Khine hana l-hajj le Madiinat al-Khudus
1 Ya Allah, fakkir fi Dawuud
wa chiif kulla taʼabah.
2 Hu halaf le Allah
wa sawwa nazir le l-Jabbaar,
le Ilaah Yaakhuub wa gaal :
3 «Ma nadkhul fi kheemti
wa la nargud fi furaachi
4 wa la nikhammid uyuuni
wa la nikhalli al-noom yarkhi jufuuni,
5 gabul ma nalga bakaan le Allah
al-yabga maskan leyah hu
al-Jabbaar, Ilaah Yaakhuub.»
6 Aywa, fi Afraata simiʼna khabar
hana sanduug muʼaahadat Allah
wa fi zereʼ Yaʼar ligiinaah.
7 Yalla namchu maskanah
wa nasjudu giddaamah !
8 Ya Allah, gumm wa taʼaal le maskanak
inta wa sanduug al-muʼaahada
al-hu alaamat gudurtak.
9 Khalli naasak rujaal al-diin yalbaso al-adaala
misil yalbaso khulgaanhum.
Wa khalli naasak al-saalihiin
yikhannu min farahhum.
10 Wa fi chaan al-hubb le Dawuud abdak,
ma tikhalliih,
hu al-malik al-inta masahtah wa darrajtah.
11 Allah halaf le Dawuud
wa akkad leyah wa gaal :
«Baʼadak ana nidarrij naadum
min zurriiytak fi mamlakatak.
12 Wa kan iyaalak yihtarumu muʼaahadati
wa awaamiri al-nantiihum leehum,
khalaas iyaalhum kula
nidarrijhum muluuk ila l-abad.»
13 Achaan Allah azal jabal Sahyuun
wa dawwar yaskun foogah
14 wa gaal : «Da bakaan al-naskun foogah ila l-abad
wa naskun foogah achaan ana azaltah.
15 Wa nibaarik maʼaachha wa nikattirah
wa nachbiʼ masaakiinha.
16 Nilabbis naasha rujaal al-diin be khulgaan al-naja
wa naasha al-saalihiin yikhannu min farahhum.
17 «Fi Sahyuun, nidarrij malik gaadir
min iyaal Dawuud
wa misil nuur, nisabbitah hu
al-ana masahtah.
18 Wa nilabbis udwaanah khulgaan al-eeb
laakin hu kamaan, al-taaj yiraari fi raasah.»
غِنَيْ هَنَا الْحَجّ لِمَدِينَةْ الْقُدُسْ
1 يَا اللّٰهْ، فَكِّرْ فِي دَاوُدْ
وَ شِيفْ كُلَّ تَعَبَهْ.
2 هُو حَلَفْ لِلّٰهْ
وَ سَوَّى نَذِرْ لِلْجَبَّارْ،
لِإِلٰـهْ يَعْقُوبْ وَ قَالْ:
3 «مَا نَدْخُلْ فِي خَيْمِتِي
وَ لَا نَرْقُدْ فِي فُرَاشِي
4 وَ لَا نِغَمِّضْ عُيُونِي
وَ لَا نِخَلِّي النَّوْم يَرْخِي جُفُونِي،
5 قَبُلْ مَا نَلْقَى بَكَانْ لِلّٰهْ
الْيَبْقَى مَسْكَنْ لَيَّهْ هُو
الْجَبَّارْ، إِلٰـهْ يَعْقُوبْ.»
6 أَيْوَى، فِي أَفْرَاتَةْ سِمِعْنَا خَبَرْ
هَنَا صَنْدُوقْ مُعَاهَدَةْ اللّٰهْ
وَ فِي زَرَعْ يَعَرْ لِقِينَاهْ.
7 يَلَّا نَمْشُوا مَسْكَنَهْ
وَ نَسْجُدُوا قِدَّامَهْ!
8 يَا اللّٰهْ، قُمّ وَ تَعَالْ لِمَسْكَنَكْ
إِنْتَ وَ صَنْدُوقْ الْمُعَاهَدَةْ
الْهُو عَلَامَةْ قُدُرْتَكْ.
9 خَلِّي نَاسَكْ رُجَالْ الدِّينْ يَلْبَسَوْا الْعَدَالَةْ
مِثِلْ يَلْبَسَوْا خُلْقَانْهُمْ.
وَ خَلِّي نَاسَكْ الصَّالِحِينْ
يِغَنُّوا مِنْ فَرَحْهُمْ.
10 وَ فِي شَانْ الْحُبّ لِدَاوُدْ عَبْدَكْ،
مَا تِخَلِّيهْ،
هُو الْمَلِكْ الْإِنْتَ مَسَحْتَهْ وَ دَرَّجْتَهْ.
11 اللّٰهْ حَلَفْ لِدَاوُدْ
وَ أَكَّدْ لَيَّهْ وَ قَالْ:
«بَعَدَكْ أَنَا نِدَرِّجْ نَادُمْ
مِنْ ذُرِّيّتَكْ فِي مَمْلَكَتَكْ.
12 وَ كَنْ عِيَالَكْ يِحْتَرُمُوا مُعَاهَدَتِي
وَ أَوَامِرِي النَّنْطِيهُمْ لَيْهُمْ،
خَلَاصْ عِيَالْهُمْ كُلَ
نِدَرِّجْهُمْ مُلُوكْ إِلَى الْأَبَدْ.»
13 أَشَانْ اللّٰهْ عَزَلْ جَبَلْ صَهْيُون
وَ دَوَّرْ يَسْكُنْ فَوْقَهْ
14 وَ قَالْ: «دَا بَكَانْ النَّسْكُنْ فَوْقَهْ إِلَى الْأَبَدْ
وَ نَسْكُنْ فَوْقَهْ أَشَانْ أَنَا عَزَلْتَهْ.
15 وَ نِبَارِكْ مَعَاشْهَا وَ نِكَتِّرَهْ
وَ نَشْبِعْ مَسَاكِينْهَا.
16 نِلَبِّسْ نَاسْهَا رُجَالْ الدِّينْ بِخُلْقَانْ النَّجَاةْ
وَ نَاسْهَا الصَّالِحِينْ يِغَنُّوا مِنْ فَرَحْهُمْ.
17 «فِي صَهْيُون، نِدَرِّجْ مَلِكْ قَادِرْ
مِنْ عِيَالْ دَاوُدْ
وَ مِثِلْ نُورْ، نِثَبِّتَهْ هُو
الْأَنَا مَسَحْتَهْ.
18 وَ نِلَبِّسْ عُدْوَانَهْ خُلْقَانْ الْعَيْب
لَاكِنْ هُو كَمَانْ، التَّاجْ يِرَارِي فِي رَاسَهْ.»
