1 Mabruuk le l-kaamiliin fi deribhum
wa yamchu hasab Tawraat Allah.
2 Mabruuk le l-yahfado wasiiyaatah
wa yifattuchuuh be kulla guluubhum.
3 Akiid, humman ma yisawwu al-fasaala
wa yamchu fi duruubah.
4 Inta amart be faraaydak
achaan yahfadoohum adiil.
5 Khalli duruubi yabgo saabtiin
achaan nahfad churuutak.
6 Wa be da, eeb ma yisawwiini
wakit nifakkir fi gawaaniinak.
7 Nachkurak be galib tamaam
wakit nilʼallam chariiʼtak al-aadile.
8 Ana nahfad churuutak,
ma tikhalliini marra waahid !
9 Kikkeef al-sabi yiʼiich fi l-tihaara ?
Be hafadaan kalaamak.
10 Be kulla galbi fattachtak,
ma tikhalliini niʼiir baʼiid min gawaaniinak.
11 Fi galbi hafadt waʼadak
achaan ma nisawwi zanib diddak.
12 Baarak Allah !
Allimni churuutak !
13 Be lisaani ana hajjeet
kulla chariiʼtak al-inta gultaha.
14 Ana farhaan fi tariig wasiiyaatak
misil ligiit khuna.
15 Ana nizzakkar faraaydak
wa niraakhib duruubak.
16 Wa nafrah be churuutak
wa ma nansa kalaamak.
17 Sawwi leyi al-kheer, ana abdak
achaan niʼiich wa nahfad kalaamak.
18 Aftah uyuuni achaan nichiif
ajaayib Tawraatak.
19 Ana ajnabi fi l-ard,
ma tilabbid minni gawaaniinak.
20 Nafsi muchtaaga le chariiʼtak
fi kulla wakit.
21 Wa inta tihaddid al-malʼuuniin al-mustakbiriin
al-yiʼiiru baʼiid min gawaaniinak.
22 Baʼʼid minni al-muʼyaar wa l-hugra
achaan nahfad wasiiyaatak.
23 Hatta kan al-masaaʼiil yilʼaamaro diddi,
ana abdak nizzakkar churuutak.
24 Wa wasiiyaatak laziiziin leyi
wa humman bas mustachaariini.
25 Nafsi waagʼe fi l-turaab.
Hayyiini hasab kalaamak !
26 Ana hajjeet leek be haali wa inta raddeet leyi.
Allimni churuutak !
27 Fahhimni derib faraaydak
wa ana nizzakkar ajaaybak.
28 Dumuuʼi jaro min al-hizin,
gawwimni hasab kalaamak.
29 Baʼʼidni min tariig al-kidib
wa arhamni be Tawraatak.
30 Ana azalt derib al-hagg
wa macheet hasab chariiʼtak.
31 Ana munrabit fi wasiiyaatak,
ma tikhalliini fi l-eeb, ya Allah.
32 Najri fi derib gawaaniinak
achaan inta tirayyih galbi.
33 Ya Allah, wassifni churuutak
wa nahfadhum daayman.
34 Antiini al-fihim le nitaabiʼ Tawraatak
wa nahfadah be kulla galbi.
35 Waddiini fi tariig gawaaniinak
achaan beehum nabga farhaan.
36 Mayyil galbi ale wasiiyaatak
wa ma timayyilah ale l-maal al-haraam.
37 Baʼʼid uyuuni min al-choofiin al-ma naafiʼ
wa ayyichni fi derbak.
38 Haggig waʼadak le abdak,
al-inta waaʼadt beyah al-yakhaafo minnak.
39 Baʼʼid minni al-muʼyaar al-nakhaaf minnah
achaan chariiʼtak hi adiile.
40 Daahu ana nihibb faraaydak,
ayyichni be adaaltak !
41 Khalli rahmatak tanzil foogi, ya Allah,
wa najaatak taji hasab kalaamak
42 le nurudd le l-yiʼayyirni
achaan ana mutawakkil fi kalaamak.
43 Ma tikhalli lisaani yibaari baʼiid min kalaam al-hagg
achaan ana nukhutt achami fi chariiʼtak.
44 Wa nahfad Tawraatak
daayman wa ila l-abad.
45 Wa ana nuruukh be hurriiye
achaan fattacht faraaydak.
46 Wa nihajji be wasiiyaatak giddaam al-muluuk
wa nagood bala eeb.
47 Wa nafrah be gawaaniinak
al-nihibbuhum katiir.
48 Narfaʼ iideeni le gawaaniinak al-nihibbuhum
wa nizzakkar churuutak.
49 Fakkir fi kalaamak al-gultah leyi ana abdak
al-foogah ana khatteet achami.
50 Wa daahu al-yisabbirni fi l-taʼab,
hu kalaamak al-yihayyiini.
51 Al-mustakbiriin achchammato foogi katiir marra waahid
laakin ana ma baareet baʼiid min Tawraatak.
52 Nizzakkar chariiʼtak min zamaan, ya Allah,
wa be da, nisabbir nafsi.
53 Wa l-zaʼal karabni fi chaan al-aasiyiin
al-khallo Tawraatak.
54 Wa l-khine jaayi leyi min churuutak
fi l-ard al-ana gaaʼid foogha misil ajnabi.
55 Be l-leel nizzakkar usmak, ya Allah,
le nahfad Tawraatak.
56 Wa hafadaan faraaydak
da bas haggi halaali.
57 Ya Allah, ana gult :
«Khidimti hi hafadaan kalaamak.»
58 Wa be kulla galbi nifattich ridaak,
arhamni hasab kalaamak.
59 Ana fakkart fi duruubi
wa gabbalt le wasiiyaatak.
60 Wa bala taʼkhiir ajala ke,
ana hafadt gawaaniinak.
61 Hubaal al-aasiyiin karabooni
wa ma nisiit Tawraatak.
62 Wa fi ust al-leel, nugumm nachkurak
fi chaan chariiʼtak al-aadile.
63 Ana rafiig kulla l-yakhaafo minnak
wa rafiig al-yitabbugu faraaydak.
64 Ya Allah, rahmatak tamla al-ard.
Allimni churuutak !
