Salaat Dawuud
1 Ya Allah ! Sawwi al-adaala,
asmaʼ chakwiti,
asmaʼ salaati
wa da bala khachch !
2 Khalli adaalti tibiin giddaamak
wa khalaas, tichiif al-hagg.
3 Inta kachaft galbi
wa be l-leel, raakhabtini wa jarrabtini
wa laakin ma ligiit foogi cheyy fasil.
Hatta kan ana fakkart fi l-fasaala kula,
ma maragtaha min khachmi.
4 Ana chift amal al-naas
wa hasab kalaamak inta,
ana hafadt nafsi min derib al-sarraag.
5 Ana rukht be sabaat fi duruubak
wa rijileeni kula ma attartaʼo.
6 Ya Ilaah, ana naadeetak achaan turudd leyi.
Asmaʼni wa asmaʼ kalaami.
7 Bayyin rahmatak,
inta al-tinajji be iidak al-zeene
al-naas al-yaljaʼo leek min udwaanhum.
8 Ahfadni misil yahfado wald al-een
wa khuttini tihit janaaheek.
9 Baʼʼidni min al-aasiyiin al-yahjumuuni
wa min udwaan nafsi al-muhawwigiinni.
10 Guluubhum gawiyiin ma yarhamo
wa khuchuumhum yikallumu be istikbaar.
11 Dool humman al-taabʼiin khatwaati
wa hassaʼ hawwagooni
wa uyuunhum foogi le yarmuuni.
12 Humman misil al-duud al-yidoor yadrub
wa misil farkh al-duud al-kaaris.
13 Gumm, ya Allah,
haarib al-aasi wa dangir raasah !
Wa be seefak,
najjiini minnah !
14 Ya Allah, najjiini be iidak min al-insaan,
min naas al-dunya al-hagguhum fi l-haya di.
Amla butuunhum be l-jahhaztah leehum
lahaddi iyaalhum kula yachbaʼo beyah
wa yikhallu al-fadle le zurriiyithum.
15 Kan leyi ana, be adaalti nichiif wijhak
wa wakit nugumm, nachbaʼ min hadaratak.
صَلَاةْ دَاوُدْ
1 يَا اللّٰهْ! سَوِّي الْعَدَالَةْ،
أَسْمَعْ شَكْوِتِي،
أَسْمَعْ صَلَاتِي
وَ دَا بَلَا غَشّ!
2 خَلِّي عَدَالْتِي تِبِينْ قِدَّامَكْ
وَ خَلَاصْ، تِشِيفْ الْحَقّ.
3 إِنْتَ كَشَفْت قَلْبِي
وَ بِاللَّيْل، رَاقَبْتِنِي وَ جَرَّبْتِنِي
وَ لَاكِنْ مَا لِقِيتْ فَوْقِي شَيّءْ فَسِلْ.
حَتَّى كَنْ أَنَا فَكَّرْت فِي الْفَسَالَةْ كُلَ،
مَا مَرَقْتَهَا مِنْ خَشْمِي.
4 أَنَا شِفْت عَمَلْ النَّاسْ
وَ حَسَبْ كَلَامَكْ إِنْتَ،
أَنَا حَفَضْت نَفْسِي مِنْ دَرِبْ السَّرَّاقْ.
5 أَنَا رُغْت بِثَبَاتْ فِي دُرُوبَكْ
وَ رِجِلَيْنِي كُلَ مَا أَتَّرْتَعَوْا.
6 يَا إِلٰـهْ، أَنَا نَادَيْتَكْ أَشَانْ تُرُدّ لَيِّ.
أَسْمَعْنِي وَ أَسْمَعْ كَلَامِي.
7 بَيِّنْ رَحْمَتَكْ،
إِنْتَ التِّنَجِّي بِإِيدَكْ الزَّيْنَةْ
النَّاسْ الْيَلْجَأَوْا لَيْك مِنْ عُدْوَانْهُمْ.
8 أَحْفَضْنِي مِثِلْ يَحْفَضَوْا وَلْد الْعَيْن
وَ خُطِّنِي تِحِتْ جَنَاحَيْك.
9 بَعِّدْنِي مِنْ الْعَاصِيِينْ الْيَهْجُمُونِي
وَ مِنْ عُدْوَانْ نَفْسِي الْمُحَوِّقِينِّي.
10 قُلُوبْهُمْ قَوِيِّينْ مَا يَرْحَمَوْا
وَ خُشُومْهُمْ يِكَلُّمُوا بِإِسْتِكْبَارْ.
11 دَوْل هُمَّنْ التَّابْعِينْ خَطْوَاتِي
وَ هَسَّعْ حَوَّقَوْنِي
وَ عُيُونْهُمْ فَوْقِي لِيَرْمُونِي.
12 هُمَّنْ مِثِلْ الدُّودْ الْيِدَوْر يَضْرُبْ
وَ مِثِلْ فَرْخ الدُّودْ الْكَارِسْ.
13 قُمّ، يَا اللّٰهْ،
حَارِبْ الْعَاصِي وَ دَنْقِرْ رَاسَهْ!
وَ بِسَيْفَكْ،
نَجِّينِي مِنَّهْ!
14 يَا اللّٰهْ، نَجِّينِي بِإِيدَكْ مِنْ الْإِنْسَانْ،
مِنْ نَاسْ الدُّنْيَا الْحَقُّهُمْ فِي الْحَيَاةْ دِي.
أَمْلَا بُطُونْهُمْ بِالْجَهَّزْتَهْ لَيْهُمْ
لَحَدِّي عِيَالْهُمْ كُلَ يَشْبَعَوْا بَيَّهْ
وَ يِخَلُّوا الْفَضْلَةْ لِذُرِّيِّتْهُمْ.
15 كَنْ لَيِّ أَنَا، بِعَدَالْتِي نِشِيفْ وِجْهَكْ
وَ وَكِتْ نُقُمّ، نَشْبَعْ مِنْ حَضَرَتَكْ.
