Wasiiye le kabiir al-khannaayiin : Mazmuur le Dawuud
1 Ya Ilaahi al-nahmudak,
ma taskut !
2 Achaan al-fasliin wa khachchaachiin
fataho khuchuumhum diddi
wa hajjo leyi be lisaan kaddaab.
3 Wa hawwagooni be kalaam hana karaahiiye
wa haarabooni bala janiiye.
4 Wa mahabbiti, yigabbuluuha leyi be tuhma
wa laakin ana nisalli leehum.
5 Humman yigabbulu leyi al-charr be l-kheer
wa l-karaahiiye be mahabbiti.
6 Wa yuguulu : «Gawwim diddah chariir
wa khalli al-adu yagood be zeenaaytah.
7 Wa wakit yichaaruʼuuh, khalli yabga khaati
wa salaatah tabga zanib.
8 Wa khalli ayyaam hayaatah yabgo gusaar
wa naadum aakhar yibaddilah.
9 Wa khalli iyaalah yabgo ataama
wa martah armala.
10 Wa khalli iyaalah yiʼiiru wa yihajjuru
wa yachhado baʼiid min maskanhum al-khirib.
11 Wa khalli siid deenah yichiil kula khumaamah
wa l-ajnabi yichiil kula al-cheyy al-indah.
12 Wa khalli naadum ma yarhamah
wa la yihinn fi iyaalah al-ataama.
13 Wa khalli zurriiytah tingatiʼ
wa usumhum yiwaddir fi l-zurriiye al-jaaye.
14 Wa khalli Allah yifakkir be zunuub abbahaatah
wa zunuub ammah abadan ma yinmahu.
15 Wa khalli kulla l-cheyy da yukuun daayman giddaam Allah
wa yuguchch usumhum min al-ard.
16 «Achaan hu ma fakkar le yisawwi al-kheer
wa taarad al-miskiin wa l-taʼbaan
lahaddi hu katal al-galbah majruuh.
17 Hu habba al-laʼana
wa hassaʼ, hi jaat leyah.
Wa ma firih be l-baraka,
wa hassaʼ, hi baʼʼadat minnah.
18 Wa hu libis al-laʼana misil khalag
wa hi dakhalat fi jismah misil almi
wa misil dihin fi udaamah.
19 Wa khalli al-laʼana
tabga leyah misil khalag al-yilkhatta beyah
wa misil hizaam al-yilhazzam beyah daayman.»
20 Wa be misil da bas, Allah yikaafi al-yathamooni
wa l-yihajju diddi be kalaam fasil.
21 Wa inta, ya Allah Rabbi,
sawwi leyi al-kheer fi chaan usmak
Achaan rahmatak aziime, najjiini.
22 Achaan ana taʼbaan wa miskiin
wa galbi anjarah fi daakhili.
23 Wa ana maachi misil dull al-zawwaal
wa gaaʼidiin yihittuuni misil saar al-leel.
24 Wa min chiddit al-soom, rikabbi gaaʼidiin yarjufu
wa min al-batuul, ana khilibt.
25 Wa ana bigiit iyyeere
wa l-yichiifuuni yihizzu ruuseehum.
26 Afzaʼni, ya Allah Ilaahi !
Najjiini be rahmatak.
27 Wa khalli yaʼarfu kadar da min iidak
wa inta Allah bas sawweet al-cheyy da.
28 Humman yalʼano wa laakin inta tibaarik
wa kan yugummu diddi kula, yalgo al-eeb
wa ana abdak nafrah.
29 Wa khalli al-yathamooni, charafhum yiwaddir
wa yalbaso al-eeb misil khalag.
30 Ana nachkur Allah katiir
wa nahmudah fi ust al-jamaʼ al-katiiriin.
31 Achaan hu yagiif be zeenaayit al-miskiin
wa yinajjiih min al-yihaakumuuh.
وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 يَا إِلٰـهِي النَّحْمُدَكْ،
مَا تَسْكُتْ!
2 أَشَانْ الْفَسْلِينْ وَ غَشَّاشِينْ
فَتَحَوْا خُشُومْهُمْ ضِدِّي
وَ حَجَّوْا لَيِّ بِلِسَانْ كَدَّابْ.
3 وَ حَوَّقَوْنِي بِكَلَامْ هَنَا كَرَاهِيَّةْ
وَ حَارَبَوْنِي بَلَا جَنِيَّةْ.
4 وَ مَحَبِّتِي، يِقَبُّلُوهَا لَيِّ بِتُهْمَةْ
وَ لَاكِنْ أَنَا نِصَلِّي لَيْهُمْ.
5 هُمَّنْ يِقَبُّلُوا لَيِّ الشَّرّ بِالْخَيْر
وَ الْكَرَاهِيَّةْ بِمَحَبِّتِي.
6 وَ يُقُولُوا: «قَوِّمْ ضِدَّهْ شَرِيرْ
وَ خَلِّي الْعَدُو يَقْعُدْ بِزَيْنَايْتَهْ.
7 وَ وَكِتْ يِشَارُعُوهْ، خَلِّي يَبْقَى خَاطِي
وَ صَلَاتَهْ تَبْقَى ذَنِبْ.
8 وَ خَلِّي أَيَّامْ حَيَاتَهْ يَبْقَوْا قُصَارْ
وَ نَادُمْ آخَرْ يِبَدِّلَهْ.