65 Ya Allah, inta sawweet al-kheer
leyi ana abdak hasab kalaamak.
66 Allimni al-fikir al-adiil wa l-ilim
achaan ana aamant be gawaaniinak.
67 Wa gabul ma nalga ihaana, ana waddart
wa laakin hassaʼ, hafadt kalaamak.
68 Inta adiil wa tisawwi al-kheer,
allimni churuutak !
69 Al-mustakbiriin wassakhooni be l-kidib
wa ana kamaan nahfad faraaydak be kulla galbi.
70 Galibhum jaamid misil al-chaham
wa laakin ana nafrah be Tawraatak.
71 Akheer leyi nalga al-ihaana
achaan nilʼallam churuutak.
72 Akheer leyi al-Tawraat al-yamrug min khachmak
min aalaaf hujaar al-fudda wa jineehaat al-dahab.
73 Iideenak addalooni wa kawwanooni.
Antiini al-fihim achaan nilʼallam gawaaniinak !
74 Al-yakhaafo minnak yichiifuuni wa yafraho
achaan be acham, ana narja kalaamak.
75 Ya Allah, ana naʼarif kadar chariiʼtak aadile
wa be amaanak, inta dasseetni fi l-ihaana.
76 Wa be rahmatak, sabbirni
hasab kalaamak le abdak.
77 Wa khalli rahmatak tanzil foogi wa nahya
achaan Tawraatak yabga leyi laziiz.
78 Ayyib al-musiiʼiin al-yitaʼʼubuuni be kidib
wa ana kamaan nizzakkar faraaydak.
79 Khalli yaju leyi al-yakhaafo minnak
wa l-yaʼarfu wasiiyaatak.
80 Wa khalli galbi yukuun tamaam be tabbigiin churuutak
achaan ma nalga eeb giddaamak.
81 Ana iyiit min fattichiin al-naja
wa be acham, narja kalaamak.
82 Uyuuni iyo min fattichiin kalaamak
wa ana gult : «Mata tisabbirni ?»
83 Ana gidimt misil girbe fi ust al-dukhkhaan
laakin abadan ma nansa churuutak.
84 Kam ayyaam hayaat abdak ?
Wa mata tichaariʼ al-yitaaruduuni ?
85 Al-mustakbiriin yankutu nugaar giddaami
wa da ma muwaafig le Tawraatak.
86 Kulla gawaaniinak sidikh.
Afzaʼni ! Humman yitaaruduuni be kidib.
87 Gariib yuguchchuuni min al-ard
wa be da kula, ana ma khalleet faraaydak.
88 Hayyiini hasab rahmatak
achaan nahfad muʼaahadatak !
89 Ya Allah, kalaamak saabit
daayman fi l-samaawaat.
90 Wa sidkhak daayim min zurriiye le zurriiye
wa inta sabbat al-ard wa di hi gaaʼide.
91 Wa kulla cheyy gaaʼid al-yoom hasab chariiʼtak
achaan ayyi makhluug yakhdim leek.
92 Kan Tawraatak ma bigi leyi halu,
ana niddammar min al-taʼab.
93 Abadan ma nansa faraaydak
achaan beehum inta hayyeetni.
94 Aywa, najjiini ! Ana hanaak
achaan gaaʼid nifattich faraaydak.
95 Al-aasiyiin khatto achamhum fi damaari
wa ana kamaan nukhutt baali fi wasiiyaatak.
96 Kulli cheyy kaamil indah huduud
wa laakin gawaaniinak ma induhum hadd.
97 Kam marraat ana habbeet Tawraatak
wa gaaʼid nifakkir foogah kulla yoom.
98 Ana karabt gawaaniinak daayman le nafsi
wa humman sawwooni hakiim min udwaani.
99 Ana bigiit aalim min saadaati
achaan wasiiyaatak bas al-nifakkir fooghum.
100 Ana faahim min al-chiyyaab
achaan hafadt faraaydak.
101 Min kulla duruub al-fasaala karabt rijileeni
achaan nahfad kalaamak.
102 Wa min chariiʼtak ana ma nibaʼʼid
achaan inta bas al-tiwassiini.
103 Kam marraat kalaamak yabga halu fi khachmi
ziyaada min al-asal fi lisaani.
104 Wa be faraaydak ana nafham
wa be sabab da, nakrah kulla duruub al-kidib.
105 Wa kalaamak faanuus le khatwaati
wa nuur fi derbi.
106 Ana nahlif wa nagood fi haliifti
kadar nahfad chariiʼtak al-aadile.
107 Ya Allah, ana ligiit ihaana ziyaada,
hayyiini hasab kalaamak !
108 Ya Allah, akhbal munaadaati misil hadiiyat al-chukur
wa allimni chariiʼtak !
109 Hayaati kulla yoom fi khatar
wa laakin ma ana nisiit Tawraatak.
110 Al-aasiyiin kajjo leyi charak
laakin ana ma waddart baʼiid min faraaydak.
111 Wa wasiiyaatak bigo leyi warasa daayme
wa suruur galbi.
112 Ana mayyalt galbi le tabbigiin churuutak
wa da yukuun daayman lahaddi l-nihaaya.
113 Nakrah al-naas al-guluubhum tineen
wa laakin ana nihibb Tawraatak.
114 Inta bas maljaʼi wa daragati
wa be acham, narja kalaamak.
115 Baʼʼudu minni, ya l-fasliin,
achaan nahfad gawaaniin Ilaahi !
116 Saaʼidni hasab kalaamak wa nahya
wa fi achami, al-eeb ma yikhattiini.
117 Saaʼidni achaan nanja
wa daayman nifakkir fi churuutak.
118 Inta abeet kulla l-yibaʼʼudu min churuutak
achaan yukhuchchu be kidib.
119 Inta gachcheet kulla l-aasiyiin min al-ard misil al-wasakh
wa fi chaan da, habbeet wasiiyaatak.
120 Jismi rajaf min al-khoof giddaamak
wa min al-ruʼub giddaam chariiʼtak.
121 Ana tabbagt al-chariiʼa wa l-adaala,
ma tisallimni le l-zaalimiin !
122 Abga damiin le kheer abdak
wa ma tikhalli al-musiiʼiin yazulmuuni.
