Angariʼ min al-zaaniye
1 Ya wileedi, khutt baalak le hikmati
wa asmaʼ al-ilim al-indi
2 le tifakkir adiil
wa lisaanak yikallim be maʼrafa.
3 Achaan al-zaaniye lisaanha asal
wa kalaamha halu.
4 Wa laakin fi l-akhiir
hi murra min al-hamdal
wa tariine min al-seef.
5 Deribha yiwaddi le l-moot
wa tariigha yuguud fi l-haawiye.
6 Hi ma indaha haaje
fi derib al-haya.
Hi waddarat khalaas
wa ma indaha khabar.
7 Wa hassaʼ, ya wileedi, asmaʼni
wa ma taaba kalaami.
8 Ma tamchi aleeha
wa ma tigarrib le baab beetha.
9 Kan macheet leeha,
giddaam al-naas titallif charafak
wa tisallim nafsak
le naadum al-ma yarhamak
10 wa l-ajaanib yaksabo maalak
wa le naadum aakhar tantiih khidmit duraaʼak
11 wa tatʼab wa tagnit fi aakhir umrak
fi wakit al-yanzil lahamak wa l-tiwaddir gudurtak.
12 Wa khalaas, tandam wa tuguul :
«Maala ana abeet al-addibiin ?
Wa maala galbi ma khassad
be luwaamit al-aakhariin ?
13 Ana ma simiʼt kalaam al-naas
al-yigarruuni
wa ma karramt saadaati
al-yiʼallumuuni.
14 Wa hassaʼ gariib
nalhag al-taʼab al-ziyaada
giddaam al-naas
wa giddaam al-mujtamaʼ.»
Agiif fi martak al-halaalak
15 Achrab almi biirak al-halaalak,
almi al-jaari min een biirak.
16 Ma tikhalli almi biirak yajri fi l-chawaariʼ
wa la yidaffig fi l-nagaʼaat.
17 Khalli almi biirak yabga leek inta wiheedak
wa ma le l-ajaanib al-maʼaak.
18 Allah yibaarik biirak
wa afrah be l-mara al-akhadtaha fi subaak.
19 Hi leek misil al-khazaala,
samha wa mahbuuba.
Khalli mahabbitha tarwiik fi kulla wakit
wa kuun machkhuul daayman be hubbaha.
20 Maala, ya wileedi, tinchakhil
be hubb al-zannaaya ?
Wa maala tikhalli chahwatak tiwaddiik
le mara aakhara ?
21 Allah yichiif kulla khidmit al-insaan
wa yiraakhib al-derib al-gaaʼid yichiilah.
22 Al-aasi yagaʼ fi isyaanah
wa zanbah yabga charak yakurbah.
23 Gillit al-adab taktulah
wa katarat al-fasaad tiwaddirah.
أنْقرِع من الزانية
1 يَا وِلَيْدِي، خُطّ بَالَكْ لِحِكْمَتِي
وَ أَسْمَعْ الْعِلِمْ الْعِنْدِي
2 لِتِفَكِّرْ عَدِيلْ
وَ لِسَانَكْ يِكَلِّمْ بِمَعْرَفَةْ.
3 أَشَانْ الزَّانِيَةْ لِسَانْهَا عَسَلْ
وَ كَلَامْهَا حَلُو.
4 وَ لَاكِنْ فِي الأَخِيرْ
هِي مُرَّةْ مِنْ الْحَمْضَلْ
وَ طَرِينَةْ مِنْ السَّيْف.
5 دَرِبْهَا يِوَدِّي لِلْمَوْت
وَ طَرِيقْهَا يُقُودْ فِي الْهَاوِيَةْ.
6 هِي مَا عِنْدَهَا حَاجَةْ
فِي دَرِبْ الْحَيَاةْ.
هِي وَدَّرَتْ خَلَاصْ
وَ مَا عِنْدَهَا خَبَرْ.
7 وَ هَسَّعْ، يَا وِلَيْدِي، أَسْمَعْنِي
وَ مَا تَابَى كَلَامِي.
8 مَا تَمْشِي عَلَيْهَا
وَ مَا تِقَرِّبْ لِبَابْ بَيْتهَا.
9 كَنْ مَشَيْت لَيْهَا،
قِدَّامْ النَّاسْ تِتَلِّفْ شَرَفَكْ
وَ تِسَلِّمْ نَفْسَكْ
لِنَادُمْ الْمَا يَرْحَمَكْ
10 وَ الْأَجَانِبْ يَكْسَبَوْا مَالَكْ
وَ لِنَادُمْ آخَرْ تَنْطِيهْ خِدْمَةْ دُرَاعَكْ
11 وَ تَتْعَبْ وَ تَقْنِتْ فِي آخِرْ عُمْرَكْ
فِي وَكِتْ الْيَنْزِلْ لَحَمَكْ وَ التِّوَدِّرْ قُدُرْتَكْ.
12 وَ خَلَاصْ، تَنْدَمْ وَ تُقُولْ:
«مَالَا أَنَا أَبَيْت الْأَدِّبِينْ؟
وَ مَالَا قَلْبِي مَا قَصَّدْ
بِلُوَامَةْ الْآخَرِينْ؟
13 أَنَا مَا سِمِعْت كَلَامْ النَّاسْ
الْيِقَرُّونِي
وَ مَا كَرَّمْت سَادَاتِي
الْيِعَلُّمُونِي.
14 وَ هَسَّعْ قَرِيبْ
نَلْحَقْ التَّعَبْ الزِّيَادَةْ
قِدَّامْ النَّاسْ
وَ قِدَّامْ الْمُجْتَمَعْ.»
أقيف في مرْتك الحلالك
15 أَشْرَبْ أَلْمِي بِيرَكْ الْحَلَالَكْ،
أَلْمِي الْجَارِي مِنْ عَيْن بِيرَكْ.
16 مَا تِخَلِّي أَلْمِي بِيرَكْ يَجْرِي فِي الشَّوَارِعْ
وَ لَا يِدَفِّقْ فِي النَّقَعَاتْ.
17 خَلِّي أَلْمِي بِيرَكْ يَبْقَى لَيْك إِنْتَ وِحَيْدَكْ
وَ مَا لِلْأَجَانِبْ الْمَعَاكْ.
18 اللّٰهْ يِبَارِكْ بِيرَكْ
وَ أَفْرَحْ بِالْمَرَةْ الْأَخَدْتَهَا فِي صُبَاكْ.
19 هِي لَيْك مِثِلْ الْغَزَالَةْ،
سَمْحَةْ وَ مَحْبُوبَةْ.
خَلِّي مَحَبِّتْهَا تَرْوِيكْ فِي كُلَّ وَكِتْ
وَ كُونْ مَشْغُولْ دَايْماً بِحُبَّهَا.
20 مَالَا، يَا وِلَيْدِي، تِنْشَغِلْ
بِحُبّ الزَّنَّايَةْ؟
وَ مَالَا تِخَلِّي شَهْوَتَكْ تِوَدِّيكْ
لِمَرَةْ آخَرَةْ؟
21 اللّٰهْ يِشِيفْ كُلَّ خِدْمَةْ الْإِنْسَانْ
وَ يِرَاقِبْ الدَّرِبْ الْقَاعِدْ يِشِيلَهْ.
22 الْعَاصِي يَقَعْ فِي عِصْيَانَهْ
وَ ذَنْبَهْ يَبْقَى شَرَكْ يَكُرْبَهْ.
23 قِلَّةْ الْأَدَبْ تَكْتُلَهْ
وَ كَتَرَةْ الْفَسَادْ تِوَدِّرَهْ.
