Chiʼir le Dawuud
1 Ya Ilaahi ! Ahfadni
achaan ana lajaʼt leek.
2 Ana gult le Allah :
«Inta bas Rabbi !
Ma indi kheer balaak inta !»
3 Al-saalihiin al-gaaʼidiin fi l-balad,
humman dool gawiyiin
wa ana nafrah beehum ziyaada.
4 Wa laakin al-yifattuchu rida al-ilaahaat al-aakhariin
yijiibu le nufuushum taʼab.
Ana ma nichaarik fi gaddimiin hadaayaahum hana l-damm
wa fi khachmi, ma nijiib usum ilaahaathum.
5 Ya Allah ! Inta gismi wa nasiibi wa kaas charaabi
wa inta bas tikharrir kikkeef ana niʼiich fi derbak.
6 Fi ahsan bakaan, wagaʼ gismi
wa warasati al-ligiitha samhe ziyaada.
7 Baarak Allah al-yiwassiini
wa hatta be l-leel, nafsi tizakkirni.
8 Ana daayman nigaddim Allah
wa ma nittartaʼ
achaan hu gaaʼid be zeenaayti.
9 Wa fi chaan da, galbi yafrah
wa nafsi tinbasit
wa jismi gaaʼid be amaan.
10 Achaan inta ma tikhalliini le l-moot
wa ma tiwaddiini al-khabur,
ana al-muʼmin beek.
11 Inta arraftini derib al-haya
wa giddaamak, al-farah gaaʼid be katara
wa l-niʼma gaaʼide daayme fi zeenaaytak.
شِعِرْ لِدَاوُدْ
1 يَا إِلٰـهِي! أَحْفَضْنِي
أَشَانْ أَنَا لَجَأْت لَيْك.
2 أَنَا قُلْت لِلّٰهْ:
«إِنْتَ بَسْ رَبِّي!
مَا عِنْدِي خَيْر بَلَاكْ إِنْتَ!»
3 الصَّالِحِينْ الْقَاعِدِينْ فِي الْبَلَدْ،
هُمَّنْ دَوْل قَوِيِّينْ
وَ أَنَا نَفْرَحْ بَيْهُمْ زِيَادَةْ.
4 وَ لَاكِنْ الْيِفَتُّشُوا رِضَى الْإِلٰـهَاتْ الْآخَرِينْ
يِجِيبُوا لِنُفُوسْهُمْ تَعَبْ.
أَنَا مَا نِشَارِكْ فِي قَدِّمِينْ هَدَايَاهُمْ هَنَا الدَّمّ
وَ فِي خَشْمِي، مَا نِجِيبْ أُسُمْ إِلٰـهَاتْهُمْ.
5 يَا اللّٰهْ! إِنْتَ قِسْمِي وَ نَصِيبِي وَ كَاسْ شَرَابِي
وَ إِنْتَ بَسْ تِقَرِّرْ كِكَّيْف أَنَا نِعِيشْ فِي دَرْبَكْ.
6 فِي أَحْسَنْ بَكَانْ، وَقَعْ قِسْمِي
وَ وَرَثَتِي اللِّقِيتْهَا سَمْحَةْ زِيَادَةْ.
7 بَارَكْ اللّٰهْ الْيِوَصِّينِي
وَ حَتَّى بِاللَّيْل، نَفْسِي تِذَكِّرْنِي.
8 أَنَا دَايْماً نِقَدِّمْ اللّٰهْ
وَ مَا نِتَّرْتَعْ
أَشَانْ هُو قَاعِدْ بِزَيْنَايْتِي.
9 وَ فِي شَانْ دَا، قَلْبِي يَفْرَحْ
وَ نَفْسِي تِنْبَسِطْ
وَ جِسْمِي قَاعِدْ بِأَمَانْ.
10 أَشَانْ إِنْتَ مَا تِخَلِّينِي لِلْمَوْت
وَ مَا تِوَدِّينِي الْقَبُرْ،
أَنَا الْمُؤمِنْ بَيْك.
11 إِنْتَ عَرَّفْتِنِي دَرِبْ الْحَيَاةْ
وَ قِدَّامَكْ، الْفَرَحْ قَاعِدْ بِكَتَرَةْ
وَ النِّعْمَةْ قَاعِدَةْ دَايْمَةْ فِي زَيْنَايْتَكْ.