123 Uyuuni iyo min fattichiin kalaamak al-aadil
wa raajiyiin najaatak.
124 Sawwi le abdak hasab rahmatak
wa allimni churuutak !
125 Antiini al-fihim, ana abdak
achaan naʼarif adiil wasiiyaatak.
126 Ya Allah ! Al-wakit ja le tugumm
achaan al-naas abo Tawraatak.
127 Wa laakin ana nihibb gawaaniinak
ziyaada min al-dahab
aywa, ziyaada min al-dahab al-saafi.
128 Wa khalaas nichiif kulla faraaydak adiiliin
wa nakrah kulla turug al-kidib.
129 Wasiiyaatak ajiibiin
wa achaan da, nahfadhum.
130 Tawdiih kalaamak yanti nuur
wa yanti al-fihim le l-juhhaal.
131 Ana fataht khachmi wa naahajt
achaan muchtaag le gawaaniinak.
132 Wajjih aleyi wa hinn foogi
hasab adaaltak le l-naas al-yihibbu usmak.
133 Be kalaamak, sabbit khatwaati
wa ma tigaddir al-charr foogi !
134 Afdaani min mudaayagat al-naas
wa nahfad faraaydak.
135 Wajjih nuur wijhak ale abdak
wa allimni churuutak !
136 Min uyuuni, dumuuʼi nazalo misil wudyaan
achaan al-naas ma hafado Tawraatak.
137 Ya Allah, inta saadikh
wa chariiʼtak adiile.
138 Inta amart wa wassaft al-adaala
wa wasiiyaatak saadikhiin ziyaada.
139 Wa khiirti sakkatatni
wakit udwaani niso kalaamak.
140 Kalaamak muʼakkad marra waahid
wa abdak yihibbah.
141 Ana miskiin wa mahguur
wa laakin ma nansa faraaydak.
142 Adaaltak tagood ila l-abad
wa Tawraatak hagg.
143 Taʼab al-diige lihigni
wa laakin gawaaniinak laziiziin leyi.
144 Adaalit wasiiyaatak tagood ila l-abad.
Antiini al-fihim le nahya !
145 Ya Allah, ana naadeet be kulla galbi,
rudd leyi wa nahfad churuutak.
146 Ana naadeetak : «Najjiini
wa nahfad wasiiyaatak !»
147 Gammeet gabul al-chagaag wa talabt fazaʼak
wa be acham, narja kalaamak.
148 Uyuuni anfataho be l-leel
wa azzakkart kalaamak.
149 Asmaʼ hissi hasab rahmatak.
Ya Allah, hayyiini hasab chariiʼtak !
150 Al-yisawwu fiʼil al-cheen garrabo leyi
wa baʼʼado min Tawraatak.
151 Ya Allah, inta gariib leyi
wa kulla gawaaniinak hagg.
152 Min zamaan, ana naʼarif wasiiyaatak
wa inta assastaha le l-abad.
153 Chiif taʼabi wa khallisni
achaan ana ma nisiit Tawraatak.
154 Ahmiini wa afdaani.
Hayyiini hasab kalaamak !
155 Al-naja baʼiid min al-aasiyiin
achaan ma fattacho churuutak.
156 Ya Allah, rahmatak wasiiʼe.
Hayyiini hasab chariiʼtak !
157 Al-yitaaruduuni wa khusmaani katiiriin
wa laakin ana ma baareet min wasiiyaatak.
158 Ana nichiif al-khaayniin be bukhud
achaan ma hafado kalaamak.
159 Ya Allah, chiif ! Ana nihibb faraaydak.
Hayyiini hasab rahmatak !
160 Asaas kalaamak hagg
wa kulla chariiʼtak adaala ila l-abad.
161 Al-kubaaraat taradooni bala janiiye
wa laakin galbi ma yarjif illa le kalaamak.
162 Ana nafrah be kalaamak
misil al-ligi khaniime katiire.
163 Ana bakhadt wa harramt al-kidib
wa gaaʼid nihibb Tawraatak.
164 Sabʼa marraat fi l-yoom, ana nahmudak
wa da achaan adaalit chariiʼtak.
165 Fiyah salaam katiir le l-yihibbu Tawraatak
wa ma fi cheyy al-yitartiʼhum.
166 Ya Allah, ana khatteet achami fi najaatak
wa tabbagt gawaaniinak.
167 Nafsi tahfad wasiiyaatak
wa ana nihibbuhum ziyaada.
168 Wa ana nahfad faraaydak wa wasiiyaatak
achaan kulla duruubi, inta taʼarifhum.
169 Ya Allah, khalli siraakhi yawsalak
wa antiini fihim hasab kalaamak !
170 Khalli hiss munaadaati yawsalak
wa najjiini hasab kalaamak !
171 Khalli hamdak yisiil min lisaani
achaan inta allamtini churuutak.
172 Khalli lisaani yikhanni be kalaamak
achaan kulla gawaaniinak adaala.
173 Khalli iidak tafzaʼni
achaan ana azalt faraaydak.
174 Ya Allah, ana dawwart al-naja minnak
wa Tawraatak laziiz leyi.
175 Khalli nafsi tahya wa tahmudak
wa chariiʼtak tafzaʼni.
176 Ana misil khanamaay muwaddire.
Fattich abdak achaan ma nisiit gawaaniinak !
1 مَبْرُوكْ لِلْكَامِلِينْ فِي دَرِبْهُمْ
وَ يَمْشُوا حَسَبْ تَوْرَاةْ اللّٰهْ.
2 مَبْرُوكْ لِلْيَحْفَضَوْا وَصِيَّاتَهْ
وَ يِفَتُّشُوهْ بِكُلَّ قُلُوبْهُمْ.
3 أَكِيدْ، هُمَّنْ مَا يِسَوُّوا الْفَسَالَةْ
وَ يَمْشُوا فِي دُرُوبَهْ.
4 إِنْتَ أَمَرْت بِفَرَايْضَكْ
أَشَانْ يَحْفَضَوْهُمْ عَدِيلْ.
5 خَلِّي دُرُوبِي يَبْقَوْا ثَابْتِينْ
أَشَانْ نَحْفَضْ شُرُوطَكْ.
