-naas al-yatʼabo hasab al-Allah yidoorah yisawwu daayman al-kheer wa yitwakkalo ale Khaalighum al-Saadikh.
1 وَ بِمِثِلْ دَا، تَعَرْفُوا كَدَرْ الْمَسِيحْ لِقِي تَعَبْ فِي جِسْمَهْ. وَ قَوُّوا نُفُوسْكُو بِفِكِرْ مِثِلْ فِكْرَهْ أَشَانْ النَّادُمْ الْقِبِلْ تَعَبْ الْجِسِمْ خَلَّى مِنَّهْ الذُّنُوبْ. 2 وَ هُو مَا يِدَوْر يِتَابِعْ شَهْوَةْ النَّاسْ بَتَّانْ، لَاكِنْ يِدَوْر يِتَابِعْ الْاللّٰهْ يِدَوْرَهْ طُولْ الْوَكِتْ الْفَضَّلْ لَيَّهْ فِي الدُّنْيَا. 3 كَفَاكُو! أَشَانْ مِنْ زَمَانْ، إِنْتُو قَعَدْتُوا وَكِتْ طَوِيلْ فِي عَمَلْ الْقَاعِدِينْ يِسَوُّوا النَّاسْ الْمَا مُؤمِنِينْ. هُمَّنْ قَاعِدِينْ يِسَوُّوا الْفَسَادْ وَ شَهْوَاتْهُمْ الشَّيْنِينْ وَ السَّكَرْ وَ حَفْلَاتْ الزِّنَى وَ السَّفَاهَةْ. وَ يَعَبُدُوا الْأَصْنَامْ الْاللّٰهْ حَرَّمَاهُمْ.
4 وَ هُمَّنْ يِعَجُّبُوا مِنْكُو أَشَانْ مَا تِلِمُّوا مَعَاهُمْ فِي فَسَادْهُمْ الْمَا عِنْدَهْ حَدّ وَ أَشَانْ دَا يِعَيُّرُوكُو. 5 لَاكِنْ فِي الأَخِيرْ رَبِّنَا يِحَاسِبْهُمْ فِي فِعِلْهُمْ. هُو جَاهِزْ أَشَانْ يِحَاسِبْ الْحَيِّينْ وَ الْمَيْتِينْ. 6 وَ فِي شَانْ دَا بَسْ، الْبِشَارَةْ بَلَّغَوْهَا حَتَّى لِلنَّاسْ الْمَيْتِينْ. وَ كَنْ حَكَمَوْا لَيْهُمْ بِالْمَوْت مِثِلْ نَاسْ الدُّنْيَا كُلَ، هُمَّنْ يِعِيشُوا قِدَّامْ اللّٰهْ بِقُدْرَةْ الرُّوحْ الْقُدُّوسْ.
المسْؤوليّة الأخويّة
7 كُمَالَةْ كُلَّ شَيّءْ قَرِيبْ. أَشَانْ دَا، خُطُّوا بَالْكُو وَ أَقْعُدُوا ثَابْتِينْ دَايْماً أَشَانْ تَقْدَرَوْا تِصَلُّوا فِي أَيِّ وَكِتْ. 8 قُبَّالْ كُلَّ شَيّءْ، أَرَّايَدَوْا أَمْبَيْنَاتْكُو بِمَحَبَّةْ شَدِيدَةْ أَشَانْ الْعِنْدَهْ مَحَبَّةْ يِسَامِحْ زِيَادَةْ لِلنَّاسْ الْيَخْطَوْا فَوْقَهْ. 9 خَلِّي أَيِّ نَادُمْ مِنْكُو يِفَضِّلْ أَخْوَانَهْ الْيَجُوا لَيَّهْ وَ مَا يَشْكِي.
