Wasiiye le kabiir al-khannaayiin : Mazmuur le Dawuud
1 Ya Allah, inta takchif daakhili
wa taʼarifni.
2 Inta taʼarif wakit nagood wa wakit nugumm
wa min baʼiid, tafham afkaari.
3 Inta tiraakhib safari wa noomi
wa taʼarif kulla duruubi.
4 Gabul ma naftah khachmi,
inta taʼarif kalaami, ya Allah !
5 Waraayi wa giddaami, inta muhawwigni
wa khatteet iidak foogi.
6 Di maʼrafa ajiibe, faayteeni.
Wa ma nagdar nalhagha, hi foog minni.
7 Ween namchi baʼiid min ruuhak ?
Ween najri min hadaratak ?
8 Kan ana talaʼt fi l-sama, inta gaaʼid
wa kan ragadt maʼa l-maytiin, inta mawjuud.
9 Kan chilt janaahe al-fajur wa tirt
wa kan khaadi le l-bahar,
10 hinaak kula iidak tuguudni
wa zeenaaytak takrubni.
11 Wa ana gult : «Khalli al-dalaam yazrutni
wa l-nuur al-muhawwigni yabga leel.»
12 Hatta al-dalaam leek inta, ma dalaam.
Al-leel yabga nuur misil al-nahaar
wa l-dalaam misil al-nuur.
13 Inta bas al-khalagt daakhili
wa kawwantini fi batun ammi.
14 Nachkurak achaan khalagtini be tariiga ajiibe.
Aʼmaalak kulluhum yikhawwufu
wa ana niʼajjib fooghum marra waahid.
15 Ma fi cheyy min jismi mulabbad leek
wakit sawweetni be sirr
wa kawwantini fi batun ammi.
16 Kan ana almi fi batun ammi kula,
inta chiftini
wa katabt fi kitaabak kulli ayyaami
gabul waahid minhum ma bigi.
17 Ya Rabb ! Afkaarak ma yinʼarfu leyi
wa adadhum kabiir ziyaada !
18 Kan nahsibhum, humman katiiriin min al-ramla
wa la nafham kulla afkaarak.
19 Ya Rabb ! Nitmanna taktul al-aasi !
Khalli rujaal al-damm yibaʼʼudu minni !
20 Udwaanak yihajju beek le yilʼaamaro
wa yarfaʼo hissuhum be kidib.
21 Ya Allah ! Nakrah al-yakrahook
wa nabkhud al-yihaarubuuk.
22 Ana nakrahhum aakhir karaahiiye
wa humman bigo udwaani ana kula.
23 Ya Rabb ! Akchif daakhili wa aʼarif galbi
wa jarribni wa aʼarif hammi.
24 Chiifni kan gaaʼid fi l-derib al-hawaan
wa guudni fi l-derib al-adiil al-daayim.
وَصِيَّةْ لِكَبِيرْ الْغَنَّايِينْ: مَزْمُورْ لِدَاوُدْ
1 يَا اللّٰهْ، إِنْتَ تَكْشِفْ دَاخِلِي
وَ تَعَرِفْنِي.
2 إِنْتَ تَعَرِفْ وَكِتْ نَقْعُدْ وَ وَكِتْ نُقُمّ
وَ مِنْ بَعِيدْ، تَفْهَمْ أَفْكَارِي.
3 إِنْتَ تِرَاقِبْ سَفَرِي وَ نَوْمِي
وَ تَعَرِفْ كُلَّ دُرُوبِي.
4 قَبُلْ مَا نَفْتَحْ خَشْمِي،
إِنْتَ تَعَرِفْ كَلَامِي، يَا اللّٰهْ!
5 وَرَايِ وَ قِدَّامِي، إِنْتَ مُحَوِّقْنِي
وَ خَطَّيْت إِيدَكْ فَوْقِي.
6 دِي مَعْرَفَةْ عَجِيبَةْ، فَايْتَيْنِي.