6 وَ بَيْدَا، عَيْب مَا يِسَوِّينِي
وَكِتْ نِفَكِّرْ فِي قَوَانِينَكْ.
7 نَشْكُرَكْ بِقَلِبْ تَمَامْ
وَكِتْ نِلْعَلَّمْ شَرِيعْتَكْ الْعَادِلَةْ.
8 أَنَا نَحْفَضْ شُرُوطَكْ،
مَا تِخَلِّينِي مَرَّةْ وَاحِدْ!
9 كِكَّيْف الصَّبِي يِعِيشْ فِي الطِّهَارَةْ؟
بِحَفَضَانْ كَلَامَكْ.
10 بِكُلَّ قَلْبِي فَتَّشْتَكْ،
مَا تِخَلِّينِي نِعِيرْ بَعِيدْ مِنْ قَوَانِينَكْ.
11 فِي قَلْبِي حَفَضْت وَعَدَكْ
أَشَانْ مَا نِسَوِّي ذَنِبْ ضِدَّكْ.
12 بَارَكْ اللّٰهْ!
عَلِّمْنِي شُرُوطَكْ!
13 بِلِسَانِي أَنَا حَجَّيْت
كُلَّ شَرِيعْتَكْ الْإِنْتَ قُلْتَهَا.
14 أَنَا فَرْحَانْ فِي طَرِيقْ وَصِيَّاتَكْ
مِثِلْ لِقِيتْ غُنَى.
15 أَنَا نِذَّكَّرْ فَرَايْضَكْ
وَ نِرَاقِبْ دُرُوبَكْ.
16 وَ نَفْرَحْ بِشُرُوطَكْ
وَ مَا نَنْسَى كَلَامَكْ.
17 سَوِّي لَيِّ الْخَيْر، أَنَا عَبْدَكْ
أَشَانْ نِعِيشْ وَ نَحْفَضْ كَلَامَكْ.
18 أَفْتَحْ عُيُونِي أَشَانْ نِشِيفْ
عَجَايِبْ تَوْرَاتَكْ.
19 أَنَا أَجْنَبِي فِي الْأَرْض،
مَا تِلَبِّدْ مِنِّي قَوَانِينَكْ.
20 نَفْسِي مُشْتَاقَةْ لِشَرِيعْتَكْ
فِي كُلَّ وَكِتْ.
21 وَ إِنْتَ تِهَدِّدْ الْمَلْعُونِينْ الْمُسْتَكْبِرِينْ
الْيِعِيرُوا بَعِيدْ مِنْ قَوَانِينَكْ.
22 بَعِّدْ مِنِّي الْمُعْيَارْ وَ الْحُقْرَةْ
أَشَانْ نَحْفَضْ وَصِيَّاتَكْ.
23 حَتَّى كَنْ الْمَسَائِيلْ يِلآمَرَوْا ضِدِّي،
أَنَا عَبْدَكْ نِذَّكَّرْ شُرُوطَكْ.
24 وَ وَصِيَّاتَكْ لَذِيذِينْ لَيِّ
وَ هُمَّنْ بَسْ مُسْتَشَارِينِي.
25 نَفْسِي وَاقْعَةْ فِي التُّرَابْ.
حَيِّينِي حَسَبْ كَلَامَكْ!
26 أَنَا حَجَّيْت لَيْك بِحَالِي وَ إِنْتَ رَدَّيْت لَيِّ.
عَلِّمْنِي شُرُوطَكْ!
27 فَهِّمْنِي دَرِبْ فَرَايْضَكْ
وَ أَنَا نِذَّكَّرْ عَجَايْبَكْ.
28 دُمُوعِي جَرَوْا مِنْ الْحِزِنْ،
قَوِّمْنِي حَسَبْ كَلَامَكْ.
29 بَعِّدْنِي مِنْ طَرِيقْ الْكِدِبْ
وَ أَرْحَمْنِي بِتَوْرَاتَكْ.
30 أَنَا عَزَلْت دَرِبْ الْحَقّ
وَ مَشَيْت حَسَبْ شَرِيعْتَكْ.
31 أَنَا مُنْرَبِطْ فِي وَصِيَّاتَكْ،
مَا تِخَلِّينِي فِي الْعَيْب، يَا اللّٰهْ.
32 نَجْرِي فِي دَرِبْ قَوَانِينَكْ
أَشَانْ إِنْتَ تِرَيِّحْ قَلْبِي.
33 يَا اللّٰهْ، وَصِّفْنِي شُرُوطَكْ
وَ نَحْفَضْهُمْ دَايْماً.
34 أَنْطِينِي الْفِهِمْ لِنِتَابِعْ تَوْرَاتَكْ
وَ نَحْفَضَهْ بِكُلَّ قَلْبِي.
35 وَدِّينِي فِي طَرِيقْ قَوَانِينَكْ
أَشَانْ بَيْهُمْ نَبْقَى فَرْحَانْ.
36 مَيِّلْ قَلْبِي عَلَيْ وَصِيَّاتَكْ
وَ مَا تِمَيِّلَهْ عَلَيْ الْمَالْ الْحَرَامْ.
37 بَعِّدْ عُيُونِي مِنْ الشَّوْفِينْ الْمَا نَافِعْ
وَ عَيِّشْنِي فِي دَرْبَكْ.
38 حَقِّقْ وَعَدَكْ لِعَبْدَكْ،
الْإِنْتَ وَاعَدْت بَيَّهْ الْيَخَافَوْا مِنَّكْ.
39 بَعِّدْ مِنِّي الْمُعْيَارْ النَّخَافْ مِنَّهْ
أَشَانْ شَرِيعْتَكْ هِي عَدِيلَةْ.
40 دَاهُو أَنَا نِحِبّ فَرَايْضَكْ،
عَيِّشْنِي بِعَدَالْتَكْ!
41 خَلِّي رَحْمَتَكْ تَنْزِلْ فَوْقِي، يَا اللّٰهْ،
وَ نَجَاتَكْ تَجِي حَسَبْ كَلَامَكْ
42 لِنُرُدّ لِلْيِعَيِّرْنِي
أَشَانْ أَنَا مُتَوَكِّلْ فِي كَلَامَكْ.