10 اللّٰهْ أَنْطَى أَيِّ نَادُمْ مِنْكُو قُدْرَةْ أَشَانْ يَخْدِمْ بَيْهَا لِأَخْوَانَهْ. وَ خَلِّي أَيِّ نَادُمْ يِشِيلْ مَسْؤُولِيّتَهْ فِي بَرَكَةْ اللّٰهْ الْقَاعِدَةْ تِسَوِّي أَمْبَيْنَاتْكُو خِدْمَةْ شِقْ شِقْ. 11 مَثَلاً، أَيِّ نَادُمْ الْيِكَلِّمْ لِلْأَخْوَانْ فِي الْمَلَمَّةْ، خَلِّي يِكَلِّمْ لَيْهُمْ بِكَلَامْ اللّٰهْ. وَ أَيِّ نَادُمْ الْيَخْدِمْ لِلْأَخْوَانْ، خَلِّي يَخْدِمْ بِالْقُدْرَةْ الْاللّٰهْ أَنْطَاهَا لَيَّهْ. أَشَانْ كُلَّ شَيّءْ التِّسَوُّوهْ يِمَجِّدْ اللّٰهْ بِوَاسِطَةْ عِيسَى الْمَسِيحْ. وَ لَيَّهْ هُو الْمَجْد وَ الْمُلُكْ دَايْماً وَ إِلَى الْأَبَدْ. آمِينْ.
شارِكين في تعب المسيح
12 يَا أَخْوَانِي النِّحِبُّكُو، مَا تِعَجُّبُوا مِنْ التَّعَبْ الشَّدِيدْ الْيَجِي فَوْقكُو أَشَانْ يِجَرِّبْكُو. مَا تُقُولُوا دَا شَيّءْ مَا مَعْرُوفْ جَاءْ فَوْقكُو. 13 إِنْتُو قَاعِدِينْ تِشَارُكُوا فِي تَعَبْ الْمَسِيحْ وَ أَشَانْ دَا، أَفْرَحَوْا فِي أُسْط التَّعَبْ. وَ كَنْ شَارَكْتُوا فِي تَعَبْ الْمَسِيحْ دَا، تَفْرَحَوْا فَرْحَةْ شَدِيدَةْ وَكِتْ هُو يِبِينْ فِي مَجْدَهْ.
14 كَنْ النَّاسْ يِعَيُّرُوكُو أَشَانْ إِنْتُو نَاسْ الْمَسِيحْ، خَلَاصْ عِنْدُكُو بَرَكَةْ أَشَانْ رُوحْ اللّٰهْ الْمَجِيدْ قَاعِدْ فَوْقكُو. 15 وَ خَلِّي نَادُمْ مِنْكُو أَبَداً مَا يِتَعُّبُوهْ بِسَبَبْ كَتِلِينْ دِمَّةْ وَلَّا سِرْقَةْ وَلَّا جَرِيمَةْ وَلَّا دَخِلِينْ فِي شُؤُونْ النَّاسْ. 16 وَ لَاكِنْ كَنْ يِتَعُّبُوهْ أَشَانْ هُو مَسِيحِي بَسْ، خَلِّي مَا يَخْجَلْ. فِي بَدَلَهْ، خَلِّي يِمَجِّدْ اللّٰهْ أَشَانْ النَّاسْ جَعَلَوْه نَادُمْ هَنَا الْمَسِيحْ. 17 أَشَانْ الْوَكِتْ تَمَّ وَ الْحِسَابْ يَبْدَا. وَ أَكِيدْ يَبْدَا بِنَاسْ بَيْت اللّٰهْ. وَ كَنْ الْحِسَابْ يَبْدَا بَيْنَا أَنِحْنَ الْمُؤمِنِينْ، يَبْقَى كِكَّيْف لِلنَّاسْ الْأَبَوْا مَا تَابَعَوْا بِشَارَةْ اللّٰهْ؟ 18 <كَنْ يَبْقَى قَاسِي لِلنَّادُمْ الصَّالِحْ لِيَلْقَى النَّجَاةْ، كِكَّيْف يَبْقَى لِلْعَاصِي وَ الْمُذْنِبْ؟> 19 وَ بِمِثِلْ دَا، خَلِّي النَّاسْ الْيَتْعَبَوْا حَسَبْ الْاللّٰهْ يِدَوْرَهْ يِسَوُّوا دَايْماً الْخَيْر وَ يِتْوَكَّلَوْا عَلَيْ خَالِقْهُمْ الصَّادِقْ.