9 وَ خَلِّي عِيَالَهْ يَبْقَوْا أَتَامَا
وَ مَرْتَهْ أَرْمَلَةْ.
10 وَ خَلِّي عِيَالَهْ يِعِيرُوا وَ يِهَجُّرُوا
وَ يَشْحَدَوْا بَعِيدْ مِنْ مَسْكَنْهُمْ الْخِرِبْ.
11 وَ خَلِّي سِيدْ دَيْنَهْ يِشِيلْ كُلَ خُمَامَهْ
وَ الْأَجْنَبِي يِشِيلْ كُلَ الشَّيّءْ الْعِنْدَهْ.
12 وَ خَلِّي نَادُمْ مَا يَرْحَمَهْ
وَ لَا يِحِنّ فِي عِيَالَهْ الْأَتَامَا.
13 وَ خَلِّي ذُرِّيّتَهْ تِنْقَطِعْ
وَ أُسُمْهُمْ يِوَدِّرْ فِي الذُّرِّيَّةْ الْجَايَةْ.
14 وَ خَلِّي اللّٰهْ يِفَكِّرْ بِذُنُوبْ أَبَّهَاتَهْ
وَ ذُنُوبْ أَمَّهْ أَبَداً مَا يِنْمَحُوا.
15 وَ خَلِّي كُلَّ الشَّيّءْ دَا يُكُونْ دَايْماً قِدَّامْ اللّٰهْ
وَ يُقُشّ أُسُمْهُمْ مِنْ الْأَرْض.
16 «أَشَانْ هُو مَا فَكَّرْ لِيِسَوِّي الْخَيْر
وَ طَارَدْ الْمِسْكِينْ وَ التَّعْبَانْ
لَحَدِّي هُو كَتَلْ الْقَلْبَهْ مَجْرُوحْ.
17 هُو حَبَّ اللَّعَنَةْ
وَ هَسَّعْ، هِي جَاتْ لَيَّهْ.
وَ مَا فِرِحْ بِالْبَرَكَةْ،
وَ هَسَّعْ، هِي بَعَّدَتْ مِنَّهْ.
18 وَ هُو لِبِسْ اللَّعَنَةْ مِثِلْ خَلَقْ
وَ هِي دَخَلَتْ فِي جِسْمَهْ مِثِلْ أَلْمِي
وَ مِثِلْ دِهِنْ فِي عُضَامَهْ.
19 وَ خَلِّي اللَّعَنَةْ
تَبْقَى لَيَّهْ مِثِلْ خَلَقْ الْيِلْغَطَّى بَيَّهْ
وَ مِثِلْ حِزَامْ الْيِلْحَزَّمْ بَيَّهْ دَايْماً.»
20 وَ بِمِثِلْ دَا بَسْ، اللّٰهْ يِكَافِي الْيَتْهَمَوْنِي
وَ الْيِحَجُّوا ضِدِّي بِكَلَامْ فَسِلْ.
21 وَ إِنْتَ، يَا اللّٰهْ رَبِّي،
سَوِّي لَيِّ الْخَيْر فِي شَانْ أُسْمَكْ
أَشَانْ رَحْمَتَكْ عَظِيمَةْ، نَجِّينِي.
22 أَشَانْ أَنَا تَعْبَانْ وَ مِسْكِينْ
وَ قَلْبِي أَنْجَرَحْ فِي دَاخِلِي.
23 وَ أَنَا مَاشِي مِثِلْ ضُلّ الزَّوَّالْ
وَ قَاعِدِينْ يِحِتُّونِي مِثِلْ سَارْ اللَّيْل.
24 وَ مِنْ شِدَّةْ الصَّوْم، رِكَبِّي قَاعِدِينْ يَرْجُفُوا
وَ مِنْ الْبَطُولْ، أَنَا غِلِبْت.
25 وَ أَنَا بِقِيتْ عِيَّيْرَةْ
وَ الْيِشِيفُونِي يِهِزُّوا رُوسَيْهُمْ.
26 أَفْزَعْنِي، يَا اللّٰهْ إِلٰـهِي!
نَجِّينِي بِرَحْمَتَكْ.
27 وَ خَلِّي يَعَرْفُوا كَدَرْ دَا مِنْ إِيدَكْ
وَ إِنْتَ اللّٰهْ بَسْ سَوَّيْت الشَّيّءْ دَا.
28 هُمَّنْ يَلْعَنَوْا وَ لَاكِنْ إِنْتَ تِبَارِكْ
وَ كَنْ يُقُمُّوا ضِدِّي كُلَ، يَلْقَوْا الْعَيْب
وَ أَنَا عَبْدَكْ نَفْرَحْ.
29 وَ خَلِّي الْيَتْهَمَوْنِي، شَرَفْهُمْ يِوَدِّرْ
وَ يَلْبَسَوْا الْعَيْب مِثِلْ خَلَقْ.
30 أَنَا نَشْكُرْ اللّٰهْ كَتِيرْ
وَ نَحْمُدَهْ فِي أُسْط الْجَمَعْ الْكَتِيرِينْ.
31 أَشَانْ هُو يَقِيفْ بِزَيْنَايِةْ الْمِسْكِينْ
وَ يِنَجِّيهْ مِنْ الْيِحَاكُمُوهْ.