43 مَا تِخَلِّي لِسَانِي يِبَارِي بَعِيدْ مِنْ كَلَامْ الْحَقّ
أَشَانْ أَنَا نُخُطّ عَشَمِي فِي شَرِيعْتَكْ.
44 وَ نَحْفَضْ تَوْرَاتَكْ
دَايْماً وَ إِلَى الْأَبَدْ.
45 وَ أَنَا نُرُوغْ بِحُرِّيَّةْ
أَشَانْ فَتَّشْت فَرَايْضَكْ.
46 وَ نِحَجِّي بِوَصِيَّاتَكْ قِدَّامْ الْمُلُوكْ
وَ نَقْعُدْ بَلَا عَيْب.
47 وَ نَفْرَحْ بِقَوَانِينَكْ
النِّحِبُّهُمْ كَتِيرْ.
48 نَرْفَعْ إِيدَيْنِي لِقَوَانِينَكْ النِّحِبُّهُمْ
وَ نِذَّكَّرْ شُرُوطَكْ.
49 فَكِّرْ فِي كَلَامَكْ الْقُلْتَهْ لَيِّ أَنَا عَبْدَكْ
الْفَوْقَهْ أَنَا خَطَّيْت عَشَمِي.
50 وَ دَاهُو الْيِصَبِّرْنِي فِي التَّعَبْ،
هُو كَلَامَكْ الْيِحَيِّينِي.
51 الْمُسْتَكْبِرِينْ أَشَّمَّتَوْا فَوْقِي كَتِيرْ مَرَّةْ وَاحِدْ
لَاكِنْ أَنَا مَا بَارَيْت بَعِيدْ مِنْ تَوْرَاتَكْ.
52 نِذَّكَّرْ شَرِيعْتَكْ مِنْ زَمَانْ، يَا اللّٰهْ،
وَ بَيْدَا، نِصَبِّرْ نَفْسِي.
53 وَ الزَّعَلْ كَرَبْنِي فِي شَانْ الْعَاصِيِينْ
الْخَلَّوْا تَوْرَاتَكْ.
54 وَ الْغِنَيْ جَايِ لَيِّ مِنْ شُرُوطَكْ
فِي الْأَرْض الْأَنَا قَاعِدْ فَوْقهَا مِثِلْ أَجْنَبِي.
55 بِاللَّيْل نِذَّكَّرْ أُسْمَكْ، يَا اللّٰهْ،
لِنَحْفَضْ تَوْرَاتَكْ.
56 وَ حَفَضَانْ فَرَايْضَكْ
دَا بَسْ حَقِّي حَلَالِي.
57 يَا اللّٰهْ، أَنَا قُلْت:
«خِدِمْتِي هِي حَفَضَانْ كَلَامَكْ.»
58 وَ بِكُلَّ قَلْبِي نِفَتِّشْ رِضَاكْ،
أَرْحَمْنِي حَسَبْ كَلَامَكْ.
59 أَنَا فَكَّرْت فِي دُرُوبِي
وَ قَبَّلْت لِوَصِيَّاتَكْ.
60 وَ بَلَا تَأخِيرْ عَجَلَةْ كَيْ،
أَنَا حَفَضْت قَوَانِينَكْ.
61 حُبَالْ الْعَاصِيِينْ كَرَبَوْنِي
وَ مَا نِسِيتْ تَوْرَاتَكْ.
62 وَ فِي أُسْط اللَّيْل، نُقُمّ نَشْكُرَكْ
فِي شَانْ شَرِيعْتَكْ الْعَادِلَةْ.
63 أَنَا رَفِيقْ كُلَّ الْيَخَافَوْا مِنَّكْ
وَ رَفِيقْ الْيِطَبُّقُوا فَرَايْضَكْ.
64 يَا اللّٰهْ، رَحْمَتَكْ تَمْلَا الْأَرْض.
عَلِّمْنِي شُرُوطَكْ!
65 يَا اللّٰهْ، إِنْتَ سَوَّيْت الْخَيْر
لَيِّ أَنَا عَبْدَكْ حَسَبْ كَلَامَكْ.
66 عَلِّمْنِي الْفِكِرْ الْعَدِيلْ وَ الْعِلِمْ
أَشَانْ أَنَا آمَنْت بِقَوَانِينَكْ.
67 وَ قَبُلْ مَا نَلْقَى إِهَانَةْ، أَنَا وَدَّرْت
وَ لَاكِنْ هَسَّعْ، حَفَضْت كَلَامَكْ.
68 إِنْتَ عَدِيلْ وَ تِسَوِّي الْخَيْر،
عَلِّمْنِي شُرُوطَكْ!
69 الْمُسْتَكْبِرِينْ وَسَّخَوْنِي بِالْكِدِبْ
وَ أَنَا كَمَانْ نَحْفَضْ فَرَايْضَكْ بِكُلَّ قَلْبِي.
70 قَلِبْهُمْ جَامِدْ مِثِلْ الشَّحَمْ
وَ لَاكِنْ أَنَا نَفْرَحْ بِتَوْرَاتَكْ.
71 أَخَيْر لَيِّ نَلْقَى الْإِهَانَةْ
أَشَانْ نِلْعَلَّمْ شُرُوطَكْ.
72 أَخَيْر لَيِّ التَّوْرَاةْ الْيَمْرُقْ مِنْ خَشْمَكْ
مِنْ آلَافْ حُجَارْ الْفُضَّةْ وَ جِنَيْهَاتْ الدَّهَبْ.
73 إِيدَيْنَكْ عَدَّلَوْنِي وَ كَوَّنَوْنِي.
أَنْطِينِي الْفِهِمْ أَشَانْ نِلْعَلَّمْ قَوَانِينَكْ!
74 الْيَخَافَوْا مِنَّكْ يِشِيفُونِي وَ يَفْرَحَوْا
أَشَانْ بِعَشَمْ، أَنَا نَرْجَى كَلَامَكْ.
75 يَا اللّٰهْ، أَنَا نَعَرِفْ كَدَرْ شَرِيعْتَكْ عَادِلَةْ
وَ بِأَمَانَكْ، إِنْتَ دَسَّيْتنِي فِي الْإِهَانَةْ.