وَ مَا نَقْدَرْ نَلْحَقْهَا، هِي فَوْق مِنِّي.
7 وَيْن نَمْشِي بَعِيدْ مِنْ رُوحَكْ؟
وَيْن نَجْرِي مِنْ حَضَرَتَكْ؟
8 كَنْ أَنَا طَلَعْت فِي السَّمَاءْ، إِنْتَ قَاعِدْ
وَ كَنْ رَقَدْت مَعَ الْمَيْتِينْ، إِنْتَ مَوْجُودْ.
9 كَنْ شِلْت جَنَاحَيْ الْفَجُرْ وَ طِرْت
وَ كَنْ غَادِي لِلْبَحَرْ،
10 هِنَاكْ كُلَ إِيدَكْ تُقُودْنِي
وَ زَيْنَايْتَكْ تَكْرُبْنِي.
11 وَ أَنَا قُلْت: «خَلِّي الضَّلَامْ يَزْرُطْنِي
وَ النُّورْ الْمُحَوِّقْنِي يَبْقَى لَيْل.»
12 حَتَّى الضَّلَامْ لَيْك إِنْتَ، مَا ضَلَامْ.
اللَّيْل يَبْقَى نُورْ مِثِلْ النَّهَارْ
وَ الضَّلَامْ مِثِلْ النُّورْ.
13 إِنْتَ بَسْ الْخَلَقْت دَاخِلِي
وَ كَوَّنْتِنِي فِي بَطُنْ أَمِّي.
14 نَشْكُرَكْ أَشَانْ خَلَقْتِنِي بِطَرِيقَةْ عَجِيبَةْ.
أَعْمَالَكْ كُلُّهُمْ يِخَوُّفُوا
وَ أَنَا نِعَجِّبْ فَوْقهُمْ مَرَّةْ وَاحِدْ.
15 مَا فِي شَيّءْ مِنْ جِسْمِي مُلَبَّدْ لَيْك
وَكِتْ سَوَّيْتنِي بِسِرّ
وَ كَوَّنْتِنِي فِي بَطُنْ أَمِّي.
16 كَنْ أَنَا أَلْمِي فِي بَطُنْ أَمِّي كُلَ،
إِنْتَ شِفْتِنِي
وَ كَتَبْت فِي كِتَابَكْ كُلِّ أَيَّامِي
قَبُلْ وَاحِدْ مِنْهُمْ مَا بِقِي.
17 يَا رَبّ! أَفْكَارَكْ مَا يِنْعَرْفُوا لَيِّ
وَ عَدَدْهُمْ كَبِيرْ زِيَادَةْ!
18 كَنْ نَحْسِبْهُمْ، هُمَّنْ كَتِيرِينْ مِنْ الرَّمْلَةْ
وَ لَا نَفْهَمْ كُلَّ أَفْكَارَكْ.
19 يَا رَبّ! نِتْمَنَّى تَكْتُلْ الْعَاصِي!
خَلِّي رُجَالْ الدَّمّ يِبَعُّدُوا مِنِّي!
20 عُدْوَانَكْ يِحَجُّوا بَيْك لِيِلآمَرَوْا
وَ يَرْفَعَوْا حِسُّهُمْ بِكِدِبْ.
21 يَا اللّٰهْ! نَكْرَهْ الْيَكْرَهَوْك
وَ نَبْغُضْ الْيِحَارُبُوكْ.
22 أَنَا نَكْرَهُّمْ آخِرْ كَرَاهِيَّةْ
وَ هُمَّنْ بِقَوْا عُدْوَانِي أَنَا كُلَ.
23 يَا رَبّ! أَكْشِفْ دَاخِلِي وَ أَعَرِفْ قَلْبِي
وَ جَرِّبْنِي وَ أَعَرِفْ هَمِّي.
24 شِيفْنِي كَنْ قَاعِدْ فِي الدَّرِبْ الْهَوَانْ
وَ قُودْنِي فِي الدَّرِبْ الْعَدِيلْ الدَّايِمْ.