76 وَ بِرَحْمَتَكْ، صَبِّرْنِي
حَسَبْ كَلَامَكْ لِعَبْدَكْ.
77 وَ خَلِّي رَحْمَتَكْ تَنْزِلْ فَوْقِي وَ نَحْيَى
أَشَانْ تَوْرَاتَكْ يَبْقَى لَيِّ لَذِيذْ.
78 عَيِّبْ الْمُسِيئِينْ الْيِتَعُّبُونِي بِكِدِبْ
وَ أَنَا كَمَانْ نِذَّكَّرْ فَرَايْضَكْ.
79 خَلِّي يَجُوا لَيِّ الْيَخَافَوْا مِنَّكْ
وَ الْيَعَرْفُوا وَصِيَّاتَكْ.
80 وَ خَلِّي قَلْبِي يُكُونْ تَمَامْ بِطَبِّقِينْ شُرُوطَكْ
أَشَانْ مَا نَلْقَى عَيْب قِدَّامَكْ.
81 أَنَا عِيِيتْ مِنْ فَتِّشِينْ النَّجَاةْ
وَ بِعَشَمْ، نَرْجَى كَلَامَكْ.
82 عُيُونِي عِيَوْا مِنْ فَتِّشِينْ كَلَامَكْ
وَ أَنَا قُلْت: «مَتَى تِصَبِّرْنِي؟»
83 أَنَا قِدِمْت مِثِلْ قِرْبَةْ فِي أُسْط الدُّخَّانْ
لَاكِنْ أَبَداً مَا نَنْسَى شُرُوطَكْ.
84 كَمْ أَيَّامْ حَيَاةْ عَبْدَكْ؟
وَ مَتَى تِشَارِعْ الْيِطَارُدُونِي؟
85 الْمُسْتَكْبِرِينْ يَنْكُتُوا نُقَارْ قِدَّامِي
وَ دَا مَا مُوَافِقْ لِتَوْرَاتَكْ.
86 كُلَّ قَوَانِينَكْ صِدِقْ.
أَفْزَعْنِي! هُمَّنْ يِطَارُدُونِي بِكِدِبْ.
87 قَرِيبْ يُقُشُّونِي مِنْ الْأَرْض
وَ بَيْدَا كُلَ، أَنَا مَا خَلَّيْت فَرَايْضَكْ.
88 حَيِّينِي حَسَبْ رَحْمَتَكْ
أَشَانْ نَحْفَضْ مُعَاهَدَتَكْ!
89 يَا اللّٰهْ، كَلَامَكْ ثَابِتْ
دَايْماً فِي السَّمَاوَاتْ.
90 وَ صِدْقَكْ دَايِمْ مِنْ ذُرِّيَّةْ لِذُرِّيَّةْ
وَ إِنْتَ ثَبَّتْ الْأَرْض وَ دِي هِي قَاعِدَةْ.
91 وَ كُلَّ شَيّءْ قَاعِدْ الْيَوْم حَسَبْ شَرِيعْتَكْ
أَشَانْ أَيِّ مَخْلُوقْ يَخْدِمْ لَيْك.
92 كَنْ تَوْرَاتَكْ مَا بِقِي لَيِّ حَلُو،
أَنَا نِدَّمَّرْ مِنْ التَّعَبْ.
93 أَبَداً مَا نَنْسَى فَرَايْضَكْ
أَشَانْ بَيْهُمْ إِنْتَ حَيَّيْتنِي.
94 أَيْوَى، نَجِّينِي! أَنَا هَنَاكْ
أَشَانْ قَاعِدْ نِفَتِّشْ فَرَايْضَكْ.
95 الْعَاصِيِينْ خَطَّوْا عَشَمْهُمْ فِي دَمَارِي
وَ أَنَا كَمَانْ نُخُطّ بَالِي فِي وَصِيَّاتَكْ.
96 كُلِّ شَيّءْ كَامِلْ عِنْدَهْ حُدُودْ
وَ لَاكِنْ قَوَانِينَكْ مَا عِنْدُهُمْ حَدّ.
97 كَمْ مَرَّاتْ أَنَا حَبَّيْت تَوْرَاتَكْ
وَ قَاعِدْ نِفَكِّرْ فَوْقَهْ كُلَّ يَوْم.
98 أَنَا كَرَبْت قَوَانِينَكْ دَايْماً لِنَفْسِي
وَ هُمَّنْ سَوَّوْنِي حَكِيمْ مِنْ عُدْوَانِي.
99 أَنَا بِقِيتْ عَالِمْ مِنْ سَادَاتِي
أَشَانْ وَصِيَّاتَكْ بَسْ النِّفَكِّرْ فَوْقهُمْ.
100 أَنَا فَاهِمْ مِنْ الشِّيَّابْ
أَشَانْ حَفَضْت فَرَايْضَكْ.
101 مِنْ كُلَّ دُرُوبْ الْفَسَالَةْ كَرَبْت رِجِلَيْنِي
أَشَانْ نَحْفَضْ كَلَامَكْ.
102 وَ مِنْ شَرِيعْتَكْ أَنَا مَا نِبَعِّدْ
أَشَانْ إِنْتَ بَسْ التِّوَصِّينِي.
103 كَمْ مَرَّاتْ كَلَامَكْ يَبْقَى حَلُو فِي خَشْمِي
زِيَادَةْ مِنْ الْعَسَلْ فِي لِسَانِي.
104 وَ بِفَرَايْضَكْ أَنَا نَفْهَمْ
وَ بِسَبَبْ دَا، نَكْرَهْ كُلَّ دُرُوبْ الْكِدِبْ.
105 وَ كَلَامَكْ فَانُوسْ لِخَطْوَاتِي
وَ نُورْ فِي دَرْبِي.
106 أَنَا نَحْلِفْ وَ نَقْعُدْ فِي حَلِيفْتِي
كَدَرْ نَحْفَضْ شَرِيعْتَكْ الْعَادِلَةْ.
107 يَا اللّٰهْ، أَنَا لِقِيتْ إِهَانَةْ زِيَادَةْ،
حَيِّينِي حَسَبْ كَلَامَكْ!
108 يَا اللّٰهْ، أَقْبَلْ مُنَادَاتِي مِثِلْ هَدِيَّةْ الشُّكُرْ
وَ عَلِّمْنِي شَرِيعْتَكْ!
109 حَيَاتِي كُلَّ يَوْم فِي خَطَرْ
وَ لَاكِنْ مَا أَنَا نِسِيتْ تَوْرَاتَكْ.
110 الْعَاصِيِينْ كَجَّوْا لَيِّ شَرَكْ
لَاكِنْ أَنَا مَا وَدَّرْت بَعِيدْ مِنْ فَرَايْضَكْ.
111 وَ وَصِيَّاتَكْ بِقَوْا لَيِّ وَرَثَةْ دَايْمَةْ
وَ سُرُورْ قَلْبِي.
112 أَنَا مَيَّلْت قَلْبِي لِطَبِّقِينْ شُرُوطَكْ
وَ دَا يُكُونْ دَايْماً لَحَدِّي النِّهَايَةْ.
113 نَكْرَهْ النَّاسْ الْقُلُوبْهُمْ تِنَيْن
وَ لَاكِنْ أَنَا نِحِبّ تَوْرَاتَكْ.
114 إِنْتَ بَسْ مَلْجَئِي وَ دَرَقَتِي
وَ بِعَشَمْ، نَرْجَى كَلَامَكْ.
115 بَعُّدُوا مِنِّي، يَا الْفَسْلِينْ،
أَشَانْ نَحْفَضْ قَوَانِينْ إِلٰـهِي!
116 سَاعِدْنِي حَسَبْ كَلَامَكْ وَ نَحْيَى
وَ فِي عَشَمِي، الْعَيْب مَا يِغَطِّينِي.
117 سَاعِدْنِي أَشَانْ نَنْجَى
وَ دَايْماً نِفَكِّرْ فِي شُرُوطَكْ.
118 إِنْتَ أَبَيْت كُلَّ الْيِبَعُّدُوا مِنْ شُرُوطَكْ
أَشَانْ يُغُشُّوا بِكِدِبْ.
119 إِنْتَ قَشَّيْت كُلَّ الْعَاصِيِينْ مِنْ الْأَرْض مِثِلْ الْوَسَخْ
وَ فِي شَانْ دَا، حَبَّيْت وَصِيَّاتَكْ.
120 جِسْمِي رَجَفْ مِنْ الْخَوْف قِدَّامَكْ
وَ مِنْ الرُّعُبْ قِدَّامْ شَرِيعْتَكْ.
121 أَنَا طَبَّقْت الشَّرِيعَةْ وَ الْعَدَالَةْ،
مَا تِسَلِّمْنِي لِلظَّالِمِينْ!
122 أَبْقَى ضَمِينْ لِخَيْر عَبْدَكْ
وَ مَا تِخَلِّي الْمُسِيئِينْ يَظُلْمُونِي.
123 عُيُونِي عِيَوْا مِنْ فَتِّشِينْ كَلَامَكْ الْعَادِلْ
وَ رَاجِيِينْ نَجَاتَكْ.
124 سَوِّي لِعَبْدَكْ حَسَبْ رَحْمَتَكْ
وَ عَلِّمْنِي شُرُوطَكْ!
125 أَنْطِينِي الْفِهِمْ، أَنَا عَبْدَكْ
أَشَانْ نَعَرِفْ عَدِيلْ وَصِيَّاتَكْ.
126 يَا اللّٰهْ! الْوَكِتْ جَاءْ لِتُقُمّ
أَشَانْ النَّاسْ أَبَوْا تَوْرَاتَكْ.
127 وَ لَاكِنْ أَنَا نِحِبّ قَوَانِينَكْ
زِيَادَةْ مِنْ الدَّهَبْ
أَيْوَى، زِيَادَةْ مِنْ الدَّهَبْ الصَّافِي.
128 وَ خَلَاصْ نِشِيفْ كُلَّ فَرَايْضَكْ عَدِيلِينْ
وَ نَكْرَهْ كُلَّ طُرُقْ الْكِدِبْ.
129 وَصِيَّاتَكْ عَجِيبِينْ
وَ أَشَانْ دَا، نَحْفَضْهُمْ.
130 تَوْضِيحْ كَلَامَكْ يَنْطِي نُورْ
وَ يَنْطِي الْفِهِمْ لِلْجُهَّالْ.
131 أَنَا فَتَحْت خَشْمِي وَ نَاهَجْت
أَشَانْ مُشْتَاقْ لِقَوَانِينَكْ.
132 وَجِّهْ عَلَيِّ وَ حِنّ فَوْقِي
حَسَبْ عَدَالْتَكْ لِلنَّاسْ الْيِحِبُّوا أُسْمَكْ.
133 بِكَلَامَكْ، ثَبِّتْ خَطْوَاتِي
وَ مَا تِقَدِّرْ الشَّرّ فَوْقِي!
134 أَفْدَانِي مِنْ مُضَايَقَةْ النَّاسْ
وَ نَحْفَضْ فَرَايْضَكْ.
135 وَجِّهْ نُورْ وِجْهَكْ عَلَيْ عَبْدَكْ
وَ عَلِّمْنِي شُرُوطَكْ!
136 مِنْ عُيُونِي، دُمُوعِي نَزَلَوْا مِثِلْ وُدْيَانْ
أَشَانْ النَّاسْ مَا حَفَضَوْا تَوْرَاتَكْ.
137 يَا اللّٰهْ، إِنْتَ صَادِقْ
وَ شَرِيعْتَكْ عَدِيلَةْ.
138 إِنْتَ أَمَرْت وَ وَصَّفْت الْعَدَالَةْ
وَ وَصِيَّاتَكْ صَادِقِينْ زِيَادَةْ.
139 وَ غِيرْتِي سَكَّتَتْنِي
وَكِتْ عُدْوَانِي نِسَوْا كَلَامَكْ.
140 كَلَامَكْ مُؤَكَّدْ مَرَّةْ وَاحِدْ
وَ عَبْدَكْ يِحِبَّهْ.
141 أَنَا مِسْكِينْ وَ مَحْقُورْ
وَ لَاكِنْ مَا نَنْسَى فَرَايْضَكْ.
142 عَدَالْتَكْ تَقْعُدْ إِلَى الْأَبَدْ
وَ تَوْرَاتَكْ حَقّ.
143 تَعَبْ الضِّيقَةْ لِحِقْنِي
وَ لَاكِنْ قَوَانِينَكْ لَذِيذِينْ لَيِّ.
144 عَدَالَةْ وَصِيَّاتَكْ تَقْعُدْ إِلَى الْأَبَدْ.
أَنْطِينِي الْفِهِمْ لِنَحْيَى!
145 يَا اللّٰهْ، أَنَا نَادَيْت بِكُلَّ قَلْبِي،
رُدّ لَيِّ وَ نَحْفَضْ شُرُوطَكْ.
146 أَنَا نَادَيْتَكْ: «نَجِّينِي
وَ نَحْفَضْ وَصِيَّاتَكْ!»
147 قَمَّيْت قَبُلْ الشَّقَاقْ وَ طَلَبْت فَزَعَكْ
وَ بِعَشَمْ، نَرْجَى كَلَامَكْ.
148 عُيُونِي أَنْفَتَحَوْا بِاللَّيْل
وَ أَذَّكَّرْت كَلَامَكْ.
149 أَسْمَعْ حِسِّي حَسَبْ رَحْمَتَكْ.
يَا اللّٰهْ، حَيِّينِي حَسَبْ شَرِيعْتَكْ!
150 الْيِسَوُّوا فِعِلْ الشَّيْن قَرَّبَوْا لَيِّ
وَ بَعَّدَوْا مِنْ تَوْرَاتَكْ.
151 يَا اللّٰهْ، إِنْتَ قَرِيبْ لَيِّ
وَ كُلَّ قَوَانِينَكْ حَقّ.
152 مِنْ زَمَانْ، أَنَا نَعَرِفْ وَصِيَّاتَكْ
وَ إِنْتَ أَسَّسْتَهَا لِلْأَبَدْ.
153 شِيفْ تَعَبِي وَ خَلِّصْنِي
أَشَانْ أَنَا مَا نِسِيتْ تَوْرَاتَكْ.
154 أَحْمِينِي وَ أَفْدَانِي.
حَيِّينِي حَسَبْ كَلَامَكْ!
155 النَّجَاةْ بَعِيدْ مِنْ الْعَاصِيِينْ
أَشَانْ مَا فَتَّشَوْا شُرُوطَكْ.
156 يَا اللّٰهْ، رَحْمَتَكْ وَسِيعَةْ.
حَيِّينِي حَسَبْ شَرِيعْتَكْ!
157 الْيِطَارُدُونِي وَ خُصْمَانِي كَتِيرِينْ
وَ لَاكِنْ أَنَا مَا بَارَيْت مِنْ وَصِيَّاتَكْ.
158 أَنَا نِشِيفْ الْخَايْنِينْ بِبُغُضْ
أَشَانْ مَا حَفَضَوْا كَلَامَكْ.
159 يَا اللّٰهْ، شِيفْ! أَنَا نِحِبّ فَرَايْضَكْ.
حَيِّينِي حَسَبْ رَحْمَتَكْ!
160 أَسَاسْ كَلَامَكْ حَقّ
وَ كُلَّ شَرِيعْتَكْ عَدَالَةْ إِلَى الْأَبَدْ.
161 الْكُبَارَاتْ طَرَدَوْنِي بَلَا جَنِيَّةْ
وَ لَاكِنْ قَلْبِي مَا يَرْجِفْ إِلَّا لِكَلَامَكْ.
162 أَنَا نَفْرَحْ بِكَلَامَكْ
مِثِلْ اللِّقِي غَنِيمَةْ كَتِيرَةْ.
163 أَنَا بَغَضْت وَ حَرَّمْت الْكِدِبْ
وَ قَاعِدْ نِحِبّ تَوْرَاتَكْ.
164 سَبْعَةْ مَرَّاتْ فِي الْيَوْم، أَنَا نَحْمُدَكْ
وَ دَا أَشَانْ عَدَالَةْ شَرِيعْتَكْ.
165 فِيَّهْ سَلَامْ كَتِيرْ لِلْيِحِبُّوا تَوْرَاتَكْ
وَ مَا فِي شَيّءْ الْيِتَرْتِعْهُمْ.
166 يَا اللّٰهْ، أَنَا خَطَّيْت عَشَمِي فِي نَجَاتَكْ
وَ طَبَّقْت قَوَانِينَكْ.
167 نَفْسِي تَحْفَضْ وَصِيَّاتَكْ
وَ أَنَا نِحِبُّهُمْ زِيَادَةْ.
168 وَ أَنَا نَحْفَضْ فَرَايْضَكْ وَ وَصِيَّاتَكْ
أَشَانْ كُلَّ دُرُوبِي، إِنْتَ تَعَرِفْهُمْ.
169 يَا اللّٰهْ، خَلِّي صِرَاخِي يَوْصَلَكْ
وَ أَنْطِينِي فِهِمْ حَسَبْ كَلَامَكْ!
170 خَلِّي حِسّ مُنَادَاتِي يَوْصَلَكْ
وَ نَجِّينِي حَسَبْ كَلَامَكْ!
171 خَلِّي حَمْدَكْ يِسِيلْ مِنْ لِسَانِي
أَشَانْ إِنْتَ عَلَّمْتِنِي شُرُوطَكْ.
172 خَلِّي لِسَانِي يِغَنِّي بِكَلَامَكْ
أَشَانْ كُلَّ قَوَانِينَكْ عَدَالَةْ.
173 خَلِّي إِيدَكْ تَفْزَعْنِي
أَشَانْ أَنَا عَزَلْت فَرَايْضَكْ.
174 يَا اللّٰهْ، أَنَا دَوَّرْت النَّجَاةْ مِنَّكْ
وَ تَوْرَاتَكْ لَذِيذْ لَيِّ.
175 خَلِّي نَفْسِي تَحْيَى وَ تَحْمُدَكْ
وَ شَرِيعْتَكْ تَفْزَعْنِي.
176 أَنَا مِثِلْ غَنَمَايْ مُوَدِّرَةْ.
فَتِّشْ عَبْدَكْ أَشَانْ مَا نِسِيتْ قَوَانِينَكْ!
